nuq bop bom: 'ay''a' jav

HutmaH wa': ngoD tetlh

Qul yaHDaj retlhDaq 'eSSIm jolpu' varSajIy. DotlhDaj chov. mogh. mIS. Suvrup SomrawDu'Daj 'oy' 'ej Qubqu'rupbe' yabDaj. Qob SIQchoHDI' tlhIngan, SuvrupchoH porgh net Sov. porgh SIghbogh Hap lIng porgh. HoSghaj 'ach QubnISDI' vay' nIS. voq'eghlaHbe'mo', Mahoun Dujvo' Haw'ta'. qachDaj 'el 'ej jot'eghmoHmeH tej Da. nav woH 'ej ngoDmey gherchoH.

ngoD wa': nov ghaH Mahoun'e'. nach jeqwI' Hutlhbogh 'anDorngnan rur yelwIyyItngan. jagh chaHbe' 'ach rut DIvI' luboQ.

ngoD cha': Sotlaw'Hey[68] HIjta' Mahoun. Sotlaw' tlhIngan tlharghDuj.

ngoD wej: tlhIngan Hol jatlhDI' Mahoun tlhIbHa' 'ej tlhIngan tIghmey Sov. bIghHa'Daq ghojpu' jatlh. laHDaj QIjbe' lutvetlh.

ngoD loS: cha'Hu' pujqu' 'e' Da Mahoun 'ach DaHjaj HoSqu'.

ngoD vagh: ghoqwI' ghaH 'e' chID.

Qubqa' 'eSSIm. chIDbej'a'? ghobe'. navDaq ngoD vagh choH.

ngoD vagh: ghoqwI' ghaH 'e' tembe'. mutojpu' 'e' chID.

qatlh tojpu'? wej yaj 'eSSIm. jatlh “pagh vISorgh. Qu'wIj 'oHbe'bej.” Qu'Daj QIjbe'pu' 'ach 'eSSIm HoHmeH 'eb jonbe'pu'.

ngoD jav: DaHjaj vangbe'pu'chugh, jIHegh. muSaHbej 'e' Da.

ngoD Soch: mupIlmoHmeH mIwmey Sovchu'.

natlIS qIl 'eSSIm. potlhbe' 'ej ngoDna' 'oHbe'. vuD 'oH neH. nongDI' tlhIngan, SIghbogh Hap lIng je porgh. yab nIS. chaq Mahoun SIgh je. SaH 'e' DataHvIS Mahoun, 'eSSIm SaHbej net HarlaHchu'. ngaghta'mo' pujmoHpu' 'e' qelDI' 'Ilqu'law' 'ej DIvlaw'. vaj qatlh tlhIngan Hol jatlhtaHvIS tlhIbwI' DalaHbe'?

tetlhDaj laDqa' 'eSSIm. DuHmey toghchoH.

DuH wa': Suy ghaH 'ej DIvI'vaD ghoq je. ghoqwI' tlhIb ghaHmo' SIbI' tlhIngan Hol jatlhHa' 'e' lIj 'ej bong tlhIngan SaHchoHbej.

DuH cha': ghoqwI' po'qu' ghaH. DuH wa' HarmeH 'eSSIm, tlhIbwI' Dachu'taH 'ach Qu'DajvaD ram QaghmeyHeyvetlh.

latlh DuH SImlaHbe' 'eSSIm. teHchugh DuH wa', vaj lI'laH. DIvI'vaD De' ngeb noblaH. teHchugh DuH cha', rap ghu'. ghoqwI' ngoQ ngu'meH bejnIS 'eSSIm. De'wI' chu' 'ej QI'vaD jabbI'ID qonchoH. matlhchu' 'e' tob neH.

HutmaH cha': ghoqwI' Segh

po veb, Qu'HommeyDaj ta'taHvIS 'eSSIm, wa' pogh chIllaw'pu' 'e' tu'. Do'Ha' nIH poghDaj Qav 'oH 'ej wej pawpa' ngaq Duj. jInmolDajvaD qaStaHvIS DIS wa'logh Such QI' net nab 'ach qaStaHvIS wa'maH jav jarmey Suchta' pagh tlhIngan Duj. Sung Dochmey lo'choHta' 'eSSIm. poghmey chenmoHlaHba' Sungpu'. boQDu'Daj rI'meH QumwI' woH. ghIq yev 'ej Mahoun Duj rI'. ghoqwI' tu'meH 'eb lo'. poghmey chu' qem Mahoun 'ej pogh chIlpu'bogh tatlh je. pegh tu'ta' 'e' Harmo' Hem ghaH. ghoqwI' tlhIb DataHvIS, tlhIb. QIpqu' 'eSSIm 'e' Har'a'? 'eSSIm nuQchoH.

SaHtaHvIS Mahoun, rI' QI'. mangvaD jatlh 'eSSIm, "ghoqwI' ghaH. vIvoqbe'." DaH 'eSSIm voqchoHmoHmeH DISlaw' ghoqwI'Hey 'e' pIH. 'ach chIDbe'. pagh peghmo' 'eSSIm, ghoq Mahoun 'e' SaHbe'. lInDab ngoQ SovmoHmeH tlhejtaH, ja''egh, 'ach toj'eghbe'. SeychuqmoHmo' tlhejchuq. voqchuqchu'be'mo' ghu' DajmoH. parmaq mojnISbe'. ghaytan lengtaHvIS Mahoun, Hoch Hogh be' chu' wIv. tugh paw tlhIngan aq Duj. DISvam may'Duj *veS* 'oHlaw'. Soj, luch, mangpu' Qup je qeng. tlharghDuj *Dugh* Sam 'e' tul 'eSSIm. ngebchugh ngoDvetlh nepwI''a' ghaH Mahoun'e' 'ej 'Ilbe'laH belDaj je.

tlhIngan wo' toj neHchugh, qatlh Sotlaw' Hujqu' qon? "nuq bop bomvetlh?" jatlh 'eSSIm. bom mu'mey mughlaHbe'pu' De'wI'. ngoq SamlaHbe' je. chaq nIS QoQ.

jatlh Mahoun, "qa'ja'pu'. bang bom 'oH. vIbomqa' DaneH'a'?"

"bomvetlh vIqelbe'. Sotlaw' bom." jatlh 'eSSIm.

"ghe'naQ bom 'oH je. noy'qu'. ghe'naQDaq Ha'DIbaHmey vong," jatlh Mahoun. "DaH vIbom DaneH'a'?"

"yImugh," jatlh 'eSSIm.

"vImughlaHbe'," jatlh Mahoun "mu'mey puS vIghov. no' Hol 'oH. vIyajbe'. wabmey vIqaw neH. HoSghajqu', qar'a'?" 'eSSIm jIb yachchoH.

Qochbe' 'eSSIm 'ach loQ qeH. bomDaj yajbe' Mahoun 'e' Harbe'. peghmeH peghlaw'. jatlh 'eSSIm, "not mev peghmey," 'ach latlh qech qelchoH Mahoun.

"chopeghnIS, qar'a', tujoy?" jatlh. "DuQumDI' QI' choSo'. luSovchoHchugh DanaDHa'lu''a'?"

ba'choH 'eSSIm 'ej Mahoun ghopDu'vo' jIb luH. QeHmoH mu'meyDaj. DaH ghu' peghmeH DIlnIS 'eSSIm ja' 'e' pIH. ghoqwI' Seghvetlh quvHa' law' Hoch quvHa' puS.

HutmaH wej: vav pegh

'a Huch qelbe' Suy SuD. jatlh “jIHmo' DanaDHa'lu'chugh jIQoS. SoHvaD potlhchugh, jIjatlhpa' jatlh Hovmey, 'ach joStaH beqwIj. ghaytan DaH parmaqqaylI' ngu'laH yuQvam bID. choQaHmeH vItemqang, DaneHchugh.” 'Ilqu'mo' QeHbe'choH 'eSSIm 'a tlhIngan naDHa'ghach SIghlaHbe' nov. vavDaj qawmoHmo' jotqa'chu'be'.

Mahoun QumwI' Qoy 'eSSIm. yopwaHDaq 'oHtaHmo' QumwI''e' SammeH Hu' Mahoun. rI' be'. yelHol jatlh. mu' ghov 'eSSIm. 'Ij Mahoun ghIq ghel. moghlaw' HoD. jatlhlaw' je Mahoun 'ej jatlhDI' Quchbe'. rInpu'DI' jabbI'ID jatlh 'eSSIm “qaStaH nuq?”

“murI' neH DujwIj. yuQvam pawlI' yuQjIjQa' Duj.” jatlh Mahoun.

“qatlh naDev ghoS yuQjIjDIvI'? motlh naDev ghoS pagh 'ej pay' SuSaH tlhIH, DIvI', cholbogh tlhIngan Duj je,” jatlh 'eSSIm. ghaytan DIvI'vaD ghoq Mahoun.

“jISovbe'. DIvI' wIboqpu'be'. ghaytan nuSujmeH neH rI' Emlye. jIratlh DaneH'a'?” jatlh Mahoun.

vagh tup ret ratlhtaH 'e' maS 'eSSIm 'ach DaH mobtaH neH. “'utbe',” jatlh. QIpbe' Mahoun. mej 'ej pagh jatlh.

jol Qoypu'DI' De'wI' lel 'eSSIm. QumtaHvIS Mahoun Duj je, jabbI'ID qonta'. DaH mughlaH. rI'bogh be' mu'mey mughlaHchu' jan. jatlh tlhIvqu' beq 'a qunbe' HoD. chergh neH. nepbe'pu' HoD. tugh bavchoH Duj chu' jatlhpu' be'. Duj Segh loy 'e' nIDtaHvIS HoD jatlhpu'. 'ach qarmoH be'. yuQjIjDIvI' Duj 'oH. rur Duj pong. vay' 'oSchugh DIvI' mu' mughbe'pu' jan. Duj ghovbe' 'eSSIm 'ach Duj law' ghaj DIvI'. chaq Suy chaH je 'e'.

Hur tuj ghoS 'eSSIm 'ej SomrawDu'Daj rotlhmoHmeH mI'choH. be'Hom Qup ghaHtaHvIS mIwvam ghojchoHmoH vav.[61] Qupqu'mo' 'eSSIm HeghDI' vav, 'ej lobchu'mo' be'Hom, vav pong ja'be' 'e' ra'DI' SoS, vav lIjpu' 'e' Har SoS. 'ach not vav lIj 'eSSIm. pegh, 'a chegh 'e' loS. Hoch jaj qaw. nenDI' 'eSSIm vav Hegh quvHa' Del me'. jatlh . quvHa'ghach yaj eSSIm , 'ej tuHqu'moH 'ach HoS vav 'ej yoH 'ej quv 'e' qaw. Heghvetlh quvHa'qu' wIvmeH tlhIngan, qaSnISpu' nuq? jatlhqangbe' SoS 'ach HeghDI' 'aHDajDaq vav mIllogh tu'. Qam ghaH, QI' HIp tuQtaHvIS 'ej tlhopDajDaq Qam 'eSSIm, buQtaHvIS. QujtaHvIS qama' Da vav 'ej 'avwI' Da 'eSSIm 'e' qaw. “jatlhQo'!” ra'DI' puqbe'. lob vav. may'DujDaq Heghmo' 'ej may'Dujvetlh Qaw'lu'mo' not vIt SovlaH qorDu'. ghaytan Sovbe' je QI'. wa' ngoD SovtaH 'eSSIm: nuch ghaHbe'pu' vavDaj'e'. wa'vatlhlogh pep'eghmeH DeSDu' lo'ta'DI' 'eSSIm, 'uSDu' qaDchoH.

HutmaH loS: yuQjIjQa' Qujmey

mI'chu'ta'DI' 'eSSIm vumqa'. ngong yotlh ghoS. lurDechmeychaj pabtaH 'e' lumaSmo' wIjwI'pu', mIwmey perta'bogh 'eSSIm pabchu'be'. mIwmey lo'pu'bogh SovmeH wIjwI'pu' Such. ngengHom Qun DeltaH wa' wIjwI' Saghqu', 'IjtaH 'eSSIm 'a SaHbe'qu'. yuQ naQ charghchugh tlhIngan wo' 'ej toy'wI''a' chaHchugh Hoch wIjwI''e', 'avnIS negh 'ej QuDmey SeHnIS, 'ach mIwmey qar lo'chu'. ngengHom Qun qImnISbe' mangghom. SaHtaHvIS 'uj bID Saw'bogh bIQ tIr pochta' wIjwI'vam. bIQ SeHmeH mIwmey ghojmoHpu' 'eSSIm 'ach pochtaHvIS lo'Qo'. 'Iq bIQ 'e' ponlaHbe' 'eSSIm. ghIq Qunmey qelbe'choH wIjwI' 'ej jatlh, tIr luSopbe'meH bo'Deghmey 'ut SoD. rut no' Sov qelnIS tej.

wovchoH 'eSSIm QumwI'. rI'lI' Mahoun. jatlh "DIvI' Duj De' vISuqta'. DaSov DaneH'a'?"

pagh De' chu' SaH 'eSSIm. DaH 'Iw Doq reghbogh Ha'DIbaH HoH 'ej Sop neH. jatlhtaHvIS HoD Hagh latlhpu' 'e' QoylaH 'eSSIm. lunuQ. jatlh "tlhIvlaw' beqpu'lI'. DaSeHlaHbe'chugh qIQ."

"yIloS." jatlh Mahoun. ghoghDaj Qoyqa', yel Hol jatlhtaHvIS. ra'ba'. tamqu'choH meH. "roD chuS 'e' vIchaw'. mutoy'chu' 'e' yIHonQo'," jatlh Mahoun.

reH Doj HoS 'ej belmoHmeH lo'pu'mo', 'eSSIm monmoH 'ach wuQmo' qejtaH. jatlh "DIvI' Duj De' yIja'."

"verghlI' DIvI' qughDuj. yuQjIjQa' tIghmey 'aghmeH leng. ghorDaq lopno'meyHey much. DIvI' Soj, DIvI' mI'wI'pu' je much. jeS Hoch net chaw'." jatlh Mahoun.

jatlh 'eSSIm, "wejpuH. rurbogh wanI' vISIQpu'. roj yItIv, toy'wI''a'pu' tItlhabmoH, pejIjchuq, Hoch nuv QIp tIchergh. vulqangan chaH'a'? Dalqu' vulqangan lopno'."

jatlh Mahoun, "yIloS" 'ej beq ghel. jatlhqa' "nurI' HumanHey. Doqqu' 'ej wov DIr. jejbe' qoghDu' 'ej pIj mon. chotlhej DaneH'a'?"

wuQbe'meH QuchDaj 'uy 'eSSIm. jatlh "vulqanganpu' chaHchugh SIbI' jImej."

jabbI'ID vanpu'DI' 'eSSIm QI'vaD latlh jabbI'ID qon. ghom DIvI' 'oSwI'pu', Mahoun je 'e' 'ollaHmo' 'eSSIm, DaH luHarnIS.

HutmaH vagh: Sojmaj 'oHbe'

ghorDaq ghom Mahoun 'eSSIm je. jatlh Mahoun, "ghaytan HoSghajqu'mo' wo'lIj DIvI' bobuSHa'laH 'ach nuSIghqu'laHmo' ngochmeychaj, muchchaj vIlegh vIneH. Dalchugh tugh matlheD. " tlhIngan wo' SIghtaH je DIvI' ngochmey QIp, 'a chIDqangbe' 'eSSIm.

lopno' lojmItDaq Qam Human. 'eSSIm nuHmey nge' neHmo' tlheDchoH 'eSSIm Mahoun je 'ach mun vu'wI'. 'eSSIm tIgh vuvmeH nuH qeng net chaw' jatlh. HoS nuHmey ghajbe' 'eSSIm Mahoun je 'e' 'olpu'DI' jatlh "pe'elneS." DIvI' Hol jatlhlaw' 'ach mugh jan.

Sungpu' chaH HochHom mebpu''e'. DIvI' HolvaD gharben cha' 'oH yuQvam pong'e'. Human chaH HochHom DIvI'nganpu''e'. taS ngaSbogh HIvje' nob wa' Human. Doq 'ej wovbe' taS. wornagh qa'vIn bIr ghap pIH 'eSSIm 'ach waHDI' HIq mumlaHbe'. qo'la' 'awje' 'oH jatlh Human. wIbHa'qu' 'ej ruqmoH. 'eSSImvaD tera' nay' qem montaHbogh Human jabwI'. jatlh "Ha'DIbaH ghIH tIr ngogh je, tlhagh patat 'oQqar naQHommey je Daghaj. tItIv!" Doq Ha'DIbaH 'Iw 'ach vutmeH meQpu' 'ej chopDI' ghomHa''egh. Somraw, to'waQ HomDu' je Hutlhchu'. 'ey patat 'ach tlhoy na' 'ej tlhoy charHa'. SoptaHvIS QoQ janmey chu' Humanpu'. pa' bebvo' ghIr tlheghmey 'ej bIHDaq HuS mI'wI'pu'. SIH'eghtaH. HoS chaH 'ej SIHlaHqu'. MahounvaD jatlh 'eSSIm "mI'wI' Segh Dangu'laH'a'?"

"Human chaH," jatlh Mahoun, 'ach Qoch 'eSSIm. Human toy'wI''a' ghajpu' 'ej jaS SIH. HomDu' let ghaj. jaS Qap mutvam porgh. HomDu' motlh Hutlhlaw'. HaSta'a' tInqu'Daq yuQjIjQa' Delbogh mIlloghmey Hotlhlu'. SoQmey much tera'nganpu'. yuQmey, cham, nuvpu' Sar, jo je cha'. lutIvqu'ba' Sungpu'. Quchmo' 'ej Seymo' jach.

"DatIvtaH'a'?" jatlh Mahoun.

Hemqu' Humanpu'. nIvqu' 'e' luHar. nuv pIm lajqang 'e' mIy 'a mIgh tlhIngan tIgh 'e' luHar 'e' Sov 'eSSIm. jogh naQ lughatlhbe'meH Humanpu', Suvqu'nIS tlhIInganpu'. "mupIlmoH," jatlh 'eSSIm. Hoch Humanpu' leghlaHbogh HoH neH. yajlaw' Mahoun. qep lumej.

HutmaH jav: pegh muj

lopno'qoq lumejpu'DI' Hurgh ram. ghonDoq lel 'eSSIm, muD largh 'ej jagh tu'meH DughchoH. 'oy'taH nachDaj. bej Mahoun. chol 'ej jatlh "bI'IH."

jatlh 'eSSIm, "pa' yIQamQo'! 'etlh DeSwIj DawaQ."

vIH Mahoun. jatlh "bIwuQ'a'?" DotlhDaj ja'pu'be'mo' 'eSSIm, bItmoH Mahoun Sov. jangpa' 'eSSIm QIj Mahoun, "bIberghlaw' 'ej pIj Huy'DunglIj DaHot."

De'vetlh SImmeH ghoqwI''a' poQbe'lu' 'ach 'eSSIm yIvtaH. "jIQIp 'e' DaHar'a'?" jatlh.

"ghobe'," jatlh Mahoun "tej SoH. tIr mut chu' Da'oghlI'. bIvalba'. qamawpu'chugh jItlhIj. jIjatlhHa'law'."

jatlh 'eSSIm "bIjatlhHa'chugh chIch bIjatlhHa'. reH bIpegh. chovoqchu'be' 'e' vIlaj 'ach ngoDmey vISImlaHba'bogh tIchID!" jatlhtaHvIS 'eSSIm pe'vIl 'etlh yan.

jatlh Mahoun "vIchID! vIchID! Hoch vIchID. nuq De' DaneH?" HeghvIplaw', pagh tojmeH nuch Da.

jatlh 'eSSIm, "chotojpu' 'e' DachID. vIloyba'pu' 'ach DaH nablIj yIDelchu'." ghoqwI' ghaH 'e' chID neH.

jatlh Mahoun, "Hoch vIchID! wa'Hu' qangaghmeH nuHHom vIlo'. puj HIch ponglu'. DupujmoHmo' qaSeHlaH. 'utbe' Qujvetlh DaH 'e' vISov. qabelmoH vIneHpu'. bIvuS'eghnISbe'mo' DatIv vIneH neH. SoH HoS law' jIH HoS puS. jIHeSpu'! jItlhIjneS!"

De'vetlh pIHbe'chu'pu' 'eSSIm. pagh jatlh. yev. wa'Hu' wanI'mey qelchu'DI' yajchoH. vaj tIr qach Sorghbe'pu' Mahoun. 'eSSIm Sorghta'. 'a HoHbe'pu'. Heghbe'meH vangta'. pujmoHlu'pu' 'e' tlhojbe' 'a chIDqangbe'mo' qIchbe'. loS neH.

jatlh Mahoun, "vIDIS. jItuH. wa'Hu' vIchIDchoH. <vISov chotojlaHbe'> bIjatlhmo' jIQuchqu'."

mogh 'eSSIm, ghoqwI' ghaH 'e' chIDbe'meH jatlhtaH. jatlh 'eSSIm "bIjatlh 'e' yImev. choSeHlaHDI' muSeymoH 'e' DaSov. SIbI' puj HIchlIj vIghovpu'. ghoqwI' SoH SIbI' 'e' vISov je. QI' peghlIj DaQannIS 'e' vIyaj. Qu'lIj yIta'. chISwI'pu' pegh DanIHchugh vISaHbe'. tlhIngan QI' peghmey vISovbe'. 'ach tlhInganpu' tInISQo'! vajar HoD Duj QotlhtaHvIS DIvI' Dabej'a'? ngebchu''a' Duj?"

jatlh Mahoun "ghobe'! may' vIleghbe'pu'. bong Duj wItu' neH. 'ej Sotchugh vay' vIQaH. DaSov!"

jatlh 'eSSIm "bIyuDtaHchugh qaHoH. SoHvaD mIw vIDelta'. Daqaw'a'?"

HeghvIpba' Mahoun. jatlhbe' 'ej chor tlhopDaq Qey DeSDu'Daj. SoQchu' mInDu'Daj. yIQchoH yopwaHDaj. qo'la' 'awje' 'oHbe' 'e' larghlaH 'eSSIm. qawba'.

nuHHey lellaw'meH vIH Mahoun ghop. HoS nuH ghajbe'ba'mo' Mahoun, 'eSSIm jeylaHbe'. batlh Suvqangmo' nuH loS 'eSSIm. 'a nuH lelbe' Mahoun. QumwI' 'oH. nuch. QumwI' chu'laHpa' nge' 'eSSIm. yavDaq chagh 'ej gho'qu', Mahoun bejtaHvIS.

HutmaH Soch: Heghpu'bogh loD Hol

qoy'choH Mahoun. Huch nob 'e' lay'. pegh 'e' lay'. SaQchoH. wejpuH. Qo'noSDaq SIbI' HoH. 'a naDev qay'laH qum. morghchugh jInmolvaD Seng 'ej chaq jeS je DIvI'. Hoghvam pawmo' tlhIngan may'Duj Seng'a' lInglaH. jatlh 'eSSIm, "qaHoH 'e' vIHechchugh DaH bIHeghpu'. loD yIDa." mInDu' poSmoH Mahoun. pagh jatlh 'a 'Ijruplaw'. jatlhqa' 'eSSIm, "tlhIngan Hol vIjatlhbe' bIjatlh 'a Dajatlhchu'. maqIHDI' loQ bIjatlhHa' 'ej mu'mey nap Dalo' 'ach SIbI' bIQagh 'e' DalIjchoH. DaH yIchID. chay' tlhIngan Hol Daghojta'?"

"mumer je." jatlh Mahoun. "laHwIj vISovbe'pu'. bIghHa'Daq chov pagh."

"DIS 'ar nIwegh'a'?" jatlh 'eSSIm. "qama' mI'lIj yIja'."

"jajmey vItoghbe'taH 'a wa' jar vISIQ net SIm," jatlh Mahoun. "mI' vIghajtaHchugh vISovbe'. DujDaq jIHtaH."

QeH 'eSSIm 'ej wuQmo' jorruplaw' QuchDaj, 'ach SeH'egh. jatlh, "bIneptaH. qaStaHvIS wa' jar tlhIngan Hol moHaqmey DaghojlaH 'e' vIHon. not tlhIngan bIghHa'Daq SoHpu'. Duj bIghHa' 'avwI' ghaHpu' vavwI''e'. jaw 'avwI' qama' je net tuch. ja'chuq qama'pu' net tuch. chaq tlhIngan Hol Dayajqu'meH QaplaH mIw DaDelpu'bogh 'a pov QIchlIj'e' 'ej tIghmeymaj DaSov je. DughojmoHba'ta' DIvI' QI'." pay' Mahoun meq tlhoj 'eSSIm. QoghIjDaq Hol lulanmeH HerghwI' lo'laH QI' net joS. HerghwI' tebmeH Hol jatlhbogh qama' QoghIj'e' lo'lu'. mIwvaD HeghnISba' qama'. jatlh "choQannISbe'. mIwmey rap DIlo' maH. Hegh 'e' maS qama'vetlh. DaH yIvIt." yaj 'eSSIm. vIt jatlh 'e' Qoy neH.

jatlh Mahoun "jInepbe'. bIghHa'Daq tlhIngan Hol vIghojbe'chugh Hol Hal vISovbe'."

Qay' 'eSSIm. jachchoH. jatlh "chay' tu'lum rurbogh mu''e' Sov qama'? nIweghtaHvIS Nargh motlhutlh'a' SoH Qang je? ghoqwI' SoH 'e' vIcherghqang 'a NachINqangme'chugh chay' mangwI' Namoj 'e' Nanam? "[25] Mahoun chor SIjmeH ghonDoq DuQchoH 'ach QachtaHvIS wewchoH Mahoun. DuQpa' 'etlh Qolta'.

HutmaH chorgh: pel'aQ ghorpa'

Mahoun DechchoHDI' jolpa' 'ej QeDpIn, Hung yaS je qabDu' leghDI' Quchqu'choH. jatlh "chay' Seng vISIQ 'e' boSov? SulughtaH. Qob tlhIngan. muHoHlI'."

jatlh QeDpIn, "DuHoHlI' banglI'?"

jatlh Mahoun, "DaH bangwI' ghaHbe'. DaH muHoHrupqu'wI' ghaH."

jatlh HungpIn, "pIghochtaHvIS pay' loj QumwI'lIj 'ej yInroHlIj wIleghDI' bISotba'mo' qajol."

mon Mahoun. jatlh, "jaS qaSlaH. nuch jIHbe'chugh jIHeghpu'. wanI' vIQIjchu' yopwaH Say' vItuQmoHpu'DI'." pa'Daj ghoS ghIq QeDpIn pa'Daq ghom HoD, QeDpIn, HungpIn je. bIQ ngaSbogh HIvje' tIn Suq HoD 'ej wanI'mey Del.

"vaj chay' tlhIngan Hol DajatlhlaHchu'?" jatlh HungpIn. "SoHvaD yap'a' wa' jar? DuSaQDaq qaStaHvIS vagh DIS DIvI' Hol vIHaDtaH 'ach Human vIqIHchugh ghaytan bong vItIch."

jatlh Mahoun, "Do', bong Human DatIchchugh DuHoHbe'."

"yIjang. ghelDI' vay' yIjunQo'. chay' Daghojta'?" jatlh QeDpIn.

"vIjun'a'?" jatlh Mahoun.

"DaH chojunqa'," jatlh QeDpIn.

"DaH jIvIt," jatlh Mahoun. "vISovbe'chu'. bIghHa'Daq vIweghlu'. tlhIngan Hol vIghojlaw'pu'. mu'mey puS vISov 'e' vIHar 'ach Hol vIjatlhchoHDI' vIjatlhlaH. pagh vIpegh 'e' vIlay'. HIHoHneSQo'."

jatlh QeDpIn "nuqjatlh?"

jatlh Mahoun. "jIqID neH."

jatlh QeDpIn "'a nuq Dajatlh? mu'mey Qav DajatlhtaHvIS tlhIngan Hol Dalo'." mugh Mahoun ghIq tamchoH.

"chaq tlhIngan ghoqwI' SoH," jatlh HungpIn. Mahoun QeDpIn qabDu' leghDI' jatlh, "jIqID neH!"

HungpInvaD jatlh Mahoun, "muwegh tlhInganpu' 'e' DaSov'a'?"

jatlh HungpIn, "joSmey vIQoy. meHDaq bIbomtaHvIS DeSDu'lIj Da'ang 'ej bIHDaq ghItlhpu' tlhIngan joy'wI'pu', qar'a'?"

jatlh Mahoun, "vIjoy'be'lu'. muvormeH tlhIngan DIr ngeb lo' tlhIngan Qel. yabwIj SIghlaH'a'?"

SIbI' jatlh QeDpIn, "ghobe'. jaS Qap Hol. QoghIjDaq Hol lanlaH tlhIngan QI' net ja', 'ach bong DIrmo' qaSbe'bej."

"chaq yabwIj SIgh jan lulo'pu'bogh," jatlh Mahoun. Saghqu' jatlh "Mossam, Rolyou, tlhIngan bIghHa' bopbogh lut'e' bo'Ijqang'a'? "

HutmaH Hut: bIghHa'Daq

lut lu'Ijqang HungpIn QeDpIn je.

jatlh HoD "mujonDI' tlhInganpu' vIjoy'lu'be' 'ach mujoy'taH wanI'mey vIqawbogh. tlhIHvaD wa' vIDel. bIghHa'Daq qama' jIHtaHvIS, mInwIj nujwIj qamwIj DeSwIj je lubaghlu'mo' ravDaq jIba'laH neH. qaStaHvIS poH nI' DeSDu'wIj vIvIHlaHbe'mo', 'oy'qu'choH, 'ej qaStaHvIS jaj pagh vItlhutlhta'mo' jI'ojqu'."

jatlh QeDpIn, "nIjoy'pu' 'e' DayajlaHbe''a'?"

jatlh Mahoun. "vay' joy'taHvIS tlhIngan DaQoypu'chugh bIjatlhbe' <Dajoy'lu'>. ravDaq jIba'taHvIS yaS wa'DIchma' lujoy'lI'. jachtaHvIS 'ej qoy'taHvIS ghoghDaj vIghov. rapmo' pongmeymaj luyu'taHvIS pongwIj'e' vIQoytaH. <Mahoun! choja'be'chugh vaj ghur 'oy'! Mahoun! yIqIm> tagha' tamchoH. Heghpu' 'e' vItul. QunwI'vaD Heghpu' 'e' vIqoy'." yev Mahoun. luqaD 'e' pIH 'ach luyajlaw'. tam 'ej lubejqu'.

"bIghHa' 'ay'vetlhDaq jImob 'e' vISov. 'ach tugh latlh qama' qeng 'avwI' 'e' vIQoy. yaS wa'DIchma' ghaH 'e' vIpIH 'ach vIleghlaHbe' 'ej vIjatlhlaHbe'. tlhuHtaH 'e' vIQoy.

"'el vay'. be' ghogh vIghov. yu'wI' ghaH. pIm yu'wI' HIp, 'avwI' HIp je 'ej moch chaHlaw' yu'wI'pu'. 'avwI'vaD jatlhDI' yu'wI' vang 'avwI' 'a yu'wI'vaD jatlhDI' 'avwI', SaHbe'law' yu'wI'. 'avwI'vaD jatlh be'. ghoHlaw' 'ach <lu'> jatlh 'avwI'. mej 'avwI'. tugh chegh. bIQ bal qem 'e' vIQoylaH. wabmey vIghov. jIHvaD bIQ nob 'e' vItulqu' 'a latlh qama' ghoS. ravDaq vay' lan. jIloStaH.

"voQchoH vay' 'e' vIQoy. 'avwI' HIvta' qama' 'e' vIloymo', jIleghlaHmeH nachwIj vIvIHqu'. loQ vIleghchoHlaH. mo'Daq SaHtaH 'avwI' 'ach 'avwI' HIvpu'be' qama'. ravDaq QottaH yaS wa'DIchma'. noghtaH. vIHbe'chu'DI'. ghum 'avwI'. QumwI'vaD jach 'ej yaS wa'DIch qab qIpchoH.

wa'vatlh: qama' Soj

jatlhlI' Mahoun. "tugh 'elqa' be' 'ej 'el je latlh tlhIngan yaSpu'. 'avwI'vaD jach be'. be'vaD jach yaS nIv. ra' yaS nIv ghIq nujwIj mInDu'wIj DeSDu'wIj je tlhabmoH 'avwI' 'ej jIH tlhopDaq yaS wa'DIch porgh luH chaH. vItoD 'e' vInID. DopDajDaq vItlhe'. voQlaw'pu'mo' nuj vInuD. SaH Soj. Soj vIlelmeH nuj vISen 'ej DubDaq vIqIp. HIja', 'eSSIm ghu' rurqu'. roDaq vIyuvqu'. tagha' nujvo' chagh Soj yIQ. nujDaq vInuDqa'. loj Soj, 'a tlhuHchoHbe'. Qapbe'law' je tIq. ghaHvaD jItlhuHchoH 'ej roDaq vIqIptaH. ghaytan joQDu' vIghor. tIq vIQapmoH vIneH 'a jIluj. Heghpu'mo' loQ jIbel. HeghmeH qoy' 'e' vIQoy. Heghpu'mo' lujoy'laHbe'taH. 'ach vItoDlaHbe'mo' jI'IQ.

"qama' nuDmeH chol moch. bong HIvje' pup ghaH 'ej ravDaq bIQ lIch. vIroSmeH chorwIjDaq jIQotchoH. ngugh bIQvetlh potlh law' yaS wa'DIch Hegh potlh puS. ghIq Soj yIQ vISop. HIja' HeghwI'Hey Hugh Soj vIlel ghIq vISop." tuHmo' HoD jatlh 'e' mev.

qabDaj So'meH ghopDu' lo' QeDpIn. 'IQlaw' HungpIn. jatlh QeDpIn "Mahoun, jI'emrup. voQtaHvIS qama' boQbe' 'avwI' 'ej Dujoy'meH DatoD 'e' ra'. chaq porghlIj lujoy'be'pu' 'ach yablIj lujoy'bejta'. bIrop jIjatlh vIneHbe' 'a DuQaHnIS vay'. nIqawmoH wa'Hu' wanI'mey 'e' vIyaj 'ach qatlh juja'lI'?"

yaSpu'Daj mInDu' bejtaH neHbe'mo' Mahoun De'wI'Hom chu' 'ej ruQtaHvIS jatlhtaH, "lugh 'eSSIm, Mossam je. tlhoy QaQ laHwIj. chay' tlhIngan Hol vIjatlhlaHchu'? qaStaHvIS loS jar 'anDorngan DujDaq jIleng 'ej 'anDor Hol vIjatlhtaHvIS muvaqtaH 'anDorngan. qaStaHvIS wej DIS DIvI' Hol vIHaD 'ej pIj malja' HuqmeH DIvI' Hol vI'lo' 'ach povbe'taH. chay' puplaH tlhIngan HolwIj?"

mIS QeDpIn. "rar'a' wanI'meyvam? voQmo' qama' tlhIngan Hol DajatlhlaH'a'? Mahoun, choghIjchoH."

jatlh Mahoun, "jIghIj'eghchoH. ghoqwI' jIH'a'? chaq chaHvaD jIghoqmeH yabwIj lughun tlhIngan pagh QoghIjwIjDaq jan lujom. 'oHmo' tlhIngan Hol vIjatlhlaHchu' 'ej tlhIngan be' vISaHchoH. rut jInajtaHvIS tlhIngan vImoj." jatlhtaHvIS De'wI' ghItlhwI' vIHmoHtaH.

wa'vatlh wa': nuq lIjpu'?

jatlh QeDpIn, “Mahoun, yuQmajDaq maHqa'taHDI' yab po'wI' DaSuch 'e' vIqap. 'a DaH qajotmoHlaH. DuHbe' mIw DaDellI'bogh. ghoqwI' lumojmoHlaHbe' tlhInganpu'.”

jatlh HungpIn, “ghaytan tlhIngan Hol ngeD law' latlh Holmey ngeD puS. valqu'be' tlhInganpu', qar'a'?”[126]

jatlh QeDpIn, “wanI'meymo' DaSIQpu'bogh bImaw'chu'be'mo' Qun yItlho'.”

“lu'.” jatlh Mahoun 'ej De'wI' roQ. jIH leghDI' HungpIn taDchoH 'e' legh Mahoun. jatlh, “nuq? Daghov'a'?”

jatlh HungpIn, “HIja'. janvam DaSIQ'a'?”

jatlh Mahoun. “HISlaH. Heghpu'DI' yaS wa'DIchma' lomvo' jIyaHpu'. pa'Daq jan muqeQ. 'oy'be' 'ach lulo'taHvIS poH vIqawlaHbe'. nuq 'oH?”

jatlh HungpIn “tuQDoq 'oH. QaQ nagh beQlIj. vIghovlaHchu'.” Duj qawHaqDaq mIllogh Sam HungpIn. jatlh “qechmey qon. yIn naQ qonlaH 'ach qaSchugh yab Sang. ghoqwI' DamojmoHlaHbe'bej, 'ach wanI'mey DulIjmoHlaH. Da'omlaHbe'. bIleSchugh chaq bIHeghbe', 'a yIHeghrup, yablIj SanglaH. 'ampaSDaq jatlhlu'. not yab ghun net jatlh. yab chImmoHlaH neH.”[127]

jatlh Mahoun, “tlhIngan Hol mughojmoHbe'law' janvetlh. bIghHa'Daq jIHtaHvIS 'avwI'pu' vIyajbe' 'e' vIqaw. mu' puS vIyaj, ra'DI' 'avwI' neH. murotlhmoHlaw' jan.”

jatlh QeDpIn, “DurotlhmoH'a'? chay'?”

jatlh Mahoun, “jImejpa' lulo'qa'. lulo'taHvIS poH vIlIjqa' 'ach lelHa'DI' loQ vIlegh. jan rap 'oH 'e' vIHar. 'ej lulo'DI' jIrotlhchoH. 'oHmo' SIbI' jIwochchoH 'ej jIHoSchoH. ghIq mutlhabmoHlaw' DIvI'. bIghHa'vo' muDev vay' 'ej 'anDorya'ngan Duj choghvat vItoS 'e' vIqaw. muQorgh 'anDornganpu'.” tam Mahoun, 'anDornganpu' qawtaHvIS. “pIj QIp DIvI' ngoch 'ach juHDaq muqemta'.”

jatlh QeDpIn, “'anDorngan val law' Human val puS.”

QeDpIn rI' meH. jangDI' rollIw jatlh QumpIn, “HoD HIjatlhmoH.”

jatlh QeDpIn, “yIloS.” HoDvaD jatlh “bIvumrup'a'?”

jatlh HoD, “Huch vIbajnIS. QumwI' HInob.” QumwI'vaD jatlh HoD, “jatlh Mahoun HoD. qaStaH nuq?”

wa'vatlh cha': toywI''a' yIngu'

jatlh QumpIn, "DurI'ta' DIvI' qughDuj *Trigraph*[69]. toy'wI''a' boplaw'."

monHa' Mahoun. reH nIStaH yuQjIjQa'nganpu', DIbvetlh lughajbe'bejtaHvIS. QeDpInvaD QumwI' nobHa' Mahoun 'ej HungpInvaD jatlh "jIHvaD qa'meH yISuq."

meH ghoS. DIvI' qughDuj rI'. Human be' ghaH 'oSwI''e'. lIH'eghta' 'ej muD Dotlh luqelpu'DI', jatlh Human, "Mahoun HoD, yelwIyyItngan toy'wI''a' wItoDta'. SalIH vIneH."

mej neH Mahoun 'ach vID Mahoun 'e' wuqchugh 'oSwI', DIvI' tetlhDaq pongDaq tu'lu' 'ej SuyvaD QaQbe' ghu'vetlh. mej 'e' mIm. ghom 'e' lunab.

jolpa' ghoStaHvIS ja'chuq jeSbogh yaSpu'. toy'wI''a' lughajbej'a' Humanpu'? nuqDaq toy'wI''a'vetlh Suq DIvI'? Mahoun pum'a'? toj'a' DIvI'? ghu' lupojtaHvIS QumwI' boQwI' legh Mahoun. vagh wen novpu' toy'wI''a' ghaHpu'. "Inaq," jatlh Mahoun, "yelwIyyIt toy'wI''a'Hey ghaj DIvI'. nuq ta' 'e' DaHar?"

jatlh beq Qup, "muHIjpu' DIvI'. not toy'wI''a' lulIghchaj vISIQqa' vIneH."

"Inaq, not Dangevqa'lu'. pIQan," jatlh HoD. latlhpu'vaD jatlh "Ha'! DIvI'vo' toy'wI''a'vam wItoD."

Qol HoD, HungpIn, chutpIn je. DIvI' 'oSwI' luqIH. yaSpu'Daj lIH Mahoun. mughwI''a' lulo'ba' Humanpu'. QIj Human, "weHwI' Dujvo' yelwIyyItngan toy'wI''a' wItoD. toy'wI''a' tuchbogh mab'e' luqI'be'ta'mo' yelwIyyItnganpu', weHwI'vetlh DIbIjlaHbe'pu'. puqpu'ra' boQanmeH mab qI'nIS qumraj. lulIghDaq loDHomvam wIHIjlI'. mabvetlh jeSbe'wI'vaD toy'wI''a' tlhab wIQay net tuch, 'a Sotqu' ghaH. tlhoS jatlhQo'. boQaHmeH chaq chutvetlh wIjunlaH."

vay' rI'taHvIS 'oSwI', bejchuq Mahoun chutpIn je. tojlaw'lI'. jatlh Human, "DaH qemlI'."

tugh paw 'anDorngan loDHey tlhejbogh Human loD. "Orson yIqIH," jatlh Human loD. yelwIyyIttngan ghaHbe'ba' SIbI' 'e' lughovlaH Hoch yelwIyyItnganpu'. SuD ghaH 'ej ghaH woch law' yelwIyyItngan woch rap 'ach pIm qab, pIw je. bItba'. loD rur 'ach be'pu' loDpu' je chaHbe' 'anDorya'nganpu'. Than[60] ghaH 'ej cha'maH ben boghpu' 'e' noH Mahoun. 'anDorngan nach jeqwI'Du' Hutlhmo', mut lungu'Ha'pu' Humanpu' QIp. 'anDor pong 'oHbe' Orson'e'.

wa'vatlh wej: nuvra'

montaH 'e' So'meH nujDaq ghop lan Mahoun. SaghwI' Da. OrsonvaD jatlh "Mahoun HoD jIH."

jatlh Orson, "yelwIyyItngan jIH, juH vIghoS vIneH." yel Hol pup jatlhlaw' 'a jaS vIHmo' wuSDu'Daj, mugh DIvI' <'u'vaD mughwI'> 'e' tlhoj HoD.

jatlh Human 'oSwI', "mu'meyvetlh mob jatlh."

toy'wI'a''HeyvaD jatlh Mahoun. "yelwIyyItngan maH. juHlIjDaq pIqemlaH." yel Hol jatlh 'ej ghaytan 'anDorngan Hol Qoy Orson. mu'meyDaj rap jatlhqa'.

jatlh 'oSwI', "not choH. Do'Ha' Dargh nov tlhutlhta'mo' Qelma', roptaH. 'a QaHmeH qaq nuvra'. SumoblaHmeH qaStaHvIS tup puS mamej."

Qub Mahoun. cha' quSmey qem Hung yaS. 'anDorya'ngan Hol jatlhchoH Mahoun. ba'choH Orson 'e' ra'. lob. "nIH ghop yIpep," jatlh Mahoun. lobqa'. yajba'. yel Hol yajbe'. jIbDaj chIS chev Mahoun. nachDajDaq jeqwI'Du' Daq Sam. jeqwI'Du' pe'chu'pu' vay' ghIq Daq meQlaw'ta'. DunHa'. vang Mahoun 'e' Hajlaw' Orson. QIH Hotbe' Mahoun. latlh quSDaq ba'choH. jatlh "jIQoS. 'oy'qu''a'?" jangbe'taH 'a loQ leS. toy'wI''a' nuj poSmoH Mahoun. SaH jat 'a non wa' Ho'.

jatlh Mahoun "'IQ ghu'vam 'a wItlhaplaHbe'. 'anDorya' wIghoSDI' DIvI' rewbe' wIquchta' 'e' luHar."

jatlh Orson, "yelwIyyItngan jIH, juH vIghoS vIneH."

chegh Humanpu'. jatlh Mahoun, "muyajba' 'a yel Hol jatlhQo'. jatlhDI' 'oy' 'e' vIHar." jatlhtaHvIS HoD ghop 'uchchoH Orson.

jatlh chutpIn, "wItlhapqang 'a mIchmey wIlengbogh Hat toy'wI''a'. toy'wI''a' DIHIj 'e' Har vay' wIneHbe'."

jatlh Human, "navmey renoblaH." DujDaj rI' Human.

chutpInvaD tlhup Mahoun. jatlh "nuq wIta'lI'?"

jatlh chutpIn, "yIloS." Sutlh chutpIn Human je 'ej tagha' De'wI'HomDaq vay' qI' DIvI' 'oSwI'. Hemba' chutpIn.

mejtaHvIS Humanpu' Hoy''eghba'. jatlh "lutlhapmo' nuvDaj'e' jIbelqu'! chaq ghaHmo' tugh mab luqI'!"

mejpu'DI' jatlh chutpIn, "DIvI'vo' 'anDorya'ngan toy'wI'a'' wISuqta'. pagh wIDIlta', mubchu', 'ej DIvI' rewbe' toy'wI''a' HIjmeH chaw' nunob. HuchwIj vIbajta' qar'a'?" Hagh Mahoun 'ej tev nob 'e' lay'.

wa'vatlh loS: jatlhvIp

Farsajii lupawDI' meH lurI' 'ej lengchoH Duj. vutwI' rI' Mahoun. 'anDorya' Soj qem 'e' ra'. HoD ghop 'uchtaH Orson. jolpa' retlhDaq loSlI' Inaq[70]. merba' 'anDorya'ngan. "bIlugh," jatlh Mahoun, "toy'wI''a' lulIgh SIQ neH pagh."

toy'wI''a'vaD jatlhchoH Inaq. jatlh Orson, "yelwIyyItngan jIH. juH vIghoS vIneH." mIS Inaq. meq loyta'bogh QIj Mahoun. 'anDorngan ghaH 'e' luSovpu'chugh Humanpu' weHwI'pu' qoppu'. 'ach yuQjIjQa' rewbe'pu' chaHbe'mo' yelwIyyItnganpu''e', loghDaq Hatbe' yelwIyyItngan toy'wI''a'. Humanpu' QIp tojmeH mu'meyvetlh lughojmoHta' toy'wI''a' ngevwI'pu'.

qeppa'Daq lughoS. rallaH 'anDorngan net Sovmo' Mahoun QantaH HungpIn tlhejtaHvIS Orson. OrsonvaD bIQ nob Mahoun. tlhutlhqu'. 'anDorya' Hol jatlh Mahoun 'a po'be'qu'mo' tlhIj, ghIq toy'wI''a'vaD lut ja'. "wejmaH wej ben mujonpu' novpu'. ngugh jIH Qup law' SoH Qup puS. mughIjpu'. mubuQpu'. muQIHpu'. juppu'wI' HoHpu'. jIHegh 'e' vIHar. muQaHpu' 'anDorya'nganpu' 'ej juHwIjDaq muqem." yev Mahoun. 'anDorya'ngan DameH nachDajDaj ghopDu'Daj lan Mahoun 'ej nItlhDu'Daj SIH. <jI'IQ. qaSaH> 'oS jeqwI'Du'qoqvetlh. DujDaq reH Haghpu' 'anDorya'nganpu' jeqwI'Du'qoqDaj lo'DI' 'ach HolvaD potlh. jeqwI'Du' bejbe'chugh 'IjwI' QIn bID Hevbe'. jathqa' Mahoun 'e' nID 'ach tlhIngan Hol laHDaj rurbe'bej 'anDorya' Hol laHDaj. moblaw'ghach HajtaHghach SottaHqu'ghach je DelmeH mu'mey Hutlhchu'. SaQchoH. SIHqu' jeqwI'Du'qoqDaj. yIQchoH qevpobDu'Daj 'ej SaQqu'mo' tlhuHHa'.

SutlhtaHvIS Mahoun, reH gholDaj vuDmey ghu' je qel. vay' yajlaHchugh Dochmey neHbogh loylaH 'ej SutlhlaHchu'. DaHjaj jatlhqangchoHmeH Orson SutlhlI' 'ej toy'wI''a' ghu' qeltaHvIS ghu'Daj tu'pu'.

wa'vatlh vagh: yajchuq

SaQtaH Mahoun 'e' tu'ba' HungpIn 'ach Qu'Daj qaghbe'. bejtaH je Orson. loQ nachDaj pepHa'. Mahoun bejtaHvIS. ghIq maHun qech lo'. nachDajDaj ghopDu'Daj lan 'ej nach jeqwI'Du' DachoH SIqwI'Du'Daj. <jI'IQ. qaSaH.> yaj Mahoun. SaQchoH je Orson. chol 'ej 'uchchuqchoH Mahoun ghaH je. SaQ 'e' tuHbe' yelwIyyItngan loD. pIj ghe'naQ 'IjtaHvIS Mahoun SaQtaH. 'a qaSpa' DaHjaj narghbe'pu' 'oy'vam. weghlu'taHvIS ghu' Hajpu' 'ach tlhabmoHlu'DI' ghu' Hajpu' je. yel yuQDaq cheghtaHvIS porghDaj nuDta' 'anDorngan Qel. pIv jatlh 'ej DeSDu' vorlaHbe'. lupoltaHvIS tlhInganpu' Huch'e' bajtaHbogh Mahoun noblu'. law'qu'be' 'ach malja' mach taghmeH lo'pu', 'ej cheppu' 'ej Sachpu'. malja' Qapla' chavbejta' Mahoun 'ej DaH luDech Dochmey wagh, luvuvbogh nuvpu', luparHa'bogh juppu' je. 'ach DaHjaj neH loDHomvetlh Qorgh vay'. SaQtaH Mahoun 'ej Orson Dub yach.

SaQbe'choHDI' Mahoun jatlh, "latlh lut qaja'. mu'mey Dayajbe' 'ach chaq qech Dayaj. wa' jaj loD maghmo' maqoch, loD ghImlu' ..." bom'e' parHa'pu'bogh vajar bomchoH Mahoun. SaQpu'mo' pupbe' ghoghDaj 'ach HoSghaj tIqDaj. 'Ijqu'meH, Mahoun 'uchbe'choHDI' Orson QamchoH Mahoun 'ej bomqu'. DaH SaQchoH HungpIn.

bompu'DI', 'anDorngan retlhDaq ba'choH Mahoun 'ej bIQ tlhutlh.

bIQ tlhutlh je Orson ghIq jatlhchoH. "bIlugh," jatlh "Hujqu' mu'mey 'a loQ QoQ vIyaj." 'anDor Hol jatlh.

jatlhqangchoHmo' Orson Quch Mahoun. jatlh, "qayu'be'. vay' DapoQchugh HIja'."

qeppa' paw vutwI'. ngaSwI' qeng. mer Orson.

"Thrxan Shrbatlhylo 'oH pongwIj'e'," jatlh 'anDorngan. mugh Mahoun.

"jIQoS," jatlh vutwI', "wabmeyvetlh lIngbe' jatwIj, 'a tlhIHvaD Soj vIqempu'." ngaSwI' poSmoH 'ej 'anDorya' naH, HIq je lel. SaQqa' Thrxan naH leghDI'. tlhap 'ej SIbI' yub teq 'ej SopchoH. HIq neHbe'. nenpa' jonlu'mo' not tlhutlhpu'.

DIvI' Hol mu' puS jatlh Thrxan. HungpIn lIH Mahoun 'ej jatlh, "naDev nuQan Mossam. DavoqlaH. SoHvaD QongDaq DoQ." HungpInvaD jatlh Mahoun, "qay'chugh vay' HIrI'."

wa'vatlh jav: DI boch

latlh yuQ SuchtaH varSajIy. nom tIr je'wI'pu' Sam. Qatqu' tIr chu'. Hoch ngevta' ghIq latlh jo Suq. Suy ngoQmey chavmeH SIm 'ej nab. reH ngevwI'vo' je'qangwI'Daq tep luHIj. pIj SuD Mahoun 'a motlh lugh tIqDaq 'ej je'wI' SamlaH. toy'chu' beq. Huch law' baj Mahoun 'ej beqpu'vaD naDmey tevmey je nob. ThrxanvaD Qel Suq. nuj nuD 'ej Ho' non tI'ta' 'ach jeqwI'Du' tI'laHbe'. wej vajarvo' Huch Hevta' 'ach SochHu' neH Sotlaw' HIjpu'. chaq wej paw tlhIngan toDwI'pu'.

chIjwI'vaD jatlh Mahoun, “Hop'a' tlhIngan tharghDuj Quv?”

jatlh chIjwI', “ghobe'. naDevvo' chaq wej rep poQ leng. jISIm DaneH'a'?”

jatlh Mahoun. “yIghoS. 'ach yIyeptaH. chuq'a' noch yIjIHqu'. SaHchugh latlh tlhIngan Duj yIcholQo'.” SaHtaH tlharghDuj. luHotlh[97]. yIntaH loS nuv. yap Soj bIQ yInSIp je 'e' tul Mahoun 'ach tIchvIpmo' rI'be'pu'.

latlh yuQ lubavchoH. pa' Sutmey ngev 'ej naH wIbHa' je'. motlh yuQmey rap SuchtaH Mahoun 'ej jeyDaj luSovmo' Suypu' nom malja' luHuq. qaStaHvIS loS jaj gharben cha' bavtaHDI' motlhHa' ghu'. 'ach motlhHa' 'eSSIm. maw' Hoch be' net jatlh 'ach qatlh ghoqwI' ghaH pay' 'e' pum? QeHchoHtaHvIS 'eSSIm choHpu' QIchDaj. Sep QIch 'oH 'e' Sov Mahoun, 'a Sov Hal ngu'laHbe'. yajlaHchu' 'ej loQ maS. bItmoH.

Qulpa'Daq QeDpIn Such Mahoun. Sey rollIw. jatlh “Doch boch yIpojchoH bIjatlh 'e' Daqaw'a'?”

jatlh Mahoun, “HIja'. jItlhIj. jIberghpu'.”

“yIlIj, HoD. vIruchta',” jatlh rollIw. *Dugh* DI vIpojta' 'ej Dajqu'. Dochvam Dalegh'a'?” Duj rurbogh Doch legh Mahoun. HanDogh Hutlh. mach 'oH. ghop tIq law' Doch tIq rap. jatlh rollIw, "romuluSngan chotwI' nejwI' 'oH." SoltarIS Hovtay'Daq lulInglu'. Hatqu'. tlhInganpu'vaD Hat je. jagh porgh DI Daghajchugh--DIr, jIb, pob, nItlh pach chIpta'bogh joq ­ghaHvaD nejwI' DaghunlaH. SumDI' nuvvetlh HoH. not luj. narghlaHbe'.[62]

jatlh Mahoun, “tlhIngan Duj QIHta''a'?”

jatlh QeDpIn, “ghobe'. vangbe'pu' nejwI'vetlh. QIH'eghlaw'pu' tlhIngan Duj. 'a Hoch DI wIpojbe'ta'. lengpu'mo' Duj wIHotlhDI' 'op wIqonbe'bogh tu'lu'.”

QuvDaq cheghqa' 'e' wuq Mahoun. choltaHvIS, latlh Dujmey nejqu' 'ej nuHmey ghajbe'taH *Dugh* 'e' lu'olmeH luHotlhqa'. yIntaH loS tlhInganpu' 'ej nuH Hutlhchu'taH.

wa'vatlh Soch: DI bochqu'

lengtaHmo' tlhInganpu' DaH Sumqu'chuqbe' Dujchaj DIchaj je 'ach tu'laHtaH varSajIy chuq'a' noch. DI Quv choltaHvIS logh Hotlhqu'. lom, HanDogh 'ay tIn je Sam. HanDogh pojmeH QeDpIn luboS. qen Hur meQmoHbe'pu' nuHmey. HanDogh qoDDaj ratlh tetpu'bogh mep. ngaSwI'Hey 'oH. ratlhbe' SIpmey 'ach HutHu' HotlhDI' HIq, nIn, latlh jorlaHbogh taS je tu'pu'. ngIvchoHDI' latlh Dochmey Sam. cha' romuluSngan nejwI'mey, loSmaH wa' cha'pujqutmey, baS 'Itlh, baS SIrghmey, cha' Hat leQmey, 'och 'ay'mey, Sarbogh Dochmey mach je boS. lom luqon 'ach luboSbe'. Qobbe'choHmeH tlhInganpu' boStaHvIS Duj lujIH 'ej rut luHotlh. not choH Duj Dotlh.

loghDaq DI lunge'be'mo' SuS yu'eghmey Ha'DIbaH joq ratlh Hoch. moQ bID chenmoH HochHom DI.[81] Hoch 'ay' boSDI' Quv Do je qon. Hemey SImpu'DI' De'wI' lut naQ luloylaH. HanDoghDaq Dochmey Hat So'pu' vay'. HanDoghDaq Hatmey tuj net pIH 'ach Hatvetlh cherghlaH HanDogh luch motlh. Hatvetlh cherghlaHbe' HIq. HIq QanmeH bIrmoHwI' pat 'oghlaw'pu' vay' 'ach lujpu'. SIp moj HIq. SIp meQmoH vay' 'ej jorpu' HanDogh. jorpu'DI' tep ghomHa'pu'.

QI' Segh bIH cha'pujqutmey'e'. lo'laHbej. lo'laH je nejwI' 'ach nuH'a' bIHmo' loQ Mahoun ghIj. ngev neHbe'. chaq Qaw'meH pop HevlaH. tlhInganpu' rI' 'e' luqel 'ach tIch luneHbe'. vay' luneHchugh tlhInganpu' rI'laH. not rI'. tlhIngan may'Duj Hop tu' noch. SIbI' pIvghor luchu' 'ej mej.

vumqu'be' Mahoun 'ach Doy'. SumtaHvIS tlhInganpu' bItmoH ghu'. QongtaHvIS naj 'ej najtaHvIS qaS wanI'mey DunHa'. wa'logh vemlaw'DI' Heghpu'bogh yaS wa'DIch lom retlhDaq Qotqa'taH. choH lom. tlhIngan moj. ghIq luDech Heghpu'bogh tlhInganpu'. loDpu' chaH. Heghpu'be'mo' 'eSSIm belpu' 'e' qaw. ghIq vemqa'bej. tlhInganpu' lutu'lu'be'. najpu'mo' lommey leghba'pu'. 'a Qongqa' neHbe'. najtaHvIS teHqu'law' lommey. jey luSImpu'bogh lupabtaHchugh DaH 'anDorya lughoS 'ach Qatqu'pu'mo' tIr, gharben cha' lughoSqa'. meHDaq ba'taHvIS Mahoun, 'eSSIm qawtaH. chaq teH vajar Duj 'e' tobDI' ghoqwI' ghaHbe' 'e' Harqang. 'eSSIm Hotqa' neHqu' 'ach tlhoy Qob boqchaj 'e' Sov. malja' buStaH.