nuq bop bom: 'ay''a' loS

'ay' loSmaH chorgh: po qep

qep pa'Daq ghomchoH Mahoun pInpu'. cholDI' Mahoun, SaH chutpIn, QumpIn, jonpIn, Suy je. HoD leghDI' QumpIn, yel Hol rI'meH mu'mey jatlh. SIbI' tamqu'choH latlhpu'. 'eltaHvIS HoD, ngIq mu'mey DochHa' jatlh Hoch. jangpu'DI' HoD tamtaH pa'. motlhHa' ghu'vetlh. roD 'eltaHvIS Mahoun jatlhtaH beq 'ej qep taghmoHmeH tamnISmoH. mon HoD. 'eSSIm HoD je bopbogh joSmeymo' tamchoHpu'. ghelvIpDI' latlhpu' tIv Mahoun.

pa' tamDaq jatlh HoD, qa'vIn qangtaHvIS. “ratlh'a' chabHommey?”

“HIja',” jatlh QumpIn. “yuQvam Sung chabmey bIH. Ha'DIbaH wIbHa' ngaSbogh tIr ngogh bIHlaw'. 'eybe' 'ach pojta' QeDpIn. jochbe' jatlh.”

chabHom nub tlhap Mahoun. waH. 'upbej. jatlh “chabHomqoqvam 'eyHa' law' tlhIngan 'Iw 'eyHa' puS.” tlhoS voQ QumpIn. mon HoD. DeSDu'Daj So'taHmo' tlhaymey, DIr'e' rIQmoHpu'bogh tlhIngan nItlhpachDu' leghbe'lu', 'ach leghpu' QeDpIn. Mahoun jolpu'DI' QeDpIn, meHDaq cheghpu' 'ej QumpInvaD ja'pu'ba'. SovDI' QumpIn Sov Duj naQ net Sov. paw latlhpu' puS. chabHom 'eybe' woD HoD 'ej jatlh “peba'.”

raS Dechbogh quSmeyDaq ba'choHpu'DI' beq, jatlhqa' HoD, “Dach 'Iv? SaHmo' QumpIn, meHDaq vum chIjwI'ma' 'e' vIloy.”

“ghobe', HoD.” jatlh QumpIn. “Qong ghaH. meH SeH QeDpIn.”

jatlhtaHvIS QumpIn, pa' 'el QeDpIn. jatlh “DaH meH SeH yel Hol jatlhbe'bogh beq'e'. chay' vay' vIra' net pIH, yel Hol jatlhbe'chugh? nuqDaq nuvvam Suqqu' chIjwI'?” roD nuvpIn gheS chIjwI'. vumwI' chu' Suq 'ej ghoHchuqchoHchugh ghot, 'oD ghaH.

“beq yIvaqQo',” jatlh HoD. “Soch ben boghpu'DI' toy'wI''a' moj. luje'ta'mo' novpu' Huj QIchDaj 'a yel Hol jatlhbej. jav nov Hol jatlhlaH je. yItuv neH. DughIjchugh jatlhvIpchoH 'ej yajlaHbe'.”

“SutlhmeH ghorDaq ghaHmo' SuypIn'e', jISaH jIH” jatlh Suy Qup.

“maj,” jatlh Mahoun, “matagh. Farsule, nuSIgh'a' naDev chut?”

jatlh chutpIn.“naDev SuyvaD chut law' tu'be'lu'. rewbe'vaD HoS nuHmey DIngev net tuch. yInbogh Ha'DIbaH DIqemchugh, rop botmeH cha'maH Hut jaj weghnISlu'. qorDu'lIjvaD vay' Dangev DaneHchugh chutmey law' DapabnIS, 'ach naDev yelwIyyItnganpu' lutu'lu'be'mo' potlhbe'. ghorDaq Hat yIHmey, toy'wI''a'pu', jav Dop ghajbogh weQmey'e' je.”

“Hat weQmey'e'!” jatlh HungpIn.

jatlh jonpIn “jav Dop ghajchugh neH.” Hagh Hoch.

“chutmey vIja' neH. vI'oghbe'.” jatlh chutpIn.

'ay' loSmaH Hut: to'

Qu' De' muchchoH Suy. Sup Sar je'rupbogh, Dochmey Sar ngevlaHbogh je qel. HaStaDaq nagh beQmey, toghbogh mIlloghmey, mI'mey je cha'taH Suy. potlhba' je'meH to' 'ej Qulchu'be'ta'chugh vay', pIj bep Mahoun. 'a DaHjaj DalchoH much. 'eSSIm porgh qawchoH HoD. moHbej tlhIngan qab, 'ach SeymoH SomrawDu'Daj 'ej chabDu'Daj Doj law' HochHom yelwIyyItngan be'pu' chabDu' Doj puS. jatlhtaH Suy. ram chabDu'Daj. yuQvam tIr Daj Dellaw'taH. ghaqchoH QeDpIn. lam QaDqu' cherghlaHmo' 'ej Sarqu'mo' mut, mIDmeyvaD lI'qu' tIr. choH'eghlaH. yuQvam Daqvo' mIDmeyvaD ngeD HIjmeH Qu'. ghaq jonpIn. ma'laH Duj 'ej qIt choqmeH Hat. tIr law' je' neH SuypIn. SutlhmeH to' muchchoH Suy.

qagh chutpIn. jatlh “yuQvamDaq tIr ngevpa' nov qoj je'pa' nov, chaw'nIS tlhIngan Duy.”

jatlh Suy “yuQvam SeHbe' tlhIngan wo' net jatlh.”

jatlh chutpIn, “bIlugh. mabmo' qum'egh Hoch mIchvam yuQmey 'ej nIS latlhpu' net tuch. yuQvamvaD mab luwemrupbe'law' tlhIngan, 'a naDev mechlaH Hoch. ”

Suy Qup mawlaw' chut. jatlh “tIrvetlh le' lupegh luneHlaw' tlhIngan!”

jatlh Mahoun. “ghaytan pagh lupegh. ghaytan tIr qutlh luneH neH tlhInganpu'. Huch law' wIDIlqangchugh, tlhInganvaD ngevqangbe'choH Sungpu'. ghaytan chutvam wIpabchugh, tIr wIje' wIneH DuyvaD majatlhDI', maHvaD tIr lungev tlhInganpu'. vaj chep chaH 'ej Huch law' wIDIlnIS maH. wIqeltaH Suy nab wI'oghtaHvIS. yuQ charghtaHvIS tlhIngan mangghom, po'qu' Sa'pu'chaj net Sov 'ach Suyma' po' law' tlhIngan Suy po' puS. wIqay'be'moH.”

“qatlh tlhInganpu'vaD chut lucherpu' Sung? maybe'!” jatlh Suy.

ghaytan wIjwI'pu' boQmo' tlhInganpu' boQbogh chut chenmoH yuQ rIp 'e' lupon tlhInganpu', 'ach boHchoHmo' Mahoun QIjbe'. much vanmeH jatlh “vay' wISutlh qatlho'.”

'ay' vaghmaH: tIr wIneH

qepvaD Qu' Dotlh ja' QeDpIn. SopmeH SuQbe' Ha'DIbaH, naH pojta'bogh je. tayvaD Dargh lutlhutlh Sung 'ach tlhutlhchugh yelwIyyItngan ghaytan Dochmey SaHbe'bogh leghchoH. nuv QIHbe'bej ghu'vetlh, 'ach tlhutlhbe' 'e' chup. HerghvaD ghaytan lI'qu' Sung tI Sar. DaH chovnatlhmey boSlI' beq. lutlhqu' Sung cham, 'a nov cham Sar lo'law'. cham nap je'qangmo' naDev cheplaH Suy.

ja'pu'DI' Hoch pInpu' qep van Mahoun. DIlbe'chugh vajar HoD ghaytan lengvammo' chep, 'ej DIl vajar 'e' pIHmo' ghaytan cha'logh chep. buy' ngop. 'ach DaHjaj Mahoun SeymoHbe' Huch bajlaHbogh. tIr luje'meH Suypu', tlhInganvaD jatlhnIS HoD. 'ej yuQvamDaq wa' tlhIngan neH tu'lu' ja'pu' 'eSSIm.

mejpu'pa' Hoch, QeDpIn loSmoH Mahoun. jatlh “bImejpa' HIqeS. tIrvamvaD vay' le' lupeghlaH'a' tlhInganpu'? DuH'a'?”

“vIHon. maHvaD Dajbej tIrvam. rotlh 'a choH'eghrupqu'. yuQmey SarvaD lI'. Huch qotlh. 'ach SIbI' tu'laH SuchwI' 'Itlh. yuQDaq Dat tIr. wIpoj 'e' luSeHlaHbe'.” jatlh QeDpIn.

“vaj Hoch lupol luneH'a'? chaq wej pegh wItu'ta'. yej vIponlaH Sutlhqangbe'chugh tlhIngan.” jatlh HoD.

“tlhInganvaD le'qu'be' tIrvam. SachmeH wo'chaj yuQmey chargh. yuQ toqbe'Daq mIDmey cherbe' 'ej motlh tIrDaj'e' ghajmo' yuQ toq. ghaytan bIlugh. Sungpu' ngor luneH neH. mangghomchaj luje'meH tIr law' luje'nIS­qoj lunIHnIS. naDev weHchugh, DIvI' mab luwem, vaj tIr luje'nIS[1]. qutlh 'e' lumaS.”

“'e' vIpIH, 'ach SaHmo' tej vay' le' vIpIH je.” jatlh HoD.

meH rI' Mahoun. QummeH yaHDaq vum beq. ghaHvaD jatlh Mahoun “Inaq, tlhIngan Duy yIrI'. yIja' tIr wIje'meH ghom neH yelwIyyItngan Suy. SuchmeH poH yISutlh.”

“lu' HoD” jatlh beq. QumwI' SoQmoH HoD 'ej QeDpInvaD mon. “maHvaD tIr vIje'.”

vaghmaH wa': qachuHnIS'a'?

HoD rI' meH. jatlh beq, “jang tlhIngan Duy. DaHjaj yelwIyyIt rep wa'maH wej, veng Qe'Daq ghom ghaH, Suyma' je 'e' chaw'. Quv Qumta'. DuyvaD Suy pong vISovnISmoH.”

jang Mahoun. jatlh. “maj. vIjaH jIH.” QeDpInvaD jatlh “Datu''a'? yel Hol jatlhlaHchu' beqvetlh. DaghIj neH.” QeDpIn qab leghDI' Hagh HoD. “nuq?”

jatlh QeDpIn. “yaS wa'DIchlI'vaD bIjatlhqang'a'?”

Mahoun qIHpa' rollIw, QI' QulmeH Duj toy'. tej po' ghaH. Dujmey law' chIjpu'. HoD luqeSchugh Suypu' neH, vuDmey potlh Hutlh 'e' Sov Mahoun, 'ej 'ebmey chu' ngu'laHbej tej. toy'meH rollIw DIlchoH Mahoun 'ej yaS wa'DIch perta'. yaS wa'DIch poQqu'be' Mahoun 'ach potlh QeDpIn 'e' 'oS patlhDaj. wej DotlhDaj lajchu'ta' rollIw, 'ach bajbejta'. jatlhDI' QeDpIn, 'Ij Mahoun. pIj vangbe', 'a 'Ij.

qep pa' ngaQmoH HoD 'ej ba'choH. motlh patlhDaj lo'be' rollIw. lo'ta'mo' qImqu'.

jatlh QeDpIn “reH bIQubpa' bIvang.”

jatlh HoD “net Sov. wuqbe' yabwIj. wuq tIqwIj. motlh qar tIqwIj.” Duj muchmeH ghop joqmoH Mahoun. “malja'vaD qarmo' tIqwIj, Dujvam vIghaj. malja' wo'Hom vISeH. reH Sov tIqwIj. QoblaH mIwvam 'e' vISovmo', yaS wa'DIch val vIDIl. 'a yab Qel vIneHbe'. chotI' 'e' yInIDQo'. tIqwIj vIvoq.”

jatlh QeDpIn “tlhIngan be' Dangaghlaw'meH DuqeS'a' tIqlIj?”

Hagh Mahoun. jatlh “vIngaghbejta' 'ach ghobe': wa'Hu' muqeS latlh porgh 'ay'. jIHvaD qub wanI'vetlh. qaStaHvIS poH nI' be' vIngaghbe'pu'. SoHvaD poH vIngu'chugh bIyay'. motlh DeSDu'wIjmo' muHaj pagh muvup be'pu'. 'ach 'eSSIm luSeymoH. SaHmo' 'eb vIjon. 'ej vItIv.”

jatlh QeDpIn “ngaghtaHvIS tlhIngan, ralqu' net jatlh. loQ bIrIQ 'ach HoSghajba' be'vetlh. DuHoHlaHbej. chay' Da- Da- ...”

mon Mahoun. jatlh “chay' vIghatlh? choSeymoH 'e' DanID'a'? wanI' vIDelchu' DaneH'a'?”

SuDqu'choH QeDpIn qab. jatlh “Qob ghu' jIjatlh neH. 'utchugh, nIngaghqangbogh be' Qobbe' ...”

tlhoS voQ Mahoun HaghtaHvIS. jatlh “mevyap. qeSlIj 'oH'a'? QoblaH tlhIngan? bIghHa'Daq qaStaHvIS wa' jar muDech tlhInganpu'. Qob 'e' vISov.”

vaghmaH cha': QoblaH tlhIngan

monHa' QeDpIn, QubtaHvIS. jatlh “vIjatlhchugh, yab Qel DaDa bIjatlh 'ej bIqImQo'.”

“yab Qel yIDaQo' jIjatlhDI' lob pagh” jatlh HoD.

jatlh QeDpIn. “qalob jIH.”

“yIjatlh.” jatlh HoD. “chaq jIjangbe'.”

jatlh QeDpIn. “cha'Hu' tlhIngan DaqIHvIp. 'a vajar HoD DajatlhtaHvIS bIjaq 'ej 'eSSIm DaqIHtaHvIS DaSuv 'ej Dangagh. bIlImbe'meH bIjaq'eghmoHlaw'. chaq tlhInganvaD <Qo'> bIjatlhvIpmo' bIvang. DaHjaj qaS nuq bIjaq'eghmoHDI'? <Qo'> bIjatlhvIpqa''a'?”

jatlh HoD “qayaj 'a bImuj. Sotmo' vajar HoD 'ej SanDaj vISeHlaHmo' mughIjbe'. mughIjbej 'eSSIm 'a wIHbe'. mughIjchoHchugh tlhIngan, QIv chaH 'e' vIqaw. vIghatlhlaHmo' 'ej muHoHbe'mo' jIHaj 'e' vIcharghta'.” yev Mahoun. “Qatlhqu'. yabwIj vIDellaHbe'. nuv vIvuvbe'bogh vIngaghta'mo' jItuH 'e' vIpIH, 'ach jIHem. DaH yab Qel SID vIDachoH.” QeDpIn bejqu' 'ej jatlh “De'vam yIpegh.”

“jIjatlhpa' jatlh Hovmey.” jatlh QeDpIn. “chovoqmo' jIbel. 'a DaHjaj tIr Daje'meH Duy Dangagh'a'?” jatlh QeDpIn

Hagh HoD “ponmeH laHvetlh'e' vIghaj 'e' vIHon.” jatlh. “DaHjaj jISutlh neH. chaq De' vISuq.”

“yIlay'” jatlh QeDpIn.

pa' lojmIt poSmoH 'e' nID vay'. ngaQtaH. chobvo' jatlh ghogh “Mahoun HoD?” HungpIn ghaH.

“vIlay'” jatlh Mahoun 'ej lojmIt ngaQHa'moHmeH QamchoH. 'eltaHvIS Hung yaS, QamchoH QeDpIn.

jatlh Hung yaS “vengDaq Sughomchuq tlhIngan Duy, SoH je, qar'a' HoD?”

“bIlugh. wa'maH wejvatlh rep qaS.”

“tlhIngan Duy DaqIHDI' DurIQmoH, qar'a'?” QeDpIn qunmeH tlhe' Mahoun 'a mejta'.

“bong qaS,” jatlh Mahoun. “ram.”

“SughomtaHvIS qaQan vIneH” jatlh Hung yaS.

“Qo'!” jatlh Mahoun. “bISaHchugh jImobvIplaw' 'ej tlhInganvaD jIpujlaw'.”

“jISaHnISbe'. SoHvaD ngaQtaH jol vIneH. qay'chugh vay' QumwI'lIj leQ cha'DIch yI'uy 'ej SIbI' pIjol.” Qochbe' Mahoun.

vaghmaH wej: malja' bel ghap

rep wa'maH cha' vaghmaH Qol Mahoun, malja' Sut tuQtaHvIS. vengDaq narghDI' SIbI' Qe' ghov. qach tlhopDaq meQ qul 'ej qul DungDaq QIt DIng Suy' naQ DuQchu'bogh naQ. tlhe'taHvIS naQ, chaghDI' tlhagh, pan qul. bolmoH pIw. reD Hutlh Qe'. lam 'oH rav'e' 'ej tun beb 'ach Say'law' quS raS je 'ej He' Soj Dun. Suy' vutwI' juStaHvIS Mahoun van. Qe' 'el. wej SaH 'eSSIm. SIbI' chol jabwI'. DIvI' Hol jatlhchoH jabwI'. yaj Mahoun. Mahoun DevtaHvIS raS lughoS 'ej HIDjolev nob.

paw 'eSSIm. Quchlaw'. tlhIngan yopwaH, Sung yIvbeH, tlhIngan Ha'quj je tuQtaH. tIS yIvbeH 'ej HuSmo' mongDech ngech 'ang. Mahoun leghDI' raS ghoS 'ej SIbI' ba'choH. jatlh “nuqneH.”

tlhInganvaD rI'meH mu' 'oHbe' 'e' Sov Mahoun. malja' HuqmeH tlhIngan Duy rI'ta' Mahoun Duj vaj DaH Sutlhrup. be' mInDu' neH bej Mahoun 'ej jatlh “wa' vI' vagh 'uy' cheb'a' Sung tIr vIje' vIneH.” ghelbe'. qaDbe'. malja' ja' neH. jang 'e' loStaHvIS HIDjolev woH, 'ach HIDjolev buSbejbe'. be' bejtaH.

jangrupbe'law'. “qatlh?” jatlh.

SIbI' jang Mahoun. jatlh “Suy jIH. Dochmey vIngevmeH vIje'.” HIDjolev laDchoH. Sung Hol, DIvI' Hol je lo' 'ach DIvI' Soj mu' Sovchu'be'mo' Mahoun, Qatlh Qu'. HIDjolev roQ.

“tIr law' 'oS wa' vI' vagh 'uy' cheb'a'mey” jatlh 'eSSIm.

“wa' vI' vagh 'uy' cheb'a' ngI'bogh tIr 'oS” jatlh Mahoun. “qatlh to'waQ DayIvtaH?” tIqIpqu' 'ej nom tIqIp.

“qatlh wa'Hu' cha'logh chotlhob?” jatlh 'eSSIm. nuqjatlh? tIr qelbe'choH be'. mISmoH neHlaw'. Qapbe' Dupvetlh. SIbI' jang Mahoun.

“wa'Hu' qangagh vIneH. DaHjaj tIr vIje' vIneH. reH cha'logh qatlhobnIS'a'?” jatlh Mahoun. boH ghoghDaj 'ach ghu' tIvqu'taH. tlhIngan quv qaDpu' 'e' Sov.

jangpa' chol jabwI'. ghaHvaD Sung Hol jatlh 'eSSIm. jatlhpu'DI', Mahoun bejchoH jabwI'. Suy' 'angmeH Mahoun, tay'taHvIS SIqwI' qaywI' je joqmoH. vay' ghelDI' jabwI' jang 'eSSIm 'ej mej jabwI'. tIr qelmeH wej jangta'mo' 'eSSIm, loS Mahoun.

tagha' jang. jatlh “naDev tlhIngan Hol jatlh pagh 'ach muvuv. DaH burghlIjDaq ghonDoqwIj vIDuQchugh 'ej woSlIj SIchmeH 'etlh pe'vIl vIpep, nIS pagh. meghwIj lujabmeH lomlIj lujun neH. jejqu' ghonDoqwIj. vIruchchugh ghaytan yavvo' Salbe' qamDu'lIj.” buQbe' ghogh 'ach buQqu'taHvIS mu'mey, ram ghogh.

vaghmaH loS: tlhIngan 'Iw rur qettlhup

jangpa' Mahoun wa'logh tlhuH. jatlh “choHoHlaH 'e' vISovchu'neS 'eSSIm Duy.” DaH tlhIngan quv luvuvchoH ghoghDaj mu'Daj je. yIvbeH lISlaw' Mahoun 'ach QumwI' 'uchchoHmeH vIH ghop. HojHa'qa'moH QumwI'. jatlh “qatlh wa'Hu choHoHbe'pu'?” qaDqa'. be' qab bej, QumwI' leQ cha'DIch 'uyruptaHvIS. Qob tIv. qepvam Qob law' po qep Qob puS.

ghonDoq lelbe' 'eSSIm. jatlh “tlhoy ngeDmo'. muqaDbe' HoHlIj. manga'chuqlaHmeH jIvuS'eghnIS.” qogh choppu'bogh Hot 'eSSIm nItlhDu', jatlhtaHvIS. DaH rIQbe'law'. ghaytan nom vormeH Hoqra' lo'ta'.

wa'Hu' Mahoun HoH neHbe'chugh ghaytan DaHjaj HoHbe' je. SuDqang Mahoun. QumwI' leQvo' ghop teqpu'. jatlh tlhIngan “tIr vIngevrupbe'. yapbe'. pItlh.”

jatlh Mahoun “tIr law' tu'lu'. yuQ wIbavtaHvIS Dat tIr yotlh DIlegh. Hoch yuQvam tIr boyobchugh 'ej bopolchugh qenglaHbe' yo'raj. yuQ naQvaD ram cha' 'uy' cheb'a'. yuQ latlh Dopvo' Hoch vIje'qang. yuQvamDaq law' vengHommey.”

leSlaw' 'eSSIm. loQ leS 'ach SutlhtaHvIS choH mach tu'laH Mahoun. tIr Sum SaHbe' 'e' ponDI' “luq” jatlh tlhIngan Duy. tlhoy ngeD. Hoch Huch 'eb qelbe'law'pu' tlhIngan 'ach vuS'eghbe' Mahoun. SIbI' je'meH chaw' qI'meH 'eSSIm nob 'ej qumvaD DujvaD je lI'. “lIw 'oH” jatlh Duy. “wa'leS nav lajqangbogh tlhIngan ngIvwI' qanobrup.”

Soj qem jabwI'. Ha'DIbaH ghabHey 'oH 'eSSIm nay''e'. reghtaH. Doq 'Iw. reghbe' Mahoun Suy' 'a qettlhupmo' ghIH. SopmeH ghop lo'. QumwI' leQ 'uynISchugh Mahoun qay'. 'ach 'utbe' Sotlaw'. Dargh je qem jabwI' 'ach QeDpIn ghuH qawmo' tlhutlhbe'. bong tIr pegh 'ang 'eSSIm 'e' tul Mahoun 'ach SoptaHvIS Satlh qun DeltaH. lInglaHghach, ghewmey, tI QIv, pochmeH mIwmey je bop. tIr pochmeH to' 'oghlaw'pu'bogh veng wa'DIch Sa' tIQ Del. tej Hol jatlhmo' qImchu'be' Mahoun. lojDI' SojDaj mej 'eSSIm. pagh le' jatlh. mej neH.

SojDaj Soppu'DI' Mahoun jabwI' DIl 'ej Qe' mej. qIDmeH jachchoH 'ej QumwI' leQ cha'DIch 'uy. SIbI' jachtaHvIS wewchoH veng 'ej DechchoH jolpa', jol SeHtaHvIS Hung yaS. Mahoun ghopDu' qab je leghDI' merlu'. “yIleS.” jatlh Mahoun. “qettlhup 'oH. qaqaD neH. nom bIvangmo' 'ej pov qechlIj qanaD.” nItlhDu' roStaHvIS Mahoun tlheD.

vaghmaH vagh: taS SuQ

meH ghoStaHvIS HoD, QeDpIn legh. ja' Mahoun “tlhInganvaD le'law' mon Sep tIr.”

jatlh QeDpIn “Sung tIr SaHbe'. tIr chu' 'oghlaw'lI'. yI'el. vay' DaQoy DaneH.”

QeDpIn pa' 'el HoD. SaH SuypIn. jatlh “Mahounoy, qaHoy'. batlh tlhIngan Duy Daponta'. DaH tIr wIje'lI'.”

“tlhoy ngeD,” jatlh HoD. “tlhoS morghbe'.” Haghqu' SuypIn. jatlh HoD “nuq vIQoy vIneHlaw'?”

jatlh SuypIn “tlhIngan jInmolmo' joS Sung.” 'IjmeH HoD ba'choH. jatlhtaH SuypIn “tIr nIv lu'oghlI' 'e' lumaq tlhIngan. Harbe' roghvaH. wa' yotlhDaq tIr le' pochta' tlhIngan tej. pegh, 'a pochtaHvIS lubej 'op Sung. pochta'DI' yavDaq taS ghomHa'. mejpu'DI' tlhIngan, pormeyvo' 'op taS luboS. tar 'oH. ropchoH Hotbogh nuv'e'.”

wa'logh tengchaHDaq loSpev Sorghta' Human jech tuQtaHbogh tlhIngan'e' 'e' Sov HoD. bong QuSvetlh lutu' yIHmey. 'ongba' tlhIngan ghoqwI'pu'. QeDpInvaD jatlh HoD “tIr pochlu'DI' 'oHDaq tar lIchlu'chugh, tIr SuQ lInglu''a'?”

“ghobe'. 'ach chaq tar lIngbogh tIr 'oghlI' tlhIngan.” jatlh QeDpIn. “tIr motlh poch 'a tIr SuQ yob.”

jatlh SuypIn, “tlhIngan tIr yobmeH boQ Sung puS. ja' pov tIr chu'. tIr lIngbogh wej yotlh motlh rur tIr lIngbogh yotlhvetlh. paSloghchajDaq tIr lunIH boQwI'pu'.”

“chovnatlh Daghaj'a'?” jatlh QeDpIn.

“ghobe'.” jatlh SuypIn. “Ha'DIbaHvaD 'op tIr je'. SuQbe'law'. latlh pochqa'ta' 'ach pagh lIng. lamDaq Hegh Hoch. pItlh.”

jatlh QeDpIn, “ghaytan loSpev, Sung tIr je Sep 'e' nID tlhIngan 'a mut chu' pochDI' vay', qaS pagh. pIj qaS cha' mut luDuDlu'DI'.”

SuypInvaD jatlh HoD, “maj. ghorDaq bIlI'. Dargh yItlhutlhQo'.”

Hagh SuypIn. jatlh “bong vIghojpu'! jIHmo' Sov rollIw.”

“nuq Daleghpu'?” jatlh HoD.

“mI'bogh HoSDo'. Daj. vIruchqangqa'. chaq yuQmajDaq je'qang vay'.”

“ghaytan.” jatlh HoD. “chovnatlh mach yIje', ghIq DujvamDaq DavutlaHmeH yItob. Sapqangbe'chugh vay', beq yInob. Qapchugh, wa'maH cheb'a' Qenvob tIje'. teppIn yISovmoH.” wa'maH cheb'a' neH nuDnISbe' yelwIyyIt veH yaS 'e' Sov HoD.

“meHDaq SoHvaD SaD jabbI'IDmey tu'lu'.” jatlh QeDpIn.

“vIloyta',” jatlh HoD.

vaghmaH jav: vu'wI' tup

Duj tIn vu'mo' Mahoun, qaStaHvIS po, DungluQ, pem, ram je Qu'mey Sar ta'nIS. pIj ramjep vumtaH. reH ghom vay' pagh rI' vay' pagh tlhob vay'. tIv Mahoun 'a rut QubnIS je. QumpIn rI' 'ej jatlh “qaStaHvIS vaghmaH tup HISujQo'.” pIj DummeH pagh ghommeH ra' 'a DaHjaj yIt neH. chob chong ghIr 'ej tep choQDaq lengchoH. choQDaq cha' beqpu' ra'lI' teppIn. jatlhbe'choHDI' teppIn, moDchoH beq. tep luqeng. ngaSwI'mey poSmoH. tep luQaylI'. bejtaHvIS teppIn. mong SomrawDu'Daj QeyHa'moHmeH, woSDajDaq yuv 'ej nach tlhe'. chollI' HoD 'e' leghDI' mon. jatlh “qatlh naDev juSuch?”

jatlh Mahoun “qaleghDI' reH jIQuch.” vIt. jot teppIn. not 'ov. Doj 'e' nIDbe'. yuDHa'. tIchbe' 'ej bochmoHbe'. be' ghaH. ngaSwI' tIn peptaHvIS, 'eSSIm porgh rur porghDaj DaHjaj 'e' tu' Mahoun. va. qaStaHvIS vagh DIS Hoch be'pu' vIbuSHa'. cha'Hu' wa' vIHot 'ej pay' yabwIj Dan. teppInvaD jatlh “Qu'vaD Hoch DapoQbogh Daghaj'a', Luhirey?[1]”

“HIja' HoD.” jatlh.

wovchoH teppIn QumwI'. jang 'ej 'IjchoH. jatlh “ghobe'. DaH yaHbeHbe'.” 'Ijqa'. “HIja' wa'leS po qanobqangbej.” DochHa' teppIn 'ach QumwI'vo' jach vay' 'e' QoylaH HoD.

teppIn ghopvo' QumwI' tlhap. 'Ij ghIq jatlh “jatlh Mahoun HoD. teppInma'vaD jach 'Iv?” tlhIjchoH Suy boH. jatlh Mahoun “bInabpu'be'chugh pIch ghajbe' teppIn. DaH yItlhIj.” teppInvaD QumwI' nobHa'.

rInpu'DI' jabbI'ID, QumwI' SoQmoH teppIn 'ej mon. “vISIQlaH. be' nen jIH.” ngaSwI' tIn woHchoH 'ach Dej ngaSwI'. choQ ravDaq pum pu'HIchmeyHey. wa' woH Mahoun. “puj HIch 'oH” jatlh teppIn. [15]

“nuqjatlh?”

“puj HIch. DabachDI', DoS SomrawDu' pujmoH. HoHbe'. 'oy'be'. motlh pumbe'. ru'ba'. 'a nom qetlaHbe', pe'vIl qIplaHbe'. Hub'eghmeH lI'. Ha'DIbaH SeHmeH lo' wIjwI'. 'a buvlu'DI' HoS nuH 'oHmo' naDev Hat. tepvam wIQolpa' DIteqnIS.

“Daj” jatlh HoD. puj HIch roQbe'. “nIghongqa'chugh Suy, HISovmoH” jatlh, 'ej tep choQDaq yItqa'.

vaghmaH Soch: puj HIch

yIttaHvIS meH rI' Mahoun. “tlhIngan Duy yIrI'” jatlh. “maHvaD tIr je'meH chaw' ghaj. junobrup'a' yIghel.” yIttaH. Qub. qay'qu'be' 'eSSIm ghu'. beqwI''e', beqwI' be'nal ghap vIngaghchugh vaj qay'. 'a nov ghaH 'eSSIm'e'. parmaqna' 'oHbe'. maQuj neH. joSlaw' beq 'a muqIchbe'. HoD jIH. DIbmey vIbajta'. 'ej ghaytan ngongmeH wa'logh mulaj tlhIngan 'ej not qaSqa'.

puj HIchqoq nuDchoH. 'oHDaq cha' lISwI' lujomlu': HoS poH je lISlaH. wej tup, HoS mach je wIv. ghaH poS chap Qeq. chu'. qaS pagh. wejlogh chu'wI' 'uy. qaStaH pagh. Hujlu'law'pu'be'. yopwaH qoghDaq lan. 'ugh HIch. 'ugh'a'? ngaSwI' SumDaq <wa'maH cheb> ghItlhlu'. 'ugh 'ach roD peplaHbej Mahoun. pep 'e' nID. 'ughqu'law'. ravvo' peplaHbe'. puj HIch nuDqa'. Dajqu'. qel'eghDI' pujbe'. pIvqu'law'. 'ach 'ughchoHlaw'pu' Dochmey.

rI' meH. jabbI'ID QoymeH QumwI' 'ugh lel HoD. “DaH Dujatlh neH tlhIngan Duy” jatlh QumpIn.

“ghorar,” jatlh HoD. wabHom lIng QumwI'. “'eSSIm Duy?” jatlh.

“jIH. SoHvaD chaw' vIghaj.” QumwI'vo' jatlh 'eSSIm ghogh. QoyDI' bomchoH Mahoun 'Iw. chaq qaSqa'.

jatlh Mahoun “chay' chonob DaneH?”

jatlh 'eSSIm “naDev yIjol. Quv rap bolo'pu' SoH QeDpInlI' je.”

“lu'.” jatlh HoD. “qaSpu'DI' wej'meH vagh tup jIjol.”

QumwI' SoQmoH. DaH 'ughbe'qa'. wa'maH cheb ngaSwI' pep. 'ugh, 'ach motlh. roQ. chob chong toS 'ej HoD pa'Daq puj HIch Hujchu'. lISwI'meyDaq wa' rep, botlh HoS je wIv. wepDaq HIch qat 'ej wep qengchoH. tlhInganDaq bach 'e' ponmeH wej qech QaQ 'oghpu'. yabDaj Huv lunIStaH tlha'bogh wanI' qechmey.

vaghmaH chorgh: chaw'

chob'a'Daq QeDpIn legh Mahoun. jatlh QeDpIn “tIr vIqeltaH. chovnatlh vIghajbe'mo' ngermey maw' vI'oghtaH. chaq SuQbe' tIr 'a SopwI' choHlaH.”

jatlh HoD, “chay' choH?”

jatlh QeDpIn “HoSghajmoH'a'? SuvvIpmoH'a'? chaq tlhIngan boQqangmoH. vISovbe'.”[36]

Qub HoD. chob'a' tlhoy'Daq loQ ro' mup. jatlh “DuHbe'! muvuQ tlhInganvam. jIHojHa' 'e' vIchID 'a mungejta'be'.”

jatlh QeDpIn “naDev Soj DaSoppu'pa' DuvuQ. Hoch DuH vIqel neH. tlhInganvaD nuH mojlaH tIr.”

jatlh HoD. “yuQDaq jIjol. Suy chaw' munob tlhIngan. chaq SoHvaD tIr De' vISuqlaH.”

“tIrDaj chovnatlh DaSuqlaHchugh HInob.” jatlh QeDpIn.

“luq,” jatlh HoD jolpa' luSIchDI'. “HIjol.” Quv nob.

jolpat ravDaq gho'taHvIS HoD jatlh “meHvaD yIjatlh qaStaHvIS wa' rep HISujQo'. 'a HungpIn yIja'Qo'.”

“lu',” jatlh QeDpIn. “qatlh wep Daqem? ghorDaq tujqu'mo' 'utbe'bej.”

jatlh HoD. “nob qat. yIrIH.” wewchoH pa' 'ej wewbe'choHDI' yotlhmey moj. Mahoun qIp tuj. yu'egh rur. 'eSSIm qachDaq yIttaHvIS lutu' Sung puS. lubej 'a nISbe'. tugh 'eSSIm qach SIch. lojmIt qIpmeH ro' lo'. poSmoH 'eSSIm. Ha'DIbaH DIr chIS tuQtaH. Dat QeyHa' 'ej tlhopDaq bID poStaH. porghDaj Dun Ho' Mahoun. chIch much'eghbe'chugh vaj pImchu' tlhIngan be'pu' yelwIyyIt be'pu' je. qaSqa'law' cha'Hu. Quch yIQmoHta'be'chugh tuj, DaH yIQbej. yopwaH lISnISchoH. jatlh “'ey.”

“'ey nuq?” jatlh 'eSSIm 'a yajba'.

“yel Hol mu' 'oH” jatlh Mahoun. “<DaH chaw' HInob> 'oS.”

“chaw' qanob,” jatlh 'eSSIm. “yI'el.” qach 'elpu'DI' qoD bIr law' Hur bIr puS.

“qaq,” jatlh Mahoun. “naDev bIrmo' jIbel.”

“tuj cherghnISlaH SuvwI',” jatlh 'eSSIm. “pujmoHchugh vaj pujtaHvIS Suv 'e' ghojnIS.”

'eb ghov Mahoun. jatlh “bIpujtaHvIS bISuv 'e' DatIv'a'?”

“'utbe' bel,” jatlh 'eSSIm. “vISIQqang.” De'wI'Hom lellI' 'eSSIm. raSDaq lan 'ej lIS. “naDev yISen,” jatlh.

jIH SenmeH 'eSSIm retlhDaq Qam Mahoun. nIH SenwI' muchtaHvIS, HIch So'bogh wep qeQmoH poS ghop. Huv 'e' 'olpu'DI' wejlogh chu'wI' 'uy.

vaghmaH Hut: bom cha'par

HIchmo' qaSlaw' pagh. jIH SenmeH Mahoun ghop Dev 'eSSIm. jIH legh Mahoun. "yIloS." jatlh. "pIqaD vIlaDlaHbe'. vISenqangbe'."

ghopDaj 'uchHa' 'eSSIm 'ej De'wI'Hom chu'Ha'. QeH'a'? ghaH retlhDaq Qammo' qab leghlaHbe'. nom HIch qatqa'chu'. raSvo' nav Sar nuD 'eSSIm. wa' wIv. tlhe' 'ej MahounvaD nob. QeHbe'law'. "DujlIjDaq bIcheghchugh chaw' 'oH yIja'." mISba'mo' Mahoun Hagh 'eSSIm. jatlh "chutmey boHeQmeH nav'e' poQ tlhIngan wo' 'e' DaHarbej'a'? tI QIv HoHmeH taSvaD lo'meH mIw Del. Sung tIr Daje' 'e' vISaHbe'. tIr chu' ngev jIvwI' 'e' wISeHnIS neH. wej potlh 'ach Sachpa' jInmol chut DIcher."

chaw'qoq tlhap Mahoun. "SuQ'a'?"

mISlaw' 'eSSIm. jatlh, "SuQ taS Delbogh. SuQbe'chugh HoHbe'. 'a SuQbe' nav'e'."

jatlh HoD "'a qatlh chonob?"

jatlh 'eSSIm "bIDaj. bIyoH. bIQIp. naDev Dal yInwIj. qangaghqa'meH qatoj."

chotojnISbe' jatlhbe' Mahoun. 'ach qay' wa' mu'. "bIcheghchugh bIjatlh?" jatlh. toy'wI''a' mojmoH neH'a' tlhIngan?

yIvbeH poSmoHwI' ghIrmoHchu' 'eSSIm. tlhoS chabDu' ngaSbe'choH. pup chorDaj SomrawDu' tlhagh je. 'eyqu'. bolbe'meH wuSDaj SoqmoH Mahoun. jatlh 'eSSIm, "qaHoHbe' ... jIvuS'eghlaHchughghgh."

nom wIvmey chov Mahoun. lajlaH. lajHa'laH. Haw'laH. Haw' neH tIqDaj. lajHa'chugh tlhIngan nong mevlaH'a' wa' mu'tlhegh nap? lajchugh puj HIchqoq voqlaH'a'? wIv. wIvbe' tIqDaj. Qamqu'. Ho'Du'Daj 'ang. vaQqu'choH porgh pe'vIl jangtaHvIS. 'eSSIm laj. wep nav je chagh 'ej pa' HeHDaq vo'meH pup. wup. bommeH ghogh 'IH ghaj Mahoun 'ej bom 'e' tIv. tlhIngan lurDech rurchu'be' 'ach be' nongmoH ghoghDaj 'e' Sov. cha'par bop bom. ghe'naQDaq be'vaD cha'par bom mugh loD. mughbe'ba'. be'vaD jatlh neH 'a jatlhlaw'mo' bo'Degh'e' jaqlaH loD. MahounvaD lI' Dupvetlh. SIbI' HIvchoH 'eSSIm. DaHjaj pagh chuH. chol 'ej Mahoun volchaHDu' 'uchchoH. pa' reDDaq Mahoun yuvmeH QeyHa'choH SomrawDu'Daj 'ach qaSpa', 'eSSIm yebDu' 'uchchoH Mahoun 'ej tlhe'qu'. 'uchHa' 'eSSIm ghopDu'. 'eSSIm DeSDu' pepmeH pe'vIl yebDu'Daj luH. 'omqu'ba' 'eSSIm 'a ngeplaHbe'. poSqu'choH mInDu'Daj pa' reDDaq yebDu'Daj yuvtaHvIS Mahoun. HoS naQ ra'law'mo' be' tlhuHqu' 'ach SeHlaH Mahoun. latlh bom tlhegh bom. "jatlh cha'par loDvetlh yIvoq." yel Hol mu'mey mughbe'.

noghqu' 'eSSIm 'ej loQ leSpu'mo' Mahoun, nargh. DoH 'a HIvrupqa'law'.

javmaH: vuS'eghghghach

jop 'eSSIm. tonSaw' mIw lo'choH. SuvwI' ghaHbe' Mahoun'e'. Hub''eghmeH mIw nap Sov neH. 'a pujmo' 'eSSIm QIt vang 'ej vangDI' HoSHa'mo' Qagh. junDI' Mahoun gho'Ha' 'eSSIm ghIq ravDaq Dej cha' nuv. muplaHpa' 'eSSIm, Qamqa' Mahoun. Qamqa'taHvIS be' bej. Soy'bogh SuvwI' Doy'qu' rur. 'uSDu' chongmoHmeH ravDaq yuvnIS DeSDu'. QamtaHvIS ngaDHa'. wa' volchaH neH 'uch yIvbeHDaj. latlh DopDaq HuS. tlhuHqu'taHvIS vIHtaH chabDu' 'e' bej Mahoun. bomqa' "jatlh cha'par yIvbeHlIj yIteq." yIvbeHDaj'e' teq Mahoun. naDev tujchoHpu'. bom "DIrlIj 'IHDaq jul tIH tItIv."

mISlaw' 'eSSIm. lojmIt ghoSmeH He lujuvlaw' mInDu'Daj. be' rIQmoH neHbe' Mahoun. Qan neH. Qorgh neH. pay' tlhIngan tay yajchoH. Suvqu'chuqbe' ngaghwI'pu'. loD qaD be'. tob. be' tlhuchpu'DI' pagh pIlmoHta' loD, HoSDaj 'angta', 'ej ngaghrupchoH be'. jatlh Mahoun "qaHoHbe'. jIvuS'eghlaH." nongmo', loD tInqu' ghogh rur ghoghDaj. tlhIngan loD ghogh rur. Ho'Du'Daj 'angqa'. tlhIngan bom mu' qaw 'ej jatlhchoH.


mu' rurbe'bogh wabmey'e' lIng 'eSSIm Hugh, yIttaHvIS. quS 'ugh retlhDaq mev. quS pepmeH joD 'ej ravvo' luHqu'. qaSlaHpu''a' wa' rep? Qub Mahoun. Qapbej'a' lISwI'vetlh? quS chuH 'ach loS 'uj chuq neH chav. quS yoyHa'moH Mahoun 'ej 'eSSIm ghaH je jojDaq lan, choltaHvIS 'eSSIm. quS SIchDI' ghaH retlhDaq QamchoH 'ej volchaHDaj DungDaq ghop vIHmoH. tlhoS be' Hotbe'. pob Hot 'a DIr Hotbe'. be'vaD tlhup. jatlh "quSDaq yItorchoH." lob be'. tuQHa'moH. Sa'HutDaj DIr qIjqu'vo' Sut DIr chIS SurghtaHvIS 'ombe'. 'eSSIm jIbDaq qabDaj lan Mahoun 'ej larghmeH pur, roDajDaq yachtaHvIS ghopDu'Daj. SeymoH tlhIngan nong pIw. tuQHa''egh Mahoun be'vaD tlhuptaHvIS 'ej yachtaHvIS. QuchDaj vIl nuD nItlhDu'Daj. HujtaH 'a chaq moHchu'be'. vIl je latlh porgh 'ay'. vIl 'ej yIQqu', loD Hevrupmo'.

javmaH wa': chaloy

"qaneHqu'," jatlh Mahoun 'ej 'eSSIm QarghDaq QInDaj let jop. Mahoun beyHom Qoylu', chaQtaHvIS. tuj be'. QeyHa'. vIHchoH. ngaghtaHvIS jatlhbe'law' tlhInganpu'. chaq nongchu'mo' chaHvaD qItHa'. 'a be' tungHa'meH jatlhtaH Mahoun. jangbe' ghoghDaj 'a jang porghDaj. yuv. DoH. yuvqa'. tay'taHvIS porghDu', bom 'Iwchaj. DuQqu'meH, 'IvtIHDu'Daj 'uch Mahoun. pe'vIl 'eltaH. noghtaHvIS ngaDHa'choH quS. pay' DIng 'ej pumchoH. 'eSSIm QorghmeH, chaghtaHvIS quS, be' qengchoH Mahoun. 'ach tlhIngan pujmoHpu' HIch, tISmoHpu'be'. 'ughmo' qaStaHvIS lup neH qenglaH. yItHa' 'ej raSDaq lan. ghomHa'choH navmey. DubDajDaq QotmeH 'eSSIm tlhe'moH. 'ombe'chu'. raSDaq QottaHvIS 'eSSIm 'uSDu' pep Mahoun 'ej QutlhmeH volchaHDu'DajDaq 'uSDu' lan. ngaghqa'lI'.

be' HoSghaj ghatlh Mahoun 'e' tIv 'ach raSDaq noghtaHvIS 'eSSIm porgh nong, be' belmoH 'e' tIv je. tlhIngan ghaH 'e' qelbe'choH. tIvchu'mo' latlh qech qellaHbe'. belDaq porgh HaH. 'ej HoSghajqu'mo' bel, porgh naQ Dan. tlhuHqu'. Qom. qaStaHvIS lup tlhoS QamlaHbe'. ngaD'eghqa'moHta'DI' QamtaH 'ej 'eSSIm DIr yach. jatlhbe'taH 'eSSIm 'ej bejlaHqu'be'law' mInDu'Daj. chaq tlhoy puj HIch lo'pu' 'e' HajchoH Mahoun. chaq tlhInganvaD QapHa'. chay' DISlaH? "'eSSIm," jatlh, 'ej jatDaj qotlhmo' tlhIngan wabmey, jatlhqa' "'eSSIm." volchaHDu'Dajvo' 'uSDu'Daj teq. raSvo' HuStaH.

jatlhchoH 'eSSIm, "chaloy, chotlhuchchu'pu'." ba'choH ghIq joD 'ej Mahoun roSchoH.

bang pong QoyDI' Mahoun, ghov. Sov Hal ngu'meH Qub. chaq qech lo' bom Qut bombogh 'avwI'. chaq rut qama' vaqmeH bang pongqoq 'ogh 'avwI'pu'. DIvqu'mo' Mahoun 'eSSIm jIb yach 'ej jatlh "'eSSIm, qatojta'. jItlhIj."

ba'qa' 'eSSIm 'ej Mahoun volchaHDaq DeSDu' qatchoH. Hotchuqmo' ro'Du'chaj mupqu' cha' tIqchaj 'e' lutu'laH. Mahoun teSvaD jatlh 'eSSIm. "vISov."

jatlh Mahoun, "qatoj chay' 'e' DaSov?"

jatlh 'eSSIm "tlhIngan DatojlaHbe'. vay' DapeghlaH 'e' DaHarDI' tlhaQ. bIQaghtaH." raS lItHa' 'ej wIjwI' Sut tuQchoHmoH. jatlh "pagh vIpeghmo' jIH 'ej chotlhej 'e' vItIvmo' qachergh. qamaw'a'?"

monqu' Mahoun. jatlh "ghobe'. choQuchqu'moH."

jangbe' 'eSSIm. yopwaHDaj tuQmoHlaHpa' Mahoun, mej.

javmaH cha': yInroH

pa' chImDaq jatlh Mahoun “mejpa', mu' DochHa' lu'oghlaHbe''a' tlhInganpu'?” yopwaH tuQmoHta'DI' chaw'qoq, HIch qatbogh wep je woH 'ej lojmIt poSmoH. loj 'eSSIm.

QumwI' lel Mahoun 'ej Duj rI'. jang QumpIn. “bIjolrup'a' HoD? wa' rep bIjatlh. qaSpu' cha'maH loS tup neH.” DochHa' ghoghDaj 'ach vaq 'e' Sov Mahoun. HI' ghaHbe'mo' lajqang. jatlh “DapoHchugh DatIvbe'. HIjol.”

jolpa' pawDI' SeHlaw 'emDaq Qam HungpIn. “nuqDaq tlhIngan?” SIbI' jatlh.

“vISovbe',” jatlh Mahoun. “qatlh bIghel?”

“Dutlhej, qar'a'?”

“Duja' 'Iv? jujIHlI''a'? loQ yInwIj vIpeghlaHbe''a'?” jatlh Mahoun.

DoH HungpIn. “qajolmeH yInroHlIj vIchevnIS vaj Sumbogh latlh yInroH vInej. 'a bImoblaw'.” yev HungpIn. “qayu' 'e' vIHechbe'. Dutlhej tlhIngan jatlh QumpIn. qaQannIS, HoD.”

“bIlugh. SarI'pa' mej. yInroHDaj DaSamlaH'a'?” jatlh Mahoun. bojqu'be'mo' HungpIn tlho' Mahoun.

“vISamlaHbej,” jatlh HungpIn. SeHlaw ruQtaHvIS nItlhDu'Daj jatlh “yuQvamDaq puSmo' nguSDI' 'ul je yInroH nIS pagh. motlh QumwI' QuvDaq nuv neH ngu'laH pat 'ach neDev QumwI' Hutlhbogh nuv'e' SamlaH 'ej yInroHDaj HotlhlaH. yIlegh. tlhInganlI' vISamta'.” jolpat rav lItHa' Mahoun 'ej HungpIn retlhDaq QamchoH. nuvHey cha'taH jIH mach. “Huj.” jatlh Hung yaS. “pujlaw' yInroH.”

“ghaytan Doy'mo',” jatlh Mahoun. mon HungpIn.

“vIHon,” jatlh. “Doy'chugh nuv pIv jaS cha'lu'. vIHbe' 'ej tlhoS tlhuHbe'. QIt vang'a' tlhIngan tIq?” 'eSSIm 'uch 'e' qaw Mahoun. nom Qapbej tIqDaj. jIH machDaq tlhoS Qapbe'law'.

“jol! DaH yIjol!” jatlh Mahoun. jachchoH. jolpat SeHlaw' QumwI' mup 'ej jatlh “jolpat! QelHom!”

vang HungpIn. jolpat rav DungDaq wewchoH muD. DIng 'ej tlhIngan be' moj. wewbe'choHDI' Dej be'. ghaH retlh jaHmeH moD Mahoun. SoQtaH mInDu'Daj. jIbDajDaq SutDajDaq nujDajDaq je tIr tu'lu'. ghaH DopDaq tlhe'moH Mahoun 'ej nuj HuvmoHmeH SenchoH. chol je Hung yaS 'ej tugh pa' lu'el QeDpIn, teppIn je. Qel qengbe' Farsajii 'ach rIQwI' boQlaH beq 'op. pawtaHvIS bejchoH Mahoun 'ej jatlh “tlhuHbe'taH.”

javmaH wej: yIntaH

'eSSIm buSqa' Mahoun. tlhoS Huv nujDaj 'ej HughDaj botbe'law' tIr. 'eSSIm tlhe'moHpu' teppIn. DaH joQDu'Daq yuvtaH. Qel Hoqra' yan [23] QeDpIn. "yIntaH." jatlh QeDpIn "tlhInganvaD lISbe'lu'mo' lI'qu'be' 'a ..." qagh 'eSSIm, tuSchoHmo'. QunDaj tlho'choH Mahoun.

tlhovtaHvIS 'eSSIm poSchoH mInDu'Daj. pa' legh. QIt ba'choHDI' cholHa' latlh yelwIyyItnganpu'. ghopDaj 'uchchoH Mahoun 'ej qabDaj yachchoH. qabDaj 'IHvo' jIb, tIr je bI'. jatlh "jItlhIj. jItlhIj. pIch vIghaj jIH." tuSqa' 'eSSIm 'ej tIr tlhISchoH. "baQa'!" jatlh 'ej HughDajvo' latlh tIr vo' wab.

QeDpInvo' Hoqra' tlhap teppIn. jatlh, "ghaHvaD yImugh. qaHotlh 'e' Dachaw''a'?"

mugh Mahoun. jang 'eSSIm. jatlh "Qo'. 'utbe'. HIHotlhQo'." tuSqa'.

"jatlh Qo'." teppInvaD jatlh Mahoun. "'a qatlho'. Satlho'. retlho'. DaH petlheD." luleghmo' yelwIyyItnganpu' tuH 'eSSIm neHbe'. lob yelwIyyItnganpu'.

jatlh 'eSSIm. "qatlh tujol?" qaD.

jatlh Mahoun, "pujmo' yInroHlIj ... bIHeghbe'meH ... vIra' ... tujoy." mon 'eSSIm. bang pong lajlaw'. QammeH boQ Mahoun, ghop 'uchtaHvIS.

jatlh 'eSSIm, "qaSbogh wanI' vIyajbe'. tIr polmeH qach vI'elDI' pay' lojmIt vISeHlaHbe'. mujonpu' 'ej jIHDaq pum tIr 'Iq. Dat tIr. tIr ngaSlaw' mInDu'wIj'e'." poSqu'moHmeH mInDaj SenwI' SIqwI' je lo' 'eSSIm. tIrHom leghlaH Mahoun.

jatlh "pa'wIjDaq qaboQlaH." ghoStaHvIS chobDaq pagh luqIH.

mInDu' Say'moH 'e' boQtaHvIS Mahoun jatlh 'eSSIm, "lojmItwIj DaSorghta''a'?" [31]

'eSSIm mIn rIQmoHbe'meH ghopDu' DoHmoH Mahoun. jatlh "pagh vISorgh. Qu'wIj 'oHbe'bej. qatlh bIghel?"

"qatlh pIch vIghaj bIjatlh?" jatlh 'eSSIm.

"qapujmoHta'mo'. vISov bIjatlhpu'." jatlh Mahoun.

mon 'eSSIm, jatlh "bIjeQqu'. DaHjaj tughoqtaHmo' jIDo'. HIghoqtaH. chaq pegh DaSamlaH. DaH Qu'wIjvaD jIvumnIS. HIjol."

tlhaq laD Mahoun. qaSpu' wa'rep. "bIHoSqa''a'?" jatlh Mahoun.

"HIja'," jatlh 'eSSIm. jolpa'Daq 'eSSIm Dor 'ej QuvDajDaq jol.

javmaH loS: tIr poj

jolpa' mejpa' Mahoun HIch qatbogh wepDaj nej 'a ratlhbe'. yaHlaw'pu' je 'eSSIm tlhejpu'bogh tIr'e'. Say'moHwI'pu' moch ghaHmo' teppIn'e' teppIn rI'. jatlh Qulpa'Daq wep tIr je tlhappu' QeDpIn.

Qulpa' ghoS HoD 'ej 'el. wov jan tIn 'ej 'oH retlhDaq jIH bejtaH QeDpIn. tlheghmey, mI'mey, ghomey je 'ang. vay' pojlaw'lI'. chol Mahoun. "nuq Dalegh?" jatlh.

"DaH tlhIngan tlhepQe' vIleghlaw'taH," jatlh QeDpIn, jan bejtaHvIS.

"bItlhaQ," jatlh HoD.

"jolpa'Daq HIchlIj DalIjpu'," jatlh QeDpIn. raS SumDaq Qot wep puj HIch je. "chay' be'vaD qaS chach?"

jatlh HoD. "wa' jaj loD maghmo' maqoch ..." HoDDaq baghneQ chuH QeDpIn. puvtaHvIS baghneQ tlhap HoD. jatlh "qaSDI' mob. tIr polmeH qachDaq qaSlaw'."

jatlh QeDpIn "tIrDaj'e' 'oHlaw'. buqDajvo' pogh vItlhap. 'oHDaq tar tu'lu'."

jatlh HoD "vaj tar lIngbej'a'?" mIS Mahoun. roghvaH ropmoH neH'a'? tlhIngan to' yajlaHbe'. Satlh buSlaw' 'eSSIm. tlhIngan qelDI' Mahoun, HoSbogh nuv qu' qel. Suv 'ej chargh. yu' 'ej joy'. 'a jaS vang 'eSSIm. chaq ghoqwI' ghaH.

QIj QeDpIn. jatlh "nuH 'oHbe'law' tarvam'e'. Satlh taS 'oH. Sung ghewmey HoHlaH 'ej tI HoH je."

jatlh HoD "tI QIv HoH'a' tIr QaQ HoHbe'taHvIS?"

jatlh QeDpIn "ghobe'. Hoch tIr motlh HoH. yotlh chIm chenmoH. 'a DaH Dajqu'wI' qamuch." tIr ngaSbogh ngop 'ang QeDpIn. wa' jengva'vo' tIrHom woH. jatlh "tIr Sung 'oH. yI'uch." tlhap HoD. lath jengva'vo' latlh tIrHom woH QeDpIn. "tlhIngan DajolDI' tIrHomvetlh wISuq. yItlhap." HojtaHvIS tIrHom cha'DIch tlhap HoD. nuDchoH.

jatlh HoD "nIblaw'." tIrHommey tlhapqa' QeDpIn 'ej pojwI'Daq lan. tInqu'choHlaw'.

jatlh QeDpIn "HaSta yIbej. poj Hotlh." bej HoD. jatlhqa' QeDpIn "tIr 'oghpu'bogh SIghbe' tar. tar botlaH tIr yInmeH pat."

"Dajqu'!" jatlh HoD. "vaj tI QIv HoHlaH wIjwI' yIntaHvIS tIrvam'e'."

javmaH vagh: charghlaH Huch

jatlh QeDpIn. “Dajqu'be' ngoDvetlh. yuQmajDaq tIrmajvaD Dupvetlh wIlo'.”

jatlh HoD “vaj qatlh tIrvam lu'ogh tlhInganpu'? mang puvmoHlaH'a'?”

“mangghom 'utbe'moHlaH” jatlh QeDpIn. “DaH DajwI'na' qa'ang. tIrvam pochlu'DI' Satlh taSvam lo'be'lu'chugh Hegh tIr. yInmeH tIr 'ut Satlh taSvam le'.”

jatlh Mahoun, “jIyaj. wIjwI'pu'vaD tIrvam lunobchugh tlhIngan, Satlh taS je'nIS Hoch wIjwI'. taS je'be'chugh lujchu' tIr 'ej pagh yoblaH wIjwI'. Huch law' poQlaH tlhIngan 'ej luDIlnIS. tlhIngan toy'be'choH roghvaH Satlh taS lutemlaH tlhIngan. vaj yuQ SeH tlhIngan. yuQ Danbe' manghom 'a yuQ lucharghlI'.”

“DaH Dayaj,” jatlh QeDpIn.

QubchoH Mahoun. mIghlaH tlhIngan net Sov. charghmeH HuchQeD lulo'choHchugh QaDbe' jogh. wIH tlhIngan to' 'ach SuyvaD lI' je. tlhIngan tIr lu'lo'choHchugh Sungpu', tIr law' lulIngchoH vaj Huch lubaj. Huch lubajchoHpu'DI' Dochmey ngevbogh Suy je'qangchoH. tIr law' lughaj tlhIngan, weHbe'taHvIS. cham 'Itlh lughajchoH Sungpu'vam. malja' law' lutIv yelwIyyItnganpu'. 'ej Sung tIr law' wIje'chugh je'qangqa'DI' Sung wIngevrup.

“rollIw,” jatlh Mahoun. “yIyuDHa'chu'. jupwI' ghaHbe'chugh 'eSSIm'e', DIvI'vaD De' Datu'ta'bogh Daja''a'?”

Qum QeDpIn. tagha' jatlh “ghobe'. mab wembe'. 'ej qatlh nutu' DIvI' wIneH?” Qochbe' Mahoun.

HaSta HaDqa' Mahoun. “DaH tIr chu'Daq ghomey SIrghmey je vIlegh.” jatlh HoD. “tar 'omlaHmo' SaH'a'?”

SuDchoH QeDpIn. jatlh “ghobe'. tlhIngan yelwIyyItngan je porgh Hap DaleghtaH. banglI' nujvo' chovnatlhvetlh boSlu'.”

javmaH jav: mon Sa' to'

po veb nIQ SopmeH Sojpa' 'el HoD. SaH chIjwI', SuypIn, QeDpIn je. ba'taH 'ej Haghqu' chIjwI', lubejtaHvIS latlhpu'. pay' jatlh chIjwI' "bIp Hov vIlegh. DIngtaH. Hov jIH je! Dunqu'!" SaQchoH chIjwI'. qaStaHvIS lup, mIS HoD ghIq raSDaq Dargh HIvje' leghmo' qaw.

SuypInvaD jatlh Mahoun, "maj. Qapla'. wejmaH cheb'a' tIje' 'ach ngoghmey tIchev 'ej jaS tIper." chIjwI'vaD jatlh "bI'ortaHvIS Darghvetlh yItlhutlhQo'." qImbe'chu'. chaq vongpu'mo' Dargh, QoylaHbe'. Dochmey leghlaw'bogh chIjwI' tIvlaw'taHvIS nIQ Sop HoD.

meH pawDI', QInmey law' nob QumpIn. law'bogh Qu'Hommey potlh ta'ta'DI' jatlh QumpIn, "DurI' banglI'."

jatlh Mahoun. "HoDpa'Daq vIjatlh." meH mej, HaghtaHvIS QumpIn.

jatlh 'eSSIm, "paS tlhIngan ngaq Duj vIloSbogh. wIjwI' poghmey bongev'a'?"

"HIja'. pogh Sar DIngev. 'op qaqem." jatlh. yuQDaq jol 'ej 'eSSImvaD poghDaj'e' poghmey chu''e' tIr'e' boSta'bogh QeDpIn je nob. "'aHlIj wInIHbe'." jatlh "'a peghlIj wISov."

jatlh 'eSSIm "nuq vIpegh?"

"wIpojta'," jatlh Mahoun. "pochlu'DI' tIr yInmeH Satlh taS le' lo'nISlu'." yev Mahoun, "'a SovnISbe' DIvI'."

mISba' 'eSSIm. "pegh 'oHbe'. qaja'pu'! cha'Hu' Qe'Daq to' vIDellI'. Daqawbe''a'?"

jatlh Mahoun "Ha'DIbaH DaSoptaHvIS nItlhDu'lIj DaroStaH 'ej woSlIjvo' ngechlIjDaq nIjtaH 'Iw. chaq Satlh mIwmey bopbogh tej Hol vIqImqu'laH?"

jatlh 'eSSIm "qaja'qa'. yIqIm. DaH tej Hol vIlo'be' 'ej ngechwIj vIqat." Ha'quj lIS. Do'Ha'. jatlh "mIw tIQ 'oH. veng Dab Sa'. wo'Daj Sach neH Sa' 'ach wIjwI' chaHmo' neghDaj'e', yotlhmeychaj lonqangbe'. vaj latlh to' lo'nIS Sa'. tIr DubmeH tIr Sar SepchoH. tIr'e' lInglaHbogh wa' yotlh ghur. tIrvetlh Dun luleghDI' latlh Sep wIjwI', luneH. chaHvaD tIr chu' ngev Sa'. lupoch 'ej luyob 'ej Quch. luyobta'DI', vay' maq Sa'. jatlh 'a DIlQo' wIjwI'pu'. jatlh . jatlh Sa' . not mangghom Dev 'ach Hoch vengmey chargh 'ej Sepvetlh mon moj Sa'vetlh veng. DIS veb latlh Sepmey chel. Qapchu' mon Sa' to'."

javmaH Soch: voqHa'chuqghach

jatlh Mahoun "Qe'Daq jIHvaD choja'be'bej!"

jatlh 'eSSIm "wIch 'oHmo' lutvetlh'e', ngugh lutvetlh naQ qa'ja'be' 'a maSoptaHvIS Sa' to' vIDelbej."

"mon Sa' to'vetlh Sov'a' DIvI'?" jatlh Mahoun.

"to'vetlh 'oghta' DIvI''e'." jatlh 'eSSIm. "DIvI' wIch 'oH. not yotlh maS tlhIngan. reH maSuvrup." yotlh maSlaw' 'eSSIm, 'a mu'meyvetlh jatlhpu'DI' loQ 'IQchoHlaw'. ghaytan magh qab 'e' Sovbe' 'eSSIm. ghelbe' Mahoun.

jatlh, "yuQwIjDaq juppu' mojtaHvIS cha' nuv, yInchaj bopbogh lutmey ja'. lutmeychajmo' yajchuqchoH."

jatlh 'eSSIm, "pIj qaSpa' may', loStaHvIS SuvwI'pu', lutmey ja'. rurchuq lurDechmey."

'eSSImvaD benI'Daj bopbogh lut ja' Mahoun. ram lut 'ach 'eSSIm monmoH 'ej rInDI' Mahoun, lut nap ja' 'eSSIm. puq ghaHtaHvIS HuD mach toSpu'. peghmey 'angbe'bej lutmey. 'ach loQ qa'mey 'ang. pIj lut yajmeH ghelnIS 'Ijmey. mu'mey yaj 'ach yuQ Huj yajbe'. juppu' mojchoH ngaghwI'pu'.

wovchoH 'eSSIm HablI'. "pa' reDvetlh retlhDaq yIQam" jatlh 'eSSIm. leghbe'meH HaSta vIH Mahoun. HablI' jangmeH leQ 'uy 'eSSIm. jatlh "nuqneH."

HaStaDaq nargh tlhIngan Sogh. Duj meHDaq ba'ba'taH. jatlh "Sotlaw' lablaw'ta'bogh tlhIngan tlharghDuj'e' DalI'ta' qar'a'?"

jatlh 'eSSIm. "HIja'. muqem nov."

jatlh Sogh "vaj nov DaqIHpu'. ghoqwI' ghaH'a'? wIvoqlaH'a'?"

jangtaHvIS 'eSSIm, Mahoun bej. jatlh "HIja'. ghoqwI' ghaH. vIvoqbe'. ghaytan Quv bopawDI' lIHIv DIvI'. "

jatlh Sogh "pov. ra'wI' vIja'. taHjaj voDleH." jabbI'ID van Sogh.

HaSta chu'Ha' 'eSSIm. pa' reDvo' 'eSSIm chol Mahoun. jatlh "qavoqbe' bIjatlh."

Sagh 'eSSIm. "ghoqwI' vIvoqbe'. qaparHa' 'a jIQIpbe'." jatlh.

yev Mahoun. tagha' jatlh "tlhIngan SoHmo' wej SoH qavoqrup, tujoy."

'eSSIm mawbe' voqHa'ghach, bang pong je. HemmoHlaw'. jatlh "a chovoqbe' 'e' DachIDmeH loQ chovoqnIS, qar'a' chaloy?"

Beginners' Summary - Volume 4

Mahoun 'oH nov HoD pong'e'.

Suy to' lunabmeH ghom Mahoun yaSpu'.
yuQvamvo' tIr luje' luneH.
tIr luSeHmo' tlhInganpu', SutlhnIS HoD.

mejpa' HoD, QoblaH tlhIngan 'e' lughuHmoH yaSpu'.
Qe'Daq ghom tlhIngan HoD je
HoD buQ tlhIngan 'ach HoHbe'.
tIr ngevqangmeH tlhIngan, ponta' Mahoun.

tIr le' lIng tlhIngan 'e' luHar Sungpu'.
tIr pochta'DI', taS SuQ lo'.
nuH Daj Suq Mahoun HoD.
nuv pujmoHlaH nuH.
tlhIngan SuchtaHvIS, tlhIngan pujmoH HoD.
DaH tlhIngan SeHlaH.

DujDaj ghoS HoD.
pujqu'mo' tlhIngan yInroH DujDaq tlhIngan jol.
tlhIngan lutoD HoD beqDaj je.

tIhIngan tIr le' poj QeDpIn.
tIr pochlu'DI' 'ut taS SuQ.
Dachchugh taS, Hegh tIr.
Hoch DIS taS je'nIS wIjwI'.
DaH roghvaH SeHlaH tlhIngan.

pegh bIHbe' tlhIngan to'
ghoqwI' ghaH Mahoun'e' 'e' Har tlhIngan.

Comprehension Questions

qatlh SutlhnIS Mahoun?
HoD ghuHmoH 'Iv?
nuqDaq Sutlh HoD tlhIngan je?
nuq 'oH taSvetlh SuQ'e'?
chay' roghvaH luSeH tlhInganpu'?


Speculation Questions

qatlh ghoq Mahoun 'e' Har tlhIngan?
tlhInganpu' lobbe'chugh wIjwI'pu', chay' bIj tlhInganpu'?
ghorgh Mahoun voqchoH tlhIngan?