nuq bop bom: 'ay''a' Hut

wa'vatlh javmaH: wovqu'

tachDaq pay' jatlh ghutar, "pebej!" vajar 'emDaq SIq. bejmeH tlhe'egh vajar. Hovmey cha'taH Qorwagh'a' 'ach Hovmey tlhopDaq HuSlaw' *Dugh*. tachDaq tlham tu'lu'mo' lolHa'law' *Dugh*. torchu'pu' 'ej bIngHey bej 'et. tlham Hutlhmo' logh, ram.[241] SomDajDaq yIt wovmoHwI'mey qengbogh nuvpu'. wovqu' wovmoHwI'meyvetlh. wovmoHwI'mey motlh bIHbe' pay' 'e' tlhoj vajar. pe'meH Sechmey bIH. *Dugh* lulaghchoHpu' jonwI'pu'. pay' pur vajar 'ej HughDaq chuS tlhuH.

"Qo'!" jatlh Hota'ro'.

jatlh qaH'eng, "peleS. poS HanDogh luchev neH. qaStaHvIS yaH poHwIj peQchem lIngwI' wIngaDmoHta'. nubmo' bIQSIp ngaSwI' *veS* SomDaq wIHIjbe'. *veS* pIrmuSDaq 'uchchugh luHwI' tIHmey, *Dugh* ngaSlaH *veS* pIvchem. cha' rep pIq gharben cha' wIghoSchoH. chorgh rep pIq wIpaw. pa' tejvaD luch wIHIjlI' ghIq Qo'noS wIghoS."

"chong!" jatlh ghutar. "wo' vergh vI'av."

"maj," jatlh vajar, 'ach DujDaj lupe'lI'mo' loghSutmey tuQtaHbogh nuvpu' bItbej. yajHa'be' qImyal DaH 'e' Sov vajar. vajar tojpu' 'ej buQpu' 'e' nID. jonwI' ghaHmo' Hota'ro' bang'e' *Dugh* Dotlh ja' 'e' Sov qImyal. vaj Hota'ro' ghaH je voqHa' vajar 'e' chup. wanI'vam rurbogh wanI'meymo', loghDaq yIntaH vajar 'ej Duj mach ra'taH. woQ Quj muSchu'. Suv neHchugh vay' vaj Suvjaj!"

ja'chuqlaw'taH Hota'ro' qaH'eng je. latlh raSDaq taghlaw'pu' mu'qaD veS, jeStaH ghutar 'ach mu'mey QoylaHbe'mo' vajar 'ovlaHbe'. mogh 'ej qejchoH. tachDaq ratlh neHbe'. QumwI' ghajbe' 'e' tlhoj. tatlhlu'be'pu'. jatlh, "Hota'ro', QumwI'lIj DaghajtaH'a'?"

jatlh Hota'ro', "ghobe'. jIchechtaHvIS vIchaghlaw'pu', 'ach *Dugh*Daq vISambe'pu'."

jatlh qaH'eng, "naDev Qapbe'." Hung pat bopbogh mu'mey jatlh ghIq QumwI'Daj lel. vajarvaD nob.

nobHa' vajar. jatlh "jIHvaD Hung yIrI'. DorwI' vIpoQ."

rI' qaH'eng, ghIq jatlh, "ghoSlI'." chuSqu'choHpu' mu'qaD veS. Soj lujaDtaH 'op jeSwI'pu'. qejmo' vajar tIvbe'. Hu' 'ej tachvo' yIt. tugh chol be'. wuSDaj rIQmo' ghov. be'tlhar ghaH.

"vajar HoD," jatlh, "DorwI'lI' jIH. nuq wIghoS?"

SuchwI' chaw'Daj much vajar. jatlh, "pa'wIj. 'oHtaHbogh Daq vISovbe'."[114]

SuchwI' chaw' nuDbe' be'tlhar. jatlh, "QongwI' pa' mIch cha'Daq tu'lu'. Ha'."

pa'Daq vajar Dor 'a lojmIt lupawpu'DI' mevbe'. QongDaqDaq tlhej. tugh qejbe'choH vajar.

wa'vatlh javmaH wa': qaH'eng nob

vem vajar. mejpu' be'tlhar 'ach be' larghlaHtaH 'ej chopqu'mo' loQ 'oy'taH qevpobDaj. Hu' 'ej puchpa' Sam. cheghtaHvIS chobDaq ghutar tu'. chech. jatlh "HoD! pISamta'!"

SaH je Hota'ro'. loQ chechlaw' ghaH je. jatlh Hota'ro, "Dutlhap Hung la' net jatlh. roD Dorbe' la''e'. poStaH lojmItlIj 'ej SaH 'Iw. Daqoplu' 'e' wIHaj."

jatlh vajar, "qay' pagh. muSujbe' Hung."

jatlh ghutar, "bIrIQ, HoD." qevpobDajDaq SIq'egh ghutar.

mon vajar. HaghchoH Hota'ro'. jatlh vajar, "'op Hung mIw vItIvqu'. Hota'ro', nuqDaq ghaHtaH banglI' 'IH'e'?"

jatlh Hota'ro', "meH chachqoqmo' vumnIS. DaH ghem wISop. ghotlhej!"

SopwI' pa' lughoS. SoptaHvIS, paw qaH'eng. Soj Suqta'DI', Hota'ro' retlhDaq raSDaq nay'mey lan, ghIq vajar chol. ngaSwI' mach much 'ej jatlh "SoHvaD vay' vIchenmoHta', vajar HoD."

ngaSwI' poSmoH vajar. cha' Dochmey nIb legh. mepDaq 'ul SIrghmey, HoSchoHwI'HommeyHey[152] je lutu'lu'. DaqwI' cham qawmoH. tlhuQ ghajbogh gho bID rur. "nuq bIH?" jatlh vajar.

jatlh qaH'eng, "QoymoHwI'mey bIH. teSDu'lIjDaq tIlan, HoD." qogh 'angmeH, vajar jIb yuvchoH.

qu'choHDI' vajar loQ DoH qaH'eng Hota'ro' je. pe'vIl jatlh Hota'ro', "QoymoHwI' bIH. bIQoychu' 'e' boQ."

pIH vajar. beqvaD Qel De' 'angbe'pu'. vajar'e' QoymoH'a' janvam, pagh DaqwI'pu''e' QoymoH'a'? jatlh "qay'choH teSDu'wIj lIjatlh 'Iv?"

bejchuq Hota'ro' qaH'eng je. jatlh qaH'eng, "juSuchtaHvIS vItu' 'ej 'olpu' Hota'ro' ghutar je, qaH."

jatlh ghutar, "SoHvaD pe'vIl majatlhnIS 'ej QumwI' DalISDI' chuSqu', HoD."

wa' jan woQ vajar 'ej nuD. jatlh qaH'eng, "poSDaq yIlan."

leQ mach chu' vajar 'ej qaH'engvaD nob. QIt vajar poS teSDaq jom. 'oy'be'. "DaH choQoylaH'a'?" jatlh Hota'ro'.

wa'vatlh javmaH cha': QoylaH

"HISlaH," jatlh vajar. qaqba'. latlh chu' 'ej nIH teSDaq lan. choHchu'pu' Dechbogh wabmey.

jatlh qaH'eng, "teSlIj rurmeH, Hung mIlloghmey vIlo'ta'. boQ je Qel. pupbe'bej 'ach bISaHtaHvIS ghu'lIj Dub 'e' vItul."

jatlh vajar, "qaH'eng Sogh, porghwIj DaHotDI' qaS wanI' Dun 'e' vISov, qaqIHDI'."

"HoD!" jatlh Hota'ro'.

Hagh vajar. jatlh, "nuq? 'IH ghaH. SoH DuHotDI' DatIv, qar'a'?" vajarDaq boqrat chej jaD Hota'ro'. noDmeH baghneQDaq qompogh lan 'ej Hota'ro'Daq wob. jun Hota'ro' 'ej latlh raS SopwI' qIp. Hagh Hota'ro' 'ej raHta' jaDchoHDI' latlh raS SopwI', junqa'. vajar qab qIpchu' raHta'. qaSpu'DI' vagh tup Soj jaDtaH pa' naQ. SoQchoHpu' tebwI' yaH 'ej HaghtaH 'ej HIvchuq Soj baHwI'pu'.

lutIchchuqtaHvIS QoylaH 'ej yajlaH vajar. vabDot morSIqnganpu' yajlaH,[183] 'ej chuSchoHDI' qaH'eng QumwI' Qoy je vajar. jatlh rI'wI', "DaH DIngtaHvIS chuS. SIbI' yIghoS!"

jatlh qaH'eng, "yaS wa'DIch." mej.[184] DaSmeyDajmo' choQDaq wabmey jej Qoy vajar.

"DIngchu'be' quSDaj," jatlh Hota'ro'. nujDajDaq Qaj tlhuQ ghoDtaHvIS. mu'meyDaj yajlaH je vajar.

jatlh vajar, "Dun QoymoHwI'meyvam. Qu' law' ta'nISba'taH qaH'eng. qatlh jIHvaD chenmoHta'?"

jatlh Hota'ro', "chotoDta'mo' 'ej chovuvtaHmo' 'ej toDujwIj vISammeH bIloSlI'mo'." yev Hota'ro'. motlh tlho'chuqbe'mo' tlhInganpu', vI'law'taH tlho'nISghachchaj; chaq SomDaq vI'taHbogh tatmey rur. Som wewmoH 'ej tlhInganpu' vuvqu'chuqmoH. jatlhqa' Hota'ro', "...'ej majachnIStaHmo' mapuQ, HoD."

jatlh ghutar, "SuvwI''a' SoH, HoD. SoH 'emDaq jagh tu'lu'chugh, Datu', DaQoybe'chugh, 'ach jejtaH Hoch nuHmeylIj wIneH."

jatlh vajar, "Qo'noSDaq maHDI' ropyaH vIghoS. pa' teSDu'wIj tI'laH Qelpu'."

"DaH chay' jura', HoD?" jatlh ghutar.

jatlh vajar, "DaH SoH qara'be' ghutar. Qo'noS vergh Datoy'. malIghtaHvIS maleStaH. may'Dujvam jo yItIv. peQong, peSop, petlhutlh, pengagh. qImyal Sa' yInuQQo'. mayuDHa' tagha' 'e' Sovmo' nunuQbe'jaj."

wa'vatlh javmaH wej: may' qoch

ghem Sopchu'DI' vajar, QongDaqDajDaq ghoSqa' 'ej QongchoH. gharben cha' bavchoHpu'DI' *veS* vajar vemmoH ghogh. Duj QumwI' patvo' Saqghom chutmey QIjlI' meH yaS. Hat HoS nuHmey. yoqpu' HIv net tuch. jolpa'mey lo'nISbogh tIjHa'wI'pu' per. pa'DajDaq Duj QumwI' rarHa' HoD 'ej Qongqa'. qaStaHvIS jaj naQ qeSDaj lobchu'. po cha'DIch vemDI' betleH tlhap 'ej mI'meH pa' ghoSmeH DorwI' Suq. qaStaHvIS vaghmaH tup qeqta'DI' poSchoH lojmIt 'ej 'el betleH qengbogh be'. vajar van 'ej qaDmeH chol. monHa'mo' qaDwI', qaStaHvIS lup vIDlaw' ghIq be'tlhar ghov vajar. vIDmoHlaw' wuSDaj. jatlh, "Hung qonwI'Daq qaleghpu'mo' qamuv 'e' vIwuq. qoch chu'mo' reH Sov chu' net ghojlaH." betleH pep be'tlhar 'ej HIvchoH.

"cha'Hu' ram vay' Daghoj'a'? " jatlh vajar, be'tlhar 'etlh way'taHvIS.

betleH ngoltaHvIS be'tlhar jatlh, "bIwuD." po'bej be'tlhar 'ej wej Doy'. vajar moDmoH 'ej tugh 'eb Sam be'tlhar. "jejqu'. qaHotbe'," jatlh 'ach QIDlaHba'pu'. taH may' ngeb.

bavchuqchoH SuvwI'pu', ghol Daq puj nejtaHvIS. jatlh vajar, "pa'wIj DanuDtaHvIS jIQong 'e' vIDa. jIchunmo' bIyonchoH'a'?"

"jIyonchoHpu'." jatlh be'tlhar. Duv 'ej jop 'ach not wun'eghmoH. jatlhtaH, "qImyal Sa' Davoqbe'chugh, HInob. nejtaH qImyal. not mev. 'oHmo' bIcheplaHbe'. lIHoHvIpbe'. qorDu'meyraj HoHvIpbe'." be'tlhar 'etlh way' vajar 'ej mu'mey buSHa'. be'tlhar mupmeH 'eb Sam vajar 'ach Hotbe' je. 'etlhmey Huv lulo'mo' Qob Quj.[199]

jatlh be'tlhar, "wa' ngoD vISovnIS. vajar HoD, tep Hat DaHIjbe'chugh, qatlh romuluSngan neHmaHDaq SungIvtaH 'e' DaSap jay'?"

jatlh vajar, "wo' vItoy'meH Qu' lI' vIta'laHchugh jIruch. pItlh. yajlaHbe'chugh tlhIngan wo' la', mu'IQmoH wo'wIj Dotlh." jatlhtaHvIS betleH 'uchqu' vajar. tlhIngan quv tIchlI'. nom noD be'tlhar. junmeH DoHDI' vajar, be'tlhar chuq narghlaHbe', botmo' tlhoy'. vajar Hugh buQ be'tlhar 'etlh, botlaHpa'. Ho'Du'Daj 'ang be'tlhar, 'ach 'angtaHmo' wuSDaj, QeHDaj chovlaHbe' vajar.

wa'vatlh javmaH loS: yu'wI' Qujmey

vajar Hugh DIr Hot be'tlhar 'etlh, 'ach 'uybe'. tlhupchoH be'tlhar. jatlh, "wo'majDaq ratlhtaHmo' nIrurbogh HoDpu', muQuchmoH wo' Dotlh." QeHbe'chu'. tlhuptaHvIS be'tlhar, jatlh, "bIquvba'mo' jIquvHa''eghbe'meH DujrajDaq HatwI'na' vIlanQo'. ghIq pa'lIjDaq romuluSngan nejwI' vISam." yay' vajar 'ej morghrup 'e' leghlaH be'tlhar. tlhupqa'. jatlh, "yIleS. Duwambe'lI'. jav wen 'op DIjon 'ej DIQotlhta'. ghem boSoptaHvIS pa'lIj nej Hung 'e' ra' Sa'. luSambe'pu'mo' QeHqu'. Dupum neH."

pe'vIl jatlh be'tllhar, "qajeyta'." vajar Hughvo' 'etlh teq 'ej DoH. jatlh "ghop chIm vIq DatIv'a'?"

betleHmey roQDI' cholchuqqa'. vajar pummoH 'e' nID be'tlhar 'ach be' DeS SeHchoH vajar 'ej tormoH. 'uchtaHvIS tlhup vajar. jatlh, "qatlh HeSwI' jIHlaw' neH Sa'?"

jatlh be'tlhar, "HoD matlh nuQlaH neH. maghwI''a' ngu'laHchugh, vaj nubchoH qorDu' juppu' je 'ej nejchu'meH wo' jo ra'laHchu'."

tlhe''egh be'tlhar 'ej vajar ngaDHa'moHmo' bong torchoH je vajar. tlhuptaHvIS jatlh vajar, "De' le' vIghaj qatlh net Har?"

Hu'choHDI' vajar, pumqa'moH be'tlhar 'ej ravDaq pol porghDaj. ghobchuqtaHvIS tlhuptaH. jatlh be'tlhar, "nuvpu' nub ngu'taH qImyal. joy'wI' jIHbe'."

pe'vIl jatlh vajar, "targhlIj DangaghmeH to'vetlh Dalo''a'?" ghIq tlhupchoH. jatlh, "bIghHa'Daq jItoy'pu'. to'lIj vIghov. chovoqmoHDI' mujoy' latlh, ghIq SoHvaD jIDIS." tlhe'egh 'ej pe'vIl ravDaq pum be'tlhar.

SeHmeH vangtaHvIS vajar. tlhup be'tlhar. jatlh, "tlhoy bIpIH, 'ach DujvamDaq qapIchlaHbe'." be'tlhar voqchoH wej 'e' wuq vajar. voqchoHchugh, choH nuq?

vajar cha'neH 'uchchoH be'tlhar, 'ach be'tlhar nach 'uchchoHmeH tlhe''egh vajar. vajar wuSDu'Daq Sumqu' be'tlhar qogh. jatlh vajar, "qavoqchugh, 'Iv vIvoqlaH je?"

vajar qogh cholmeH be'tlhar wuSDu' tlhe''egh be'tlhar 'e' chaw' vajar. jatlh be'tlhar, "wa' nuv vIvoqlaHbogh vIngu'laHchugh, DaH SoH qaja'be'taH." yay' vajar. DujvamDaq Dat tlhInganpu' lutu'lu' 'ach voqHa'chuqmo' Hoch, quvchaj lupegh. vajar SomrawDu' pujmoHmo' qech, nom nargh be'tlhar.

pe'vIl jatlh be'tlhar, "vIt Daghovmo' bItuH! jIHvaD Qapbe' to'vetlh, no'wI' quv vItoblaHmo' jIH!" Hagh 'ej betleHDaj woH. jatlh, "Qapla', vajar HoD."

wa'vatlh javmaH vagh: QIn loSDIch

SopwI' pa'Daq vajar Dor 'avwI'. pa' lu'el je ghutar, Hota'ro' je. nay'meychaj luSuqta'DI' HoD tlhejchoH. ba'choHtaHvIS Hota'ro', 'ungya taj ret'aq legh vajar. puqpu' ghajbe'mo' 'ungya, ghaytan Heghbat jeSwI'vaD tajmey nob qorDu', 'ach wej jangta' HoD 'utlh. nIQ luSoppu'DI' De'wI' pa' lughoS.

SaH vagh QInmey,[115] labpu'be' 'ungya tennuS. *Dugh* loH bop cha'. De' chu' lu'angbe'. Dugh jonwI' chu' bop wejDIch. ja', Heghpu'mo' ghIrel tugh verghDaq paw jonwI' chu'. mIS vajar. wej toy'beHmo' Duj, wej jonwI' chu' SuqmeH tlhobpu'. ghIq HovpoH laD. ngo'qu' QIn. Heghpa' ghIrelHey lablu'pu'. DaH yajchoH. pong ngeb lo'pu' *Dugh* toy'bogh ghIrelqoq'e'. pawpa' ghIrelqoqvetlh Heghpu' ghIrel teH. ghIrel pong nIHta' jonwI'qoq. Hujqu'. qatlh jonwI' Da vay'?

QIn loSDIch laDchoH vajar. perlu'[190].

QIn wIvDI', SIbI' vIHbogh mIllogh cha'choH [259] QIn. *veS* meH Hung ta 'oH. meH tlhopDaq qonwI' jomlu'ba'pu'mo' Hoch yaHmey luleghlu'. HoD quSDaq ba'taH qImyal Sa' 'ej Degh SeH loD ghovbe'bogh vajar. HaSta bIngDaq Duj pong, mIllogh qonwI' mI', qonwI' Daq, HovpoH je ghItlhlu'. chorgh wen qaSpu'.

jatlh ghutar, "nuq Dabej, HoD? lab'a' HoD 'utlhlI'?"

jatlh vajar, "ghobe'. may'Hey 'oH. mungeH vay' vIghovbe'bogh." may' tamey bej 'e' tIv vajar.[119] bejlI' je Hota'ro'.

HaStaDaq tlhe' DeghwI' 'ej Sa'vaD jatlh. pagh QoylaHmo' vajar QoymoHwI' Hot. jatlh ghutar, "tam. wabmey qonbe'lu'law'pu'."

HaStaDaq QeHchoHlaw' qImyal Sa'. jatlhtaHvIS DeSDu' joqmoH. joq je DeghwI' DeSDu'. ghoHtaHvIS, meH lu'el 'avwI' Hota'ro' je. nISwI' lel Sa'. DeghwI'Daq Qeq. wovqu' nISwI' tIH. pumDI' DeghwI', HaStaDaq, vajar retlhDaq je loQ Sup Hota'ro'. HaStaDaq Degh SeHchoH Hota'ro'. mI'bogh nItlhDu'Daj ghovbej vajar. wewtaH begh ghuHmoHwI': Qapbe'taH begh. yev Hota'ro' 'ej Sa'vaD tlhe''egh . jatlhchoH. DeghwI' wa'DIch rur. QuchHa'ba' Sa'. Hota'ro'vaD jachtaHvIS tlhepQe' vo'taH nuj net leghlaH. chol Sa', jeqqIj joqmoHtaHvIS. Hota'ro' DeSqIv mup. 'oy'ba' 'a lobtaHQo' Hota'ro'. wuSDu'Daj porghDaj je leghlu'DI' jatlhba'.

wa'vatlh javmaH jav: bIjqoq

SeHlaw leQmey HotchoH Sa'. Qu'vetlhvaD ghaH Soy' law' Hota'ro' Soy' puS. jop Hota'ro' 'ej Sa' yeb 'uchchoH. ghobchuq chaH. meHDaq poSchoH Hoch nuj 'ach SIbI' bejbe'choH HochHom. SeHlawvo' Sa' raD Hota'ro'. Degh SeHqa'DI' Hota'ro', nom leQmey 'uy. ghunba'lI'. jachchoHlaw' Sa' 'ej nISwI' lel. SeHlawDaq QanmeH 'oHDaq qat'egh Hota'ro'. bachbe' Sa'. HoD quSDaq ba'choH 'ej jatlhchoH. ravDaq QottaH latlh DeghwI'. vultaH. chaq Heghpu'.

qaStaHvIS tup puS qaS pagh. ghIq meH lu'el cha' loDpu' tIn. negh ghaH.[219] Sa' tlhopDaq Qam 'ej luvan.[242] Hota'ro'Daq SIq Sa' 'ej jatlh. Hota'ro' chol negh. SeHlawDaq QottaH Hota'ro'. ghaH 'emDaq QamchoH wa' loD 'ej ghaH tlhopDaq QamchoH latlh. taj lel mang wa'DIch, 'ej Hota'ro'vaD lo'law'. be' DIr pe'be'law'. SutmeyDaj SIjlI'.

taj roQpu'DI' mang, yopwaH qoghDaj teq 'ej Hota'ro' 'uchchoH. qonwI' waQtaH SeHlaw, latlh mang je 'ach ghu' yajmeH leghnISchu'be' vajar. Hota'ro' luwemlI'. rIn'DI loD wa'DIch, Hota'ro' HIvchoH loD cha'DIch. Hota'ro' qab bID leghlaHchu' vajar. bechba'taH. bejtaH 'e' tIvba' Sa'. Hagh 'ej loDpu' tungHa'law'.

tagha' 'omchoH Hota'ro' 'ej nargh 'e' nID. lu'uchtaHmo' loDpu' luj. Hota'ro' chol Sa'. jatlhtaH 'ej jeqqIj yan. Hota'ro' qunlaw'. latlh 'oy' SIQvIp 'e' 'ang Hota'ro' qab. nargh 'e' nIDqa'. noDchoH. Hota'ro' mup Sa'. poSqu'choH Hota'ro' nuj. ghaytan jachtaH. Qan'egh 'e' nID, luHIvtaHvIS loD Sa' je. meHDaq bejbe' latlh nuvpu'. bejbe'choH je vajar. QIn qIl.

jIH chIm bejtaH vajar. loQ neSlo' Damo' jIH qIj, Hota'ro' qab leghlaH. Saghqu' 'ach Sotbe'. mang yoH Qorgh neH vajar, 'ach ghu' 'arghmoH neHbe'. ghaytan naDev DaqtaH je Hung. QInvam labta' 'Iv? QIn laDqa' vajar 'ach choHpu'. DaH loghDaq Duj may'na' cha'choH. lubejchoH. Hota'ro' bIjqoq cha'bogh meH ta lubejpu' 'e' luchIDqangbe'law'.

wa'vatlh javmaH Soch: jorbogh romuluSngan nach

jatlh Hota'ro', "may'vetlh vIpar. jorbogh romuluSngan nach yIcha'."

DaqwI'pu'vaD motlh DataH. Sa' chovchu' vajar. Dat DaqtaH. jabbI'IDmey jIHtaH. *Dugh* Dotlh So'meH neppu'. vajar pumta'. Hota'ro' bechqu'moHtaHvIS Hagh. qarchugh Hota'ro' De', batlhHa' HoDDaj muHta'. quvHa'bej Sa'. mIgh. quvHa'ghach'a'vam yajlaHbe'.

jatlh vajar, "jorbogh romuluSngan nach vIleghbe'pu'. yISam."

nejchoHDI' Hota'ro' teSDajDaq tlhup vajar. jatlh "Hota'ro' Sogh, bIyoHqu'." jorbogh romuluSngan nach Sam Hota'ro'. chobDaq QamtaHvIS romuluSngan, nachDaj 'o' qIp beH tIH. nach Hom 'elpu'DI' tIH nach naQ jormoH HoS. tlhoy'meyDaq, rav'eqDaq je ghomHa''egh QoghIj 'Iw je. Hagh beq. vabDot Hagh Hota'ro'.

QInDaj javDIch laDchoH vajar. labpu' 'eSSIm.

***
vajar HoD,

lI'qu' De' Dalabpu'bogh. ghoqwI' ghaHbe' Mahoun'e' 'e' vI'ol.

gharben cha'Daq 'oHtaHvIS may'Duj, tuSuchchugh SoH beqlIj je tuquvqu'moH. yuQvamDaq meb puS vIlegh. lutmeyraj vIQoy vIneH. Satlh jInmol Quv luSov *veS* jolwI'pu'.

'eSSIm
tlhIngan wo' yIn QeD 'ampaS
gharben cha' Satlh jInmol
***

ghorDaq jIHlaHbe'taH *veS* Hung. jatlh vajar, "Ha'. tej wISuch." HoS nuHmey ratlhmoHmeH 'ej betleHmeychaj tlhapmeH pa'meychajDaq Dor 'avwI' ghIq jolpa' lughoS. chuS chob'a', SaHmo' DaSmey tuQtaHbogh tlhIngan law'. jolpa' lucholqu'DI' chob'a' bottaH loStaHvIS QaS. chob'a' botlhDaq yIttaH De'wI'Hom qengbogh bu'. jatlh, "nIHDaq peQam wamwI'pu'. poSDaq peQam veng SuchwI'pu'. ghoch le' boghajchugh HIja'." chob'a' nIHDaq law' betleHmey.

wa'vatlh javmaH chorgh: SuchwI'pu'

Saqghom chutmey jatlhtaH 'ej wamwI'pu'vaD gheD mub perbogh navmey'e' nob bu'. Hagh wa' SuvwI' 'e' Qoy vajar. jatlh, "Ha'DIbaH vIleghDI' vIHoH. bong Ha'DIbaH muj vIHoHchugh mubIjlaHbe' Sungpu''e'."

SIbI' jang ghoghmey law', "Daruchchugh tlhIngan batlh DamuchHa'!" "DubIj quvHa'ghachlIj'e'." batlh quv je bopchu'. ghutar SoQmey rur.

pay' ghutar pong jach ghogh. Qupbe'mo', ghutar vav ghaHlaH jatlhlI'bogh loD'e'. jatlh "bIQol'a'? ghotlhej! mawam! Doj betleHlIj!"

paw' wamwI' Sey, ghutar je. jatlh ghutar, "jIwampa' HoDwI' vItlhejnIS. tej wIquvnISmoH." wamwI'vaD jawchoH ghutar.

De'wI' ghajtaHbogh bu' ghoS vajar. jatlh, "yuQDaq tlhIngan Satlh mID wISuch jIH beqwIj je. Quv boSovlaw'."

"nuq 'oH mI'lIj'e', HoD?" jatlh bu'. QI' mI'Daj ja' vajar. tetlhDaj laD bu'. jatlh, "ra'wI' tetlhDaq mI'lIj tu'lu'be'chugh bIQol net tuch. 'e' ra' qImyal Sa'."

"qImyal Sa' beq maHbe'," jatlh vajar. "SuchwI'pu' maH. qImyal Sa' wISuchta' 'ej DaH ghorDaq tej potlh wISuch. qama'pu' maHbe'." pIHlaw' bu'.

jatlh Hota'ro', "bu', HoDwI' De' 'ollaH Qugh Qel." ropyaH rI' bu' 'ej Dotlhchaj 'olta'DI' Qel ghogh, tetlhDaq pongmeychaj chel bu'.

chob'a'Daq ghutar luqIm nuv law'. lagh Qup luDech cha'maH SuvwI'pu'. jatlhlI' ghutar. tonSaw', quv je poj. rurchuq 'ej rurbe'chuq. jatlhDI' latlhpu' ghoHbe'. ghaqbej. quv luqeltaHvIS may'morgh lurur. quv luyajmeH jIjchu' 'ej DevtaH HoS choHwI' tamlaHbe'bogh lagh'e'. laH Daj 'agh.

jatlh ghogh, "wamwI' ghom veb!" ghoSchoH nIH loSwI'pu', ghutar vantaHvIS 'ej naDtaHvIS.

"Qapla'!" jatlh ghutar.

"ghutar," jatlh vajar, "qatlh SoQmey Damuch?"

jatlh ghutar, "SoQ vImuch 'e' vIHechbe', HoD. tej vISuchnISmo' muvaqDI' vay'. quv qechmeywIj vIQIj. 'IjchoH latlhpu'. jIjatlhtaH. jIra'be'. quv vIyajmeH jIghel neH. naDev law' valbogh SuvwI' quv ." nuj poSmoHDI' ghutar quv bop. DaH ra'wI' HoHmeH betleH lolu' 'e' chupbe'mo' yon vajar.

wa'vatlh javmaH Hut: cherghlaHbe'

jolpa' ghoSlI' wamwI' ghom veb. ghaH 'emDaq bep vay' 'e' QoylaH vajar. jatlh, "may' wIghoStaHvIS vaghvatlh negh QollaH qaStaHvIS cha' tup. qatlh leSpoH wIghoStaHvIS vagh tup poQ Hoch Saqghom?"

jang vay', "may' wIghoStaHvIS chaw'mey DIpoQbe'mo' jay'."

tagha' vajar ghom rIt bu' 'ej jolpa' lughoS. pa' Quvchaj 'ol Hung yaS. pongmeychaj mI'meychaj je qon. HoS nuHmey qengbe' 'e' 'ol. chutmey ja'qa'. vajarvaD QumwI' noj 'ej ja', "DaHjaj law'choHmo' muD tatmey QumwI' boghajbe'chugh chaq DIjollaHbe'. SuQolrupDI' perI', 'ach peloSrup. chaq paS jolraj 'ach pepaSQo'! jav rep pIq may'DujDaq tlhIHqa'be'chugh bobIjlu'. Soch rep pIq may'DujDaq tlhIHqa'be'chugh ... chaq wa' nem latlh Duj botIjlaH. loSbe' may'Duj! yaj'a'?"

"yaj!" jatlh Hoch 'ej ra'DI' yaS, jol rav lulIt. Qol. tuj muD. tuj lam je. chalDaq HuStaH tInqu'bogh 'engmey chong 'ach muD bIrmoHbe' QIbmeychaj. Quvvo' yIt 'ej Hatlh lulegh. yotlhmey, qachmey nap je legh. Du' Qu'mey'e' yajbe'bogh vajar ta'lI' yoqpu' chIS. tlhInganpu' lutu'lu'be'. chaq muj Quv. tujmo', tlhay'meyDaj tuQHa'moH tlhInganpu'. Hota'ro' yebDu'Daq moHtaH 'oy'mey. pe'pu' mIrmey, 'omDI'. DaH meqDaj yaj vajar.

bej 'e' tu' Hota'ro'. jatlh, "ra'DI' Sa' loblaHbe' mang maw'Ha'. ghopDap yoS wI'el Qapbe'taHvIS noch 'e' ra'! jIyoHbe'mo' mubIj qImyal. mang bIjtaHvIS moch, noD net tuchba'. vISovchu'. not chobIjtaHvIS jInoD."

jatlh vajar, "jISov. reH bIj Dalajchu', Sogh. cha'Hu' bIj'e' wISIQbe'. ngugh nI'oy'moH'a'?" ghIbpa' Hota'ro' yevpu' 'e' qaw vajar. chaq rIQqu'mo' SIQlaHbe'.

jatlh Hota'ro', "cha'Hu' mu'oy'moHbe', HoD. muqawmoH neH." cha'logh 'oy' SIQchu'be'taH 'e' leghmo' HoD tuHba' Hota'ro'. jatlh, "ngugh, meHDaq, SonwIj QopmoHpu' bIj. vISIQ 'e' vInID 'ach bIj vIcherghlaHbe'taH." yav bej Hota'ro'.

tlhIngan DujDaq motlhHa'be' bIjmey ral 'ach motlhHa'bej bIjqoqvetlh naS. vajar QeHmoH ghongvetlh. jatlh "yItuHQo', Sogh. DacherghlaHbe'chugh pIch Daghajbe'. vIbej 'e' vIcherghlaHbe' jIH. bIyoHqu'."

wa'vatlh SochmaH: vajar SoQ

jatlh Hota'ro', "jIquvHa''eghmoHpu'."

DaH QaHlaH vajar. jatlh, "may' law' vISIQpu', Sogh. bechtaH SuvwI' law' 'e' vIbej. QaptaHchugh Hugh, taghDu' je, jach. quvHa'moHbe' SuvwI'. wIch 'oH SIQlaHchu'bogh SuvwI''e'. DupIlmoHjaj qechvetlh, 'ach Dachavchu'be'DI' yItuHQo'. 'oy'mo' jIjachpu' 'ej 'oy'mo' jIjachqa'. HeghtaHvIS SuvwI' qatlh majach? Dapojpu''a'? jach HeghlI'bogh SuvwI' 'e' wISo'meH majach. not chID vay' 'ach teH. nuch SoHbe'bej." wa'vatlhlogh ghuv tuHvaD SoQvetlh ja'pu' vajar. chutmey nap pab batlh 'e' luHar QupwI'pu'. nuH rurbe' quv. qaStaHvIS may' nge'laHbe' jagh nIv. bong quv chIllaHbe' vay'. jatlh, "qImyal Sa''e' quvHa'qu'moH tavetlh. bItoy'taHvIS batlh yIvang 'ej wanI'vetlh yIlIj."

"DalIjlaH'a' SoH, qaH?" jatlh Hota'ro'. "DaH choleghDI' reH Daqaw. bIquv SIbI' net Sov. Dutoy' quvHa'wI' DaneHbe'. bIquvHa'be' bIjatlh 'a chovoqnISDI' meHvetlhDaq jIqoy' 'e' Daqaw 'ej latlh yaS Davoq. jIpuj 'e' DaSovmo' not chovoqchu'. vISov, HoD. jIvoq'eghqu'qa'laHchu'be'."

jatlh vajar, "bIyoHqu' reH 'e' vIqaw. DaH yaS wa'DIchwI' SoHtaH 'ej ropyaHDaq jIHtaHvIS HoD DagheS. qavoq 'e' tobbe''a'?"

jangbejbe' Hota'ro', jatlh "Duj vItoy' 'e' vInID. ghopDap mIch vIghoS 'e' ra'qa'DI' Sa', nI'moHmeH begh tI'meH poH, SeHlaw vIngaQmoHta'. ghaytan begh chu'qa'laHta' jonwI'pu', ngoq SamlaHpa' Sa'. vISovbe'. jISaHbe'. ropyaH vIghoSmeH muDor gharon, latlh je."

gharon'e' qaw vajar. pupta'DI' Hota'ro', jatlhpu'. vaj gharon ghaH wa' HIvwI''e'. wanI' buStaH Hota'ro' neHbe' vajar, ach nuqjatlh? jatlh, "nIDor'a' nIHIvta'bogh loDpu' jay'?"

jatlh Hota'ro', "HIja'. jIreghtaH 'ej jIyItlaHqu'be'. chobDaq mulon luneHbe'. muQorghtaHvIS Qel, <HaqwI' le' DapoQ> jatlh. waw' ropyaHDaq muQay 'ach Qaghlaw'pu'. pa' HaqwI' vIpoQbe' net jatlh. jIvumrupchoHDI' mejpu' may'Duj. chaq mutob Sa' 'ej jIlujmo' mulon. latlh DujDaq vItoy'choH 'ach SeHlawwIj vIHotDI' ... vIqaw 'ej jIjaqHa'choH. jIQublaHchu'be'mo' pIj jIQagh 'ej muvoqbe'choH HoD. vIQayqa'lu'DI' jIjaqchu' 'e' vI'Ip. rut jIbachHa' 'ach reH bIjwIj vIlaj."

wa'vatlh SochmaH wa': pIHpu'

"jISov," jatlh vajar. "meHDaq bIQongchoHDI' jIjatlh 'ej bIjangDI' jIQeHchoH. Daqaw'a'?"[64]

jatlh Hota'ro', "HIja', HoD. Hoch DuHmey vIqelta'DI' meqlIj vIloypu'."

jatlh vajar, "DuHvetlh Daperchugh ngugh chay' jIvang 'e' DapIH?"

jatlh Hota'ro', "chomup 'e' vIpIH."

jatlh vajar, "vaj qatlh bIjatlh?"

jatlh Hota'ro', "cha' Qu' potlh vIghaj. Duj vItoy'nIS 'ej HoD vIlobnIS. tlhochchuqchugh Duj vItoy'nIS 'ach ... Qu'wIj vIta'chu'chugh ram bIj."

jatlh HoD, "bIchechtaHvIS jaS bIjatlh."[63] Hagh ghutar. Hota'ro' mu'mey qawlaHlaw'. HIq law' SIQlaH ghutar.

QeHtaH vajar. qImyal, loDpu'vetlh je HoHrup. jatlh, "naDev, motlh'a' bIjqoqvetlh?" mujchu'. SaHbe''a' yaSpu'Daj? SaHbe''a' 'avwI'pu'Daj?

jatlh Hota'ro', "jISovbe'. SIQpu'chugh latlhpu' mujatlhbe'pu'."

jatlh ghutar, "Hung mIw mub 'oHbe'. 'a ra'ta'mo' HoD'e' HeSbe' jeSwI'pu'. quvHa''eghmoHbej 'ach Hatbe'." bIj wIvlaH HoD 'ej DIbvetlh nISlaHbe' ngup.

jatlh vajar, "qatlh cha'Hu' chobDaq gharon DaHoHbe'ta'? DuQorghbe'bej!"

jatlh Hota'ro', "pIch ghajbe'. lobbe'pu'chugh ..." mu'tlhegh rInmoHbe' Hota'ro' 'ach naSba'mo' qImyal, 'utbe'. jatlh Hota'ro', "vIvup 'ej vImuS. QIpmo' mu'meyDaj, vI'oy'moH."

chollI'bogh tlhIngan be' legh vajar.. Hurghqu' DIrDaj. HIp tuQbe'taH 'ach SomrawDu' HoS 'ang yIvbeHDaj nov. tlhIngan yopwaH tuQtaH 'ej jIbDaj tIqDaq tI law' [262] leghlaH vajar. wIjwI' ghaHlaw'. pawDI' jatlh vajar, "tej wInejlI'. 'eSSIm ponglu'. nuqDaq ghaHtaH?"

jatlh be', "yuQvam Dab wa' tlhIngan neH. 'eSSIm jIH. vajar HoD SoHba'. Sotlaw'rajmo' qaghov, 'ej murI' Qugh Qel." yaS wa'DIchDaj, HungpInDaj je lIH vajar.

jatlh 'eSSIm, "Ha'. matlhutlhjaj lutraj boja'taHvIS." DevchoH 'ej tugh qachDaj machDaq ba'taH ghom, HIq ngaSbogh HIvje'mey 'uchtaHvIS. lutmey ja'choH vajar.

mang ghaHbe'mo' 'op QI' De' nopnIS 'ach bepbe' 'eSSIm. Hoch lutmey qImqu'. tlhaQDI' Hagh. SeyDI' nogh 'ej jach. HIq qangtaH 'ej Hoch yaS vuvqu'. ta'meychaj naD 'ej Ho'. qatlh QI' muvbe'ta' 'eSSIm? SIv vajar 'ach tlhobbe'. may' bommey bom 'ej tlhIngan chaH. Quchqu'law' 'eSSIm. vajar parHa' 'e' noH vajar.

wa'vatlh SochmaH cha': qav'ap may

Sotlaw' Hevpu'bogh much 'eSSIm. rInDI' Mahoun bom, jatlh vajar, "yoHpu' novvetlh SuD. tlhIngan quv yajlaw'. mawuntaHvIS nuvuv. bortaS nejbe'law' nughDaj."

jatlh 'eSSIm, "jaS lunej. bortaS lughItlhmeH 'Iw lulo'be'. vIyajbe' jIH 'ach yonlaw'taH. DuqeHbe'law'. Huch neH neH."

"Huch 'ar?" jatlh vajar. HaSta cha' 'eSSIm. DIvI' Hol, Hol ghovbe'bogh vajar je lo'lu'ta' Suy, 'ach Huch 'oSmeH ngoqmey'e' ghovlaHbogh De'wI' lo'pu' je. qutlhbe' 'ach may Huch'e' poQbogh Suy. "vIDIl," jatlh vajar. "batlh vangta'. yuQvamvo' Huch vIngeHlaH'a'?"

"ghobe'. tlhoy lutlh. baS Huch neH lulo'. 'ach Huch QaymeH chaw' lajbej maHun. DaH yuQvam bavtaH DujDaj," jatlh 'eSSIm.[243]

"mejnIS! SaH 'e' Sovbe'nIS qImyal Sa'," jatlh vajar. qama'vetlh boplaw'mo' qImyal yu'taHghach, tugh Mahoun je yu'choH 'ej tlhIngan wo' HoD ghaHbe'mo' rallaHbej mIwmey.

"Sov qImyal Sa' 'ej qay'be'," jatlh 'eSSIm. "ghoqwI' ghaHbe' 'e' vI'ol. bavchoHDI' may'Duj loQ ja'chuq Mahoun qImyal Sa' je. qImyal Sa'vaD tu'lummey ngevta' 'e' vIHar. Supawpa' Mahoun vIrI'. DuqIHrupqa'.[191] qatlh qImyal Sa' Davoqbe'?"

'eSSIm voqbe'mo' vajar Hoch QIjchu'be'. jatlh, "tlhIngan matlh jIH 'ej wo' vItoy' 'ach pIHtaH. nunuDchu' 'e' wISap 'ach yapbe' jay'! De' pegh vIghaj 'e' Har. Mahoun boplaw'."

loQ 'eSSIm bItmoHlaw' De', 'ach jatlh, "QI' DujDaq jIlengDI' reH pIH ra'wI'pu'. reH porghwIjDaq lunuDchu' 'ej jISapbe' jIH. muyaj Hota'ro' jIjatlhDI', [157]." Haghbe'DI' Hota'ro' qech van 'eSSIm. jatlh, "betleHmey botlhapta'. SuSuv 'e' boHech'a'?"

"mawam wIneH!" jatlh ghutar. Qochbe'qu' Hota'ro'.

jatlh 'eSSIm, "Sulaw'mo' Mahoun boghIj. vajar neH Suchqang." SIbI' wamrup Hota'ro' ghutar je. chaHvaD QumwI' nob vajar ghIq ngem Daq'e' chupbogh 'eSSIm lughoSchoH.

wa'vatlh SochmaH wej: qech chevwI'

'eSSIm chov vajar. wejmaH vagh ben boghpu' 'e' noH. moHqu'be'. naDev mob. be' larghmeH nachDaq pep 'ej tlhonDu' tInmoH. tu'law'pu' 'eSSIm. vajarDaq tlhe'choHDI' 'eSSIm nach HughDajDaq wab nong lIng vajar. SIbI' jatlh 'eSSIm, "bIrchoH SuvwI' 'Iw." vajar mer 'ach qay'be'.[244]

Mahoun rI' 'eSSIm 'ej tugh Qol 'ej qach 'el. HaStaDaq Mahoun leghba'pu' vajar 'ach ngugh Duj chach buStaHmo', loD SuD qImqu'be'pu'. HurghtaH DeS DIr 'ej ghegh. Heghbe'pu'mo' bel vajar 'ach qama''e' SaHtaHmo' loQ tuH. jeQ nov, choltaHvIS. tInchoHpu'. tlhIngan loD mach tIn law' Mahoun tIn rap. DaH pIvchu' 'ej langqu'be'. novvaD tlhIngan QI' DeQmey 'oSbogh mep nob. 'eSSImvaD jatlh, "tlhIngan qa' yajlaw'mo' wIvuv."

Huch laj Mahoun 'ej jatlh, "choquvmoH, vajar HoD. wej tlhIngan qa' vIyajchu' 'ach vIvuvbej." tlhoS pup QIchDaj. yay' vajar.

jatlh vajar, "Qo'noSDaq Hol DaHaDtaH'a' qama' SoHtaHvIS?"

jatlh Mahoun, "ghobe'. chobaghpu'DI' SIbI' 'anDorngan DujDaq vIqenglu'."

Daj. Qo'noS pawDI' *naQjej yoH* wej qama'pu' tlhabmoHbogh mab'e' qI'lu'. Mahoun tlhabmoHmeH 'ej qama' taDaj choHmoHmeH DIlqu'nISpu' vay'. Hoch chavlaH woQ qal. HoSghajbej Mahoun tuq.

jatlh Mahoun, "ngaq DujDaq 'anDornganpu' DaQorgh'a' je, vajar?"

jatlh vajar, "ghobe'. ngaq DujmajDaq 'anDorngan lutu'lu'be'."

Mahoun qab DanchoH mIS. jatlh, "mutlhejbej 'anDornganpu', 'ach chaHvaD rotlhmoHwI' lulo'lu'be'pu'. pujqu' chaH."

DaH mISchoH vajar. jatlh, "rotlhmoHwI'? nuq 'oH?"

jatlh Mahoun, "Qo'noSDaq choHIjpu'DI', vItlhabmoHlu'pa' nachwIjDaq Doch Dalo'. rotlhmoHwI'Hey 'oH."

jatlh vajar, "qama' Qaylu'pa', leghlaHbe'meH reH mInDu' luqatlu'. SoHDaq qama' buq vIlanta'. qablIj vISo'."[158]

jatlh Mahoun, "mIvqoqvetlh vIqellI'be'. nachwIj DaSo', ghIq DaSo'Ha', ghIq jan Dalo' ghIq buq Dalanqa'. jan tlhIngan pong vISovbe. HolwIj vImughchugh, <qech chevwI'> pong HungpInwI'.[245] mIllogh vIghaj. jIHvaD potlh jajvetlh. vIqawchu'."

wa'vatlh SochmaH loS: HIvwI'

"qaSbe'pu', maHun. qaqaw. jajvetlh mInDu'lIj vIqatta'DI' qama' buq vIteqbe'. bImISlaw'," jatlh vajar, ghIq mIllogh legh. ghov. wejmaH ben QI' pegh 'oHbejpu' tuQDoq'e'. qubtaH. not SaHtaHvIS vajar tuQDoq lo'taH vay'.

"qaSbejpu'. murotlhmoH. chaq tlhIngan Hol mujatlhmoH. qatlh qama' lurotlhmoH tlhInganpu'?" jatlh Mahoun. De'vam neHqu'mo', bIQ neHbogh qama' rur.

jatlh vajar, "Heghbe'meH. Heghchugh qama', ra'pa' ra'wI', qay'. chaq wanI' Daqawbogh vISov. nonchoHpu'mo' DeSDu'lIj 'ej--"

qagh Mahoun. jatlh, "wanI'vetlh vIqawchu' je. pIm." poSDaq DeSDajDaq 'uch'eghchoH Mahoun 'ej 'eSSIm leghmeH nach tlhe'moH. jatlh Mahoun, "jIHvaD Soj Danob 'ej Qel DarI' 'ach cha'maH wa' 'anDornganpu'vetlh Qorghlaw'pu' pagh. langqu'chu' 'ej roptaH 'ej Heghpu' 'op."

"'anDorngan 'ar?!" pe'vIl jatlh vajar. Mahoun SupmoH.

chuSchoH Mahoun QumwI'. 'eSSIm retlhDaq QamchoH Mahoun, jangtaHvIS. nov Hol jatlhtaHbogh be' 'IjchoH. Mahoun ghIjlaw' mu'meyDaj. QumwI' 'eSmoH Mahoun. vajar pum qabDaj. jatlh, "qatlh ngem SumDaq SaHlaw'taH cha' tlhInganpu'?" Hota'ro' ghutar je tu'law'pu' Farsajii noch.

jatlh vajar, "beqwI' chaHlaw'. nIghIjbe'meH tlheD 'e' vIra'." bIttaH Mahoun. De' 'olDI' 'eSSIm, leS Mahoun.

pay' bebDaq chuSqu' vay'. qachDaq Suppu''a' HIvwI'? betleHDaj woH vajar. QumwI'vaD jachchoH Mahoun. chuStaH beb. lojmIt chuq luchovlaw' Mahoun mInDu'. Dung bej vajar. jotlaw' 'eSSIm neH.

jatlh 'eSSIm, "SISqu'choHpu'." lojmIt poSmoH 'eSSIm. SISbej. leghmeH lojmIt chol vajar. yav qIpDI' bIQ, Supqu'. "tugh rIn," jatlh 'eSSIm. "jarvam pIj qaS."

jatlh Mahoun, "jItlhI­Hagh qoHpu' neH HeghtaHvIS SuvwI'pu'." quSDaq ba'qa'.

Haghbe' 'e' Qap vajar. tlhIngan loDHom qawmoH Suy. jatlh Mahoun, "jIjolpa' naDev cha' tlhInganpu' neH tu' noch. jatlh QeDpInwI' HungpInwI' je, muDDaq law'mo' tatmey QapHa'laH noch, jolpat je. 'ach 'anDornganpu'wI' DIqel. wa'maH vagh qama' lutu'lu'. Heghpu' jav vIqIHpa'. qatlh Qorgh pagh?"

lut ghov 'eSSIm 'e' loS vajar 'ach wanI' Sovbe'law'. Qup. lut ja'choH vajar.

wa'vatlh SochmaH vagh: SImchu'

jatlh vajar, "wejmaH loS ben, QojtaH yuQjIjQa', tlhIngan wo' je. tlhIngan mIch DoQta' DIvI'. tlhIngan logh wIHubba'taH. mIch 'elpu'DI' nov veSDuj wIQaw'. mIch cholDI' nov tepqengwI' wIjon 'ej qama'pu' DIyu'. DIvI' luboQtaHchugh Qo'noSDaq, rura' pente'Daq ghap DIngeH. qaStaHvIS veSvetlh ngabpu' tlhIngan ngaq Duj.

"Qo'noSDaq cha'maH wa' 'anDorngan qama' HIjlI' Dujvetlh. vagh jaj poQpu' leng 'ach pawbe'. Qaw'pu' jagh net Har 'ach Qaw'lu'pu'be'. lujpu' pIvghor. pIvghor Hutlhpu'mo' 'evnagh Se'mey lablaHbe'pu'. SImqu'ta' HoD 'ej wuqta'. Hongghor chu'qu' 'ej pIvlob pagh vI' Hut Hut Hut jav chav. qaStaHvIS gho'Do ngajchoHlaH poH. lengtaHvIS Duj wa' jar luSIQpu' chaH 'ach Qo'noSDaq qaSpu' wej DISmey."[159]

jatlh Mahoun, "vISov. wanI'mo' wej DISmey vIHutlh. jIHvaD QIjpu' 'anDornganpu' 'ej HoD jIHmo' DaH QeD vIyajba'. 'ach qatlh qaStaHvIS jarvetlh 'anDornganpu' je'be' 'avwI'chaj? tlhoS pagh Soj luHevlaw'pu'."

jatlh vajar, "yuQ SIchmeH yap nIn 'ach HochvaD yapbe' Soj. qama'pu' je'be'chu'chugh yapbe' je Soj. 'ach qama'pu' SopchoHchugh, yap. lojDI' Soj, yIntaHmeH beq 'op qama'pu' Sop. yIntaHmeH latlh qama'pu' loQ je'."

jatlh 'eSSIm, "qama'pu' je''a'? qatlh jolDaq qama' polbe'? qatlh SIbI' Hoch qama' HoHbe'? Ha'DIbaHchaj luchoqpu'chugh qama'pu' je'nISbe'pu'."

jatlh vajar, "ngugh wej 'Itlhmo' chamvetlh, jol qawHaqDaq yInbogh nuv pollu'be'. yInbogh qama'pu' HIjmeH HoDvetlhvaD DIl QI'. Heghchugh Hoch DIlQo' QI', 'ej chaq 'urmang ta'pu' net pum."

poSqu'choH Mahoun mInDu' 'ej chorDaj lu'uch DeSDu'Daj. "nuvpu' vISoppu''a'?" jatlh.

jatlh vajar, "DujvetlhDaq maHbe'taH, Mahoun. *qeylIS batlh* ponglu'pu' ngaq Dujvetlh. qaStaHvIS noHvetlh ngaq Duj *naQjej yoH* vItoy'taH 'ej *naQjej yoH*Daq qa'avtaH ngabDI' *qeylIS batlh*. ngugh noy wanI'. Duj toDlu'DI' leng poj QI'. yuQ toq SIchlaH, lojpa' nIn 'ej lojDI' Soj. SImchu'ta' HoD."

wa'vatlh SochmaH jav: DaH cha'logh

morgh Mahoun. jatlh, "matay'pu'! paw 'anDorngan Duj 'ej nutoD! juppu'wI' chaH! lu'ollaH!"

jatlhbe' vajar. nov Sey bejtaH 'ej QubtaH. wejmaH wej ben Qo'noSDaq Mahoun HIjta' vajar. Qo'noSDaq loDvaD Mahoun nobta' vajar. Hegh Mahoun 'e' pIH ngaq Duj HoD. wejmaH ben Mahoun, 'anDorngan qama'pu' je tlhapta' 'anDorngan Duj. wej DISvetlh qawbe' Mahoun. *naQjaj yoH* tlheDDI' Mahoun tuQDoq leghlaw'. poH lIjmoHlaH tuQDoq. nap lut. ghaytan qaStaHvIS wej DIS bIghHa'Daq ghaH Mahoun'e' 'ej joy'wI' mIwmey le' qawbe'meH, tuQDoq lo'pu' vay'. QI' pegh 'oH'a'? tuQDoq qel. 'ach tuQDoqHey qaw Mahoun, tuQDoq 'oHbejchugh rotlhmoHwI'qoqDaj'e'.

"qaHar," jatlh vajar. bIghHa'HomDaq Mahoun qaw. jatlh "vIghro'mey bopbej'a' bomlIj mu'mey?"

"jISovbe'," jatlh Mahoun. "SoHvaD vIQulchoH. no' Hol HaDpu'mo' chIjwI'wI' vIghel, 'ach no' Hol 'oHbe' jatlh. loQ rur 'op mu'mey neH. vaj vImughlaHbe'. vIghro' bop 'e' vIHon. bom ngo' law' ghe'naQvetlh ngo' puS 'e' vIHar. mupIlmoH bom. ghe'naQDaq HeghlI' loD 'ej luQaH ngem Ha'DIbaHmey."

"choja'pu'," jatlh vajar. HIqDaj tlhutlh 'ej bebDaq SIStaH 'e' 'Ij. nuplI' wab. chuSqa' Mahoun QumwI'. jang Mahoun.[254] be' ghogh qImtaHvIS QamchoH. jabbI'ID yev 'ej jatlh "muDDaq law'mo' tatmey jolpat voqchu'be' beqwIj. SaHmo' tlhIngan law', qay'choHpa' mujol. vajar HoD, malja' wIHuqqa'jaj." QumwI'vaD jatlhqa' 'ej QIt Qol.

HIq lutlhutlh tlhInganpu'. wo', novpu', noHmey je luqeltaH. motlh Qochbe'. tlhaq laD vajar. ratlh wej repmey. 'eSSIm bejqu' vajar 'ej HughDajDaq wab nong lIngqa'. "DaH jIbwIj vISay'nISmoH," SIbI' jatlh 'eSSIm. Do'Ha'. SIS 'e' lu'Ij.[192] wup 'eSSIm. bIQ Duj chIjtaHbogh SuvwI'pu' bop bom. Hoch mu'mey Sovbe' vajar 'ach boQmo' HIq, bomqu'. SISbe'choH ghIq SISqa'. qaStaHvIS tup puS tamtaH. QamchoH vajar. betleH tlhap 'ej mej.[193]

SISqu'. wamwI'pu' ghochchoH 'ach chatlh mojlI'mo' yav lam lughItlhpu'bogh laDmeH vajar yevqu'nIS. Dochaj law' law' ghochwI' Do law' puS. chegh vajar 'ej 'eSSIm Du' qach beb HeH bIngDaq wamwI'pu' loS.[196]

wa'vatlh SochmaH Soch: SanIDlogh nuHoHlaH

chegh Hota'ro' ghutar je. yIQchu'. yIttaHvIS naQvo' HuS gheDchaj. chemvaH rur. ror 'ej pIv veD. "majQa'!" jatlh vajar. ghIq jatlh, "maja'chuqnIS." beb HeH bIngDaq gheD lulan. jatlh vajar, "yaSpu'wI', *veS* ghu' wIlajlaHtaHbe'. Seng boSov. wIyuDHa'chu' 'ach nupumtaH qImyal Sa'. quvHa'bej ghaH. *Dugh* tI'lu'meH Qo'noS wISIchnIS. chay' mavang 'e' bochup?" qechmey ghaj vajar 'ach yaSpu'Daj vuDmey Qoy neH. yIQmo' vajar jIb, jatlhtaHvIS mongDechDaq 'eltaH bIQ. jIbDaj lIS.[194]

qevpobvo' jIbDaj yIQ bI' ghutar. qoghDaj bID 'ang.[265] jatlh, "batlh mavangnIS. batlhHa' vangba'pu' qImyal Sa' 'ach tlhIngan ghaH. tlhIngan batlh neHqu' Hoch tlhIngan tIq. lajmeH 'eb poQ neH. machun 'e' wItobchu'. loSmaHlogh maHDaq nejlaH 'ej loSmaHlogh pagh Sam. Qo'noS wIghoSmeH jaj 'ar poQ?"

jatlh Hota'ro', "pIvlob Soch vI' vagh lo'lu'chugh wa'maH jaj poQ."

jatlh ghutar, "qaStaHvIS wa'maH jaj maloS. matay'taH. mavoqchuqtaH. maHubchuqruptaH. Sa' pIlmoHjaj quvmaj. qaSlaH nuq?"

jatlh Hota'ro', "nuHoHlaH. SuvwI' quv Ho'be' qImyal. woQDaj SachmoHlaHbogh nuv'e' neH Ho'. ghutar, ghaytan bIHay'taHvIS, chIch jatlh DuyDaj <ghIqtal>. nuHoHnISbe' qImyal. nuqaDlaHtaH Duypu'Daj. bong nuHoHlaH jol. qaStaHvIS wa' ram loS SanIDlogh nuHoHlaH pagh nutojlaH."

<jatlh 'e' mev> 'oSbogh ghop Hol lo' vajar ghIq tlhup. jatlh "jol vIQoylI'." 'IjmeH mev latlhpu'.

"vIQoybe', HoD," jatlh ghutar.

"SIStaH neH 'e' vIQoy," jatlh Hota'ro'.

qo' yIQ bejqu' vajar 'ach pagh nub legh. HurghchoH. teSDajDaq vIngtaH. ghur wab. "DaH vIQoychoH!" jatlh ghutar. QoymoHwI'meymo' vajar teS QaQ law' SuvwI' Qup teS QaQ puS! ghIq jatlh ghutar, "SoHvo' vIQoy. QoymoHwI'meylIj tIteq." teqDI' loj wab. QoymoHwI' 'IjDI' ghutar, 'ol. "chaq yIQmo'," jatlh.

wa'vatlh SochmaH chorgh: bIQ ngaS

vajar retlhDaq QamchoH Hota'ro' 'ej teSDajvaD jatlh, "nuq neH Sa'? maweb neH'a' neH? DaSov'a', HoD?"

De' lunejlaw'lI'bogh Sa', be'tlhar je Del vajar.

"chaq pu'jIn pegh, cham le' ghap much," jatlh ghutar.

jatlh vajar, "qaStaHvIS wejmaH wej DIS lI'taHchugh cham, le'qu' 'oH."

jatlh Hota'ro', "De' vIloylaH. yejquv DevwI' pegh quvHa' 'oS De'. yejquv muvmeH qImyal, yejquv DevwI'pu' ponnIS. tuHmoHlaHbogh De' ghajchugh qImyal, DevwI' buQlaH. pegh polmeH, SamwI' HoHqangbej yejquv. Suja'chuqtaHvIS qImyal SoH je, yejquv DevwI'pu' bop. DaH wIyaj. De' DaSuqlaH'a', HoD?"

jatlh vajar, "jIchun 'ej jImatlh 'e' tlhojnIS. De' vIghajbe'."

jatlh ghutar, "yejquv De'vetlh wISamDI', DevwI' bopbogh wIngu'nIS, 'ej ghaHvaD wImuchnIS. yejquv tuHmoHbe'meH paj."

jatlh Hota'ro' 'ach Qoybe' HoD. "nuqjatlh?" jatlh.

jatlh ghutar, "nuHoH yejquv DevwI' 'e' Har Hota'ro'."

jachqa' Hota'ro'. jatlh, "De' DaSuqlaH 'e' Harmo' qImyal Sa' Dujoy'qang. joy'wI' po' ghaH."

"wI'omnIS. tlhIngan batlh wIchoqnIS. wo' batlh wIHubmeH qImyal Sa' wIHoHnISchugh, vaj qImyal Sa' wIHoH," jatlh ghutar.

reH ra'wI' HoHrup'a' ghutar? wIch 'ar Qoypu'? jatlh vajar, "wej tlhInganpu' maH. may'Duj naQ SeHtaH qImyal Sa'. chay' Sa' wIHoH?" vaq 'e' Hech vajar 'ach jatlhtaHvIS SaghchoH mu'mey.

jatlh Hota'ro', "to'Daj wIlo'. Duy wIpon. luqeH quv SaHtaHbogh 'op yaSpu''e'. HoHqang 'op."[247] nISwI' beH bopbogh mu'mey'e' jatlhlaw' je Hota'ro' 'ach QoylaHbe' vajar. 'urmang luqelchoHpu'mo' moDchoH vajar tIq. DaqwI'pu' nejmeH nachDaj tlhe'moH.

'ej SaH DaqwI'! ghaH 'em ghoSlI' 'eSSIm. DIvqu'mo' vajar qab nachDu'chaj tlhe'moH ghutar Hota'ro' je. QuSwI'pu' muchbogh Hew neHchugh vay', ghu'vam pup law' Hoch pup puS. taghtaHvIS ram choS SIStaH. qach HeH bIngDaq Sa' luHoH 'e' luQuS wej tlhInganpu'.

yay'law' 'eSSIm. DIvmoHbogh mu'mey Qoyba'pu'. ghonDoq lel, 'ej Hub'eghrupchoH.

wa'vatlh SochmaH Hut: 'urmangHey

jatlh vajar, "pIHoHbe'." wa' ghopvo' HuS vajar betleH 'ej latlhDaq QoymoHwI'mey 'uchtaH. HIvrupbe' je latlhpu'. QoymeH, teSDajDaq QoymoHwI'mey lanqa' vajar. vIngbe'choHpu'.

wejlogh tlhuH 'eSSIm ghIq jatlh, "HIvqa' veqlargh. qaStaHvIS lup HIvwI' tlhIH 'e' vIHar." ghonDoq 'eSmoH 'ach lelHa'be'.

jatlh vajar, "nuQaHpu'bogh 'ej wo' toy'taHbogh be' wIHIvchugh, batlhHa' wIvangbej."

jatlh 'eSSIm, "batlhHa' vangrupbogh SuvwI'pu' tlhIIHbe'law'."

jatlh ghutar, "SoHvaD gheD ghoQ wIqem." Ha'DIbaH SIq.

jatlh Hota'ro', "'ay'mey DamaSbogh Datlhappu'DI' *veS* vutwI'pu'vaD chuvbogh Daghtuj yInob."[195]

jatlh 'eSSIm, "luq. veDDIr boneH'a'? Hurgh veD 'e' boleghba' 'ach chISchu' DIr'e'."

jatlh vajar, "ghutar, qorDu'lIjvaD Daqem DaneH'a'?"

jatlh ghutar, "DaneHbe''a', Hota'ro'?" QuS luqelbe'meH, DIr QIp lubuSchu'.

jatlh 'eSSIm, "yItlhap. bowavlaH." ghonDoqDaj lo'taHvIS nom Ha'DIbaH Surgh. veDDIr lajpu'DI' Hota'ro' ghutar je, Ha'DIbaH tlhap 'eSSIm 'ej mejchoH.[198] chaHvo' yIttaHvIS yev 'ej tlhe''egh. jatlh, "tlhoS jIlIj, Saja'meH SaghoSta'. *veS*Daq quvlaw' Qugh Qel. lIpIHtaHchugh Hung, yIja'. tlhe''eghqa' 'eSSIm 'ej qachDajDaq chemvaH qeng. pagh Qoypu' 'e' ghet 'eSSIm. tlhIngan matlhqu' ghaHlaw'. QuS vay' 'e' cherghqangchugh 'eSSIm vajar mer.[200]

jatlh vajar, "maQolpa', Hota'ro', quv vuvtaHbogh yaSpu''e' tIngu'. quvtaHchugh qatlh vangbe'ta'?" be'tlhar mu'mey qeltaH vajar. voqrupchoH.

jatlh Hota'ro', "cha'Hu' qaH'eng bojtaH yaS wa'DIch 'e' Daqaw'a'? quS wabmey SaHbe'pu'. qaH'eng jatlhmeH 'eb chenmoH. [248] jatlh."

moch HoHrupDI' tlhIngan, morgh latlhpu' 'e' SIvchoH. jatlh vajar, "chay' jang qaH'eng."

jatlh Hota'ro', "vIt. QuQmeyDajvaD neH matlhchu' ngaH. not joS. woQ buSHa'law'. 'a wa' ben qImyal nuSbogh ne''e' Hupqu'. Sa'vaD matlhlaw' ngaH."

jatlh ghutar, "ta'meychaj quvHa' lIjmeH naDev ta'Hommey buSlaw'taH nuv law'. quvlaH nItlh quvHa'taHvIS ghop 'e' lughet."

jatlh Hota'ro', "quvHa'chugh ngaH, vang qaH'eng 'ach batlh vang ngaH. qangwI' ghaHbe'. tugh *veS*Daq pawlaw' Duj mach chIjbogh meb potlh. nISbe'meH *Dugh* lulaghchu' jonwI'pu' 'e' ra'DI' qImyal, morgh ngaH. latlh DopDaq Dugh lulanlI' neH. ngaH vuvlaw' qImyal Sa'."

mob qaH'eng. moblaw' be'tlhar. mob yaS wa'DIch. jatlhchuqvIpmo' yaSpu' QuSlaHbe'.

wa'vatlh chorghmaH: QapmeH HIv

*veS* yaS puS qel vajar, Hota'ro' ghutar je 'ach pagh wuqqu'. ghutarvo' QumwI' tlhap vajar 'ej *veS* rI'. jang Sogh. jatlh, "SuloSnIS. Quv Huv yIghoS 'ej peloS." yotlhDaq QamtaH ghom. bejchuq 'ej loSlI'. 'ej tagha' yuQ yIQ ngoSmoH jol. *veS* jolpa' lupawDI' jatlh jonwI', "lItHa'! tugh!" 'ej pa' lumejta'pa' pawpu' ghom veb. QumwI' tlhap vay' 'ej chob lughoS.

chobDaq qev Hutvagh. Hoy'chuq SuvwI' law' 'ej paw'chuq. joSmey law' luQoylu'. rInpu'bogh may' rur 'ach chech HochHom 'ej rIQ SuvwI' puSqu'. veDDIrmey chIS qeng HochHom wamwI'pu'. ghoSmoH ghom'a' 'e' luchaw' *Dugh* beq. puSchoHDI' ghom'a', 'avwI'vaD jatlh vajar, "SuchwI' DorwI' wIpoQ," 'ach buSHa' 'avwI'.

vajar SupmoH ghogh. "vajar HoD!" jatlh. be'tlhar ghaH. betleH qeng je ghaH. "qaghuHmoHta'. qatlh Sucheghta'?" jatlh be'tlhar.

jatlh vajar, "may'meyDajvo' Haw'be' tlhIngan."

jatlh be'tlhar, "may'raj 'oHbe'."

jatlh vajar, "nIteb Qob qaD jup 'e' chaw'be' SuvwI'." vIH be'tlhar wuS 'ach Quch'a'? Sovbe' vajar.

nachDaj tlhe'moH be'tlhar 'ej jatlh, "mang!" qImchoH nuv puS. wa' Hung 'avwI' wIv be'tlhar. ghaHvaD jatlh, "ghochchajDaq nuvpu'vam tIDor." tlheD be'tlhar.

lob 'avwI'. betleHmey veDDIr je roQmeH pa'chaj lujaH, ghIq SeSpa'Daq ba'taH, ghIq tach machDaq Dor latlh 'avwI'. tachDaq law' HaStamey. wamwI'pu' SuvwI'pu' 'ovwIpu' je muchtaH.[188] *veS* ghu' luqImbe' tlhutlhtaHvIS.

chobDaq may' wabmey Qoymo' QamchoH 'ej tach lojmIt lughoS. qaDchuqtaH cha' SuvwI'. betleHmey yantaH. Dop chobDaq ngab chang'eng ghIq ngabHa'. choltaHvIS ghobwI'pu' be'tlhar ghov vajar. loD ghovbe'. jatlh ghutar, "HungpIn ghaH." chobDaq vajar luyuv bejwI'pu'.

DIS Qujmey[269] SuvwI' po' law' Hung yaSpu'vam po' rap. jop 'ej way'. tlhe''eghtaH may'. cholqa'DI' ghobwI'pu' DoH 'e' nID vajar 'ach bot bejwI'pu' chu'. DaH be'tlhar Dub neH leghlaH vajar. betleH levDI' 'ej ngolDI' vIHtaH SomrawDu'. DoH be'tlhar 'ej betleH yantaHvIS, vajarDaq pum bIQ'e' puvmoHbogh DeSDu'Daj. HungpIn woch law' be'tlhar woch puS 'ach nom vIHlaH be'tlhar 'ej HoSghajqu' volchaHDu'Daj. HungpIn DoHmoH 'ej Dop chobHom 'el 'e' raD. Suvqu'. Dop chobHom 'el je be'tlhar. tlhuHtaHvIS SuvwI'pu' 'ej mupchuqDI' 'etlhmey QoylaH 'ach tam qamDu'Daj.

wa'vatlh chorghmaH wa': narghbe'chugh SuvwI' qa' taH may'

Dop chob machvo' ghoS chang'eng. wej rIQ SuvwI' 'ach HoHmeH 'eb lujonqu'ruplaw'. Doy'choHlaw' 'ach tonSaw' Dun lu'aghtaH. much rur 'ach ghetbe'mo' much rurbe'. ngol HungpIn 'ej chaQ. way'Ha'DI' be'tlhar woS bIng DuQchu' HungpIn betleH DuQwI'. pe'vIl pur qev net QoylaH. jachpu'chugh be'tlhar Qoybe'pu' vajar. Hugh SIjbe'pu' betleH. woS neH DuQ. narghmeH nach pep be'tlhar 'e' nID 'ach ta'choHDI' betleH SalmoH HungpIn. qaStaHvIS may' pIj HoH wa' Qagh.

bIQtIqHom moj 'etlh ghoSlI'bogh be'tlhar 'Iw. jatlh HungpIn, "bIjeghrup'a'?" janglaHmeH be'tlhar loQ betleH chaQHa'. nuj poSmoHDI' be'tlhar jatvo' jeq betleH QIn net leghlaH. nujvo' 'Iw tuy' jatlhlaw'taHvIS 'ach chuSmo' bejwI'pu', mu'meyDaj QoylaHbe' vajar. jeghbe'law'. nuj SoQta'DI' loQ betleH jIrmoH HungpIn. HoHmeH Hugh nejlaw' 'etlh. junmeH nogh be'tlhar 'ej betleHDaj'e' jopqu'. HungpIn chor DuQpu'. DoH HungpIn 'e' nID 'ach be'tlharvo' betleH teqmeH chaQHa'nIS 'ej bot chor DuQtaHbogh 'etlh. nargh 'e' nIDqa'DI' be'tlhar, pumchoH 'ej HungpInDaq betleH raD porghDaj. ravDaq pum cha' yaSpu'. 'Iw lughaychoH. HungpIn 'uSDu' jojDaq 'aD'a' SIjpu'law' be'tlhar betleH. chuSqu'be'choH bejwI'pu' choQ nguvmoHtaHvIS tlhIngan 'Iw.

wej HeghmoH be'tlhar QIH. reghtaHvIS HungpIn SIQlaHlI'chugh 'ej Hugh QanlaHchugh QaplaH. nach tlhabmoH 'e' nIDqa' 'ach ravDaq chaQqu'qa' HungpIn. be'tlhar QoghIj DuQlaw'pu'. SupchoH ghIvDu'Daj nachDaj je 'ej betleHDaq Qaw''eghchoH. SuvwI'pu' QaHruplaw' bejwI'pu' 'ach
Heghpu'be'mo' jeSwI'pu' 'ej jeghpu'be'mo', taHtaH may'. mI'taHvIS be'tlhar porgh bejtaHvIS vajar, HeghlI' 'e' Sov, 'ach cha'Hu' ram bel qawmoH. ngugh voqbe'pu'. 'Il'a'?

betleH chaghDI' HungpIn 'ej vIHbe'choHDI' tlhabchoH be'tlhar nach. nujDaj teb 'Iw. jatlh 'e' nIDlaw' 'ach mu'mey vo'laHbe'. poStaH mInDu'Daj 'ej vIH'eghtaH ghIvDu'Daj 'ach tlhuHbe' 'ej ghupbe' 'ej tuSbe'. tlhuHmeH mIw lIjlaw'. HeghtaHvIS poStaH mInDu'Daj. cha' SuvwI'pu'vaD jach bejwI'pu' 'ej chobmeyvo' chuSqa' beymey. lut Dun luQoy qorDu'chaj.[150][151]