nuq bop bom: 'ay''a' vagh

javmaH chorgh: burghDaq qugh mangghom

*Dugh* meHDaq mobtaH ghutar 'e' Sov HoD. meQpu'bogh ghopDu'Daj taDmo', qaDpu'bogh Qu'mo' je ghaytan 'oy' 'ej Doy'. Sonqang HoD 'a Ha'quj nge'be'meH, HoD pa'Daq ratlhtaH, Duj 'IjtaHvIS. poSchoHlI' meH 'o' lojmIt 'e' Qoy. SoQchoH. jatlh ghutar ghogh. “vISov. tI'meH laghchoHpu' HoD 'ach mIch vaghDaq tI'meH 'ay'mey lutu'lu'mo' rInbe'.”

meH 'elba'pu' Hota'ro' 'ach ghoghDaj tam QoylaHbe' HoD. Soj vutmeH jan luqelba'lI'. qaStaHvIS chach, Duj bIQ polmeH, bIQ pat chu'Ha'ta' HoD. QaDchoHchu'pu'mo' janDaq meQ'eghpu' bIQ tujmoHwI'.

QuchHa'law' Hota'ro'. mu'meyDaj QoylaHbe' HoD 'a wabmey 'up jatlh.

jatlh ghutar “nuq Datlhutlh? bIQ?” janglaw' Hota'ro', jatlhqa'mo' ghutar “lu'. vaHwIjvo' yItlhap.” pay' meHDaq vIng nISwI' 'e' Qoy HoD. qaStaHvIS wa' lupHom vangchoH HoD 'a pu'HIchDaj lelpu'pa', ghu'na' tlhoj. taghpa' yaH poHDaj reH qa'vIn tlhutlh Hota'ro'. tujmoHmeH, ghutar nISwI'HIch nojta'. meqDajmo' Hoy''egh HoD. jatlh ghutar “jIHvaD nay' yItujmoH je.” yev. “jISaHbe'. 'up Hoch.” meH mejqa'pu' 'ej 'elqa'pu' Hota'ro'.

jatlhqa'law' Hota'ro' 'ach tlhoy tamtaH ghoghDaj.

“lu'” jatlh ghutar. Duj Dotlh ja'choH. tlhoS Hagh HoD QIH tetlh 'IjtaHvIS. qay' nuH, Hongghor, pIvghor chuyDaH, noch, Som, Soj vutwI' jan, puchpa' je. natlISvetlhmo' Hagh Hota'ro' 'ej vay' tlhob. jangmeH jatlh ghutar “jolpa'Daq tu'lu'. 'a wIQolpa' QaDnISchoH, bIQ wIpolnISmo'.” jatlhtaHvIS ghutar vIngqa' nISwI' HIch. Duj Dotlh naQ ja'lI' ghutar. jatlh “buy' ngop: meHvo' nIH begh chu'qa'mo' HoD, DaH qay'be'. chu'Ha'chu'mo' chuyDaH qay'qa'be'taH je.” ghutar Sonba'lI' Hota'ro'.

pay' meHvo' ghum Qoy'lu'. DaH Hota'ro' ghogh QoylaH. “chol DujHey! botjan vIchu'! weHwI'pu'!”[2]

javmaH Hut: qaStaHvIS wa' lup cha' Hugh SIjlaH Qambogh loD

DujDajmo' bey'vo' meqleH tlhap HoD 'ej meH 'elqu', chenchoHtaHvIS Soch ­ chorgh!--wewbogh tutmey. meHDaq jollI' jagh. nom ngIq tutDaq Qeq Hota'ro' 'ej bach 'a wej chenchu'pu'mo' nuvpu' SIghbe' nISwI' tIH. tIH qIlchu' jol 'ej HoS natlh neH. chaq chuyDaHvaD Hoch Sov DeghwI', 'a logh may'vaD paQDI'norgh HutlhtaH. HoD retlhDaq chenlI' cha' nuvpu': nIHDaq SaH wa'DIch 'ej poSDaq SaH cha'DIch. ghaH nIH volchaH DungDaq meqleH yan HoD poS ghop. 'uch 'ej qaStaHvIS lupHom loSlI'. SubchoHqu'DI', 'a wewbe'choHchu'pa' jagh wa'DIch, poS DeS SIHHa'moH HoD 'ej meqleH Qachqu'. meHDaq SaHDI' jagh, Hugh 'aD'a'Daj[1] SIjchu' HoD meqleH. yevbe' meqleH jej. He SaS ghoSlI' 'ej tlhe'laHpa' jagh cha'DIch HughDaj mup je HoD meqleH. Hugh pe'chu' 'ej mongDaq pIp mup je. 'Iw SuD ghayqu'[35] cha' HughDu', DejtaHvIS ghajwI'pu'chaj. may' law' Suvta' HoD. jolwI' HIvmeH poH ngu'laHchu'. ghol vebDaq DuvchoHpa' HoD, HeghwI'pu' mut ngu'meH yevbe'.


Qeqchu'taH Hota'ro' 'ej SubchoHpu' DoSDaj vaghDIch. SIbI' Sangta' tIH.[4] ghutar 'emDaq jagh Qeq je Hota'ro' 'ach nISwI' HujHa'pu'mo', rIQ neH. pum 'ej 'oy'mo' jachchoH. “nIch!” jatlh Hota'ro' 'ej ghutarvaD HIch nob.


jagh veb ghobchoHtaHvIS HoD ghu' chov 'e' nID. ratlh loS jagh pIv 'ej wa' rIQwI'. qo'larngan weHwI'pu' chaH. HoS nuH qengbe'law' 'ach baS 'etlh yan Hoch 'ej Hota'ro'Daq naQjej chuHlI' wa'. junlaw' Hota'ro'. nuH lu'uchlaH ghutar ghop 'e' Sovbe' HoD 'a Hay'choHmo' 'ollaHbe'. HoD mongDaq betleH rurbogh 'etlh'e' jop weHwI'. way' HoD. vaHDajDaq pu'HIch tu'lu' 'ach poSDaq HuStaH. chaQDI' jagh DoH HoD. pu'HIch lelmeH poS ghop lo'nIS. 'etlh lev jagh, DuvtaHvIS 'ej Qach. way'meH meqleH lo'qa' HoD. mupchuqDI' 'etlhmey, loQ 'oy' ghop, yeb, DeS, DeSqIv, volchaH je. pu'HIch SIchmeH nIH ghopDaq meqleH baQchugh, way' 'e' SIQlaHbe' nIH DeS rIQ. wa' ghop lo'laHbogh vaj'e' Suv, wej 'e' tu'law' jagh.

SochmaH: ram 'oy'

vIHtaH HoD. ghol nuH 'ugh law' HoD nuH 'ugh puS. way'nISDI' HoD, HoD 'oy'moH 'ughwI' 'a nuH vIHnISDI' ghol, ghol 'oy'moH. nIHDaq jop HoD 'ej tlha'DI' ghol yItHa'. 'eb jon HoD, ghol 'uS mup HoD 'etlh. reghchoH jagh 'ej QamHa'choH. ghIrchoHDI' 'etlh, HoHmeH jop HoD 'a ghaH poS volchaH mup vay'. DaH HoD HIvtaH cha' jagh. regh volchaHDaj 'e' Sovbe' 'a 'oy'. meqleH baQ 'ej luDechbe'meH jagh, HeD. DaH HIch lellaH. nIH DeS voqtaHvIS meqleH 'uch HoD, pu'HIch leltaHvIS poS ghop. pu'HIch QeqlaHpa' jev cha' jagh. qu'! pe'vIl HoD DeS mupchoH jagh cha'DIch nuH. 'etlh tIq 'oH. junmeH tlhe'qu' HoD, vaj DeS mupbe' 'ach HIch qIp 'etlh 'ej chaghmoH. noDmeH meqleH pep 'ach Do'qu' jagh. meqleH botchu' 'ej pe'vIl vajar DeS qIp jagh yoD. Hom wab tu'be' jagh 'e' tul vajar. Soy' ghop, meqleH baQqa'taHvIS. DaHjaj nIteb meqleH yanqa'laHbe' nIH ghop. HoD qam retlhDaq Qot pu'HIch 'a woHmeH joDchugh mupbej jagh.

ravDaq jachtaH jagh rIQ. rav Qarghmey ghoS 'Iw 'a qam bIngDaq 'Iwmo' charchoH choQ. jach Hota'ro'. Quchbe'law'. HoD 'emDaq pum porgh 'e' Qoy. choQDaq Doq 'op 'Iw.

DaH DoHchugh HoD, pu'HIch woHlaH wa' jagh HubtaHvIS latlh. pu'HIch ghajchoHchugh qo'larnganpu'vam ghutar Hota'ro' HoD je HoH. naDev cha' nuv SuvnISmo' Qatlhqu' Qu'. Sov je qo'larnganpu'. ravDaq chaHlaw' ghutar'e' Hota'ro''e' je 'e' luSov HoD jaghpu' je. leSchoHlaw' jaghpu'. vajar HoHrupchoHmeH Holchaj mu'mey jatlh. leSmeH 'eb jon vajar, HIvchu'meH 'eb nejtaHvIS. 'ebvetlh SamDI' meqleH pep 'ej QamHa'bogh jagh rIQ HIvchoH.


Hub'eghmeH DoH HoD ghol. HughDajDaq 'etlh Qach HoD 'ach way'rupbejmo' pay' choH 'ej ghop neH DuQ. jach ghol. nuH 'uchHa'choH. ghopDu'Dajvo' betleHHeyDaj nIH HoD. 'uchDI' cha' ghop 'oy'qu' poS volchaH, nIH DeS je. 'ach qaStaHvIS tup puS Qutlhchuq DeSDu' 'e' tul. 'oy' SIQlaH. nuH ngol 'ej chaQ vajar, jagh qab mup, chaq mIn DuQ. reghqu'. qImHa'moH vajar 'oy'. 'etlh 'uchlaHbe'pa' chaq wa'logh mupqa'laH. Do' DoHchoH cha' jagh. pu'HIch woHmeH HoD tlhoy SumtaH jaghpu', 'a qIpmeH tlhoy HoptaH.

SochmaH wa': burghDaq Qot mang

lulqu'be'choHpu'mo' tamchoH meH. ghumtaH De'wI'. jachbe'choHpu' jagh rIQ. tlhovtaH vay''e' leghlaHbe'bogh HoD. vaytaH'a' Hota'ro'? 'etlh yantaHvIS HoD ghutar ghogh Qoy. "HIQan!" jatlh. chaq QaQ. chaq qabqu'.[36] QaQchugh, Hota'ro'vaD jatlh ghutar, vaj SuvlaHtaH ghutar, Hota'ro' je, 'ej jagh HoHmeH yeqtaH. qabqu'chugh vajarvaD jatlh ghutar, lujlI'mo'. Hub'eghmeH SuvnISmo' HoD, ghutar QaHlaHbe'.

QumwI' lel jagh pIv 'ej 'oHvaD mu'mey jach, HubtaHvIS latlh Qambogh jagh. ghutar Hota'ro' je lurgh bejchoH HoD. pa' yIn'a' jagh? Hota'ro' leghbe'. ravDaq nogh cha' jagh. jochbe'law'. chaH jojDaq Qot ghutar. nISwI' pepmeH cha' ghopDu' Soy' lo' ghutar. tochDu'Daj jojDaq nISwI' 'uch 'ej chu'wI' Senlaw'. po'be' 'ach Qap. QumwI' lo'bogh jaghDaq Qeq 'ej bach. pum. reghbogh jaghDaq bach. pum. rechqu' HoD. Dat lommey 'Iw je lutu'lu'. meH ngoHta'chugh Hut puqpu' maw', meHvam rur. nuH 'ugh chagh HoD ghIq joD 'ej pu'HIch woH. joDtaHvIS SeHlaw bIng leghlaH. ravDaq, qabDajDaq, QottaH Hota'ro'. loQ nogh. DubDaj jeq tajHey.

"ghutar," jatlh vajar. "Heghpu' Hoch jagh 'e' yI'ol. Hota'ro' vIboQ."

Hota'ro' retlhDaq torchoH vajar. tlhuHbej 'ach chuS. volchaH bIng jeq 'uj bID 'abbogh ret'aq. regh Dub 'ej regh je latlh 'oy'mey ram. rav SumDaq cha' tlho'ren muq 'Iw Doq 'e' noH HoD. law'law' 'ach SuvwI' pIvvaD 'Iqbe'. "Hota'ro', bIjatlhlaH'a'?" jatlh.

"HIcha," jatlh Hota'ro', tlhuptaHvIS. "DupwIch DuHpu ... choyacha?"[14]

"qayaj," jatlh HoD, "vISov. yIvIHQo'. yIjatlhQo'. pIboQlI'."

chol ghutar. DaSpu'meyDaj nguvmoH 'Iw SuD. "Heghbejpu' Hoch jagh," jatlh. "batlh Suv Hota'ro'. tuqDaj quvmoHbej. cha' jagh jey, ghopDu' neH lo'taHvIS."

ret'aq cha' HoD. jatlh "nuHvetlh Daleghpu''a'? nuq 'ab?"

jatlh ghutar "tIq. tlhopDaj jeqbe'chugh mumer. DuQpu'DI' DuQpu'bogh jagh HoHmeH pIp ghorlaw', ghIq pum."

jatlh HoD, "qatlh bIjatlh? DuHublaHbe'ba'pu'."

jatlh ghutar, "Sov'a' jagh? vImISmoH vIneH. mubejtaHvIS DaHIv 'e' vIpIH."

jatlh HoD, "ghutar lagh, bachchu'mo' nISwI'lIj jIyIn. tlhoS nuHwIj vI'uchlaHbe'pu'. "

jatlh ghutar, "taj vIteq DaneH'a'?"

SochmaH cha': 'oy' yISIQ

"wej." jatlh HoD. "yaS wa'DIch yIvemmoH 'ej Qel Hoqra', Sev je tISuq. pa'wIjDaq bIHHtaH. taj bey' bIngDaq lutu'lu'."

'ungya rI'meH SeHlaw' ruQ ghutar. QumwI'vo' wab Doy' Qoy HoD. "DaH ghoS!" jatlh HoD.

QIH nuDmeH, Hota'ro' yIvbeH pe' 'ej DubDajvo' volchaHDu'Dajvo' je teq. rechtaHvIS Hota'ro' DubDajDaq DuD 'Iw muD je. wornagh yor rur 'Iw.[3] purtaHvIS QIH 'elqa' 'Iw. 'elbe'meH je Hota'ro' jIb choljaHDaj lIS HoD.

poSchoH meH 'o' lojmIt. <'ungya HIghoS> jatlhrupmeH HoD pur 'a 'ungya ghaHbe' nuvvetlh pay' 'e' tlhoj. nISwI' beH qengbogh qo'larngan[66] legh. pu'HIchDaj lelnIS 'ej QeqnIS 'ej bachnIS HoDDaq bachpa' jagh. Qatlh tajvaj, pa' elchu'ta'be'mo' nov, loQ bot lojmIt. HoD Hota'ro' je leghDI' ghol nISwI'beH QeQmeH tlhe'choH. Heghbej bachwI' cha'DIch. chaq HoHchuq. vangtaHvIS HoD Dochmeyvam Qub 'ej nom vang 'ach pu' chu'wI' 'uylaHpa' HoD nISwI' tIH Qoy. nISwI' tIH leghbe'. pum jagh. chIm mIch cha' 'ach 'oH 'emDaq SoQchoHlI' lojmIt cha' 'ej mich wejDaq qaStaHvIS lup 'ungya nIvnav ghov HoD.[15]

SIbI' SeHlaw ruQchoH HoD. ratlh pagh jagh 'ej QaptaH botjan 'e' 'ol. HaStaDaq Haw'law'lI' ghol Duj. bejtaHvIS tu'be'choH noch QIv. HoDpa'vo' chegh ghutar 'ej HoDvaD Hoqra' nob. bej ghutar Hota'ro' HotlhtaHvIS HoD. poS taghDaj DuQchu'pu' nuH. lugh ghutar. roDaj DuQchu' je. 'etDaj DuQ taj QIn. Do' tIq, 'aD'a'Du', pIp je junchu'. "Hota'ro'," jatlh HoD. "tugh taj vIteq. 'oy' yISIQrup."

"vISIruu" jatlh Hota'ro', tlhuptaHvIS. nujDajvo' loQ nIj 'Iw.

vormeH Hoqra' lIS HoD. ghutarvaD jatlh HoD "DaH yIteq. wa'logh yIluH, yItlhe'Qo'." 'uchmeH cha' tochDu' lo' ghutar, 'ej luH.[67] SIbI' reghqu'choH Hota'ro' Dub 'ach reghbe'choHmoH HoD, Hoqra' lo'taHvIS 'ej Sevmey 'uy. nuH moH chaghDI' ghutar, pay' lojmItDaq nov lom chu' tu' 'ej nuDmeH Hu'. "HIvqa' veqlargh" jatlh.

"Heghpu' Hoch jagh 'e' Da'olDI' bIQagh," jatlh HoD, Hota'ro' nuDtaHvIS. Qaghvetlh qawmeH ghutar bIj 'e' nab. jatlh "ghaH 'emDaq SaHmo' 'ungya maDo'."

jagh lommo' poStaH lojmIt wa'. vegh ghutar. "HoD naDev yIghoS jay'!" jatlh. pavqu' ghoghDaj. lImchoH. tlhuHtaH Hota'ro' 'ej leS. Hu' HoD, pu'HIch QeqruptaHvIS. jagh lom bejchoH 'a motlhHa'be'. chob'a'Daq wovmoHwI'mey Qaw'lu'ta'. bIHDaq bachlaw'pu' jagh. poStaH lojmIt cha'. chob'a' HurghDaq tor ghutar. leghlaHchu'pa' HoD, 'emchoHpu' ghutar.[16]

SochmaH wej: may' pugh

mIch wejDaq, ravDaq tortaH je 'ungya. ghu' chovchoHDI' vay', yaS wa'DIch luHIvlI' gharghmey tIn 'e' HarlaH. SuvmeH ghopDu' lo'law'. 'ach gharghmey bIHbe'. yaS wa'DIch luHDu' bIH. Suvbe'. pumbe'meH 'uch 'a chorDaj pe'qu'lu'mo' yapbe' ghopDu'. chorvo' HuStaH luHDu' 'ej nIjtaH 'Iw law'. chob'a'Daq yaS wa'DIch He cha' 'Iw. ravDaq chejHey tu' HoD. lubejtaHvIS DejlI' 'ungya. DopDaq pumchoH. Qutlh 'e' nID ghutar 'a ba'taHmeH HoS Hutlhchu' 'ungya. ravDaq QotchoH. jatlhmeH nuj poSmoH 'ungya 'ach pagh tlhuD. luH yIrtaH 'e' lunID ghopDu'Daj.[17]

ghutarvaD jatlh HoD “chob'a' yIwovmoH ghIq meH yIghoS. Hota'ro' yIQorgh.” may' pugh SIQnIS SuvwI' 'ach rIQqu'DI' chor 'uplaHbej 'e' chIDqang HoD. Sechmey Sam ghutar ghIq tlheD. QIH chovchoH HoD. chor neH HIvta' jagh 'ach ghIHqu'moHta'. chor DuQpu'DI' DuDlaw'pu' jagh. 'Iw chIlpu'bogh chovqangbe' HoD. QIHvam vorlaHbe' Hoqra'. QIHvam vorlaH Qel'e' 'e' Hon vajar, 'ach bejtaHmo' 'ungya jottaH vajar 'ej jatlh “yIleS. Hoch jaghpu' DIHoHta'. qaboQ.” reghchu'be'meH 'ungya Qel Hoqra' lo'. reghbe'choHchu'be' 'ach qaqbej. jup luH 'ay'Du' buvchoH.[5] Qaw'lu'chu', pagh naQlaw', pagh chaq vorlaH. 'up Qu'. 'oy'taH ghop, volchaH je 'ach SabtaHmo' Hoqra' HoS, vor'eghmeH natlh neHbe'.

chegh ghutar. Say'moHmeH luch law', Hoqra' HujwI', Sevmey je qem. pagh jatlh 'a SIbI' quy'IpDaj teq. paw je Hota'ro'. yIvbeH Hutlh. yIttaHvIS tlhov. choQ charDaq ba'choH 'ej tuS. HoDvaD jatlh. “rIQbe'mo' ghopDu'wIj tupoQ.” vorchuqchoHmeH mu'mey, Hoqra', che'ron QelHom mIwmey tIQ je lo' tlhInganpu'. 'ungya 'ay'Du' Say'moH. reghbogh 'aDDu' bot. luH 'ay'mey puS woD 'a tuj muvwI' lulo'taHvIS luH HochHom lulaghHa'law' 'ej chor SoQmoH. qaStaHvIS wej tup taH may' naQ 'ach qaStaHvIS wej rep 'ungya luvormeH vum tlhInganpu'. ravDaq QongchoH 'ungya. luvIHvIpmoHmo' ravDaq ratlh.

jajvetlh Heghbe' 'ungya.

SochmaH loS: qaS nuq?

[18]meHDaq SaHtaH HoD, Hung yaS, DeghwI', je. qaStaHvIS may', HoD poS volchaH rIQmoH jagh 'ej nIH DeS Hom ghorqa'. volchaH vorta' Qel Hoqra' 'ach SIbI' Hom vorlaHchu'be'. pIvchoHtaHvIS SIHbe'meH DeS, 'oHDaq baS baghlu'pu'. Hung yaS QIDpu' jagh taj 'ach ram 'ej vorchu'pu' Hoqra'. wa'Hu'mo' nItlhDu' poSmoHlaHchu'be'taH 'ej SoQmoHlaHchu'be'taH 'ach SenwI' Dop, qanwI' Dop je lo'taHvIS meH SeHlaw ruQlaH. Hota'ro' tagh DuQpu'chu' jagh, vaj muD nIjbe'meH DeghwI' ro, DIrDajDaq mep Hum lulanpu'. DaH tlhuHDI', ghIch nuj je neH vegh muD. loQ tlhovtaH 'ej pIj leSnIS 'ach yItlaH 'ej ghopDu' lo'laHchu'.

yItmeH 'ungya boQpu' HoD ghutar je. volchaHDu'chaj 'uchtaHvIS 'ungya meH ghoS. quSDaq ba'meH luboQ. leS ghIq jatlhlaHDI' wanI'mey SIQpu'bogh Del. ngugh QongDaqDajDaq Qongchu'taHvIS pay' vemmoH 'oy''a'. HIvlI' jagh. 'ungya chor SIjmeH, wejlogh 'etlh jejHa' Qach. HIvtaHvIS vem'lI'mo' mIS 'ej Qotmo' nom noDlaHbe'. Qotlhta'DI' nov, buSHa'choH. reghtaHvIS 'ungya nuHmeyDaj nuD nov. nISwI'beH wIv, nIch Sam 'ej nISwI'beH bachbeHmoH. Hub'eghmeH vangchoHpu' 'ungya 'ach yaS wa'DIchDaq bach 'e' Hechbe' qo'larngan. latlh DoSvaD nISwI' beH wIvta'. pa' mej nov. meH ghuHmoH 'e' nID 'a may'mo' Qoylaw' pagh. jagh tlha'meH Qam 'e' Qap 'ungya. 'a meHvo' rI'DI' ghutar janglaHbe'. wab neH jatlh. nISwI'HIch qeng 'ej chaghtaHmo' luHDaj'e' je qeng. poStaH lojmIt cha', lojmIt wa' poSmoHtaHvIS nov. SoQchoHDI' lojmIt cha', nISwI' bach 'ungya. pum jagh 'ach pum je 'ungya. Qutlh'eghlaHtaHbe'.

"DaHoHta'," jatlh HoD. vangbe'pu'chugh 'ungya, HoD, Hota'ro' je HoH qo'larngan. Duj tamey nuD. botjan leQ wIvpu'DI' Hota'ro', QIt QanchoHpu' botjan'e'. Qapbe'taHmo' HoS QaymeH 'och, may' SIQbeHbe'pu' botjan. qaStaHvIS vagh lup chenchoHlI' botjan. chenchu'pu'pa', quqpu' Hut jol. meHDaq pawpu' chorgh 'ej yaS wa'DIch pa'Daq pawpu' wa'. ghuHchuqlaHbe'pu' beq. rInpu'pa' meH may' yaS wa'DIch Qotlhpu' jagh. jaghpu' SammeH, Duj Hotlhta'chugh ghutar, jaS qaSbe'pu'.

pIch ghaj pagh. 'oy' Hoch 'ach 'oy' 'e' luchIDbe'.

SochmaH vagh: Duj Dotlh

yaHpu'DI' weHwI' lommey choQ luSay'moHmeH rav lughay.[37] rav Qarghmey ghoSpu' bIQ lam. watlhqa'moH bIQ pat. DaH Say'law' meH. SeHlawmeyDaq tlhoy'meyDaq je 'Iw luleghlaHtaH 'a tlhIngan DujDaq motlh ghu'vetlh.

Duj Dotlh luqel. ghaytan weHwI'pu'vaD De'chaj ngevta' maHun[6] HoD. jIj Hoch SuDwI'pu'. Haw' weHwI'vetlh Duj, 'a chaq chegh 'ej chaq paw latlh. botjan lulo'taHqu'chugh HoS law' tlhuD Duj vaj tu'laH Hoch jagh. SIbI' vangmeH botjan lIS HoD. DaH chu'taHvIS yIntagh HoS lo'. botjan 'oH yIn'e' 'e' luQochbe'. chenchoHpu'DI' botjan yIntagh HoS lo'be'choH. chentaHvIS neH poQ.[30]

tar teqlaw'taH muD ngeb pat. poStaHvIS Som 'ellaw'pu' bIrmoHmeH taS chuch ngoghmey mach. teqlaHbej pat 'a 'aqroS tu'lu'. 'aqroS cholchugh tar[8] SuQchoHlaH muD. ghu' jIHnISlu'.

Qapbe'taH Soj vutmeH jan. QaDchu'mo' HochHom Soj, bIQ chelluDI' DuDchu'meH 'ut tuj. bIrtaHvIS ngoSbe'chu'mo' Soj mojbe'. tlhorghHa'taH Duj Soj 'ach ngoSbe'pu'chugh Sojqoqvetlh Sop neHbe' ghungchu'wI'. tI'meH mIch vagh ghoSnIS vay'. mIch loSDaq mIch vaghDaq je HochHom tI'meH luch pollu'. mIch vaghDaq QuQ tu'lu'mo' pa' vum jonwI' vaj pa' jonwI' luch tu'lu'. 'a DaH QIHmo' mIch loS veghmeH logh Sut tuQnISlu'. Hoq ta'nIS. vang luneH tlhInganpu'. Hoq wa'DIch nabtaHvIS tetlh lugher.

HIvje'meyDaq wornagh pov qang vajar HoD. 'ej buy' ngop. teHchu'. buy'bej Hoch jengva'. Ha'DIbaH ghoQ luSoplI'. vutlu'pu' Hota'ro'. roD jagh Sopbe' tlhIngan 'ej not Ha'DIbaH SuD Sopta' ghutar, 'ach SopchoHpa' mIm pagh. ghungbe'law' 'ungya 'a 'op Hota'ro' nay' Sop. pIvchoH ja'. Soppu'DI' pa'DajDaq luqeng. wa' chej luwoDnISpu'mo' latlh pIlmoHmeH HIq nob HoD[9].

SochmaH jav: tey'

meH SeHtaHvIS Hota'ro' QongtaH ghutar 'ej 'ungya tlhej HoD. chorDajDaq Doqqu' DIr pe'lu'pu'bogh , 'ej loQ nIj 'Iw. yItmeH 'ej ba'meH 'utmo' SomrawDu' QIHta'bogh jagh, wej toy'rup jatlh. tugh pIvchoH 'e' voq vajar. 'ungya Qup law' vajar Qup puS. Qup Hoch vajar beq.

ghu ghaHtaHvIS vajar Heghpu'mo' qorDu'Daj[80], qawbe' 'ej luQaHbe'. tuq ghajchugh Sovbe'. reH DujDaq toy' neH vajar 'a mang mojpu'DI' ghor waw'Daq toy' net ra'. 'avwI' ghaHpu'. toy'chu'taH 'e' Har. DughtaH. 'a pa' not may' SIQpu'. loHmeH mIw ghojpu'. qama'pu' Qaypu'. tamey leHtaH. DaSmey bochmoHtaH. voDleH toy'taH. 'a voDleH lutoy'pa' 'op yaSpu', toy''egh. mochDajvaD Qaqlaw'bogh HoD Delpu'DI' vajar, numlu'pu' moch. moch cho'be'pu' vajar. latlh 'avwI' numlu'pu'. SaHtaHmo' HoD Qaq, beppu'DI' vajar may'DujDaq Qaylu'pu'. Seyqu'pu' vajar 'ach Do'Ha' waw' rur may'Duj. qal 'op 'ej Qappa' yuDHa'wI'pu' Qap ngorwI'pu'. QuSHommeyvaD jeSqangbe'chu'mo' Duvbe' 'ach law'mo' SuvmeH 'ebmey tonSaw' ghojpu'. nuH law' lo'taH. SuvwI' po' mojta'. ngaq DujDaq Qaylu'pu', ghIq *Dugh* nungwI'Daq Hung yaS gheSpu'. Dun HoD. woQ SaHbe'mo', vajar rur. qal wo' 'e' yajmo' Dup pIm wIvpu'. vajarvaD jatlhpu' <loghna'Daq nIteb mavang. nuSIghbe' Sa'pu'. loghDaq jagh DIHoH. batlh mavang. bommey mabom 'ej machmo' Duj nuSaHbe' ngup>. machmo' Hoch Duj Qu'mey ghojpu' vajar. wa' jaj paj HoD. mID DabchoH 'ej chIjmeH paQDI'norgh ghojmoH. yaS wa'DIch gheS vajar.

mIDDaq HoD 'utlh Suchta' vajar. Sawbe'pu' HoD 'utlh 'a Sawpu' loDnI'Daj. vajarvaD tey'Daj lIH HoD 'utlh. 'ungya ghaH. ropyaH DujDaq toy' 'ungya. 'ungya Qup law' vajar Qup puS 'ach loD rap luHo'mo' nom maqochpu' moj. voqchuqlaH 'ej tlhejchuq 'e' lutIv. rut Qu' rapvaD jeS tlharghDuj ropyaH Duj je. may' Dun tIv 'ungya. pIj SuvwI' rIQ SIchmeH jagh law' jeynIS.

ngo'choHDI' Dujvetlh 'ej QopchoHDI' Duj chu' Suq HoD. *Dugh* 'oH. ngugh Hoch cham chu' jomlu' 'ej Hoch nanbe'lu'chu'pu' 'ej teybe'lu'chu'pu'. qaStaHvIS may' Heghmo' HoD, HoD gheSpu' vajar. law'bogh ta'mey Dun chav. *Dugh*Daq Qay 'ungya. jonwI' boQtaHvIS patmey ghojlI'. tlharghDuj 'ormeH ghojmeH vajar 'ej DeghwI' gheS ghIq yaS wa'DIch moj. vajar 'ungya je ghojmoHpu'mo' vajar 'utlh 'ej 'ungya ghojmoHpu'mo' tennuSDaj vajar je tlhoS rap vuDmeychaj. ghoHbe'taH. DaH qaStaHvIS wa'maH DIS tay'taHvIS SuvtaH. vajarvaD tey', qeSwI', jup je ghaHlaw' 'ungya'e'. DaH ngo'choHpu' *Dugh* 'ach matlhtaH.

QongtaHvIS 'ungya jach 'ej nogh.

SochmaH Soch: bIj qotlh

meH 'elqa'DI' HoD SaHlaw' pagh. ghIq Hota'ro' legh. SeHlaw bIngDaq tu'lu'. choQDaq QottaH. Heghpu' 'e' HajchoH HoD, 'a cholDI' tlhuHchu' 'e' tu'. QongtaH neH. QeHchoH. vemmoHmeH pe'vIl volchaHDu' 'uch. vemDI' jach 'ej mupmeH vIHqu' ghIvDu'Daj. HoD leghDI' mev'egh 'ej Hu' neH. "qaH!" jatlh. DIvqu'law'. yIvbeH tuQbe'taH.

"lagh! qabIj qatlh 'e' Daqotlh?" jatlh HoD.

"jIDughnIStaHvIS bong jIQongchoHmo' chobIj 'e' vIqotlh, HoD!" pe'vIl jatlh.

"qatlh bIQongchoH, lagh?" jatlh HoD.

"jIDughHa'mo', jIQongchoH, HoD!" jatlh DeghwI'.

jatlh HoD, "bImuj. bIDughHa'be'. bIDughchu'. DaHjaj loS jaghpu' DaHoHpu'. rolIj DuQchu' jagh, ghIq qaStaHvIS..." tlhaq laDmeH yev HoD. "... wa'maH wa' rep nIteb meH DaSeHtaH. bIDughHa'be'bej. bIrIQmo' leSnIS porghlIj. bIQongnISbej. vaj qatlh qabIj 'e' Daqotlh?"

jatlhqangbe' Hota'ro'. QamtaH neH, HoD QeH lajtaHvIS. "yIja'!" jatlh HoD.

jatlhqa' Hota'ro' "San DaSeHlaHbe'mo' vay' Da'oy'moH DaneH'a'?" 'ungya San qelba'. HoD chor SIjchu'meH betleH Qach'ta'chugh Hota'ro', 'arghlaHbe' bep. mu'meyDajmo' ravDaq chaghlaw' HoD luH.

tamqu'choH HoD ghogh 'a QeHtaH. jatlh "ghobe'. bImujtaH. rInDI' yaH poHlIj qoj bIDoy'qu'choHDI' DuSonmeH vay' DarI'be'mo' qabIj 'e' Daqotlh. nIteb Duj DachIjlaHbe'."

jatlh DeghwI', "lu' HoD!" Qamqu' 'ej loS. mup HoD 'e' pIHba'. mup neH HoD. ghIchDaj QIp ghor neH. DaH choQ Say'Daq reghqu'meH DeghwI' ghIch mupqu'chugh QamtaH neH Hota'ro' 'e' Sov. 'a 'ungya vorbe'. 'ej laghvam taQvaD ghojmoHbe'law' je. Hota'ro' mupbe' HoD.

QamtaH DeghwI'. jatlh , "HoD? nuq 'oH bIjwIj'e'?"

jatlh HoD, "jISovbe'. yIQongchoH. meH vISeH."

"lu' HoD" jatlh Hota'ro', 'ej meH mej.

ra'wI' quSDaq ba'choH HoD 'ej HaSta bejchoH. pay' vemmo' QongchoHpu' 'e' tlhoj HoD. meHDaq ba'taH ghutar. Duj pat jIHlaw'taH. "ghorgh bI'el?" jatlh HoD mIS.

"wej rep ret," jatlh ghutar. "muvemmoHta' Hota'ro'. jatlh qaStaHvIS cha'maH Soch rep Qongbe'law'pu' HoD. yISon."

SochmaH chorgh: mIch vagh Hoq

meH mej HoD 'ej HoD pa'Daq QongchoH. vemqa'DI' meHDaq SaHtaH ghutar, Hota'ro' je. qa'vIn bIr tlhutlhlI' DeghwI' 'ej nay' tlhorghHa' SoplI'. ghIrel[20] yIvbeH tuQtaH. "HoD!" jatlh cha' beq 'ej luvan.

"Dotlh!" jatlh HoD. Do, ghoch chuq je ja' ghutar. chuyDaH lulo'be'taHmo' choHqu'be'. loQ ghurpu' SIp SuQ'e' teqpu'bogh muD ngeb SeHwI' pat. DujvaD choHbe'pu' ratlhbogh Dotlh. tugh ghutar Son Hota'ro'. jatlhbe'choHDI' ghutar, De' chel Hota'ro'. 'oy' vISIQbe' jatlhpu' 'ungya. SopQo'. vIychorgh neH tlhutlhpu'. DaH QongtaH. DubtaH ghutar nItlhDu' 'a Dochmey 'uchqu'laHbe'. jatlh Hota'ro'. "jItuSDI' SaH 'Iw puS 'a jIvumrupchu'."[12]

jatlh HoD, "DaHjaj mIch vagh wInaw'nIS. Hota'ro' Qu'vetlh Dabajta'." Hemlaw' Hota'ro'. jatlh HoD "DIb 'oHbe'." bIj pIHnIS 'e' lIj'a'?

jatlh Hota'ro', "Duj toy'laHDI' mang reH DIb 'oHtaH." ghIch mup 'e' qelqa' HoD 'a SeH'egh. 'aw'pu'mo' mu'meyDaj, muj ghaH 'e' tob neH. nIQ SoptaHvIS DeghwI'. 'ungya luSuch Hung yaS, HoD je. pIvbe'taH. yItQo'mo' HoD pa'Daq luqeng. SopQo'. HaqwI' poQ 'e' lutlhoj 'ach DujDaq HaqwI' tu'lu'be' 'ej HaqwI' SammeH Do chavlaHbe' Duj.

Hota'ro'vaD Hoch mIwmey lo'ta'bogh ghutar Delqa' HoD. HIchDal Daqa' mIch wej. luch yIrpu'DI' Hota'ro' logh Sut tuQmoH. qabDaj DuQ 'oy', tlhay tuQmoHtaHvIS 'a bepbe'. ghaHvaD Hoqra nob vajar. Hoqra' lo'taHvIS Hota'ro', Hoqra' DoS cha'taH meH HaSta.[21] "Dochmey Daleghbogh DIlegh," jatlh. tobmeH, meHDaq Hoqra' joqmoH DeghwI'. HaStaDaq taHlaw' Hoch.

"Da'uchtaHvIS yoy Hoqra'" jatlh ghutar, HaghtaHvIS. Hagh je Hota'ro'. Hoqra' tlhe' 'ej yoyHa'choH meH mIllogh.

ngaQchu' Hota'ro' mIv 'e' 'ol HoD ghIq QumwI' tobmeH jatlh, "bIvumtaHvIS Duj patmey SeH ghutar. pe'vIl muqaDmey tIbach ."

Hota'ro' ghIjbe'law' De'vetlh. QumwI' lo'taHvIS jatlh "batlh toy'taH." latlh logh Sut patmey tobpu'DI'[22] meH mej.

SochmaH Hut: bIjQo'

potlh Son. SonvaD Hota'ro' Hup 'e' Hech HoD. noDbe' 'e' 'aghmeH, Hota'ro' bIjbe' ghaH 'e' wuq. bIj latlh. DeghwI' 'emDaq SoQchoHpu' lojmIt, ghutarvaD jatlh HoD, "loS mIch HurghmoHta'DI' Haghqu'mo' ghaytan yopwaHDaj yIQmoH. Dughong."

jatlh ghutar, "vISov. wanI'vetlhmo' Hoghvam Qu'HommeywIj ta'nIS. morghbe' 'ej batlh ta'lI'. muquvmoH 'ej tuqDaj quvmoH." qeHbe'ba' ghutar.

HaStaDaq Hota'ro' Hoqra'mo' mIch cha' cha'lu'. qIDmeH, puchpa' mojpu'bogh jolpa'[23] Hotlh, juStaHvIS, ghIq lojmIt cha' leQDaq ghopDaj cha', 'uytaHvIS. vegh 'ej SoQchoHtaHvIS lojmIt mIch wejDaq beq pa'mey, bIQ pat, muD ngeb SeHwI' je lojmItmey cha'. QumwI' lo' 'ej jatlh. "ghutar ne', mIch wejvo' muD yItlhuch."

"lu' lagh," jatlh ghutar 'ej muD QaymeH leQmey wIv.

"DaloSmoH 'e' vIchaw'," jatlh HoD. " qabIjbe' Qu'Daj DaQatlhmoHchugh."

Sagh ghutar, mIch Dotlh buStaHvIS, jatlh "vIneHbe', HoD. not moch Qu' vInIS vIneH."

jatlh HoD. "moch ghaHbe'. qanumta'. DaH lagh SoH je."

"choquvmoH, HoD," jatlh ghutar 'ej HemchoH volchaHDu'Daj. QaylI'bogh muD jIHtaH, ghIq ghuH SeHlaw. "wIHotlhlu'!'" jatlh ghutar. "botjan chu'!"

"majQa'! Datojchu'!" jatlh HoD. Hota'ro' yInroH bejtaHvIS Hagh. ghummo' moD tIqDaj.[30]

"HoD," jatlh ghutar, "jIqIDbe'. wIHotlhlu'law'pu'. 'a Duj tu'be' noch." loS 'a ngeblaw' ghum. Hota'ro' luja'.

mIch wej chImmoHta' 'e' 'olDI' Hota'ro'vaD Qum. HaSta lubej lojmIt wej leQ 'uytaHvIS Hota'ro'. ghopDajDaq ngaDtaH Hoqra' poSchoHtaHvIS lojmIt. mIch loS 'agh. qay'be'law'. 'el Hota'ro'. loj choQ 'ay'mey puS. poStaH puchpa' lojmIt. tlheghDaj baghpu'DI' Hota'ro' puchpa' 'el. Som tI'ta'bogh yaS wa'DIch HotlhchoH. QaQlaw'taH Som lIw.

vumtaHvIS Hota'ro', mIch wejDaq mIch vagh muD QaylI' ghutar. Hota'ro'vaD ghong chuptaH HoD 'ach tojbe'taH ghutar. tagha' jatlh ghutar. "HoD, choqaDlI'neS 'e' vISov. qaDmey vIlajqangchu' 'ach jIHvaD tlhoy ngeD qaDvam. Hota'ro' DuQDI' jagh Daleghpu''a'?"

jatlh HoD, "vIleghpu'be'. pumlaw'DI' vIQoy neH."

jatlh ghutar "nuchol cha' jagh. muHIvchoH wa' 'ej Hota'ro' HIvchoH latlh. nuH ro' joq vI'uchlaHbe'mo' jIHubqu''eghlaHbe'. Hub'eghchoHpa' Hota'ro', muHIvbogh jagh HoHmo' DuQ jagh cha'DIch. muHubbe'ta'chugh jIHegh. not Hota'ro' vIghong. vIHubrupqu'."

chorghmaH: ram chuch

lobHa'DI' beq HupnISlu'bej, 'a HupnIS moch. Qu'Daj jun 'e' nIDmo' HoD tuH. chIch ghutarvaD qaDvetlh nobbe'pu' 'a qaD tu'pu' 'ej jeypu'. jatlh HoD "maj, qaDvetlh Dachavta'. batlh patlhlIj chu' Dabajta'. yo'vaD vIQumqa'laHDI' lagh SoH 'e' Sov wo'."

"wo' vItoy', HoD!" jatlh ghutar lagh. Quch 'ej HemchoHlaw' porghDaj naQ.

puchpa'Daq Som HotlhtaH Hota'ro'. ravDaq SuDbogh 'op ngoghHommey tu'lu'. QumwI' lo'taHvIS jatlh HoD, "nuq 'oH? pa'. ravDaq."

jatlh Hota'ro', "chuch 'oHlaw'. ro'wIj muq wa'. cha' tlho'ren lumuq Hoch 'ay'mey 'e' vInoH." qonmeH, QIt DIng.

bItchoHlaw' ghutar. "SuQqu', qar'a'?" jatlh.

"ram," jatlh HoD. "mIchvetlhDaq nuSIghbe'" Hota'ro'vaD jatlh "yap, yItaH." mIch vagh 'el Hota'ro' 'ej QuQmey nuD. Qapchu'. Do'Ha' Dachmo' wa' HanDogh 'ej QapHa'mo' peQchem lIngwI' ngaDmoHwI', chungmeH QuQmey lo'laHbe'. Hoch luch Hotlhta'DI' Hota'ro', ravDaq Hoqra' lan . HaStaDaq lubej. tI'meH luch, jonta' 'ay'mey je yIr 'ej mIch loSDaq lan. Hoch tetlh Dochmey yIrta'DI' mIch loSDaq Qam Hota'ro'. SoQchoHpu'DI' lojmIt loS, lojmIt wej leQ 'uy. qaS pagh.

"poSchoHQo' lojmIt," jatlh.

"DaH mIch wejDaq muD tu'lu'. vIQayqa'taHvIS bIloSnIS." jatlh ghutar. mIch vaghDaq 'elpu'pa' Hota'ro' Qayta'.

jatlh Hota'ro'. "jIloStaHvIS 'op DochmeywIj vISuqmeH pa'wIj vI'el."

qagh HoD. jatlh "Qo'. vIchaw'be'. meq DaSov."

"lu', HoD," jatlh Hota'ro' 'ej chob'a'Daq QamtaH. tuHbe'choH HoD 'ej QuchchoH, QuHom'vetlh ta'pu'mo'. Duj leHmeH rut Duj QIHnIS. beq DevmeH rut beq HupnIS. muD Qaylu'pu'DI' mIch wej 'el ghIq Qayqa'taHvIS loSqa'. poSchoHDI' lojmIt cha' mIch cha'Daq Hoch 'aH lan. meH 'el 'ej jatlh "Qapla'!" Hoy'meH ghutar, mIv teq ghIq paw' 'ej logh Sut teq 'e' boQ. ghaHvaD "qaSonrup," jatlh Hota'ro' 'ej Duj Dotlh ja'choH ghutar.

chorghmaH wa': yaH poH gho

meH SeHtaHvIS Hota'ro', Soj vutmeH jan tI'lI' HoD. ngoD Huj tu'. tujqu'chu'pa' jan, chu'Ha' leQ net nab 'ach lojchu' leQ. teqpu'lu' 'ej rarchuq baS SIrghmey neH [94]. chaq ghorpu' 'ej tI'Ha' vay'. leQ qa'meH SamlaHbe' HoD. laghHa' 'ej DajchoH. Sojqoq perpu'DI' raHta' ponglu'. raHta'na' rurbe'qu' 'a DaH tujchoHpu'mo' bIQ, SoplaH vay'. HoDpa'Daq 'ungyavaD raHta' qem 'a Soj lajQo'. jatlh “qen muje'pu' DeghwI'.” neplaw'. raHta' SopchoH HoD 'a qagh ghuH.

“HoD! wIHotlhlu'pu'! botjan vIchu'ta'.” jatlh Hota'ro'. QamchoHtaHvIS HoD ravDaq raHta'qoq chagh. SIbI' meH ghoS, pu'HIch leltaHvIS. jatlh Hota'ro' “Duj tu'be'ta' noch. chaq ghummoH logh woj neH.” meH 'el je ghutar, nIvnav DaSmey je tuQtaHvIS. HaSta lubejtaHvIS Dachchu' Duj. qaStaHvIS wejmaH tup loS. nargh pagh Duj. ghumHa'qa'law'.

bIt DeghwI', 'ach naD HoD. “SIbI' chorI'mo' jIbel,” jatlh.

rInDI' Hota'ro' yaH poH wej vumrupmo' 'ungya, Son HoD. HoD Son ghutar. ghutar Son Hota'ro'. QIt ghoStaH Duj. DubtaH ghutar ghopDu'. tuSDI' Hota'ro' 'Iw lIngtaH 'ach QaptaHmo' latlh taghDu' vumlaHtaH.[58] DubtaH je 'ungya, jatlh HoD, 'ach meH 'elbe'taH. qaStaHvIS jaj wejlogh ghumHa' noch. jatlh ghutar mejtaHvIS. “nughuHbe'chu'chugh tlhoS ghu' vImaS!” 'ungya pa'Daq Qong HoD meH SeHtaHvIS Hota'ro' 'a cha'logh vemmoH DeghwI'. Hotlhqa' HoSDo'. qej HoD SontaHvIS. Duj Dotlh DeltaHvIS Hota'ro' muD pat tar ja'. ghurlaw'pu' ghIq mevchu'. ghaytan loj ngogh Qav. beq SIghbe'law' tar. SaHchugh teqlaw'taH muD pat.

QongmeH Hota'ro', ghIrel pa' ghoS, ghIq HoD Son ghutar. SaH HoD ghutar Sonqa'taHvIS Hotaro'. noch ghu' DeltaHvIS ghutar jatlh DeghwI'. “qay'qu''a'?” Quchqu'law'. jatlh “HaStaDaq 'IH ghuH.” HaSta bejtaH. ja' ghutar 'e' qImHa'law'.

Hu' HoD 'ej DeghwI' nuDchoH. “Hota'ro' lagh! bIchechlaw'. Hoch HIqmaj Datlhutlhchu''a'?”[34]

“ghobe' HoD,” jatlh Hota'ro'. “qa'vInwIjDaq loS vatlhvI' tlho'ren baqghol vIchel neH. jIchechbe'.” HIvje' 'ang DeghwI'. “jIpIvchu'. 'oy'be' taghwIj jIQuchlaw' neH 'ej Dujmaj HoDma' Dun je vIparHa',” jatlh, HIvje' peptaHvIS. chechwI' Dabej. Qel Hoqra' tlhap HoD 'ej 'Iw pojmeH, DeghwI' Hotlh. HIq puSqu' ngaS 'IwDaj 'a yInSIp puSqu' ngaS je.

“Hota'ro' lagh, QapHa'law' taghDu'lIj,” jatlh HoD.

chorghmaH cha': tagh ghu'

morgh Hota'ro'. jatlh "jIpIv! HIpumQo'!" vIDchoH. qabDaj qIpmeH ro' lo' HoD. qevpobDaj rIQmoH HoD Qeb.

jatlh vajar, "lagh, DeghwI' SoH. yIQub. 'Iv paQDInorgh yIqaw. DughHa'choH beq 'ej Quchqu'. qaS nuq?"

poSqu' Hota'ro' mInDu' 'ej ghopDu'Daq qab So'. jatlh "HoD, beqvetlhvaD yapbe' yInSIp. jItlhIbpu'."

DeghwI' taghDu' Hotlh HoD 'ach Seng'a' tu'be'. wa' QIDlu'pu' 'e' tu' 'a pIvchoHbejlI'. muD ngeb Dotlh nuD HoD. meHDaq yap yInSIp. mIch cha'Daq yap yInSIp. mIch wejDaq yap yInSIp. chIm mIch loS, mIch vagh je. Hoqra' lIS 'ej Hota'ro' Hotlhqa'. jatlh HoD "naDev muDDaq yap yInSIp 'ach lajlaw'Qo' 'IwlIj. bot vay'." tlhIch purDI' vay', tlhIch SIp 'uchqu'mo' 'Iw, yInSIp 'uchlaHbe'. tlhIch DalaH latlh SIpmey. "Ha', HItlhej," jatlh HoD. tlha' Hota'ro'. mIch cha' luvegh 'ej mIch wej lu'el. muD ngeb SeHwI' pat lojmIt poSmoH HoD. "yI'el," jatlh. 'elvIplaw' Hota'ro' 'ach lob. muD SeHwI' pat lunuD. SIp'e' rechbogh nuv boS 'ej choHqa'. chen yInSIp, Hap qIj je. Qaplaw'lI' mIwvetlh. janDaq vI'taH Hap qIj[98]. pupbe'mo' latlh yInSIp chelmeH pat, bIQ chev. mIqta'Daq 'op naw' lojmItHommey poSmoH Hota'ro' 'e' ra' HoD.[32] bIQ law' natlhtaHmo' chaq QapHa'.

ravDaq lojmIt poSmoH Hota'ro' 'e' ra' HoD. ngaQHa'moHpu'DI' lojmIt 'ugh vIHmoHmeH tlhuHqu' 'a poSmoHta'. bIng bejchoH Hota'ro'. ghaH retlhDaq Qam HoD 'ej bIQ pat 'ay'mey ngu'. Hurgh choQ 'eS 'a bIQ lam ngaSwI', watlhmoHwI', veQ boSwI', bIQ Say' ngaSwI' je leghlaH. jatlh HoD, "yIghIr 'ej Seng yInej. SoHvaD 'ul Sech vISuq."

letlhHom ghIr Hota'ro'. rav Hotbe'mo' letlhHom 'er'In 'eS, SupnIS Hota'ro'. SaqDI' yIQ rav. jatlh "nIjba' vay'. Dat bIQ tu'lu'."

"nIj'a' veQ boSwI'?" jatlh HoD. ghaHvaD 'ul Sech chagh HoD.

tugh jatlh Hota'ro', "HoD! bIQ 'oHbe'! pa'vam SoD bIrmoHmeH taS."

chorghmaH wej: 'e' tul pagh tlhIngan

"'ar?" jatlh HoD. "nuqDaq 'el?"

"ravDaq wejmaH vatlhvI' 'uj Saw'. Hal vIleghbe'. jInejlI'." jatlh Hota'ro'. va. law'qu'. 'ej yoSvam DungDaq Qong Hota'ro'. pa'DajDaq 'ellaw' tar teqpa' muD ngeb SeHwI' pat.

"lagh, DaH yISal," SIbI' jatlh HoD. letlhHom ghoS Hota'ro' 'ej SIchmeH Sup. Qatlhqu'law' letlhHom toSmeH Qu'. rav lojmIt veghqa'pu'DI' ravDaq QotchoH. tlhuHmeH vumqu' ro SomrawDu'. DaSmeyDaq bIrmoHmeH taSna' tu'lu'. rav lojmIt SoQmoHmeH HoD poS ghop lo'. Hu'meH Hota'ro' DeS luH 'ej yItmoHmeH volchaHDajDaq qat. meH lu'el. "mIch wejvaD yIntagh yImobmoH. mIch wa'vaD mIch cha'vaD je yInSIp yIghurmoH. cha'maH Hut vatlhvI' yIwIv." jatlh HoD.

vang ghutar. "mobta', wIvta', HoD," jatlh.[29]

ravDaq ba' Hota'ro' 'uchbe'choHDI' HoD. qIvDu' jojDaq nach HuS. tlhuHqu'mo' qetwI' tlhIb rur. ghutar 'Iw Hotlh HoD 'ej Hotlh'egh je. jatlh "nIjpu' bIrmoHmeH taS law'. 'IwmajDaq yInSIp botchoHlI' SIp SuQ tlhuDbogh. DaH pagh Datu' 'ach vI'lI'mo' pay' vay' SIghchoH. nom SablaH."

jatlh Hota'ro', "rav bIngDaq tar tu'lu'."

jatlh ghutar, "ghuy'cha'! naDev tu'lu''a'?" naw'meH lojmIt bejchoH.

jatlh HoD, "vISovbe'. Hota'ro', naw'meH lojmItvetlh yIpoSmoH."

"luq, HoD," jatlh Hota'ro' 'ej lojmIt ruQ. poSmoHDI' chol ghutar HoD je. nuH HoS 'ochmey, De'wI'mey je legh. Say'law'. lojmIt retlh ravDaq QotchoH Hota'ro'.

"yIHu', lagh!" jatlh HoD. HoD bejchoH Hota'ro' 'ach qeQlaHchu'be' mInDu'Daj. QammoHmeH DeS luH HoD. chechwI' Daqu' 'a jIj. meH lutlheD. chaH 'emDaq SoQchoHbe'meH lojmIt ngep ghutar 'ej meHvo bejtaH. mIch cha'Daq rav lojmItHom poSmoH Hota'ro' 'e' ra' HoD. vIHmeH qIvDu' tochDu' je lo' Hotaro'. lojmIt SammeH rav HottaH. leghlaHbe' Hota'ro' pay' 'e' tlhoj ghutar. lojmIt Sam Hota'ro' nItlhDu'. ngaQHa'moH 'ej pepmeH luH.[28]

"HoD!" jatlh ghutar. "vIta'laH. leS 'e' yIchaw'."

jatlh HoD, "meH yISeH. Duj toy'."

chorghmaH loS: 'argh tagh

rav lojmIt poSmoHta'DI' Hota'ro' bIng nuD HoD. DewI'mey mIqta' je legh. Say' rav 'eS. "yISoQmoH, lagh," jatlh. lojmIt SuvtaHvIS lagh, meH 'elqa'. chob'a'Daq Hota'ro' bejtaH ghutar. lojmIt retlhDaq QottaH. luH 'ach pujqu'mo' SoQmoHlaHbe'.

"wIvorlaHbe''a'?" jatlh ghutar, Hota'ro' bejtaHvIS.

jatlh HoD, "SuQ 'ach QIt HoH. taS DaleghDI' bIHeghbe'. DatlhuHDI' bIHeghbe'. 'op DacherghlaH 'ach tlhoy DatlhuHchugh yInSIp Dalo'laHbe' 'ej bIHegh. ghaytan ghaHvaD 'argh, tagh QIDlu'mo'."

jatlh ghutar "vaj tar 'Iq tlhuHpu''a'? HeghlI''a'?"

"Qel vIrur'a'?" jatlh HoD, 'ej HoD pa' ghoS.

HoDpa'Daq tlhuHqu' vajar 'ej chov'egh 'e' nID. yapbe'choHDI' yInSIp Quchmo' nuv, chov'eghlaHbe' 'e' Sov, vaj Quchbe'mo' Quch. qechvetlh qelchoHDI' mISchoH. pay' Hoqra' qaw 'ej Hotlh'egh. HoD 'IwDaq wej Qobqu' tar 'a SaH. 'ungya Hotlh je. tar puSqu' ngaS 'IwDaj, 'ach HotlhtaHvIS Qay' 'ungya. Hoqra' tlhapqu' 'ej jaD. tlhoy' qIpqu'DI' ghomHa' SaD 'ay'mey. "HIHotlhtaHQo'." jatlh 'ungya. "tlhIngan maH."

"jagh wISuvmeH jagh wItu'nIS" jatlh HoD 'ej Hoqra' 'ay'mey boSmeH joDchoH. 'a ngugh ghumchoH ghuH. Hotlhqa' jagh Dujqoq. pu'HIch lel HoD 'ej meH 'el.

SIbI' "DachtaH," jatlh ghutar. "chaq nutlha' nuch. nuSuvvIpmo' maHegh 'e' loS."

"maHeghbe'." jatlh HoD. SoQtaH lojmIt wa' 'ej ghutar yaH retlhDaq quSmeyDaq QottaH Hota'ro'. "nIteb yItta''a'?" jatlh HoD. tul.

jatlh ghutar. "ghobe', HoD. vIqengmeH qaStaHvIS wa' tup yaHwIj vIlon. bIj vIlajrup." jangbe' HoD. DaH jup Hegh bejnISmo' ghutar, bIjDaj wIvta'.

jatlh HoD, "qaSon, ghutar. pa'lIjDaq yIQongQo'. pa' 'aH 'ut DaSuqnISchugh yIghoS 'a pa'wIjDaq yIQong. bIcheghpu'DI' mIch wej 'el vay' net tuch."

"lu' HoD," jatlh ghutar 'ej mIch cha' 'el.

Hota'ro' bej HoD. luDechbogh wanI'mey Sovbe'law'taH. tlhuHmeH nuj poSqu'moH 'ej vIH volchaHDu'. Hu' HoD, joD 'ej quSDaq Hota'ro' ba'moH. "meH DaSeH" jatlh HoD 'ej jolpa' ghoS.[38]

chorghmaH vagh: Hota'ro' ta

meHDaq cheghDI' HoD, cheghta' je ghutar. DeghwI' retlhDaq ba'taH, jIb yachtaHvIS. "banglI' ghaH'a'?" jatlh HoD. Sovbe'pu'mo' mer.


jatlh ghutar, "ghobe', HoD. latlh DujDaq parmaqqay ghaj. Hung yaS jIHmo' vIQan vIneH 'ach QobvamvaD mIw vISovbe'." ghu'vetlh Sovchu' HoD 'a pagh jatlh. qaStaHvIS loS rep ba'taH tlhInganpu', pagh jatlhtaHvIS. tlhovtaH Hota'ro' 'e' lu'Ij. tagha' Qam ghutar. jatlh "jIDughmeH jIQongnIS, HoD. Heghchugh HIvemmoHneS." HoD pa' ghoS. ba'taH Hota'ro', SeHlaw bejlaw'taHvIS 'ach leghlaH 'e' pIHbe' HoD. ghumHa'be'choHmeH noch pat ghunqa' HoD. Duj QonoS qon. qaStaHvIS Qu'vam Heghchugh Hoch, quvchaj SovnIS qorDu'meychaj. qaStaH repmey.

HaStaHomDaq Hota'ro' QI' ta laDchoH. Daj. may'DujDaq toy'pu'. po'qu'mo' naD HoDDaj wa'DIch. numpu'. 'ej may'Daq yoH ghItlhlu'. DeghwI' qu' bejqa'. nuplaw' tlhuHmey 'a wej quSvo' pumpu'. Hota'ro' ta laDqa'. pIj ropyaHDaq ghaHpu'. bIjlu'mo' rIQpu'. <tlhIvmo'> <moch tlhochmo'> <moch nIS> je ghItlhlu'. Hujbej Qel taHom Qav. motlh bIjmo' qaSbe'law' QIHvetlh. bong qonlaw'. qatlh may'Dujvo' Qaylu'? QIjbe' ta. naDHa'be'pu' HoDvetlh 'a pay' latlh DujDaq toy'choH. parpu' HoD cha'DIch 'ej jeQbe' jatlh. tlhoch'egh ta. De' chu' chel vajar HoD.

vIHchoH Hota'ro'. jatlh HoD "Hota'ro', choQoylaH'a'?"

"HIja'," jatlh DeghwI'. nach tlhe'moH 'ej HoD leghlaHlaw'. tam ghoghDaj 'ach Qap.

"'arghHa'lI''a' DotlhlIj?" jatlh HoD.

chov'eghmeH yev Hota'ro'. mon 'ej jatlh "wej vIHeghpu', HoD. DaH jItlhuHmeH jISuvqu'nISbe'. 'a chaq yInSIp vIHutlhmo' jIchov'eghlaHbe'." chovlaH HoD. chaq nItmo' meH muD, naDev tlhuHtaHvIS tar 'uchHa' 'Iw 'ej yInSIp lo'qa'laHlaw'.

jatlh HoD "QI' talIj vIlaDlI'. qatlh may'Duj Damej?"

jatlh Hota'ro', "vImejbe'pu'. waw'Daq jIHtaHvIS mumejmo' muQay wo'. wa' nuv loSbe' may'Duj."

chorghmaH jav: Heghba'lI'

qaSpu'DI' tup puS jatlh Hota'ro', "HoD, jIDoy'qu'law'. qaStaHvIS rep puS choSonqang'a'?"

"meH vISeH, DeghwI'," jatlh HoD. "mIch wejDaq yIQongQo'." HoD pa'Daq Qong 'e' chaw' HoD 'ach meH HeH HurghDaq QotchoH 'e' wIv Hota'ro'. choQDaq QongchoH 'ej qaStaHvIS yaH poH DeghwI' bejchoHDI' reH tlhuHtaH.

meH 'el ghutar, HobtaHvIS. DeghwI' yaH chIm leghDI' HoDDaq tlhe'.[40] QeHlaw' qabDaj. jatlhlaHpa' jatlh HoD, tlhuptaHvIS, "yIchuSQo'. QongtaH DeghwI'ma'." Hota'ro' Daq 'ang. belchoHba' ghutar. QongtaHbogh be' nuD ghIq nIQ SuqmeH Sojpa' ghoS. cheghDI' SopmeH ba'choH. ghutarvaD meH Qay HoD. Duj Dotlh ja'ta'DI' HoD jatlh ghutar, "QongtaHvIS yaS wa'DIch, jachtaH ."

"jISov," jatlh HoD, 'ej SuchmeH Hu'.

QongDaqDaq QottaH 'ungya. bejtaHvIS HoD jachqu'mo' vem'egh. HoD leghDI' jatlh, "maqochwI', qatlhobnIS ..."

jatlh vajar, "nuq DapoQ?"

jatlh 'ungya, "DaSov."

jatlh vajar, "Qo'."

jatlh 'ungya, "muHIvDI' jagh, 'oy'qu' 'ach 'oy'vetlh ramqu'moH 'oy' vISIQtaHbogh. muvegh pagh. luHwIj ngImDaq nonchoH Soj vISoppu'bogh. nIteb jIQamlaHbe'. Hoch tup ghur bep'a' vISIQbogh. HoDwI', jupwI', vajar! jIHegh 'e' yIboQ. qaqoy'!"

jatlh HoD "qaja'pu'. nuH Da'uchlaHtaHvIS naDev bIlI'taH. Duj Datoy'meH 'oy' DaSIQnIS." janglaHpa' 'ungya mej HoD. bech jup 'e' tIvbe' 'ach teH mu'meyDaj. HIvqa'chugh jagh 'ut Hoch SuvwI'. 'ej chaq pIvchoH 'ungya. pIvchoHta' Hota'ro'. meH 'eltaHvIS jachtaH 'ungya 'e' QoylaH.

meHDaq vempu' Hota'ro' 'ej ghutar retlhDaq ba'taH. "HoD!" jatlh 'ej luvan 'a HoD pa' lojmIt bejtaH. 'ungya beymey QoylaHba'. QIghpej SIQbogh qama' rur. vajar pong jachtaH. jangbe'mo' HoD bejchuq Hota'ro' ghutar je. ghIq Hota'ro' pong jachchoH yaS wa'DIch.

"vISuch," jatlh Hota'ro'. yeptaHvIS Hu' 'ej HoD pa'Daq yIt. 'elpu'DI' tugh mev 'ungya beymey.

chorghmaH Soch: taj noj

bItchoH HoD. nuq ta'lI' Hota'ro'? Hu' 'ej HoDpa' lojmIt retlhDaq QamchoH. jatlhtaH 'ungya 'e' QoylaHmo' leSchoH 'a pay' 'ungya mu'mey QoychoHlaH. nuH bey'Daj Del 'ungya 'ej tajmey le' perlI'. tajmey SuqmeH Hota'ro' ra'lI'. HoD pa' mejDI' Hota'ro' meH mej 'ej mIch wej, ungya' pa' je 'el yInroHDaj. cheghtaHvIS chob'a'Daq ghom HoD. 'op tajmey qeng. "HoD." jatlh Hota'ro'. tajmey qengmeH cha' ghop lo'taHmo' vanbe'. QamtaHvIS Hota'ro' woS qIpmeH pe'vIl ro' lo' HoD. Hota'ro' nach vIHqu'moH 'ej Sa'HutDaq pum, tajmey chaghtaHvIS. ravvo' HoD bejtaH. morghbe' 'a chunlaw' qab.

"mIch wej Da'el net tuch!" jatlh HoD.

"luq HoD! vI'elqa'be', HoD!" jatlh Hota'ro'. bIjlu'DI' jotqu'mo' Hota'ro' reH qIpqa' neHchoH. bIj meq lIjlaw'pu' HoD 'a bIj qotlhba'. ba'taHmo' chaq val. qIpmeH joD neHbe'. 'a puplaH. qIv pup. DaSpu' lo'be' 'ach 'oy' SIQ 'e' 'angmo' Hota'ro' qab bel HoD. meHDaq chegh.

qaSpu'DI' tup puS meH 'el Hota'ro'. rIgh. SIbI' HoDpa' 'el, tajmey qengtaHvIS. tugh tlha' HoD. 'ungya retlhDaq tajmey lanta' DeghwI'. tajmey DellI' 'ungya 'ej HIpDajDaq So'lI' DeghwI'.

"nuq bota'lI'?" jatlh HoD QeH.

jatlh 'ungya, "SochHu' , poSchoHpa' Som, lopmeH neH Hu'qa'ta'mo' DeghwI', nuHmey qengbe'pu'. pa'DajDaq Hoch nuHDaj tu'lu'." 'oy' SIQmo' yev 'ungya. jatlhqa', "Duj HubmeH tajmey poQ SuvwI'. 'op vInoj. Do'Ha' DeghwI'ma' 'IHmoHbe' SutmeywIj." Hota'ro' porghDaq Doghbej ghutar yIvbeH.

Hoch nuHmey So'ta'DI' Hota'ro' ghaHvaD jatlh HoD, "DaH nuq Danab?"

jatlh Hota'ro', "jItoy'rup, HoD. chay' chora'?"

"puchpa' yISay'moH. yIruch!" jatlh.

"lu' HoD!" jatlh Hota'ro' 'ej lobmeH moD. mejtaHvIS rIghtaH.

mejpu'DI' Hota'ro' jatlh HoD, "tajmeyvaD Dutlhob'a'?"

jatlh yaS wa'DIch "ghobe'. yIvbeHvetlh vInuSDI' QIj."

jatlh HoD. "qatlh ghaH DarI'pu'?"

"chojangbe'mo'," jatlh 'ungya. "muQorghvIpbe' Hota'ro'. SIj ghaH. qatlh Dapar?"

"mughIj. may wanI' 'e' SaHbe'law'mo' ghob Hutlhlaw'. Huj." jatlh HoD.

"woQ DaSaHbe'law'mo' nuvpu' DaghIj SoH" jatlh yaS wa'DIch. "Hut tlhIngan may'Duj HoDpu' DaponglaH'a'?"[52]

"wa' may'Duj HoD vIponglaHbe'." jatlh HoD "vISaHbe'chu'."

chorghmaH chorgh: QaQ betleH

"choboQqangbe'choHchugh ghaH vItlhob, vajar," jatlh yaS wa'DIch. vIHDI' loQ jach.

jangbe' vajar.

"jIHoH'eghmeH nISwI' vIlo' 'e' vIqel jay'! chojoy'taH! vISIQlaHbe'! jIHeghba'lI'. QongDaqDaq jIHegh vIneHbe'!" jatlh 'ungya, ghIq jachqa'. quvHa''egh SuvwI' 'e' bej neHbe'mo' vajar, DoH. nogh yaS wa'DIch 'ej QongDaq lItHa'. ravDaq pum 'ach ravDaq ghoStaH. vIHDI' jach. DoHtaHmo' vajar meH 'el. meH 'el je yaS wa'DIch. ravDaq QottaH 'ej bep'a'mo' jachqu'. DoHqu'mo' vajar yItHa' 'ej Sa'HutDajDaq pum.

beymey QoylaHmo' ngugh meH 'el Hota'ro' nISwI' yantaHvIS. jach HoD "naDevvo' yIghoS!" jatlh. "peghoS!" jachtaH neH yaS wa'DIch. HeD Hota'ro' ghutar je.

meHDaq 'ungya legh HoD. qIj 'ej wov DIrDaj. DISmey rur mInDu'Daj. porgh naQ ngej rop. yItbogh lom rur, 'ach yItlaHbe'. muS'eghchoH vajar. yaj'eghlaHbe'. SeH'eghlaHbe'pa' maqoch qatlh boQbe'pu'? 'ungya retlhDaq torchoH 'ej maqochDaj ghop Hot. mer porgh Hat. jatlh "jupwI', jIQoS, wIta'. taj SeQ Daghajchugh yIper." qaStaHvIS lup puS jach neH 'ungya ghIq jatlh "Hota'ro'." yaj HoD. 'ungya tajmey ghajtaH Hota'ro'.

Hu' HoD. Sojpa'Daq Hota'ro' ghutar je yInroH tu'lu'mo' Duj QumwI' SeHlawDaq pa'vetlh wIv. jatlhmeH leQ 'uypa' QubchoH 'ach Sojpa'vo' ghutar ghogh Qoy. jatlhlI' "nISwI' beH vIlo'be'. HoD HoHDI' vay' wo' toy'. potlh lurDech. nuH SeQ vImaS. QaQ betleH."

yay' HoD. janglaw' Hota'ro' 'ach reH tammo' be'vetlh ghogh mu'meyDaj QoylaHbe'. jatlh HoD "muHoHmeH nISwI' lo' 'e' qeSlaw'!"

jatlhlI' ghutar, " ... rIQtaH HoDma' DeS."

jatlh HoD, "'ungya! DaQoylaH'a'? qIQmeH QuSlI' beq." Qay'. jatlh, "qoHpu'! vIHoH!" lojmIt wa', lojmIt cha' je ngaQmoH.[41]

chorghmaH Hut: be' Qoy

jatlh 'ungya “vajar! be' DaQoylaHbe''a'? Dubopbe'.”

jatlh ghutar, “HoD DagheSrup'a' SoH?”

QumwI' lIS HoD 'ej pay' chuSqu'. jatlh Hota'ro', “HoDma' vIHoHQo'. batlh nuDev. nuSaH. ngoy'. maw'be'. vajar HoD vItoy'rupchu'.”

“nepchoH! nutoj!” jatlh HoD. “vIHoH! 'urmang!” pe'vIl QumwI' chu'Ha'.

ghutar ghogh Qoyqa'. QumwI'vo' luQoybe'. lojmIt wa' 'emDaq ghaHtaH. jatlh “ngaQtaH.”

HoD tlhejmeH vIHchoHDI' 'ungya jachqa'taH. beymo' tlhoS QumwI' Qoybe', HoD rI'DI' Hota'ro'. jatlh “HoD, reSuj wIneHbe'. Hov ghajbe'bogh ram rur pegh ghajbe'bogh jaj. ma'el 'e' yIchaw'neS.” SoQvetlh'e' pIHbe'pu' HoD.

jangpa' HoD jatlh yaS wa'DIch “Hota'ro', be'oy, HIghoS.”

“lojmIt yIngaQHa'moH,” jatlh Hota'ro'.

“yIpoSmoH,” jatlh 'ungya 'ej jachqa'be'meH rIlwI' chopchoH.

qatlh vIngaQmoHta'? ghel'egh vajar 'ej lojmIt poSmoH. 'el ghutar, Hota'ro' je. ravDaq QottaH 'ungya. nIvnav yopwaH neH tuQtaH. HeDajDaq 'Iw HuH je ngoHlu'. He'So' porghDaj. SIbI' 'ungya ghoS Hota'ro' tlha'taHvIS latlhpu'. ravDaq yaS wa'DIch luDech. jatlh vajar, “Hota'ro', taj Daghajbogh poQ.”

“SoSnI'lI' taj, qar'a'?” 'ungyavaD jatlh Hota'ro'. Qochbe' 'ungya. taj lel Hota'ro' 'ej HoDvaD nob. HoDvaD jejmeH nagh nob ghutar. taj jejchoHmoH HoD. 'ungya DeS yach Hota'ro'.

“taj yItlhap,” jatlh HoD 'ej taj jejqu' much. nogh 'ungya 'ej rIlwI' choptaH. 'oy' wab mach lIng HughDaj ghIq taj 'uchmeH ghop SIch. loj rIlwI' 'ay' Qav. regh ghop 'ej wuSDu'Daq 'Iw Doq tu'lu'. 'oy''a' SeHmeH rIlwI' chopchu'ta'.

taj 'uchchoH 'ungya 'ej taj ret'aqDaq latlh ghop lan je. 'ungya ghopDu'Daq ghopDu'Daj lan HoD 'ej roDaq Daq qar HotmeH taj Dev. jachchoH 'ungya 'a wej taj DuQchoHta'. SeH'egh. taj yuvchoH 'ach nechchoH. ngaDqa'moH HoD. “mInDu',” jatlh. poStaHmeH 'ungya' mInDu' 'uchchoH ghutar. DuQ'eghmeH 'uyqu' 'ungya. DIr SIjlI' taj 'e' lubej. 'etlh waQbe'meH joQ DevlI' vajar. DuQ 'ej tIq 'el.[43] reghqu'choH. boQwI'pu'Daq ghay 'Iw. jachqa' 'ungya 'ej jachchoH je latlhpu'. tIq 'ay' vaghDIch SammeH taj tlhe'qu' vajar[46] 'ej ghaybe'choHDI' 'Iw taj lel. taj Say'moHmeH tlhayDaq ngoH vajar. jachbe'choHpu' 'ungya 'ach taH latlhpu' beymey.[44] ghuHmoHmeH 'ej Sotmo' 'ej DunHa'mo' wanI' qaStaHvIS poH nI' jachtaH. 'oy'choHDI' HughDu' tamchoH. bejchuq. chaHDaq 'ungya 'Iw lulegh 'ach jatlh pagh.[45]

HutmaH: Qoy'be'

jatlhbe'taH Hoch. HIq Suq HoD. nov HIq Huj 'oH. lujonta'mo' Segh luSovbe'. HIvje'mey teb 'ej latlhpu'vaD nob. tlhutlh 'ej jatlhbe'taH 'ej bejchuqbe'taH. choQDaq QottaH 'ungya lom. pagh legh mInDu'Daj poS 'ej chuq'a''e' leghlaHbe'bogh nochchaj lubejlaw' yIntaHbogh tlhIngan mInDu'. Duj QonoSDaq wanI' qon HoD 'ej beq tamey lIS. jatlhpu' HoD 'utlh . chImchoHDI' ngaSwI' latlhmey Suq HoD. HoSghaj HIq. tlhutlhtaH. jeghrupDI' jav chejDu' jatlh HoD. “may' law'.”

lubejchoHDI' latlhpu' jatlhqa' vajar, “jIyIntaHmeH pIj vang.”

qech quvmoHmeH yev, ghIq jatlh ghutar, “mutoD je.” ghopDu'Daj rIQ nuD. 'IQchoHlaw'.

vup'egh vay' neHbe' vajar. mermeH jatlh,“ghutaaaaaaaaar!” ruq nI' lIng jatlhtaHvIS.

ruqtaHvIS HoD Da ghutar, “vajaaaaaaaaar!” Haghqu' ghutar vajar je.

jatlh HoD “Hota'ro', yIruq.” nID Hota'ro' ach tuSqu'choH. 'Iw tuy'. Hagh HoD. jatlh “jaS bIruq. qatlh reH jaS bIvang, DeghwI'wI'?”

HoD bejmeH tlhe'eghchoH Hota'ro'. chechchu'mo' SomrawDaj SeHlaHchu'be' 'ej jIjbe'taH mInDu'Daj. pe'vIl HoD qIvDaq ghop lan 'ej jatlh “Duj vItoy'meH jIvang. chonuQchugh Sa'HutlIjDaq yIghoD.”

Haghqu' HoD. Hota'ro' qIp 'e' ghetmeH vIHmo' quSDajvo' pum. Hu'choHDI' pumqa'mo' ravDaq ba'taH. jatlh “peqIm! peqIm!” ghop joqmoH. tamchoH Hota'ro' ghutar je. HIq tlhutlhqa' HoD. HIvje' roQ. bejqu' latlhpu' 'e' tu'DI' jatlh “nuq?”

“bIjatlhrup'a', HoD?” jatlh Hota'ro'.

jatlh HoD, “ghobe', Sogh. jIchechqu' neH.” Haghqa'.

“HoD,” jatlh “Hota'ro', “lagh jIHneH. ghIrel yIvbeH vItuQtaH. Sogh DeghDaj Dalegh.” HIqDaj tlhutlhqa'.

jangchoH HoD 'ach ghum SeHlaw. Hotlhqa' DujHey. SeHlaw'Daq vIH Hota'ro' ghop 'ach mI'be' nItlhDu'Daj. Soy'qu'. “va!” jatlh. “jIchechqu'mo' botjan vIchu'laHbe'.”

“yIqImHa'. ngebqa'ba',” jatlh HoD.

vay' ghum SeHlaw. “Duj tu'law',” jatlh Hota'ro'.

“qaboQ,” jatlh ghutar 'ej cholmeH QamchoHDI' bong vajar qIv pup 'ej pum. SeHlaw ruQ 'e' nIDqa' Hota'ro' ghIq chechchu'mo' 'oHDaq vulchoH.

“Qu'vatlh!” jatlh ghutar, Hu' 'ej SeHlawvo' Hota'ro' yuv. pay' “jol! yIbachrup!” jatlh. jol Qoybe' HoD. wewchoH muD 'ej pay' ghaH retlhDaq QamtaH vay' 'ej vajar nachDaq vay' Qach. vulchoH.