nuq bop bom: 'ay''a' Soch

wa'vatlh chorgh: Qel De' lI'

vemDI' vajar[48], ghogh ghovbe'bogh Qoy. jatlh “vajar HoD, choQoylaH'a'?” mInDu' poSmoH vajar. nachDaj DungDaq vay' 'uchtaH 'ach rachwI' ngu'pu'mo', HIvbe' vajar.

jatlh vajar, “beqwIj! DujwIj!” yInroHDaj Hotlh rachwI' 'ej vay' rI'.

vajar QongDaq chol Qel 'ej ghu' QIj. jatlh “Dujrajvo' SoH, cha' beqpu' je rejolpu'. DaH tlhIngan may'Duj *veS* ropyaHDaq tlhIHtaH.”

jatlh vajar “ghutar ghopDu' DavorlaH'a'?” jatlhmeH ghopDu'Daj'e' lo'DI' HoD baS tuQbe'taH DeSDaj 'e' tu'. 'oy'taH DeS 'ach Qaplaw'.

jatlh Qel, “HIja'. lagh tochDu'Daq nItlhDu'Daq je qa'meH DIr vIlan 'ej SomrawDu' to'waQ je vIlISta'. wa'leS 'uchlaHchu' 'e' vIpIH. SoHvaD cha'logh DeS Hom rap Daghorlaw'pu'mo' vItI'meH HomlIjDaq HaqwI' mep vIlo'ta'. HoSqu' 'ej raghbe'. qaStaHvIS wej Hoghmey ghaytan loQ 'oy' DeS 'ach SIbI' Dalo'qu'laH.”

jatlh vajar, “pIvqa''a' Hota'ro' tagh?”

jatlh Qel, “DuQchu', a vor'eghchu'lI' tagh. ghaHvaD qIv Hom Qargh vItI'pu' je.”

jatlh vajar, “rIQpu''a' qIvDaj?”

jatlh Qel, “HIja'. bIjlu'pu'mo' jatlh.”[49]

qaw vajar. jatlh “teH. vIqIpta'DI' qImbe'mo' vIpup.” bIj meq lIjpu'. chay' lIjpu'? chechchoHpa' qaSlaw'. 'ungya HoHta''a'? ghobe' Heghbat ... jatlh, “qen wanI'mey vIqawHa'law'. chaq muSIgh nov HIq wItlhutlhpu'bogh.”

ba'choH Qel. jatlh “rejolDI' Suchechba'. bIvulchoH qaHotlhtaHvIS. 'a qay'be' HIq. 'IwrajDaq vI'taH tar pIm.”[141]

jatlh vajar, “Hota'ro' SIghpu'. tlhoS Hegh.”

jatlh Qel, “jaS Hoch SIgh. chaq qaStaHvIS jaj puS SuwuqHa'taH pagh Qu'mey nap bota'Ha'pu', pagh wanI'mey bolIjtaH, pagh SuvIDchoH. HoSghaj tarvetlh. SuDo'.”

Qub vajar. HoSghajbej taSvetlh 'ej Qobbej. qa'meH lu'oghnIS tejpu'. jatlh “mapIvchoH'a'?”

jatlh Qel, “HIja'. tlhIHvaD tar HIq je vIteqchu'. ru' QIH.” taDaj laD Qel. vay' jatlh 'a QoylaHbe' vajar.

jatlh vajar, “nuqjatlh?”

mon Qel. jatlh “lujchoHlI' teSDu'lIj. ghaytan rut wabmey tam, be' ghoghmey ghap DaQoylaHbe', qar'a'? 'arghtaH. naDev vItI'laHbe' 'ach tlhIngan yuQ DaSuchDI' lutI'laH.” yay'taHvIS vajar latlh De' chel Qel. jatlh “meHDaq Sogh lom vInuDpu'. Heghbat tay vIghov. tlhIbHa' mIw. DaHjaj, qaSpa' tayvetlh, reSampu'chugh, vItoDlaHbe'pu'. batlh HeghDaj ta'lu'. chaq SoHvaD lI' Sov.” tlheD Qel.

wa'vatlh Hut: HoD luSov

Hu'DI' vajar. lulegh Hota'ro' ghutar je 'ej pongDaj lujach. pIvmo' 'ej tay'mo' beq Quchchu' HoD. chol. ghutar 'uch 'ej cha'logh paw'qu'. "SuvwI'!" jatlh. ghop DIr chu' nuD. Hota'ro' volchaH 'uch 'ej paw'qu'meH tlhe'. pe'vIl qIpchuqtaHvIS QuchDu'chaj vajar qIp Hota'ro' jIb. bI' 'ej "SuvwI'," jatlhqa'. ravDaq HeghtaHvIS SuvwI'vam bejnISbe'mo' Quchqu' HoD.

jatlh ghutar, "nuHmaj vIghaj. nujolDI' yaH." nuHmey nobHa'choH ghutar. "HoD," jatlh, "qatlh pu'HIch Daqeng? DIvI' nuH 'oHbe''a'?"

nuH tlhap vajar 'ej much. jatlh "chong, qar'a'? may'meymo' rut pu' DIjon. lI' 'e' vItu'. mach 'ej qaStaHvIS poH nI' HujtaH je. boSwI' chovnatlhvam [58] vIje'ta'. vIparHa'. "

nuD ghutar. jatlh "nov, 'ach jagh HoHchugh jIbepbe' jIH. DaH HoS 'aplo'mey vISuqnIS."[143]

mejpu'DI' ghutar, jatlh Hota'ro', "qen DutoD chamvetlh nov."

jatlh vajar, "Do'Ha' qaStaHvIS may' muchaghmoHmo' jagh, lo'meH 'eb vIghajbe'."

jatlh Hota'ro', "wej wen vIqel. choHIvDI' muHub SuvwI' DujwIj neH. nISwI' 'oHpu'chugh qaHoHta'. 'ach not pu'HIch nov vIHotpu'mo' chu'wI' vIngu'meH jIyevnIS. pu'HIch DamaSmo' jIbel."

chegh ghutar 'ej tamchoH Hota'ro'. SIv vajar. qatlh pay' qechDaj Delqang Hota'ro'? HoD HoHruppu' chIDDI' SuD. 'ach voqqangmo' bel vajar.

vajar qechmey qagh HaSta. 'oHvo' jatlhtaH be'. *veS* ra'wI' ghaHba'. may'Duj meHDaq ra'wI' quSDaq ba'taH. HIp tuQtaH. nuHmey law' qeng. ror 'ej qu'. ghaH qan law' vajar qan rap. DujDaj parmaqqay ghaj 'e' SIv vajar. ja' be' "tlhIngan SuvwI'pu' DItoDpu'bogh vorta' ropyaH beqma'. tlharghDujchaj chovlI' jonwI'pu'ma'. wa'leS gharben cha'[117] wISuch. leSpoH DIb bajta'bogh beqpu''e', poH tetlhDaq pechel'egh! wo' wItoy'!"

"be'vetlh vIghov" jatlh ghutar. "pong vISovbe' 'a tengchaHDaq wa'logh vIleghpu'."

jatlh Hota'ro'. "qImyal Sa' ghaH."

"'Iv ghaH?" jatlh vajar. "qImyal Sa' vIghov net pIH'a'?"

jatlh Hota'ro', "tlhIngan may'Duj HoD'e' ghaH HoSghaj law' Hoch HoSghaj puS. tugh tlhIngan yejquv muv net pIH."

"wo' woQ Qujmey vIbuSHa'chu', 'a chaq pong vIghov." jatlh vajar.

"Daghov 'e' vIpIH," jatlh Hota'ro'. "QI' tawIjDaq DalaD. chorgh wen may'DujvamDaq jItoy'taH." Quchbe'law'.

wa'vatlh wa'maH: not majegh

vajar chol lagh. jatlh “vajar HoD, Dujatlh neH ra'wI'.” HIpDaj lam lISta' vajar 'ej lagh tlha'. chobmey tIq lughoS, meHDaq DortaHvIS lagh. Hurgh meH 'ej pa' vum nuv law'. SuchwI' lubejbe' HochHom 'ach lubejqu' 'avwI'pu'. 'avwI'pu' bejtaH je latlh 'avwI'pu'. quSDaq ba'taH ra'wI'. van lagh 'ej jatlh “qImyal Sa'! vajar HoD vIlIH.” van je vajar.

vajar nuD qImyal mInDu' ghIq jatlh Sa', “vajar HoD, DujlIj QonoS vIghaj 'ej DujlIj luchovta' jonwI'ma'. HIja'. DujlIjDaq qaSpu' nuq jay'?”

jatlh vajar, “qImyal Sa', jorpu'mo' nIH HanDogh luj HochHom Duj patmey. nuHIvta' je weHwI'pu'. batlh Heghpu' jonwI'ma', yaS wa'DIchwI' je 'ej rIQchoH latlhpu'. nIjtaHmo' bIrmoHmeH taS SuQchoH muD. not majegh. Dunmo' wo' chetoDpu'neS.”

jatlh Sa', “Sotlaw'Hey wIHev. DalI''a'?”

jatlh vajar, “Sot tlhIngan wo' Duj jogh naQvaD 'e' vImaq vIneHbe'mo' vIlI'be'. qeng nov.”

jatlh Sa' “bombogh nov ghaH. nuq bop bomvetlh?” bejqu'mo' Sa', Mahoun bItmoH 'ach jangchu' 'e' nID.

jatlh vajar, “jISovbe'. Sotlaw'vaD vIje' neH.”

jatlh Sa', “nov Daghov'a'?”

jatlh vajar, “vIghovlaw' 'ach mut vIngu'laHbe'.”

jatlh Sa', “jonwI'lI' yIchov.”

jatlh vajar, “vumqu' 'ej nom vanglaw'. jatlhtaHvIS pIj vIyajbe' 'ach jeQ. Do'Ha' pIj 'ay'mey 'ut SuqlaHbe'mo' Qapchu'be' Duj.”

jatlh Sa', “Dutoy' qu'wI'HomwI', Hota'ro' 'e' vItu'.”

jatlh vajar, “'orwI' po' ghaH, 'a loQ ... Qatlh.”

jatlh Sa', “vISov. mutoy'taHvIS rut po'mo' naDlu' 'ach tojwI' 'ong ghaH. nuvpu' SIghmeH nep 'ej Qaq. lobtaHmeH rut DabIjqu'nIS. rap bangDaj. QuS. tIvoqQo'.”

quSDajDaq vIH Sa' 'ej jeqqIj, nISwI' je lIS. Qub vajar. tojpu' pagh neppu' Hota'ro' 'e' tu'be'. yepnIS.

jangpa' vajar, jatlh Sa', “vay' Dapegh'a'? vay' DaSovbogh nop'a' QonoSlIj?”

SIbI' jatlh vajar “pagh vInoppu', Sa'.” QonoSDajmo' Hem vajar.

QumwI' Hot Sa'. jang jonwI'. jatlh Sa', “tlharghDuj bolaghchoHta''a'?”

jatlh jonwI', “wej, ra'wI', DaH mIw wIwuqlI'.”

jatlh Sa', “maj. vIra'pa' yItaghQo'.”

vajarvaD jatlhqa' Sa', “jonpIn ghaH. QIH'a'mo', Duj tI'meH Qatlh Qu'. 'ay'mey lI' neH DIpol net maS.” luHDaj 'uchtaHvIS 'ungya, rurbogh 'oy' SIQtaH 'e' Qub vajar. 'oy' 'ang'a' qabDaj? vajar bejqu'taH Sa'. jatlhrupDI' vajar ghop pep Sa'. jatlh “yIjot'eghmoH, HoD. HoD jIH je. le' Dujoymeymaj[76], qar'a'? loghDaq raghtaHchugh *Dugh* vIpay.[82] QIt vang loH. ghaytan latlh Duj DaHevpa' vagh DIS DaloSnIS 'e' DaSov.” Sov vajar. Duj chu' SuqmeH HoD vay' potlh SovnIS pagh HoHnIS.

wa'vatlh wa'maH wa': tlhIngan maH

Sa'vaD Duq qem lagh. SeHlawDaq lanDI' toqvIr lung QImmey ngaS 'e' legh. DuqDaq ghop lan Sa' ghIq nujDaq QImmey ghoD. ngechDajDaj ravDaq je pum puS. bejtaHvIS vajar, qaStaHvIS cha' jarmey Duj Soj QaD neH Soppu' 'e' tlhoj. qIm 'e' nID.

jatlh Sa', “*Dugh* 'ay'mey DIHIj 'e' pIH Qo'noS wo' vergh'a', 'ach Sa' jIH. Duj naQ vIHIj vIneHchugh DIbvetlh vIghaj. Duj quv tI' tlhIngan wo' 'e' vIchupchugh, lutI'.”

tlhoS tlhuHbe' vajar. qaStaHvIS loSmaH loS DIS tlhIngan QI' toy'ta' 'ej not DujDajvaD munta' Sa'.

jatlhtaH Sa', “wo' vItoy'. wo' wIvmey vISIghqu'pa' meq vISovnIS. chaq tlhIngan wo'vaD De' potlhqu' DaSuqta'chugh, pagh maghwI''a' Dangu'laHchugh, pagh yejquvvaD Qu' pegh Data'ta'chugh. chaq pegh'a'mo' pop DaHevbe'pu' ... choyaj'a', vajar HoD?”

jatlh vajar, “qayaj, qImyal Sa'. choquvmoHneS. wo' vItoy'.” Dunbogh Qu'mey law' ta'ta'. toy'chu'ta' 'ej tagha' pop Hevrup. Hemqu'choH. yabDajDaq Sa'vaD Qu'mey le' yIrchoH.

pe'vIl jatlh Sa', “tlhIngan maH!”

ja' Hoch Qoybogh beq, “tlhIngan maH!” jeS je vajar.

ta'meyDaj potlh perchoHDI' vajar jatlh Sa', “naDev DIqelbe'. tugh maghomqa'. DaH: ghaytan wo' ngoch DaSov. wo' vergh'a'Daq qaStaHvIS wa' jar ratlhnISchugh Duj, tI'taHvIS leH vu'laH HoD 'ach luloS latlh beq net tuch. Duj lajpa' vergh'a' QaynIS.”

jatlh vajar, “bIlugh Sa'. ngochvetlh vISovbej. 'oHmo' motlh wo' vergh'a' vIlo'be'. matI''egh. Do'Ha' vagh wen Qapbe'choH So'wI'maj 'ej QI' pegh 'oHmo' 'ay' 'ut' jomlu'meH wo' vergh'a' wIghoSnIS. pa' jonwI' chu' vISuq 'ach 'ay' 'ut lungeHbe'taH. beq chu' vIpoQDI' jIloSqu'nIS.”

jatlh qImyal, “chut DajunmeH, DujwIjDaq beqlIj vIQayqang.” De'wI'Hom much Sa' 'ej jatlh “naDev yISen. Qaypu'DI' vergh'a' vIjatlh.”

jatlh vajar, “matlh beqwIj. vIQaypa' vIjatlh.”

jatlh qImyal Sa', “wIvlIj 'oHba' HoD. beqlIj matlh DapolmeH latlh mIw DaSovchugh yIlo'qu'.” QImmey Sopqa' Sa' 'ej DeghwI' ra'choH. rIn qep 'e' tlhoj vajar.

wa'vatlh wa'maH cha': SuchwI' chaw'

meHvo' vajar Dor lagh. vajar buQbe'pu' qImyal Sa'. ra'be'pu', mupbe'pu' 'ach bItmoH. vangchu'be'chugh yaH Duj pagh yaH beq. ngo' Duj 'ach veQ 'oHbe'bej. chobDaq jatlh lagh. “nuq 'oH ghochlIj'e', HoD?”

jot'eghmoHpu'DI', laghvaD jatlh “DujwIj lulaghlI'bogh jonwI'pu'Daq HIqem.”

“lu',” jatlh lagh 'ej chobmeyDaq vajar Dev. veng rur may'Duj. chobmeyDaq vaghmaH loS nuv juS vajar DorwI' je. loSlogh mevmoH 'avwI'pu' 'ej ngu''eghnIS. SuchwI' chaw' ghajbe'mo' vajar, pIH 'avwI'pu' 'ach jatlh lagh, “ngeH qImyal Sa'.” ghIq ghoS 'e' luchaw'. jonwI' choQ lucholDI' yapbe'choH DorwI' chaw'. jonwI' choQ 'el vajar net tuch 'ej mejpa' SuchwI' chaw' Suq 'e' luqap. naDev loSnIS, chaw' qemtaHvIS vay'. jatlh Dorbogh lagh “jIloS neHbe' Sa'. HoD DornIS latlh 'avwI'.” ghIq mej.

chaw' loStaHvIS vajar. Hota'ro' legh. pongDaj jatlh, 'a tlhe''eghDI' jatlh, “nuqjatlh?” Hota'ro' ghaHbe'. yItDI' rap 'ej rap DaQDaj 'ach *veS* Sogh ghaH. 'IH.

QIj vajar, jatlh “DeghwI'wI' Darur.”

jatlh be', “toH Hota'ro' ra'wI' SoH, vajar HoD, qar'a'?” lIH'egh be'. qaH'eng[59] ghaH pongDaj'e'. *veS* jonpIn cha'DIch ghaH. “qatlh naDev SoHtaH, HoD?” jatlh. QIjDI' vajar, 'avwI'vaD jatlh, “vIngoy'. chaw'Daj DaHevta'DI' HIrI'.” Sogh tlha' vajar. 'op chobmey luveghpu'DI' lojmIt poSmoH.

pa'Daq raS tIq tu'lu'. raS DungDaq tIHmey luHotlhlu'taHmo' chenlaw' Duj ngeb. vagh 'uj Saw', wa'maH vagh 'uj 'ab, 'ej jav 'uj juch HanDogh joj. SaH loS nuv. raSDaq QamtaH be' mach. rewbe' Sut tuQtaH. vajar lIH Sogh. *veS* jonpIn ghaH be' mach'e'. ngaH ponglu'. baS buSbogh loD ghaH latlh Sogh'e'. Qoreq ponglu'. SaH je cha' ne'pu' 'ach lIHbe'. woch wa'. ror latlh. chaq SomrawDu' neH ghaq. raSDaq HanDogh laghmeH mIwmey wIvmeH ghoHlaw' ngaH Qoreq je. jatlhtaHvIS lagh'eghlaw' Duj ngeb 'ej 'ay'mey qel jonwI'pu'. Doj pojmeH patchaj. Duj naQ rartaHmo' patmey yepnIS laghwI'. qay'qu'law' peQchem lIngwI' ngaDmoHwI'. pIvghor luchu'Ha'laHchu'pa' peQchem lungaDnISmoH. Hoch tlhach mu'meychaj yajbe' HoD 'ej lughlaw' Qel: Hoch be' mu'mey QoylaHbe'. Qu'chaj lubuSbogh jonwI' 'Il'e' ghov. Hagh 'ej vaqchuq 'ej mIwmey DeltaHvIS Qutqu'.[53]

wa'vatlh wa'maH wej: wIvmey

*Dugh* luqeltaHvIS jonwI' 'Ij motlh 'e' tIv HoD 'ach DaH *Dugh* Heghbat lunab. qaStaHvIS may' law' vajar QantaH *Dugh*. potlh qaw. buSchuqmo' latlh jonwI'pu' qaH'eng ja', "pe'meH Sechmey bolo'choHpa' SaghuHnISmoH: muDvaD cha'maH Hut vatlhvI' yInSIp wIvlu'."

jatlh qaH'eng, "qul DaneHpu''a', HoD?" naDbe'ba'.

jatlh vajar, "tar vIqIl 'e' vInID. ropqu'pu' DeghwI'wI'."

choH qaH'eng qab. lajlaw'. jatlh, "beq DaQorghmeH bISuD." vajar parHa'law'.

Qoypu' jonpIn 'ej jatlh, "latlh chachmey Danabpu''a'?"

jatlh vajar, "ghobe'. wo' wIvmey vIqaDbe'. qatlh tI'be' net wuq? tI'laHbe''a' vay'?"

jatlh jonpIn. "wItI'laHbej. wItI'choHlI'. wo' verghDaq HanDogh tI'nISlu' 'ej bIQ pat, 'ul pat je lujomnISqa'lu'. *Dugh* naQ ma'laHbe'mo' lupDuj choQmaj, loQ Duj wIlaghnIS. latlh HanDogh wIchevnISba' 'a ghaytan meH wIchevnIS je."

qagh baS po'wI'. jatlh "maw' ghaH. yIqImQo'. mIch loSDaq Duj wIwav."

jatlh jonpIn, "Duj wIlaghtaHvIS wIQIHqu'bejchugh vaj laghHa'qa'meH Qu' wIQatlhmoH." vajar qab leghmo' yev. "vay' Dayajbe''a', HoD?" jatlh.

"Duj bowoDmeH bolagh 'e' vIQub. muja'law' Sa'," jatlh vajar.[118]

"jonwI' ghaHbe' Sa''e'," jatlh jonpIn. "yIQuch'eghmoH. DujlIj wIQorgh. Seng SIQbejpu' 'ach Subbej." Sa' lumISmoHlaw'pu' jonwI'pu' tlhach mu'mey. maj. DaH Duj polmeH 'utbe' woQDaj.

"HoD, DaH wIghoS DaneH'a'?" jatlh ne' ror.

"'utbe'," jatlh vajar.

"latlh HoD vIjatlh, qaH," jatlh ne'.

"patlhwIj 'oH je HoD'e'," jatlh jonpIn. ne'pu'vaD jatlh, "HIja'. Hoch bIrmoHmeH taS yIteq. ngaSwI'mey tIchImmoH; rav tISay'moH; Som Hurvo' chuch yItet qoj yItey. Qu' bota'ta'DI' DujvetlhDaq bIrmoHmeH taS vItu'chugh, boSop."

"lu', HoD!" jatlh ne'pu' ghIq mej.

wa'vatlh wa'maH loS: ngoy' HoD

“DopDaq qul yIchenmoH QobDI' ghu',” jatlh vajar. “la' jIH.”[54] raSDaq QamtaHvIS, jonpIn run law' vajar run puS 'ach nIv patlhDaj. vuvHa' neHbe'qu'. vajar mu'mey qImHa'. maj. jatlh, “HoD, chay' mIch wej 'el bIrmoHmeH taS? 'oHmo' tlhoS Hegh DeghwI'ma' 'a vIQIjlaHbe'. Dejpa' Som 'uymo' muD 'ellaH pagh, 'ach Dejpu'DI' Som ngaQtaH lojmIt wej.”

jatlh jonpIn “Qeb 'ochvo' nIj. ghaytan jorDI' HanDogh, Qeb 'och ghor yu'egh, 'a QIt nIjtaH.”

jatlh vajar, “vaj SuQ muD qatlh 'e' nughuHmoHbe'taH noch? puSqu'taH tar 'e' wIHar. motlh pagh tu'taH noch.”

jatlh jonpIn "noch SoDmo' Qaw'. 'Iqchugh taS ja'laHbe'. Do'Ha' patrajDaq cha' Segh bIrmoHmeH taS luDuDlu'pu'mo' SuQqu'.”

jatlh vajar, “reH SIp SuQ tlhuD bIrmoHmeH taS.”

jatlh jonpIn “bImuj. SuQqu'be' DaHjaj bIrmoHmeH taS. Datlhutlh 'e' vIchupbe' 'ach cha'maH ben taS rurbe'qu'.[50] reH Segh qar Dalo'nIS. ngaSwI'meyDaq Segh mI' yIper 'ej qarwI' yIlo'!”

jatlh vajar, “taS chellu'taHvIS motlh jISaHbe'pu'. roD Qu'vetlh ta' jonwI'ma'.”

jatlh jonpIn, “DujrajDaq toy''a' jonwI''e'? ropyaHDaq ghaH'a'? vIjatlhnIS.”

jatlh vajar, “Do'Ha' jorDI' HanDogh, Hegh. tameyDaj DavoqnIS.”

jatlh jonpIn, “qaStaHvIS vagh jarmey SuSottaH'a'?”

“ghobe',” jatlh vajar, “qaStaHvIS wa'maH wa' jaj neH maloStaH. 'a vagh jar rur.”

jatlh jonpIn, “qaStaHvIS vagh jarmey jonwI' QonoSrajDaq pagh ghItlhlu'. qaH'eng, yIleghmoH.”

vagh wen Hegh ghIrel nubwI'. ghIq *Dugh*Daq ghIrel Sogh Qaypu' QI' 'ej may' QIH tI'pu'. not QonoS leHpu''a'? taS muj chelpu''a'? vajar QeHmoH jonwI' tlhIblaw'ghach. De'wI'Daq QonoS chIm cha' qaH'eng Sogh. So'wI' Duy' bop ta Qav. pagh ta'pu''a' ghIrel? ghaHmo' Heghpu''a' 'ungya? Qumqangqu'be' ghIrel 'e' qaw HoD 'ach mobtaH 'e' lumaS jonwI'pu' law'. pIj nuvpu' parHa'be'law' 'ej cham lumaS. ghIrel naDpu' nungbogh ra'wI'. tlharghDujvaD 'um. maghwI'!

wa'vatlh wa'maH vagh: butlh

chen vajar ro'Du' 'e' legh qaH'eng. jatlh, "vajar HoD, pIch Daghajbe'. jonwI' jIH. jonwI' voqnISlaH ra'wI'. DaH Qu'vamvaD nuvoqtaHmo' ra'wI'ma', mavumnIS. Ha'." vajar DevmeH volchaHDaj 'uchchoH. HoS.

mejtaHvIS jatlh vajar, "HoD, Soghpu', *Dugh* botI'lI'mo' tuquvmoH."

Hung yaHDaq vajar DortaHvIS qaH'eng luch chuS retlhDaq yev. jatlh, "vajar HoD, Hov ghajbe'bogh ram rur pegh ghajbe'bogh jaj. DujrajDaq SaHchugh vay' ... pegh, vIta'qang." QoylaHchu'be'mo' vajar cha'logh jatlhnIS 'ej DIch ghajbe'taH vajar. ta'qang? peghmey tu'lu'chugh chay' ta'laH vay'? <tI'qang?> QoyHa'law. jatlh vajar, "qaH'eng Sogh, *Dugh* So'wI' DatI'laHchugh choQuchqu'moH."

jatlh qaH'eng, "naDev majatlhlaH, HoD. HIvoq." vay' pIHlaw'. 'a vumnIS ja'pu'.

jatlh vajar, "qavoq, Sogh. mInDu'lIjmo' vIleghlaH. Hoch luch Danaw' net chaw'. not mev peghmey. may'Dujvam Dun Datoy'be'taHchugh, DaH Dutoy'meH qaponlI'." Sagh mu'mey jatlhpu'bogh, 'ach jaS yajqangchugh be', vangrup je vajar.

yajqu'law' qaH'eng 'ach pagh jatlh. yItqa' 'ej tugh Hung yaH lupaw. jatlh "bIquv, vajar HoD. wa'maH Hutvatlh rep 'et tachDaq chaq qaleghqa'." ghIq mej.

chaw' lunob 'avwI'pu'. 'oHDaq <DornISlu'> ghItlhlu'. "Dat vIDornISlu''a'?" jatlh vajar.

"QongmeH pa', puchpa' je jojDaq 'utbe' DorwI' 'ach chaw' Dacha'nIStaH," jatlh. Sagh. chaw'Daq QongmeH pa'Daj perlu'.

jatlh vajar, "DaH mI'meH pa' vIghoS vIneH." Dev 'avwI' Qup. lupawDI' pa'Daq vajar mobmoH. qaStaHvIS rep yoq rurbogh ngogh'e' muptaH 'ej puptaH vajar. Do qeq 'ej HoS qeq 'ej Qeqchu'meH qeq. ghIrel 'oHpu'chugh ngogh'e' wa'vatlhlogh HoH. chIch *Dugh* Sorghta''a'? tlhIb'a'? Sa'vaD yap'a' *Dugh* quv? cha' beqpu' Qup neH'a'? wo' toy'qangchu' vajar. tlhobpu'chugh Sa' SIbI' wo'vaD Qu' nIDqang. not Hota'ro' yaj 'ach QuSbej'a'? ngogh qIp vajar 'ej qIpqa'. lugh Qel. 'oy' nIH DeS 'ach Qapchu'.

baS 'ay'mey 'ugh pepchoH vajar. SIla'Daq legh'eghlaH. DIrDaj HIpDaj je nguv 'Iw 'e' tlhoj. nIH DeS Say'moHlaw'pu' Qel, Hom tI'taHvIS 'a poSwI'Daq qabDaq rolDaq je 'ungya 'Iw tu'lu'taH. ghaytan Soj 'oH 'e' luHarmo' latlhpu' buSHa'. *Dugh*Daq Ha'DIbaH ghoQ tu'lu'be'pu'mo' jagh 'Iw, jup 'Iw ghap 'oH Hoch 'Iw'e' leghlaHbogh 'e' Sov. 'Iw SuD leghlaH; SaHbej Hota'ro' 'Iw 'ej ghaytan SaH je ghutar 'Iw. butlh nuD. butlh ghajbogh nuv'e' yIHo' net jatlh. DaH nuvpu''e' 'oSbogh butlhvetlh vuv vajar. Qu' potlh noppu' 'e' tlhoj. baS 'ugh roQ 'ej lojmIt poSmoH. SaH 'avwI'. jatlh vajar, "jabbI'ID potlh vIlabnIS. mIDvaD vIlI' vIneH. DuH'a'?"

wa'vatlh wa'maH jav: jabbI'ID

“HIja',” SIbI' jatlh 'avwI'. “HItlhej.” pa'HomDaq Dev 'avwI'. pa' QumwI' cham tu'lu'. jatlh 'avwI', “naDev QInlIj yIqon. ngoq Dalo' net chaw'. DalabrupDI' qawHaqDaq yIpol 'ej Quv yIqon. tugh lI' QumpIn. vay' pav DalabnIS 'e' pIH ra'wI'ma'. chobDaq qaloSlI'.” mej 'avwI'. vay' pav lab vajar 'e' loSmo' qImyal Sa' Dajqu' ghu'. 'avwI' ghuHmoHta' je! qImyalvaD jatlhDI' vajar pagh pegh, nepbe' 'a pegh pIHlaw'taH qImyal.

jIH tlhopDaq ba'choH vajar 'ej jatlh'eghrupmoH. qonwI' chu'. jatlhchoH. 'ungya tennuSvaD *Dugh* Qugh DelchoH. HanDogh, weHwI'pu', 'ungya ta' je DeltaH. yoHmo' 'ungya *Dugh* toDta' 'a 'ungya lutoDlaHbe'. 'ungya Heghbat DelchoHDI' taj much vajar 'ej tlhay cha'. HeghDaj batlh 'olpu' Qel je. cheghlaHbe'mo' tey' 'e' pay vajar. HemlaHbej qorDu'Daj 'a ghaytan 'IQ je. taj SeQ ngeH 'e' lay' vajar. Duj Dotlh DelmeH jatlh, “*Dugh* lutI' wo' jonwI'pu' 'e' vItul.” vanmeH jatlh “wo' wItoy'.” mu'tlheghvetlh maSlaw' qImyal vaj jabbI'ID jIHDI' chaq belmoH. pagh ngoq lo'. Heghvetlh HemlaH wo' naQ. HoD 'utlh Quv qonDI' vajar, pa' mej. loSlI'bogh 'avwI'vaD jatlh, “pItlh.”

Sojpa'Daq vajar Dor 'avwI'. tInqu' pa' 'ej chuSqu'. pa' cha'vatlh tlhInganpu' lutu'lu' 'ej nay'na' SoptaH. ngopDaq Ha'DIbaH ghoQqu', qagh, pIpyuS pach je leghlaH 'ej qeyvaq Ha'DIbaH larghlaH. pa'Daq cha'maH cha' raS tIq lutu'lu' 'ej Hoch raSDaq ba'taH HIp tuQtaHbogh tlhIngan SuvwI'pu'. Soj SuqmeH jengva' woH 'ej tebwI'pu' chol. Qaj tlhuQ, qagh, ghab 'ay' je tlhap vajar. ghab ngu'laHchu'be' 'ach 'oHDaq ratlhmo' ghISDenHey ghaytan lung Segh 'oH. 'oHDaq chanDoq lIch tebwI'. jengva' buy' qengtaHvIS, Hota'ro' pong Qoy. pa' 'elpu' Hota'ro'. DujvamDaq toy'pu'mo' lughov 'op nuv. luparHa'law'. paw' 'op. “Dujvetlh chu' DaparHa''a'?” jatlh vay'. jang Hota'ro' 'ach QoylaHbe' vajar.

wa'vatlh wa'maH Soch: 'uQ

ba'choH vajar. qagh SopchoH. jatDaq noghtaHvIS qagh Dunqu' 'ej Ho'Du' jojDaq HoHDI' 'eyqu'. pup ghevI': tlhorgh 'ej jeD. gharghmey Sopchu'pu'DI' ghevI' 'ep je. ghun Ha'DIbaH 'ej DuQchu' Qaj tlhuQ. tugh vajar tlhej Hota'ro'. Soj QaQ SoptaH 'e' tIvba' je. QI' HIp yIvbeH tuQtaH. mongDechDaq *veS* Degh, Sogh Degh je lucha'lu'. bejtaH HoD 'e' tu'DI' yev. jatlh, "nuq?"

jatlh vajar, "HIplIj vIlegh."

jatlh Hota'ro', "yIvbeHvam munojta' parmaqqaywI'. *veS* beq vImuvqa'be'pu'. *Dugh* vItoy'. 'ach Sogh jIHlaw'." SuchwI' chaw'Daj much Hota'ro'. jatlh "QI' tawIjDaq Sogh jIH qonlu' net ja'. Qagh DaqarnISmoH, HoD."

Heghlaw'taHvIS be' numpu' vajar. qorDu'vaD Hoch Huch bajbogh ngeHtaH Hota'ro'. Sogh ghaHchugh, HeghDI', Huch Hev qorDu'. vuppu' 'e' chID neHbe'mo' jatlh vajar, "jIchechtaHvIS bong qanumpu'." pop bajbe'law'pubogh Hevmo' Quchbe' Hota'ro' 'e' legh vajar. jatlh, "chaq lI'. DabajmeH yIvum."

ghutar ghogh luQoy. SopwI'pa' lu'el ghutar, negh law' je 'ej Quchlaw' Hoch. chechbe' 'ach Sey 'ej jatlhqu'. ghutarvaD jatlh luneHlaw'. HoD leghDI' ghutar, van, tebwI' yaH ghoStaHvIS ghom.

Hota'ro'vaD jatlh vajar, "chay' naDev law' ghutar juppu'?"

jatlh Hota'ro', "ghaytan DaHjaH neH luqIH. ghutar laH Datu'ta'be''a'? DutlhejtaHvIS ghutar bIquvqu' 'ej bIpotlh 'ej potlh je tuqlIj naQ 'e' DaHarlaH, qar'a'? tlhoS loDHom ghaH 'ach SaHtaHvIS bIquv 'e' Datob DaneH. batlh vang Hoch 'e' Harqu'mo', nuvpu' pIlmoH. SaHtaHvIS tlhoS batlhHa' vanglaHbe' vay'."

Qub vajar. reH vuvqu' ghutar 'ej HoD quvmoH 'ach laH le' 'oH'a'? ghutar qIHpu', loH qach 'avtaH. mu'mey puS jatlhpu' ghutar 'ach SIbI' mang parHa'pu'. quvba' 'ej toy'qang. ghutarvaD jatlhpu' vajar, "tlharghDujDaq bItoy' DaneHchugh *Dugh*Daq yIQay. ponglIj vIleghDI' qalaj." lughlaw' Hota'ro'.

chuSqu'choH SopwI'pa'. QamchoH 'op nuv 'ej qevchuqtaH. ghutar pong Qoyqa'. raSDaq QamchoH loD 'ej jachchoH. QoymeH tamchoH pa'. jatlh, "ghutar, yurIH puqloD, wa' rep pIq naDev qaSuv! betleHlIj yIqem!" SeychoH qev.

wa'vatlh wa'maH chorgh: ghIqtal

latlh raSDaq Sup ghutar, jatlh “wot'av, torgh puqloD! batlh qelDI' tlhIngan, lumbe'. Do'Ha' DaHjaj betleHwIj'e' vInaw'laHbe'. wa' munojqangchugh vay', SIbI' maHay'. chuSqu'choH SopwI'pa'. qevDaq chen gho chIm 'ej 'oHDaq QamtaH ghutar, wot'avHey [78] je. nISwI', tajmey je ghaj 'ach quv bopmo' betleHmey loS. tugh wot'av betleH qem maqoch. jIrmoH, ghutar buQtaHvIS, 'ach HIvbe'ba'. ghutarvaD betleH much vay'. Hemqu'choH nojwI' jatlhDI' ghutar 'ej tlhapDI'.

vanchuqta'DI' Hay'choH. QamchoHDI' HochHom bejwI'pu', ghobwI'pu' leghchu'be' vajar. rut qev DungDaq 'etlhmey boch leghlaH 'ej lul 'e' QoylaH. <'Iw!> jatlh qev.

raSDaq Sup Hota'ro'. “rIQ ghutar, jatlh. “betleH roQchoH.

jatlh vay', “ghIqtal! jachchoH qev. “ghIqtal! ghIqtal! raSDaq Sup vajar 'ej ghutar legh, betleH pepqa'taHvIS. pa' lu'ellI' 'op Hung yaS 'ach nISbe'.

jop ghutar. betleH yanqu'. may' wabmey tIQ luQoylu'. 'etlh qIp 'etlh. yoD qIp 'etlh. tlhuHqu' SuvwI'pu'. jach bejwI'pu'. pay' nom vIHqu' 'etlh. jachqu' qev ghIq tamchoH. pum porgh, betleH, latlh Doch je. ravDaq lengtaH wa' Doch, DIngtaHvIS. tlhIngan nach 'oH. nach jIb 'uchchoH vay' 'ej pep. “Qachchu'! jatlh. nach muchtaHvIS tlhe'moH. ghutar nach 'oH'a'?

ba'choHpu'mo' 'op bejwI'pu' ghutar leghqa'laH. QamtaH. betleH nobHa'. qabDaj So' 'Iw 'ach Say'moHmeH tlhay lo'. ghol 'Iw 'oHlaw' neH. chol Hung yaSpu'. ghutar volchaHDaq ghop lan wa'. 'ombe' ghutar. DochHa'law' jawtaHvIS. luDortaHvIS chev'egh qev. “ghutar! ghutar! ghutar!” lubom[79] ghogh law'. ghutar lunaD.

vajar DujDaq batlh Hay'chugh cha' mangpu' nISbe' HoD. SuvtaHvIS nISbe'pu'mo' Hung yaSpu' naDev Seng pIHbe' vajar. juStaHvIS ghutar, van.

Hota'ro'vaD jatlh vajar “nuqDaq QIDlu'? vIleghbe'pu'.

jatlh Hota'ro', “nach DopDaq rIQ. So' jIbDaj.

jatlh vajar, Dujvam DaSov. 'ungya vavvaD QIn vIlI'ta'. jangpu'chugh chay' naDev QIn vIHev?

jatlh Hota'ro', De'wI' pa' DaghoSnIS, qaH. SuchwI' chaw'lIjmo' Dughov De'wI'. SoHvaD QIn tu'lu'chugh Duja'.

Dorqangbogh 'avwI' nejmeH Qam vajar. SopwI'pa' lojmItDaq 'avwI' chol. jatlh “De'wI'pa'Daq DorwI' wIpoQ.

“lu' qaH, jatlh 'avwI' 'ej vay' rI'. chobDaq loS vajar. 'avwI' retlhDaq QamchoH. tugh paw wochbogh 'avwI' tIn. SopwI'pa'vaD jatlh vajar, “Ha'! Hota'ro', HItlhej!

wa'vatlh wa'maH Hut: ghelbe' HoD

chol Hota'ro'. merchuqba' loD Hota'ro' je. Haw'ruplaw' 'ej HoHchuqruplaw' je. latlh may' pIH vajar. Qamqu' loD 'ej Hota'ro' mInDu' buS. jatlh “reH latlh qabDaq qul tuj law' Hoch tuj puS.” 'IltaH 'e' nID 'ach qa'meH vIttlhegh ja'chu'pu'pa' choH ghoghDaj. qa'meH vIttlhegh laj Hota'ro' 'e' qotlhbe' 'e' Harlaw'. Hota'ro' qab leghDI' vajar, lughba' loD. jatlh loD, “gharon 'oH pongwIj'e'. bIHeghpu' mujatlh.”

qaStaHvIS vagh lup tamtaH Hota'ro'. tagha' jatlh “vIQaylu'. nuqDaq ghaH latlh'e'?” 'IQlaw' Hota'ro'.

jatlh loD, “cha' wen qaStaHvIS may' Heghpu'. mawIvlaHbe'pu' 'e' DaSov. mang jIH neH. vItIvbe'pu'. qaQorgh 'e' vInID.”

jatlh Hota'ro', “choQorgh'a'? bItlhaQ 'e' DaHar'a'? Data'laHmo' qayajbe'chu'. De'wI' pa'Daq ghoDor.” mu'meyDaj tuy'. nom yItchoH. He Sovba'mo' SammeH DorwI' poQbe'. lutlha' vajar DorwI'qoq je.

'IQlaw' loD. gho'DI' Hota'ro' chuS DaSmeyDaj. mev Hota'ro'. tlhe' 'ej loD mInDu' bej. qu'chu'. qul tIH bachchugh Hota'ro' mInDu', vajar merbe'. pay' HIv Hota'ro'. loD pup 'ej mup. nom vangmo' toghlaHbe' chaq cha'logh mup ghop 'ej wejlogh mup qam. Dej loD. 'oy'qu'ba' 'ach HoHbe'pu'. lojmIt poSmoH Hota'ro'. vajarvaD jatlh “naDev De'wI' pa' tu'lu'.” 'el.

loDvaD jatlh vajar, “Daqotlhpu''a'?”

tlhuHlaHmeH loS loD ghIq jatlh, “ghobe'. Hegh vIqotlh. yIQorgh, qaH.” yeptaHvIS QamchoH loD 'ej QIt mej.

pa'Daq Hota'ro' tlha' HoD. jotqa' DeghwI'. De'wI' chu' 'ej HIDjolev QIj. HoDvaD wa' QIn tu'lu' 'ach labpu'be' HoD 'utlh. labwI' Sovbe' vajar. 'eSSIm ponglu'. QIn laDchoH.

***
vajar HoD:

Sotlaw'raj vIHevpu' 'ej tlhIngan ra'ghomquvvaD vIlI'qa'ta'. SoH beqlIj je lItoDpu' may'Duj net jatlh, vaj jabbI'IDvam DaHev 'e' vItul. bombogh nov SuD bop. ghoqwI' ghaHlaw'. lutDaj vI'olmeH novvam De' peghbe'bogh HIlab. 'ej tlhIngan Hol laHDaj yIchov. lInDabDaj bopbogh ngermey puS'e' qaja'qang. chaq Qob. 'ej qaghelnIS: nuq bop bom 'e' DaHar?

'eSSIm
tlhIngan wo' yIn QeD 'ampaS
gharben cha' Satlh jInmol
***
jang vajar. jabbI'ID labpu'DI' vajar, QI' leHmeH De'wI' naw' 'e' nID 'ach naDevvo' DuHbe'. paw ghutar. tlhej vay'. batlh ghaHvaD jatlh ghutar, 'elpa'.

wa'vatlh cha'maH: ghutar quv

pa' mach 'el ghutar. jatlh vajar, “'Iv ghaH be'vetlh'e'?”

“muDorbogh 'avwI' ghaH, HoD. tuqnIghDaj nayta' SoSnI'wI' be'nI',” jatlh ghutar.

jatlh vajar, “no'raj boqelmeH nItlhap'a' *veS* Hung yaSpu'?”

jatlh ghutar, “ghobe' HoD. taj ret'aqDaq boqbogh tuq Degh tuQmo' Qu'vat noH cha'DIch bopbogh lutHom vIjatlh 'ej ... potlhbe' HoD. majaw neH.”

jatlh vajar, “qatlh DuqaD loD DaHoHpu'bogh?”

jatlh ghutar, “ghIqtal vIpIHbe'pu'. qoghwIj chevpu'DI' vIHoy'rup.” jIbDaj yuvDI' ghutar loj qogh bID 'e' leghlaH HoD. jatlh ghutar, “jaS quv wIyajmo' maSuv 'e' qap. qaStaHvIS wej puq poHmey vav puqloD puqloDpu'chaj je quvHa'moHmo' vav quvHa'ghach, not quvqa'laH SuvwI' quvHa' 'e' Har. 'ach Hoch 'Ighpu'wI' tlhabmoH batlh. batlh vangchugh vay' Qu'Daj ta'chu', wo' toy'chu', Quch 'ej latlhpu' vuv. quvchugh Hoch tlhIngan, tlhIngan batlh HoSmoHchu'. batlh vang neH Hoch tlhIngan 'ach batlhHa' vangpu'chugh vay', rut tlhIngan qa' je'nIS vay'. SuvwI' qawnISmoHlu'.

jatlh vajar, “DunISchugh vay' bIjatlh'a' ?” SopwI'pa' may' QIjba'.

jatlh ghutar, “ghobe' HoD! jIjatlhchugh quvDaj vIvuvbe'. vay' quv vIghovmo' quvvetlh buS nuv, 'ej batlh vang. quv vIja'be'. quv vIyIn.”

jatlh Hota'ro' “wotvetlh Dalo'Ha'. bIyIn neH. vay' DayInlaHbe'.”[84]

jatlh ghutar, “be' quvqu' SoH, Hota'ro' Sogh. not bIyIn neH SoH. batlh DayIntaH.”

jatlh Hota'ro', “Qagh 'oH neH patlhvam'e' qaja'pu'. bong munumpu'mo' HoDma', tawIjDaq muj DaH 'e' vISov."

jatlh ghutar, “qaja'pu', Qagh yIleghQo'. quv neH yIlegh. Sogh SoH. chaq bIrIQqa'DI' 'aj Damoj. Hota'ro' 'aj vItoy'qang.”

wa'vatlh cha'maH wa': jeymey

bochmoHwI' Daba' ghutar. 'om 'e' nID Hota'ro' ach 'Ilchu'mo' ghutar, Qap. HemchoH Hota'ro'. Hagh HoD. ta'taH'a' ghutar? qawtaHvIS wanI' ngu'. jatlh, “ghutar, qanumDI'--”

qagh ghutar, “--choquvqu'moH HoD. reH vIbajtaHmeH jIvumqu'.” qaD 'oHbe'pu' 'e' Sovchu' ghutar. batlh vangmeH HoD tojta' ghutar.[85] *Dugh* muvDI' ghutar, QIpmo' ghu'mey yajbe' 'e' Har vajar. 'ach 'ong DaH 'e' tlhoj. jatlh ghutar, “DaHjaj nuq 'oH Qu'maj'e'?” qImqu' je Hota'ro'. Dev HoDchaj 'e' luloS.

*Dugh* Dotlh ja'choH HoD. jonwI' pu'jIn 'Itlh DelchoHDI' qagh ghutar.

jatlh “jonwI' choQ Danaw'ta''a', HoD? Hung yaHDaq jeylIj vIleghpu' 'ej not 'el SuchwI' chaw'lIj. pa' DapawDI' Da'el net tuch.”

jatlh vajar, “chay' jeywIj Danaw'ta' SoH?”

jatlh ghutar, “*Dugh* HungpIn jIHmo' Hung pat chu' vIleghDI' vInuD vIneH. patchajmo' Hem 'avwI'pu' tlhIbHa'. muQIj. HoDwI' vIQannISmo' ghochmeylIj vIlegh net tuchbe'.”

jatlh vajar. “SuchwI' chaw' vIloStaHvIS Hota'ro' qawbogh jonwI' Qup vIqIH 'ej jonwI' choQDaq muDor jonwI'vetlh 'IH.”

jatlh Hota'ro', “pa' bISaH 'e' yIpegh. pa' ghoS SuchwI' net tuch.” toH, vIt'a'? toj'a'? ghuHmoHpu'mo' qImyal yep vajar.

jatlh vajar, “qay'be'. muparHa'law' jonwI'. Do'Ha' vumnISpu'.” Haghrup Hota'ro' ghutar je 'e' tu' 'ach buSHa'. qanqu'be' vajar. parHa'laH be'pu' 'IH. jatlhqa', “law' Dujmaj Seng. tlhIblaw'pu' ghIrel. 'a lutI' 'e' luHech jonwI'pu'. luHIjmeH lulaghnISlI'.”

jatlh Hota'ro' “lulaghHa'qangchugh je jIbepbe'.”

jatlh vajar, “lulaghHa'qangchu' jonwI'pu' 'ach ...” yev vajar. DevnIS HoD. jatlhqa', “SIbI' SuQaynIS. *veS*Daq SuQaylaH pagh latlh Duj bowIvlaH.”

“qatlh maQaynIS?” jatlh ghutar.

wa'vatlh cha'maH cha': QIptaH

pa' 'el Hung HIp tuQtaHbogh mang. jatlh, "naDev HoS choHwI' vItamnIS." rav'eq naw'meH raSDaq Qam 'ej wovmoHwI' laghchoH. Qapchu'pu' wovmoHwI'. jatlh vajar, "naDev wabmey luqonlu''a'? bIboghpu'pa', may'DujDaq 'avwI' jIHtaHvIS Dat bejlaH Hung 'ach qama' mIchDaq neH wabmey DIjIHtaH." jangmeH mIw Sovbe'ba'mo' mang loQ tlhaQ ghu'.

jatlh vajar. "quvlIj vIqaD 'e' vIHechbe'. wejmaH vagh ben pIj QapHa' jIHwI'meyvetlh QIp." mon mang Qup. QIplaw'taH jIHwI'meyvetlh 'ej rav'eqDaq lujomlu'. 'ej DaH Qapbej pa'vam qonwI'. mej mang.

jatlhqa' ghutar, "maQaynISbej'a'?"

jatlh vajar "wo' ngoch 'oH. Duj tI'chu'meH poH nI' poQlu'mo', tI'lu'taHvIS Duj, loStaH beq net tuch. Duj lulajpa' tI'wI'pu', Qay'eghnISpu' beq. SuQay'eghbe'pu'chugh verghDaq mapawDI' lIQay wo'."

jatlh ghutar, "latlh Duj vIneHbe'! *Dugh* vItoy'!"

jatlh vajar, "wo' Datoy', lagh. buD beq neHbe' wo'. *Dugh*Daq Sapol vIneH 'ach DuHbe'." QuSmey bot 'e' nID ngoch. tlhIngan wo' toy'nIS mang. Duj rap toy'taHchugh HoDvetlh wo' toy'choH net Har. chaq lugh. jatlh vajar “nuQaHqang qImyal Sa'. *veS*Daq SuQay'egh 'e' chaw'."

jatlh Hota'ro', "DeghwI' poQbogh latlh Duj DaSovneS'a', HoD?" veQDuj toy' 'e' maSlaw', 'ach DujDaq Qay'eghlaHmeH vay', SaHnIS Duj pagh DujDaq lengnISlaH.

jatlh ghutar, "Dun may'Duj 'ach naDev beq quv pIlmoHqu'be' ra'wI'pu'. vay' quv vIvuvDI' vImer. *Dugh* vImaS."

ghutar qech yaj vajar. jatlh, "pIm Dujmaj. lengrupqa' *Dugh* SuQay'eghqa'." Qay'eghqa' ghutar 'e' pIH vajar HoD 'ach ghaytan latlh DujDaq ratlh Hota'ro'.

jatlh ghutar, "Qo'! matay'taHvIS *Dugh* wIHubta'. matay'taH vIneH!"

jatlh vajar, "reH batlh bISuvrup, ghutar 'a Do'Ha' jaghvam jeylaHbe' nuHmeylIj quvlIj joq. wo' yo' chutmey DaHoHlaHbe' joq DatuHmoHlaHbe'."

wa'vatlh cha'maH wej: QaynIS

jatlh ghutar, "HoD, Hoch nuHmeywIj Daqelchu'be'ta'. nujeymeH yo' chutmey yanchugh vay' vaj yo' chutmey DIQachnISchu' maH." De'wI' tlhopDaq ba'choH ghutar 'ej jIH chu'. Duj De'wI'Daq Duj patmey, QI' De' joq naw'laHbe'ba' SuchwI' 'ach peghbe' wo' yo' chutmey. nom Se'vIr Sam ghutar. qen Hung chutmey HaDta'mo' buvmeH pat Sovchu' vaj Duj loHmeH chutmey chIjlaH je. laDchoH.

jatlh ghutar, "naDev <beq 'utbe' QaynISlu'> ghItlhlu', 'ej naDev vIlaD. ma'ut, qar'a'?" Hemba'.

Hob vajar jatlhtaHvIS, "tlharghDuj tI'lu'taHvIS 'ut HoD jonwI' je neH. 'ay' vaghmaH wej DoD wejDaq tetlh tu'lu'[71]. ghutar lagh, qaStaHvIS yInlIj naQ wo' vergh leH vIloHpu'. chutmey vISovbe' 'e' DaHar'a'?"

jatlh ghutar, "reH 'eb tu'lu', HoD." chutmey laDqa'. ghutar retlhDaq joD Hota'ro'. HaSta lulaDtaHvIS ja'chuq.[77]

latlh quSDaq ba'choH vajar 'IjtaHvIS. Hota'ro' ghutar je tung chutmey 'ej tungHa', laDtaHvIS. ghutar ghogh Sey QoylaHchu'. motlh Hota'ro' ghogh Qoybe' 'ach chutmey Sovchu'mo' mu'meyDaj loylaH. quSDajDaq tlhe''egh ghutar 'ej jatlh, "HoD, maSuvtaHvIS qarIQmoH 'e' Dachaw'qang'a'?"

jatlh vajar, "bIghHa'Daq bIQay DaneH'a'?"

jatlh ghutar, "ghobe'. ropyaHDaq SoHtaHchugh 'ej yaS wa'DIch gheSpu'chugh Hota'ro Sogh vaj *Dugh*vaD 'ut ghaH 'e' DamaqlaH."

Hagh Hota'ro' 'ach Haghbe' vajar 'e' tu'DI' SIbI' Haghbe'choH. ghIjlaw'pu' vay'. chaq vay' 'angvIp. Sojpa' QuSHey qaw vajar. yabDaj nISpu'mo' tar chaq qawHa' 'ach HoD HoH ngugh 'e' luqellaw' ghutar Hota'ro' je.[87] Qam 'ej lojmIt poSmoH. jatlh "chobvamDaq puchpa' tu'lu''a'?"

jangrupba' Hota'ro' 'ach nom jatlh ghutar. "HIja'. Duj pu'jIn vIHaDta'. qaDor." Qam 'ej HoD tlhej. Hota'ro'vaD jatlhmeH ghelta' vajar 'ach ghutarvaD jatlhnIS je. chobDaq jatlh ghutar, "HungpInlI' jIHmo' latlh DujDaq maHtaHvIS qa'av."

morghmeH poSchoH vajar nuj 'ach qImyal Sa' luDech 'avwI'pu' 'e' qaw. jatlh, "QuSmey Dabot'a', HungpInwI'?"

wa'vatlh cha'maH loS: QuSHey

jatlh ghutar, “nIbuQbogh QuSmey vIcherghQo'. poS yIghoS.” wa'Hu' QuS qelbe'qu'law'taH. QuSwI' ghaHchugh tojwI''a' ghaH je. chaq tarmo' lIjchu'pu' lagh.

jatlh vajar, “HoD HoHrupchugh betleH yanbogh SuvwI' Qup bImun'a'?”[89] jejmo' vajar ghogh, qIm ghutar 'ej pay' yajchoH.

jatlh ghutar, “Qo'! HISlaH! vIta'Qo'. vImunbej. jIQuSQo'! Duja''a' Hota'ro'? muyajHa'law' jay! HoD! jImatlh 'e' vI'Ip.”

jatlh vajar, “yIQIj.”

jatlh ghutar, “wa'Hu', SuQortaHmo' 'ungya Sogh SoH je, moch Hegh vIqelchoH. tlhIbchoHchugh mochwI' pagh matlhHa'choHchugh Qu'wIj 'oH Heghvetlh'e' 'e' vISov. reH Qu'wIj vIta'rupchu' vIneH. vIta'Ha'chugh vIquvHa''eghmoH. Hota'ro'vaD jIghel, 'ach muyajHa'. reH Duj Hub neH. DuHubchoH.”

jatlh vajar, “qatlh DeSwIj rIQ boqel? DaH HoSchu'.” tobmeH ghutar DeS mupmeH ro' lo'. Sub ghutar Somraw.

puchpa' lu'el.[88]

jatlh ghutar, “cha'logh Daghor vIja'be'. rInDI' may' Homvetlh Daghorpu' 'e' Sov Hoch. qatmeH baS lo' Hota'ro' 'e' DalIj'a'? ngugh Qapbe' ghopDu'wIj.”

jatlh HoD, “DaH Qapchu''a'?”

jatlh ghutar, “wej pup 'ach DaHjaj betleH vIlo'laHchu'mo' jIbepbe'. nuHwIj vI'uchqa'laHmo' jIbelqu'.”

jangchu'be'ta' ghutar 'ach DIvbe'law'. QuS Hota'ro' ghutar je 'e' pIHbe' vajar 'ach reH yepnIS HoD. wa'maH Hut ben pajDI' HoD 'utlh, yaS wa'DIch HoHta' matHa', ngugh HoD gheSpu' matHa' 'ej yaS wa'DIch gheSpu' vajar. vaQ matHa'/HoDvetlh. potlh vavDaj. qaSpu'DI' wa' DIS, Duj chu' Suqpu'--*Dugh* 'oH Dujvetlh chu''e'. ngugh So'wI'Daj QaQ law' Hoch QaQ puS. qaStaHvIS cha' DIS *Dugh* ra' HoDvetlh, ghIq HoH jagh beH tIH. HoD nISwI' woHta' vajar 'ej yovtaH beq 'e' Dev. ramvetlh *Dugh* lutIjqa'taHvIS, jatlhDI' DeghwI', *Dugh* HoD gheSpu' pay' 'e' tlhoj.

wa'vatlh cha'maH vagh: SarghwIj yI'uch

puchpa' lumejtaHvIS chol cha' 'avwI'pu' vaQ. ja' QupwI' "SuchwI'pu'! nuqDaq ghaH DorwI'ra''e'?"

"puchpa' vIghoSmeH DorwI' vIpoQbe' jay'," jatlh vajar. ghuy'cha'. puch wInIH 'e' luHar'a'?

jatlh 'avwI' Qupbe', "QongwI' pa' mIchDaq chaw'lu'. mIchvamDaq Dat 'ut DorwI'."

"yaj," jatlh vajar. DaHjaj Hung ngochmey QIp cherghqang.

"De'wI' pa' wIghoS. ra'wI'wI' ghaH vajar HoD'e'. ghutar 'oH pongwIj'e'. SarghwIj yI'uch 'etlhwIj vIjejmoHtaHvIS." jatlh ghutar.

yay' vajar 'avwI' Qup je 'ach Haghqu' 'avwI' Qupbe'. jatlh "rughtay[90] tuq Degh DatuQbe'taH. rughtay tuqnIgh SoH'a'? lutvetlh ja'taH vavnI'wI'."

jatlh ghutar, "lutvetlh luja'taH Hoch vavnI'pu'." latlhpu'vaD QIj ghutar. lut tIQ bop. lengtaHvIS 'avwI' qempa' qaDpu' 'etlh yanbogh loD. Doy'qu'mo' Suv neHbe' qempa' vaj lIH'egh 'ej mu'tlheghvetlh jatlh. Suvbe'. qaDbogh loD nayDI' lengbogh SuvwI' <rughtay> tuq lucher. Ha'quj Deghmo' 'avwI' tuq ghovpu' ghutar.

jatlh vajar, "lutvetlh Sovbe'pu'chugh, bImaw' 'e' Har."

jatlh ghutar, "jISuDbe'pu'. qItbe'bej quH Sovbe'bogh rughtay tuqnIgh'e'."

De'wI'pa' lupawpu'DI' wem lulIjlaw'pu' 'avwI'pu'. jatlh ghutar, "rInDI' yaH poHraj ghoSam. tachDaq ghoDor." chobDaq jawtaH ghutar 'avwI'pu' je, De'wI' pa' 'eltaHvIS vajar.

De'wI' pa'Daq jatlh vajar, "Hota'ro', qajatlh."

Qam Hota'ro' 'ej vajar qIm. jatlh "lu' HoD."

jatlh vajar "wa'Hu' Sojpa'Daq qechmey Daj boqeltaH SoH, ghutar je. Daqaw'a'?"

"vIqaw, HoD," jatlh Hota'ro'. loQ bItchoH.

"jIHvaD yIDel," jatlh vajar. "yIvItchu'. pagh yInop. qaqaD."

Qub Hota'ro'. jatlh "Hoch vIqawbe', HoD. nI' 'ej gho moj. jInID. ravDaq SoH, 'ungya Sogh je SaIleghpu'mo' ghutarvaD jIghel. Heghba' wIpIH 'ach Sughoblaw'lI'mo' Heghba' rurbe'. DuHoH 'e' nID 'ungya 'e' wIqel. jIHvaD <moch DaHoHpu'? moch HoHtaHvIS vay' Dabejpu''a'?> jatlh ghutar. not qaSpu'neS, HoD, 'ach ..." yev Hota'ro'. rav'eq bej.

wa'vatlh cha'maH jav: vuv 'a tlhoch

jatlh Hota'ro'. "ghutarvaD ... wIch tIQ vIja'. HoD HoHbogh yaSpu' bop. vIHarbe'." yev Hota'ro'. nepchoHpu'. rav'eq lurghDaq vIHqa' mInDu'Daj. yaj vajar.

jatlh Hota'ro'. "moch HoHmeH, nISwI' beH lo' neHbe' ghutar. jatlh <betleH vImaS>. Qu' quvvaD nuH quv lo' neH. jatlh <betleH lo' qeylIS, HoDma' je>. rIQtaHvIS DeSlIj betleH Dalo'taHmo' DuHo'. DuHoHpu'chugh 'ungya, HeghbatvaD 'ungya wIboQnIS," yevqa' Hota'ro'. bItbej.

jatlh vajar, "yIja': 'urmang bonablI''a'?"

jatlh Hota'ro', "ghobe'. 'e' vI'Ip!" 'Ilqu'law'.

jatlh vajar, "maj. wIch yInop. yIja'chu'."

jatlh Hota'ro', "jIHvaD <HoD DagheSrup'a'?> jatlh ghutar." temmeH moD Hota'ro'. jatlh, "jIjangpu'Qo', HoD. ghutar DaSov. quv batlh je bop yIn 'e' Har. moSnIStaH ra'wI' 'e' yajbe'. wa'maH wa'Hu' novvetlhvaD DajatlhtaHvIS DuHoHrup 'e' Daqaw. pe'vIl ghaHvaD jIjatlh. jImatlh jIjatlh. HoDma' vItoy'chu'. vIponta' 'e' vIHar. ngugh ngaQchoH lojmIt'a'mey 'e' wIQoymo' DInuDchoH. chaq muyajHa' ghutar. jImatlh 'e' vI'Ip. matlh je ghaH. nuq jatlh?"

Qub HoD. nIbbe' lutmeychaj mu'mey 'ach rap qechmey. nIbchugh QuS rurba'. jaS wanI' luqaw 'ach vItlaw'. nepchugh Hota'ro', nep je ghutar. QuSchugh, po'qu' QuSwI'pu' 'ej DevwI' Seng luqotlh. Hota'ro' 'emDaq De'wI' chutmey cha'taH HaSta. jatlh vajar, "yo' chutmey boQulchu'ta''a'?"

jatlh Hota'ro', "HIja'. lI'be' qechmeymaj. toy'beHbe'mo' Duj, DaH yaS wa'DIch DaSugh net tuch." De'wI' chu'Ha'.

chutvetlh Sovba'pu' vajar. wej yaS wa'DIch chu' qelqu'ta'. <muvoqchu'bogh jup vIvoqchu'bogh[107] vIwIvnIS> 'e' Qub. Heghpu' HochHom juppu''e' voqbogh vajar. lI' yaS wa'DIch laHmey, Sov je, 'ach De' ghojlaH. voq 'e' ghojlaHbe' vay'. Hub'eghmeH Heghchugh HoD, pagh HoD HubmeH qIQchugh beq SuvnISlaHchu' je. jatlh vajar, "*Dugh* tI'lu'taHvIS, Qochbe'bogh yaS vInej."

jatlh Hota'ro', "HoD jIHchugh, Qochbogh yaS wa'DIch vInej. vuDmeywIj'e' vISov."

mon vajar. QochtaH 'e' tIv Hota'ro' 'a qIQbe'law'. chaq muj Sa'.

wa'vatlh cha'maH Soch: tIjwI'ghom

De'wI' pa' lojmIt poSqa'moH vajar 'ej pe'vIl jatlh, "Supumchuqbe'meH Sajatlh: wa'Hu' Sojpa'Daq tlhIHtaHvIS bong jIDaq." mIS 'avwI'pu'. yajchoH ghutar.

jatlh ghutar, "tach wIghoS, chetlhej'a'?"

"majQa'!" jatlh vajar. Qochbe' Hota'ro'. DevchoH 'avwI'pu'.

wovchoH 'avwI' Qupbe' QumwI'. jang. jatlh "HIja'. De'wI' pa' loSDaq chaH. DItlhejtaH." 'Ijqa'. jatlh "lu'." QumwI' SoQmoH. jatlh "DaH jolpa'Daq reDor."

"tach vImaS," jatlh vajar.

"nuqDaq wIghoS? yuQ wIpawpu''a'?" jatlh ghutar.

"jolpa' wIghoS," jatlh 'avwI' Qupbe'. tamchoH ghutar.

jolpa'Daq SaH latlh yaS. jatlh, "Dujraj lulaghpa' jonwI'pu' Dochmeyraj puS botlhap net chaw'. latlh Dochmey pol jonwI'pu' 'e' lunID 'ach le'chugh vay' DaH yIQorgh. Som lu'olpu' jonwI'pu'. Duj naQ bonaw'laH."

"yaj," jatlh vajar. jol rav lulIt. SeHlaw ruQ yaS 'ej *Dugh*Daq chegh. He'So' jolpa'. pa'meychaj ghoSmeH lojmIt cha' lupoSmoH ghutar Hota'ro' je. lojmIt wa' poSmoH vajar. meHDaq rav bID poSmoHlu'pu' 'ej jonwI' luch Sar tu'lu'. HoDpa' 'el. HochHom nuHmeyDaj tuQtaH. ratlhwI'mey puS tlhap. QongDaq vIHmoH. wa'maH jav ben pa'vam DabchoHDI' vajar, QongDaq 'emDaq nungbogh HoD pong tu'pu'. 'oH bIngDaq pongDaj'e' ghItlhbe'pu' vajar. HeghDI' DeghwI' yoH, tlhoy'Daq DeghwI' pong ghItlhpu'. DaH tlhoy' memDaq SaH wejmaH Soch pongmey. chaq muj natlIS. wa' Hutlh. pu'HIchDaj lel vajar 'ej latlh pongmey bIngDaq 'ungya pong ghItlh. batlh Heghpu' neghvam. tIjwI' ghommey QobvaD jeStaHvIS Heghpu' HochHom. ngoy' vajar not 'e' lIj. HalDaq QongDaq tatlh. betleH, Ho' teywI', nIvnav je yIrpu'DI', jolpa' ghoS.[182]

jolpa' pawDI', pa' betleHmey qengtaH ghutar, Hota'ro' je. jatlh ghutar, "tIjwI'ghom wIrur." baQ 'ej jIr.

"bIHojbe'chugh latlh qogh Dachev," jatlh vajar. Hagh ghutar 'ej betleH roQ. jatlh "latlh 'aHwIj vISuqnIS," 'ej lojmIt cha' poSmoH.

jatlh vajar, "Hota'ro', HItlhej. chaq mIch vaghDaq vay' wIpoQ." 'aHchaj luroQ 'ej ghutar lutlha'. mIch vagh lu'el. jonwI' luch nuDchoH vajar. jatlh, "naDev DaqlaH pagh. DaH wIchqoqvetlh yIja'."

wa'vatlh cha'maH chorgh: pegh Hoch

vajar cholqu' Hota'ro' 'ej teSDajDaq jatlh, "HoD, HoD gheSmeH qImyal, nubwI'Daj[99] HoHta'. meH lu'el ghaH, matlhwI'pu'Daj je 'ej tlhe''eghlaHpa' HoD, ghaH, 'avwI'pu'Daj matlh je muH. nISwI' beHmey lo' net jatlh." HoD mer lut. Qu'vetlhvaD quvHa'mo' nISwI' beH. qImyal mIghmoH neHchugh Hota'ro' Qap lutvetlh. teH'a'?

jatlh Hota'ro', "HoD, jIQuptaH 'ej yaS wa'DIch'e' jIHbe', 'ach bong chonumpu'mo' yaSlI' potlh jImoj[92]." SuchwI' chaw'DajDaq mu' <Sogh> Hot. jatlh, "patlhvammo' tlhIngan wo'vaD jIngoy'. qImyal meHDaq jItoy'ta'. qalchu' 'ej QaqtaH."

cha' wen jatlhvIp be'vam. DaHjaj jeQqu'. jatlh vajar "Sogh, 'urmang vIQoy vIneHbe'."

jatlh Hota'ro', "qaqeSnIS, HoD. Dutoj 'e' nID qImyal Sa'. qImyal to' vIQIj. Duponmo' qImyal, bIyemta' 'e' DaHarchoH. DutoDta' 'e' DaHarDI' Dujon. Qob ghaH."

tonSaw' ghojchoHmoHpu'DI' Qob vajar'e' 'e' Har. chaq Hoch ra'wI'pu' Haj DeghwI'. jatlh vajar, "nutoDbejta' qImyal Sa'. DubIjqu'ta'mo' Sa' DaqeH'a'?"

loychu'ta' vajar. Hota'ro' tuHmoHlaw' pum. jatlh, "mu'meywIj tob neH, HoD. not mumevqa' bIj. Duj vItoy'. lI'be'chugh mu'meywIj HImupchu', 'ach HIQoyneS. Hoch Qu'meylIj tIqel. DuquvHa'moHlaHbogh Qu' tu'lu''a'? talIj nuDchu'DI' Sa', nuq SamlaH? chovoqqangbe'chugh HIjangQo', 'ach yIQub."

Hoch wemHommeyDaj qawchoH vajar. SaHtaHvIS Qel vulbe'taH qama' SuD 'e' chaw'mo', Hembe'. pIj beqpu', Duj 'ay'mey je SuqmeH chutmey jun 'ach ta'taH Hoch'e'. ta' je qImyal Sa'. rut HIgh, 'ach maybe'DI' may' rut HIghnIS SuvwI'. not Qu' naQ nguvmoHta' ta'Hom nub. tagha' jatlh "ghobe'. quv Hoch Qu'meywIj."

jatlh Hota'ro', "DughelDI' Sa', bIjangpa' yIyevQo'. " HoD patlh lIj 'ach SaHbe' vajar. Dachmo' 'ungya, boQ poQ.

Qubqa'DI' Qu' nub qaw vajar. jatlh "wa'logh wej na'SIqya'nganpu'[96] DIHoH jIH 'ungya je, 'ach maboqchuqpu'pa' qaSmo' quvHa'be'." Quchbe'law' Hota'ro' 'ach jatlhbe'. jatlh vajar, "qay'be'. batlh Suv. qevpobwIjDaq muDuQpu' wa'. DaleghlaHtaH, yIlegh." qevpobDaj SIq.

jatlh Hota'ro', "yIyepneS, HoD. nuHmeyDaj bIH peghmeylIj'e'."

jatlh vajar. "jIpeghtaH qatlh 'e' luHar Hoch?"

"peghmo' Hoch," jatlh Hota'ro'. nuq pegh ghaH? 'e' SIv vajar.[91]

wa'vatlh cha'maH Hut: no' chavmey

jatlh vajar, "butlh Daghaj. qeSlIj vIqel."

leS Hota'ro'. vay' jatlh be' 'ach Qoybe' vajar. SuDta' Hota'ro'. Hota'ro' pIH vajar neH qImyal Sa' 'ej qImyal pIH vajar neH Hota'ro'. nuq luchav? qepDaq peghmey 'angbe'pu' Sa'. SoghvaD Sa' qep naQ Del vajar. Hota'ro' lubopbogh mu'mey'e' neH nop. 'IjtaH Hota'ro'. Saghqu'. rut yajmeH qagh. Sa' mu'mey pup[95] Sov neH 'ach ja'laHbe' vajar. jatlh Hota'ro', "vaj Dujatlh Sa''e', <ta'meylIj Dunmo' Duj vIchoqqang&gh;, 'ach nIja' jonwI'pu''e', <Submo' Duj wItI'qangbej, 'ej nuponnIS pagh>, qar'a'?"

"bIlugh," jatlh vajar. "quvmo' Dujmaj choqqang 'ach 'utbe'." chIch nepbej'a' qImyal? pagh Qaghpu' neH? woQ Quj muS vajar, 'ej QoymeH buSnISchu'mo' QublaHchu'be'. jatlh "DupIH Sa'. Qaghpu'. qep vebmajDaq vIjatlh."

"Qo'!" jatlh Hota'ro'. "pagh DapIHbogh yI'ang. yI'Ij 'ej HarwI' yIDa."

jolpa' lughoS. *Dugh* beq jolchoHpa' *veS*, 'aH luwIvta'bogh jol. "wIwojnIS," jatlhpu'. lunuDba'lI'.

meH ghoSqa' vajar. QonoS De'wI' chu'. yaS wa'DIch Hegh 'oH wanI' Qav'e' qonlu'bogh. <yaS wa'DIchvaD Hota'ro' Sogh vISugh> ghItlh ghIq *Dugh* beq toDta' *veS* 'e' Del. [104] mub mIw. yaS numlu'ta'DI' qaSpa' wa' jaj qonnIS ra'wI'. cha'maH rep ret neH lutoDlu'. QI' qawHaq rar net chaw'be'. De'wI' chu'Ha'.

jolpa' 'elqa'. tuq lut Qatlh jatlhlI' ghutar. tuq Hutlhmo' vajar loQ tuH. motlh tuqmey qeltaHvIS latlhpu' nuS pagh jun. 'ach ghutarvaD lI'law' De'. jatlh "Doj tuqmey SovlIj. chay' Daghoj?"

jatlh ghutar "choquvmoH, HoD. yo' qIjDaq Hoch no'wI' vIghovlaH 'e' qap vavwI'. tIQmo' vavwI' tuq, ta'meychaj vISovchoHmeH HochHom tlhIngan tuqmey qun vIHaDnISpu'."

tuqmo' mIytaH vay' 'e' par vajar. jatlh, "qeylIS puqnI' ghaH'a' tuqnIghlI' wa'DIch'e'?"

Hagh ghutar. "Hoch ram Hut be'pu' yatlhmoHpu'chugh qeylIS, Hoch puqnI'pu'qoqDaj QIjbe'."

jatlh Hota'ro', "qeylIS ghojmoq ghaH ghutar tuqnIgh wa'DIch'e'. ghaHvo' nIm tlhutlhpu' qeylIS."

Haghbe'laHbe' ghutar. jatlh lagh, "nep ghaH. ghotI' bIH tuqwIj cherwI'pu''e'. pongmeychaj vISovbe', 'ach quvqu' bIH. QallaHchu'."[101]

Hagh vajar. jatlh "QallaHchu' no'wI'--no'wIj!--je. chaq yurwI' SoH." *veS* jonpa' lupaw, HaghtaHvIS Hoch.

wa'vatlh wejmaH: nepchu'qu'be'

jatlh Hung yaS Sagh, "vajar HoD, DaH Dujatlh qImyal Sa'. DuDor laghvam. pa'meyrajDaq 'aHraj lan vay'."

"lu'," jatlh vajar. "mutlhej yaSpu'wI'."

ghutar Hota'ro' je nuD lagh. ne' Degh tuQtaH ghutar 'ej *veS* Sogh Degh tuQtaH Hota'ro'. loQ mIS lagh. jatlh "nItlhej latlhpu' 'e' ra'be' Sa'."

jatlh vajar, "wIvwIj'e' 'oHmo'." ra'chu' ghoghDaj. ghu' laj lagh 'ej wej tlhIngan DorchoH.

lojmIt tlhopDaq mev DorwI'. SaHtaH cha' 'avwI'pu'. nuHmeychaj chu'Ha'lu'pu' 'e' 'ol wa' 'avwI'. qImyal rI' latlh. Hung mIwmeyvammo' puQ vajar.[149]

"yI'el," jatlhDI' qImyal, 'el vajar, Hota'ro' ghutar je. QamDI' chevchuq 'etlh chuq. che'ron SuvwI'pu' Dalaw'. pa'Daq SaH wIy, De'wI', quS puS, raS, cha' 'avwI'pu', qImyal Sa' je. Sa' lumerchugh Hota'ro' ghutar je, 'angbe'. jatlh, "buy' ngop, vajar HoD. SIbI' *Dugh* lajqang wo' vergh'a' yaH cha'maH cha', beqlIj DaQayqangchugh." mon qImyal. yayHom lopruplaw'.

jatlh vajar, "juquvmoH qImyal Sa'. SoHmo' wo' toy'qa'laH *Dugh*. Do'Ha' yo' leH De'wI' vInaw'laHbe'pu'mo' wej beq vIQaypu'. SIbI' wIta'qang, wa' Duj toy'be'bogh raQpo' DaHIjqangchugh."

vajar bej qImyal. jatlh, "wa' raQpo' HIjqang *veS*. De'wI'vam yIlo'." HaSta leghDI' vajar, qImyalvaD *Dugh* QaybeHmoH. Duj naQ QaymoHchugh vajar vaj Duj toy'taH Hota'ro' ghutar je 'ej Duj Hutlh vajar. vajar ghaH raQpo'vetlh'e' 'e' Har qImyal. muj Sa'. HaStavetlh qIl vajar 'ej latlhmeyDaq De' ghItlh.

jatlh, "Dugh HoD jIHtaH, Sa', 'ach Qo'noSDaq ropyaH qach vIghoSnISmo' Duj leH yaS wa'DIchwI', Hota'ro' Sogh." Hota'ro' qImyal je merba'ta' vajar.

jatlh qImyal, "Qotlhlu'pu'mo' DujlIj yaS Danum net chaw'be' 'e' DaSov, vajar HoD. QonoSlIj vIlaDpu'. Sogh ghaH 'ach DItoDpa' yaS wa'DIch DagheSmoHbe'pu'."

jatlh vajar, "yaj, Sa'. Heghpu'DI' 'ungya Sogh, yaS wa'DIch moj Hota'ro' 'ach vIjollu'mo' De' choqbe'law'pu' De'wI'. Do', wa'maH tup ret vI'olta'. qaSpu'pa' wa' jaj vIqarmoHta'mo' mubchu'." nepchu'qu'be' vajar. Heghpu'DI' 'ungya, moch ghajbe'mo' wa'DIch ghaH Hota'ro''e'. SIbI' numbe'ta' vajar, 'ach ngoDvetlh SovnIS pagh.

wa'vatlh wejmaH wa': Sapta'

"bInep," jatlh qImyal. "wa'Hu' Danumbejta'chugh qatlh SIbI' Daja'be'pu'? qatlh ja'be'pu' SoghlI'? Sogh ghaH 'e' Sovbe'pu' jay'." Hota'ro' bejtaH Sa'.

Hota'ro' roSHa'moHlu'law'. QubtaHvIS vajar, jatlh ghutar, "ngugh chechchu'pu' Hota'ro' Sogh, qImyal Sa'. ghuy'cha'! yaHDajDaq vulchoHpu'. Heghpu' 'ungya Sogh DaHjaj po 'e' lIj. DotlhDaj qawbe'chugh mumerbe'." nepbe' je ghutar.

SImlaw'taH qImyal. jatlh, "vaj 'Iv ghaH raQpo''e'?"

"ghutar," jatlh vajar. "Dujvo' vIQaylI'mo' DaH yaHDaj chu'Daq lupnISlu'."

"ra'wI' lupwI' jIHbe'. Qo'noS vergh'a' wIghoSchu'," jatlh qImyal.

"majQa'," jatlh vajar. "Qo'noS vergh'a' yaH cha'maH cha'Daq vumchoH ghutar." jIH Sen ghutar 'ej SIbI' lajlu'. Dalmo' vergh'a', reH mang lajrup. yayHom chavta'. beq neHlaw'pu'mo' qImyal, Qanta'. chaq lo'laHbe'. ghaytan potlhbe' 'ach Sa' lutojta'. noD Sa' 'e' loS.

jatlh Sa', "raQpo' ghaHchugh Hung mIw le'--"

jatlh vajar, "Sa' SoHmo' qavuv, qaH, 'ach jIH beqwIj je juvoqHa'taHmo' jIpuQ. Dujmaj bonuDta'. 'aHmaj bonuDta'. tlhIngan matlh maH. quvmaj boHonchugh SIbI' ghopum. Hung mIwmeyvetlh DI- DI-"

jatlh ghutar, "HungpIn jIHmo' Seng vIghovneS Sa'. Duj quv choqtaHmeH ra'wI', quvHa'ghach luqembe' mebpu' 'e' 'olnISchu' ra'wI', 'ach tlhIngan quv mawbe'meH Qatlh Qu'. qavuvmeH 'ej quvwIj vItobmeH munuDchu' HunglIj 'e' vISap, ghIbchugh HoDwI'. chopumbe' 'e' vISovchu' 'ej *veS* quv vIchoq 'e' DavoqlaH."

<HungpIn> per'eghtaHmo' ghutar mon vajar. 'avwI' chu' ghaH ghutar'e'. puch Say'moHwI' ghaH. 'ach Hoch Qu' ta'choHDI' buSchu' 'ej wo' quvmoHmeH ta'chu'. lagh tlhochbe' vajar. jatlh, "vIghIb 'ej jIH munuD je HunglIj 'e' vIghIb." Sappa' yevqu' Hota'ro' 'ach tagha' jatlh, "pagh vISo' 'e' vItobvIpbe'qu'." jeQlaw' Sogh 'ej pe'vIl jatlh.

jatlh qImyal, "qechraj vIlaj. quvraj botobchu'ta'DI' rInjaj voqHa'chuqtaHghachvam." 'avwI'pu'DajvaD jatlh, "Hung pa'Daq laghvam Soghvam je tIDor. lunuDlu'chu'qu' 'e' yI'ol."

"qaHpu'," jatlh 'avwI' 'ej DevchoH.

wa'vatlh wejmaH cha': Qu'mey Del

jatlh qImyal, "vajar HoD, yIloS. yIba'. bIghung'a'?" ghungbe' vajar. jatlh qImyal, "romuluS HIq DaneH'a'?" vajar merqu'mo' Hagh qImyal. jatlh "qay' nuq, HoD?"

jatlh vajar, "Hatqu'mo' chomer 'ach weHwI'vo' bojonba'ta'. chaq nuHIvbogh weHwI'pu' boHoHta'."

Saghqu'choH qImyal. jatlh, "ghobe'. ngevmeH HIjlI' tlhIngan HoD. jIjchu'mo' muHlu'be' 'ach numHa'chu'ba'." romuluS HIq jonpu' vajar 'ach reH tlhutlh beq. ngevchugh tlhIngan, romuluSngan wo' boQ. 'eyqu'. HIvje' laj.

vajar, ghutar, Hota'ro' je Qu' De' Sov neH qImyal Sa', vaj Del vajar. Duj tI'ta'DI' ghIrel, Qo'noS lumej. DeghwI' luHutlhpu'mo' 'or vajar, 'ungya je. Duj chIjmeH loQ ghutar ghojmoHpu' vajar. 'or 'e' Sap ghIrel 'ach po'Ha'mo' Son HoD. waw'Daq Hota'ro' parbogh HoD'e' qIH vajar. DeghwI' Qayqangmo', Hota'ro' laj. romuluSngan neHmaH HeH lughoS 'ej pa' romuluSngan logh Suchbogh Dujmey'e' jIHtaH. Dal Qu' 'ach wo'vaD lI' 'ej batlh ta'pu' beq. ta'meychaj DeltaH HoD. boHchoHlaw'DI' Sa', lut van vajar. cheghmeH mIchvam Hop lulengtaHvIS jor HanDogh.

latlh Qu'mey De' Sov neH qImyal. yejquv toy'bogh Qu'mey buS. Qu'mey ngo' qel, HoD gheSpa' vajar. Qu'meyvetlh De' Sovchu'be' vajar, 'ach qaw 'e' nID.

"nuqDaq 'oH juHlIj'e'?" jatlh qImyal.

"*Dugh*Daq tu'lu'," jatlh vajar. qaStaHvIS wa'maH jav DIS tlharghDuj HoDpa' DabtaH vajar 'e' HarlaHbe' Sa'.

"nuqDaq Dab qorDu'lIj?" jatlh.

<bIQ'a'Daq> Qubmo' vajar DaHjaj tuHmoHbe' mu'meyvetlh. jatlh, "qorDu'wIj vISovbe'." yu'taH Sa'. nepbe' vajar 'ach pIHtaH Sa'.

"puqpu' Daghaj'a'?" jatlh qImyal Sa'. tempa' vajar, Qubmo', vay' nop 'e' Sovba' Sa' 'ach qaDbe'. "bISawta''a'?" jatlh.[187]

jatlh vajar, "cha'logh. may'Daq Hegh cha'. bortaS vISuqta'."

wa'vatlh wejmaH wej: qama' mIwmey

vajar Sotlaw' Hotlh Sa'. "qama'lI' ghaHtaH nuvvetlh. Dajonpu''a' SoH?" jatlh Sa'.

"ghobe'. ngugh ngaq Duj *naQjej yoH*Daq jItoy'. 'avwI' jIH neH. qama' jonpu' may'Duj *lotlhwI'* negh. Qo'noSDaq wIHIjmeH *naQjej yoH*Daq qama' luQay," jatlh vajar.

"Qo'noS bopawDI' qaS nuq? wanI' yIDelchu'," jatlh qImyal.

jIjtaH vajar. QI' pegh 'oH De'vetlh'e' 'ach Sa'vaD peghbe'. qama' law' Qaypu' 'ach qama'vetlh SuD qawchu'. ghIHbe'meH qama' Qaylu'taHvIS, qaStaHvIS wa' jaj Qo'noS lupawpa' pagh Soj noblu'pu'. motlh bIQ law' tlhutlh qama'vetlh. 'ojmo' vIngpu'. qama' yebDu' baghta' 'ej ngIbDu'Daq mIrmey ngaQmoHta'. nuDchu'pu'. leghlaHbe'meH qama', qama' nachDaq buq lan[110].

pawpu' qama' DorwI'. nuv ghovbe'pu' vajar 'ej pong qawbe'. chaw' qar ghajpu'mo' qama' nobpu'. DorwI'vaD qama' QorghmeH De' ja'pu' vajar, <ralbe'. bIQ law' poQ 'ej rotlhHa' DIr>. bIghHa' QonoSDaq De' chelchoHpu'DI' vajar, vay' Huj tu'pu'. qama'vetlhvaD <HIjlu'taHvIS Heghpu'> ghItlhlu'pu' 'ej HevwI' pong qIlta' vay'. HoD ja'pu'DI' jatlhpu' HoD, <yIbuSHa'. Qo'noS bIghHa' SIchpa' Hegh. DapIchlu'be'>.

"may'Dujvo' vay' Daqem pagh vay' DaSo' 'e' ra''a' vay'? 'e' tlhob'a' vay'?" jatlh qImyal. qaSbe'pu'. vajarvaD Qumbe'pu' may'Duj beq.

"may'Dujvo' luch, nuvpu', De' joq Qaylu'pu''a'?" jatlh qImyal.

"may'Dujvo' vIQaylu' jIH," jatlh vajar. ngugh wa'maH wen may' QIH tI'lu'taHvIS ngaqDujDaq Qaylu'pu'. qama' Qaylu'pu'. wa'logh jolpu' Qel 'ach SIbI' cheghpu'. jawbe'pu' vajar Qel je. qama' rop muchta' vajar. qama' nuD 'ej QaH Qel. qama'vaD jatlhbe'law' Qel 'ach ram, tlhIngan Hol yajbe'pu'mo' qama'.

De' law''e' Sovbe'bogh vajar nejtaH qImyal. tagha' jatlh, "vajar HoD qaSuj vIneHbe' 'ach wo'vaD potlhqu' Qu'vam. may'Dujvetlhvo' De' pegh nIHta' vay'. Qaw'lu'mo' may'Duj wo'vaD 'ut De'. Dangu'laHchugh DuquvmoHbej wo'. chaq De'vetlh DapeghmeH neppu' vay'. Dangu'laHchugh Duvanqu' wo'. nuq DaSov?"

QaH 'e' nIDqu' vajar 'ach De' pegh nejtaHbogh Sovbe'chu'.

wa'vatlh wejmaH loS: tep Hat

"naDev tlhIHvaD qay''a' vay'?" jatlh Sa'. "Hoch DapoQbogh DaSuqta''a'?"

jonwI'vetlh Qup qelqa'mo' vajar tlhoS mon. chaq ramvam jonwI'vetlh SuqlaH. jatlh "DojbejneS may'DujlIj, Sa'. Hoch vIpoQbogh vISuqta'." morgh neH vajar 'ach luyepmoH Hota'ro' mu'mey. HarwI' Da.

lojmIt mup vay'. jatlh qImyal, "nuqneH?"

jatlh vay'. Qoybe' vajar 'ach jatlh qImyal, "yI'el." 'el wej 'avwI'pu'. qImyal teSvaD tlhup wa'. SIbI' QuchHa'qu'choH qImyal qab ghIq jaS QuchHa'choH. wa' 'avwI'vaD jatlh "petaH tIjatlh." mej 'avwI'vetlh. vajarvaD jatlh, "*Dugh*Daq 'op tep Hat lutu'pu'. Dochmeyvetlh DaQIjlaH'a'?" Saghqu' ghoghDaj. jatlhtaHvIS vajar DeSDu' 'uchchoH 'avwI'pu' 'ej pu'HIchDaj nge'.

ba'qu'choH vajar 'ej 'avwI'pu' buSHa'. jatlh, "Hatchugh tepwIj vISovbe'pu'. nuq luSam?"

jatlh qImyal, "HeSmeylIj DaDISnIS. nuq boHIj?"

Qubqu' vajar. HeSpu''a'? ratlhbe' HIq nov 'e' Sovbej 'ej not tep jonpu'bogh ngev. pe'vIl jath Sa', "lut ngeb yIqonQo'. bong DaHIjpu'be'. tep DaSo'ta'bogh vIqellI'."

jatlh vajar, "pagh tep vISo'ta'." vay' So'ta'chugh beq, ngoy' HoD 'e' Sov. tlhoS jatlh <matlhHa'law' ghIrel> 'a jonwI'pu' Suchta' 'e' peghnIS. ghaytan Sa'vaD matlhHa'ghachDaj luja'ta' jonwI'pu', vaj mIqta'Daq vay' So'lu'ta'chugh yaj Sa'. qarbe''a'? jatlh, "QuSmeyDajmo' ta''a' Hota'ro' 'e' DapIH'a'?"

Qochlaw' Sa'. vajar'e' pIHba'. Saghqu'taHvIS jatlh "SIbI' bIDISchugh chaq qaQaHlaH 'a HeSmeylIj DaSo'taHchugh bIquvHa' 'ej qaQaHlaHbe'." pagh So'ta'mo' jangbe' vajar.

vajar luDorchoH cha' 'avwI'pu'. ghaH nIH cha'neH[103] 'uchtaHvIS 'avwI', 'oy'moH 'ach bepbe' vajar. tep Hat luleghmeH Hung pa' lughoS. pa' loSlI' Hung la'. be' ghaH. ben wuSDaj Dung QIDqu'mo' vay' Ho'Du' 'ang monbe'taHvIS. qu'moH. HatwI'Hey muchchoH. romuluSngan Hol lo'bogh pu'jIn QIj vajar. lujonta'. romuluSngan loghvaD Sung De' qar law' tlhIngan De' qar puS. chachmo' wej wo'vaD De' chu' lI'ta'.

wa'vatlh wejmaH vagh: potlh QonoS

jatlh Sa', "wo'vaD lI''a' je romuluSngan be'pu' mIlloghmey?" 'op romuluSngan Hol Se'vIrmey much. QIj vajar. lengtaHvIS romuluSngan chuQun, qum yaSpu' je, pegh jeychaj. pIj luSuchmo' parmaqqaychaj, loDpu' potlh ghochmeH, be'pu'vam noy ghoch. Se'vIrmey cha' vajar. ghe'naQ bomwI'vam ngagh yuQ qumwI'[105]. yo' 'aj Such Sutmey tuQbe'bogh nga'chuqqangqu'law'wI'vam'e'[113]. De'vetlh SuqmeH joS Se'vIrmey Suqta'. vagh ben mIwvam val 'oghta' 'ungya. QonoSDaq De' law' lIngta'bogh poj much vajar. QochlaHbe' Sa'.

na'SIqya'ngan nach Hom much la'. nubbej boqwI' nach. Do' ghuHmoHmo' Hota'ro' ghu'vam qelta' vajar vaj bItbe'chu'. QonoSDaq HoHvetlh qonta' 'ej 'ungya pa' tlhoy'Daq HoHvetlh mIllogh nuDlu'chugh 'oHDaq HovpoH leghlu'.

jatlh vajar, "Dochmeyvam DISo'pu'be'. nuq So'law'pu' vay'?"

ngaSwI' mach much la'. qaStaHvIS wa'maH wa' ben leghbe'pu' 'ach SIbI' ghov. "nuqDaq boSamta'?" jatlh vajar.

"ghojunQo'!" jatlh Hung la'. SID Hergh chaw' Hutlhmo' Hat Herghvetlh, 'ej ghajmeH meq Hutlh vajar. QIj vajar. ghaytan HoDpa' rav bIngDaq lutu'pu'. be'nalDaj cha'DIch Hergh ngaS. yatlhtaHvIS nobta' Qel. chaw' ghajpu'. be'nalvetlh QI' taDaq chaw' qonlu'.

"puqpu' DaHutlh bIjatlhpu'," jatlh qImyal.

"puqpu' vIghajbe'," jatlh vajar. "yatlhtaHvIS HoH jagh. boghpu'chugh puq DaH wa'maH ben boghpu'." vajar yaS wa'DIch ghaHpu' be'nalvetlh'e'. DaH beqpu'Daj ngaghQo'.

ratlh pagh. ngeb Hoch vajar HeSmeyqoq. Qamqu' vajar.

loQ ghopDaj vIHmoHDI' Sa', vajar 'uchHa' 'avwI'pu'. "qaH," jatlh wa' 'ej pu'HIch nobHa'. vaHDaq lan vajar, Sa' bejtaHvIS.

"reH Suvrup SuvwI''a'," jatlh Sa'. QuchHa'law'.[109]

wa'logh ghup vajar. quvDaj qaDqu'ta' Sa' 'ach Sa' ghaH 'ej SIbI' tlhIjta'. qeH moch neHbe'. qa'meH vIttlhegh lajmeH ghu' buSHa' vajar. jatlh "latlh De' vIqawchugh qaja'." pa'vo' yItta' Sa'. rInlaw' qepvam. tugh cha'maH wa'logh Qoy'lu'pu'. 'avwI'vaD jatlh vajar, "tachDaq HIDor."

"mIw DaSIQ 'e' DaSap, qaH," jatlh 'avwI'.

wa'vatlh wejmaH jav: tInuDchu'

Hung pa' motlhDaq vajar luqem. pa'Daq QumwI' HaSta', jIHwI'mey, quSmey let, raS, mIrmey je lutu'lu'. tlhoy'Daq 'op lojmItmey 'ugh lutu'lu'. Qorwagh Hutlh 'ach bIghHa'Hommey, yu'wI' pa'mey joq bIH 'e' Sov vajar. quSmeyDaq ba'taH Hota'ro' ghutar je. chaH retlhDaq ba'choH vajar. wej lunuDlu'pu'. jatlh ghutar, “HoD, ghu'vam vIqaSmoHta'mo' jItlhIj 'a nunuDchu' 'e' luHechba'. maSappu'mo' maH quvmaj wIchoq, 'ej ghu' wISeH je, vaj pagh SamDI' Qatlhbe' ghu'.”

chol wej 'avwI'pu'. jatlh Da', “qama'pu', petuQHa''eghmoHchu'!”

jatlh vajar, “qama' maHbe'! maSappu' jay'!”

jatlh Da', “SujIjQo'chugh qama' bomoj. DaH, petuQHa''eghmoHchu'...neS, qaHpu'!” wejpuH. qaStaHvIS wejmaH DIS choHqu'be'law'pu' mIwmey motlh.

yIvbeHDaj teqchoHDI' vajar, jatlh, “ghutar, qaHoHnIS 'e' vIlIjchugh HIqawmoH.” qIDmeH ghutarvaD DaS jaD.

jangDI' ghutar Sagh ghogh. jatlh, “choHoHmeH nom yIvang, muHoHpa' Hota'ro'.” Saghqu' Hota'ro' SutmeyDaj tuQHa''eghmoHtaHvIS. bIj lajrup qabDaj.

tugh paw wej avwI'pu'. HotlhwI'mey qeng. jatlh Da', “tInuDchu'. mIwmey motlh.” ghIq jatlh “qam­qaHpu'! raSvetlhDaq ghopDu'raj tIlan.” lob *Dugh* beq. vajar chol wa' 'avwI'. vajar yebDu'Daq raSDaq je mIrmey ngaQmoH. DaH DoHlaHbe' vajar, 'ej ravDaq raS jomlu'.

ghaH retlhDaq jatlhtaH latlh 'avwI' ghutar yebDu' ngaQmoHtaHvIS, “ghutar?! Daqoplu''a'? nuq Data'?”

jatlh ghutar, “ghobe', maSapta'.”

Haghqu' 'avwI', ghutar jIbDaq nejtaHvIS. jatlh “qatlh mumerbe'?” qIDlaw'taH ghaH ghutar je nuDtaHvIS. naDev Hoch nuv Sov'a' ghutar?

ralbe' mIw 'ach pagh lunop. Sutmeychaj, nuHmeychaj porghmeychaj naQ je nuDchu' 'avwI'pu'. nItlhDu', HotlhwI'mey je lo'. 'Iv quv choq mIwvam jay'? 'avwI' ghaHtaHvIS vajar qama' law' nuDta' 'ej rut qama' le' 'avmeH mIw SIQpu' vajar. voqqu'chuqbe' tlhInganpu', 'ej vay'Daq nejlu'DI' nejlu'chu'qu'be'chugh lI'Ha' mIw. vajar chor HotlhtaHvIS 'avwI' jatlh, “vay' Daghuppu'chugh tu'bej HotlhwI'vam. bIrorbe'mo' bIDo', HoD.” rorwI'vaD mIw Sov vajar.

wa'vatlh wejmaH Soch: Dojlaw' quvDaj

pe'vIl tlhuH Hota'ro' 'e' QoylaH HoD. qabDaj leghlaH vajar. tlhoS lImchoH Hota'ro'. mIrmey 'ompu'mo' yebDu'Daj pe'pu'. ghaHvaD jatlh vajar, "He yIghoStaH, Sogh."

pa' 'el latlh nuv. jatlh, "naDev qaS nuq jay'? quvchaj tobmeH Sapta'. quvraj'e' yIqIm. SIbI' tIngaQHa'moH." Hota'ro' ngaQHa'moHtaHvIS be', wuS rIQ leghlaH vajar. cheghpu' la'. 'avwI'pu'vaD jatlh la', "qeylIS pongvaD pe'Ip. ghotpu'vamDaq vay' Hat, vay' nub ghap boSamta''a'?"

"ghobe', qaH," jatlh 'avwI'pu'. Sutmeychaj tatlh 'avwI'pu' 'ej tuQ'eghmoH beq. mej ghutar Hota'ro' je 'e' luchaw' 'avwI'pu' 'ach vajar
ratlhmoH la'.

jatlh la' 'ach <vajar HoD> neH Qoy vajar.

jatlh vajar, "yIjatQo'. pe'vIl yIjatlh." lujlI' porgh 'e' chID SuvwI' neHbe' 'ach yu'wI' QoylaHbe'chugh Hub'eghlaHbe'.

jatlh la', "DaH tach DaghoS DaneH, qar'a'?"

vajar DorchoH la'. yIttaHvIS jatlh "HIvqa' veqlargh." *veS* HungvaD tlhIj 'e' yaj vajar.

vay' jatlh la', 'ach Hoch Qoybe' vajar. "QeHqu' Sa'. yIyep, vajar HoD," jatlh 'e' Qoy. Sal Hoch vajar pob.

qaSpu'DI' tup puS loQ Hagh la' 'ej jatlh, "bIvalqu'. rurbogh tamey qon tlhIngan HoD not 'e' vIlegh."

jatlh vajar, "ngIvtaHvIS tlharghDuj pIj Dalqu' Qu'. poH natlhlaH QonoS."

jatlh la', "Dalchu'be'. romuluSngan pu'jIn Dajonta'. romuluSngan Duj DatIjta'?"

tongDuj ngo'vo' pu'jInvetlh tlhapta' vajar. jatlh "QI' peghmey vI'angQo'."

yaj la'. tachDaq lupawta'DI' jatlh, "be'tlhar 'oH pongwIj'e'. lInISchugh Hung, HIrI'."

chuS tach. naDev DaqlaHbe' Hung. jonwI' nejtaHvIS vajar, ghutar ghogh Qoy, jatlh "vajar HoD! naDev!" raSDajDaq ba'taH je Hota'ro'. yebDu'Daj So'meH tochDu'Daq tlhay'meyDaj 'uchtaH Hota'ro' 'e' tu' vajar.

ba'choH vajar. jatlh ghutar, "qepDaq quvmaj Datobta''a'?"

wa'vatlh wejmaH chorgh: parmaqqay

"HIja', 'a tlhoS vIqoplu'!" jatlh vajar. romuluS HIq qangpu'bogh qImyal tlhutlhbe'chu' pay' 'e' tlhoj. jatlh "HIq vIpoQ." HIq SuqmeH Hu' ghutar. bItlaw' Hota'ro'. ghaHvaD jatlh vajar, "DaHjaj lI' qeSlIj. HI'Ij: SopwI'pa'Daq jIneppu'. wa'Hu' matlhutlhchoHpa' chIch qanum. Daqotlh. motlh yaS ngoy'nIStaHghach yajbe' QupwI'. nIbItmoHbe'DI' wIvmey Qatlh, yaS tlhIbHa' SoH."

QoylaHmeH vajar cholqu' Hota'ro'. jatlh, "yaS pov jIH vIneH. Qatlh HoD Qu' 'e' vIlegh. qaboQqang 'ej qaHubqang."

jatlh vajar, "DupIH qImyal Sa'. 'a qavoq."

Hem Hota'ro' 'ach vay' leghmo' jangbe'. raSchaj ghoSlI' jonwI' HIp tuQtaHbogh be' Quch'e'. qaH'eng ghaHlaw'. vajar juS 'ej Hota'ro' chol. paw' be'pu'. HotchuqtaHvIS QuchDu'chaj yev. Hotchuq je ghIchDu'chaj. "bangwI'," jatlh qaH'eng. Hota'ro' qab yach. 'uchchuq be'pu' ghIq jatlh Hota'ro'. "vajar HoD, parmaqqaywI' DaqIHlaw'pu'. qaH'eng vIlIH."

"vajar HoD," jatlh qaH'eng.

"yIvbeHvetlh Dunojta' parmaqqaylI'," jatlh vajar. tlhojbe'pu'mo' Hagh.

jatlh Hota'ro'. "yIlegh. naDev muDuQchu'pu' taj QIn." cha'meH ngechDaj lupoSmoH nItlhDu'Daj.

leghlaH vajar. "Doj," jatlh.

chegh ghutar, HIq bal, HIvje'mey je qengtaHvIS. "qaH'eng!" jatlh. ropyaHDaq Sogh qIHpu', Hota'ro' SuchtaHvIS. jatlh ghutar, "Dujmaj DaparHa''a'?"

HIvje' laj qaH'eng 'ej jatlh, "Dujvetlh luleHtaH'a' leghlaHbe'bogh romuluSnganpu'?"

mon vajar, jatlh. "wa'logh," 'ach QIjbe'mo' qID 'e' luHar latlhpu'. HIq lutlhutlh.

jatlh qaH'eng, "DujvetlhvaD 'Iqmo' Seng, wIHIjvIp. 'umbe'law' jonwI' 'ej buDqu'law' nubwI'Daj. Qop HochHom 'ej 'op 'ay'mey chu' vIngu'laHbe'. jagh Duj puylu'bogh boteq'a'?" qaSpu' 'e' chIDbe' vajar. jatlh qaH'eng "bIQSIp 'och tI'meH vay' mep Hum, choljaHmey je lo' jay'!"

jatlh ghutar. "wa'logh SeHlaw tI'meH mavjopmey lo' ghIrel 'e' vIbej."

"SeHlawvetlh yIngu'!" jatlh vajar.

"ngo'mo' Duj Hoch DInuD," jatlh qaH'eng. "ghorgh chen?"

jatlh vajar, "wa'maH chorgh ben. ngo'qu'be'."

wa'vatlh wejmaH Hut: noH ghu

jatlh ghutar, "wa'maH chorgh ben jIboghpu' jIH!"

"nuqDaq bIboghpu'?" jatlh qaH'eng.

"rIngDal loSDaq," jatlh ghutar.

jatlh vajar, "rIngDal loS? wa'maH chorgh ben DanmeH tlhIngan wo', rIngDal loSDaq qaStaH noH qar'a'?"

"HIja'. qaStaHvIS noHvetlh jIboghpu'," jatlh ghutar. "Sub jIHpu'."

"qaStaHvIS loS DIS neH taH mID noH. chay' Sub ghaHlaH ghu'e'? lut yIjatlh"[203] jatlh vajar.

mon ghutar 'ej jatlhchoH, "mID noHDaq negh chaHtaHvIS vavwI''e' SoSwI''e' je, qIHchuq. rIngDal loS lucharghmeH yavDaq Suv negh law'. 'omqu' Sungpu'. may'meyvetlh Dunmo' bommey law' luqonlu'pu', 'ach lutwIj neH Saja'. jagh lughobtaHvIS SoSwI' vavwI' je Ho'chuqchoH 'ej che'ronDaq tlhejchuqchoH. Hubchuq 'ej toDchuq 'ej SeymoHmo' may'mey nga'chuq, vaj yatlhchoH SoSwI'[111]. tInqu'choHmo' chorDaj SuvlaHchu'be'DI' tay'laHtaHmeH QaSvaD vutchoH. yoS luDantaHbogh, raQ luDab. pa'meyDaq Qongbe'ba' SuvwI'pu'. yavDaq Qong Hoch. qoSwIj ram SoSwI' chorDaq jIpupmo' vIvemmoH 'ej jIngojtaHmo' Qongqa'laHbe'. jIboghrup. Qongbogh SuvwI'pu' Sujbe'meH Hu' SoSwI'. tlhej vavwI'. QongwI' Daqvo' lughoS. yoHmo' SoSwI' jachbe' jIboghtaHvIS, 'ach jIboghDI' jIjachqu'. Qongbogh SuvwI'pu' vemmoH beymeywIj 'ej pay' jaghmey tu'. 'avwI'pu' HoHta'. nIn, Sechmey je luqeng. nIn lulIchlaHpa' vIvemmoHbe'chugh, Qongbogh SuvwI'pu' meQmoHchu' jagh. vaj <ghutar> mupong."

jatlh Hota'ro', "ghu tar? vIyajbe'."

jatlh ghutar, "ghuHta' 'oS. jaS jatlh SoSwI'. <ghuHta'> HechDI' <ghutar> jatlh. SepDajDaq motlh QIchvetlh. jIHmo' ghuHta' SuvwI'pu'." Hemba' ghutar.

jatlh vajar, "majQa'. Dun lut." wej'vatlh nem lutvetlh ja'taH ghutar qorDu' 'e' tlhoj vajar. vajar ghu lut ja'laH pagh. HIvje' tebqa'meH HIq qang.

HIvje' peptaHvIS jatlh ghutar, "batlh yaS wa'DIchma' chu' Hota'ro' Sogh ra'taHjaj!" tlhutlh Hoch 'ej Hota'ro' Hoy'.

jatlh Hota'ro', "woQ Quj Dapar Dajatlh 'ach DaHjaj bIpo', HoD. qImyal Sa' Datojta'!"

jatlh vajar, "tlhIngan tlham vIchIjnISDI' jImIS 'ach jagh'e' vIqaDlaH."