nuq bop bom: 'ay''a' wej

'ay' cha'maH wej

HoD pa'Daq QottaH vajar. vumtaHvIS latlhpu', leS neHbe' 'ach DughtaHmeH beq, leSnIS Hoch. DaH meH SeHtaHmo' yaS wa'DIch, QongnIS HoD. 'a QonglaHbe'. Seng pIH. QamchoH 'ej meH 'el.

meHDaq ba'taH beq naQ: yaS wa'DIch, Hung yaS, DeghwI' je. chaq Duj Qotlhlu'pu'mo' Dal Qu' 'e' beptaH latlh mut beq, 'ach tlhInganvaD 'utbe'. jatlhnISbe'chugh tamtaH. HaStaDaq vIHbe'law' Hovmey. yev HoD 'ej qaStaHvIS lup tlhaq bej. DeghwI'vaD jatlh “Hota'ro', qatlh bISaHtaH? vagh rep ret DuSonbe''a' 'ungya?”

jangmeH DeghwI' jatlh “muSonta', HoD. ghaHvaD Degh vIQayta'. jIratlh neH. Qu'HommeywIj vIta'ta'.”

“jI'eq jIH” jatlh Hung yaS. “lojmItmey vInuDta' 'ej Sojpa' vISay'moHta'.” QaptaHmeH Duj Qu'Hommey Sar ta'nIS Hoch beq. DaH ta'chu'meH 'ovlaw' chaH. Hemba' HoD. nItebHa' ghom pup lumojlI'. Do'Ha' Duj pup luHutlhtaH 'ach rut yIHmey ghom Hoch.

yaS wa'DIch SeHlawDaq Duj Dotlh bej HoD. Duj pu'jInDaq DoqchoH QapHa'taHbogh pat, QIH je. DoqtaH pu'jIn HochHom. jorpu'DI' nuH HoS 'och, chev'egh nIH HanDogh. mejDI' HanDogh Hegh jonwI' 'ej mej je nuH laH, bID noch laH, pIvlob laH je. pIvlob chavlaHbe' HanDogh Hutlhbogh Duj net Sov. HoS lIngtaHmo' pIvghor, QaptaH yIntagh, De'wI'mey. Surchemmey, wovmoHwI'mey je. QaptaH Hongghor woj choHwI' 'ach lujpu'mo' peQchem lIngwI' ngaDmoHwI' Hong Do lulo'laHbe'. chungmeH chuyDaH neH lulo' 'ej Qapchu'be' bIH. QIt tlhetlh.

tlhe' HoD 'ej meH 'o' ghoS. HIchDal lojmIt rur meH 'o' lojmIt. muD pollaH. poSmoHmeH leQ 'uy HoD. SIbI' poSchoH 'ej veghpu'DI' HoD SoQ'eghqa'. chob'a'Daq rurbogh loS HIchDal lojmItmey lutu'lu'. DujvaD vagh mIchmey cher. meH 'oH mIch wa'DIch'e'. chob'a' luDechbogh Qebmey rur mIch cha', mIch wej, mIch loS je. Duj 'o'Daq QuQ pa' 'oH mIch vagh'e'. chob'a' DopmeyDaq latlh lojmItmey lutu'lu' 'ach perbe' mI'mey.

'ay' cha'maH loS

mIch cha'Daq QamtaH HoD. tam Duj. roD naDev nuH HoS 'och QoylaH. motlh reH baHbeHmo' reH vegh HoS. Dachmo' wabvetlh qarHa'law' Duj. Sojpa' lojmIt poSmoH. Say'moHbejta' Hung yaS. Sojpa' retlhDaq Soj polmeH pa' nuD HoD. Heghpu'mo' 'ej choqlu'pu'mo' Hoch Soj, 'eybe'. QaDqu' HochHom. Soj mojmeH bIQ chelnISlu'. 'up, 'ach yap. 'utbe' bel. latlh Soj polmeH pa' naw'meH HoD, ravDaq lojmItHom ngaQHa'moH 'ej ghIr. ngaSwI' qengtaHvIS meHDaq chegh.

“maloprup,” jatlh chIjwI', ngaSwI' leghpu'pa'.

“nuq wIlop?” ghel HoD.

“tugh, qaStaHvIS wa' Hogh loghDaq malenglI', nuH, pIvghor, Hongghor je DIHutlhtaHvIS, 'ej maSuvruptaH.”

“'ej wej maHoHchuqchoHpu',” jatlh yaS wa'DIch.

“pelop! wa'leS chaq maHegh!” maq Hung yaS.

Hagh HoD. Heghbe'pu'chugh ghIrel, beq DubmoHbejpu' ghu'. 'ej reH loprup tlhIngan. HIvje'mey SuqmeH HoDpa' ghoS. HIvje' qengmeH ghaH poS ghop lo' 'e' qaw.' ghaH nIH[2] lo'chugh 'oy'qu'taH. HIvje'mey qengtaHvIS meHDaq cheghqa'DI' toghlI' DeghwI'. “Hut ... chorgh ... Soch ... jav ... vagh ...” toghtaHvIS, HIvje'meyDaq wornagh qang HoD 'ej HochvaD nob.[1] “loS ... wej ... cha' ... wa' ... pagh! qaStaHvIS wa' Hogh ghoStaH pIpyuS rIgh!” meHDaq paw' QuchDu', HIvje'mey je. tugh bom 'ej Hagh loS tlhInganpu' Quch. DIvI' DujDaq meHDaq HIq tlhutlh net tuch net jatlh. “qatlh?” 'e' SIv vajar. chaq HIq chaghDI' vay' cherghlaHbe' DIvI' ravmey tun.

pay' QomchoHmo' meH, HIq chaghchoH Hoch.

'ay' cha'maH vagh

SIbI' DeghwI' bejchoH HoD, 'ach Hurgh SeHlawDaj. ghaH je merpu' wanI'. ghutar ghIchDaq HIq purlaw'pu'mo' tuSchoH. DaH 'orlaw'taH yaS wa'DIch. “Dotlh!” jatlh HoD.

jang yaS wa'DIch, “ngaDHa'choHpu' tlham ngeb lurgh. nISlaw' vay'[3]. vInuDlI'. loQ motlhbe'law' chuyDaH, tlham, pIvghor je.”

jatlhruplaw' DeghwI' 'a SeH'egh. SeH'eghbe' Hung yaS, “QI'yaH! Sengchugh pIvghor jorlaH!” SuvrupchoH 'ach Do' beq Qeqbe' 'e tu' HoD.

jatlhqa' yaS wa'DIch, “baHHa'choHpu' wa' vIj. vIngaDqa'moHlI'.” vIjvetlh matlhHa' HIvruplaw' Hung yaS[4]. vangruplaw' je DeghwI'. poS nujDaj 'a' jatlhbe'taH. jatlh yaS wa'DIch “ngaDmoHlaHbe' chuyDaH SeHwI'.[5] SomDaq vIjvetlh'e' vIbejlaHchugh tlhe'choH 'ej tlhe'qa'. tlhe'taHvIS tajvaj mach chenmoH, 'ach nom qaS.” wanI' DelmeH yaS wa'DIch, ghop joqchoH. bItbogh qama' ghop rur.

“DangaDqa'moHmeH chang'engvetlhvaD retlhbogh chuyDaH yIDonmoH. HoS naQ.” ra' HoD. leSchoH DeghwI'.

“Qapbe'law',” jatlh yaS wa'DIch. “ghurtaH tlhe'meH tajvajDaj. bID gho mojchugh tajvaj, Qaw''egh vIj. vIchu'Ha'nIS.”

“Qo'.” pay' jatlhchoH DeghwI'. “vIj Heghbat 'oH. QapHa'be' vIj'e'. 'oHDaq QapHa' HoS'e'.” jotqu' ghoghDaj. tlhIngan meHvaD tlhoy tam 'ach tlhIbHa'law'. QI' paQDI'norgh chu' Sov QupwI'. jatlhtaHvIS DeghwI' 'IjchoH yaS wa'DIch, HoD je. “'elSeHcha nIH pIrmuS chang'eng cha'DIch yIchu'. cha'DIch neH. HoS naQ. chang'eng wejDIchvaD wa'DIch yIchu' je. quqnIS!”

chay' nom mIwvetlh SImlaHpu' DeghwI'? Sovbe' HoD, 'ach nger yaj. taHchugh,[6] HoS 'och Qaw' je''eghghach.[7] qaSbe'meH, HoS lurgh SeHnIS latlh chuyDaH. Dup SImnIS De'wI' 'ach DaH *Dugh* chuyDaH SeHbe'taH De'wI'. DeghwI' voq. “yIruch!” ra'.

vangchoHDI' yaS wa'DIch pe'vIl ronchoH meH. pu'jInDaq wewchoH pIvghor. “Qo'!” jatlh DeghwI'. “yIlISchoHQo'. yIpoSmoHchu' neH.” jottaH ghogh 'ej tamtaH 'ach pavqu'. SeHlawDaj HurghDaq 'or 'e' nID DeghwI' nItlhDu'.” Qomqa' meH.

“Sogh!” ra' HoD “Degh Qay! SIbI'!”

'ay' cha'maH jav

wovchoHDI' DeghwI' SeHlaw moDchoH nItlhDu'Daj. Qom 'e' mev Duj. DeghwI' nIH ghopDaq wa' 'eDSeHcha chang'eng SentaHvIS, latlh qew 'ej latlh qan. poH ghopDaq lolSeHcha chang'engmey SIq 'ej qay 'ej qan. nItlhDu'Daj bejbe'taH. HaStaDaq Duj Dotlh bejtaH. pa' pIvghor tlham je patlh cha' mI'mey Doq. nuptaH mI'. vIHbe'choHpu'pa' DeghwI' nItlhDu', SuDchoHpu' Dotlh. ba'taH neH DeghwI'.

"majQa'," jatlh HoD. Hem vajar 'ach tlhobvIpbe'. "chay' Data'?"

vIj baHmeH Dup Qatlh QIjchoH DeghwI'. qagh HoD. jatlh "'ach chay' DaSIm?"

"De'wI' vIlo'. napHa'bej SImmeH Qu'."

"'ach qabej. De'wI' Daghunbe'. yapbe' poH. SIbI' Davang."

"wej ben De'wI' vIlo'. SengvamvaD chuyDaH vIpoj ghIq vangmeH Dup vIqawchoH."

"Daqaw'a'?" qagh yaS wa'DIch. Ha'qujDaj nge'pu'mo' Hota'ro' laH, yaj neHqu'. jatlh "Hoch vIjvaD yablIjDaq Dup Dapol'a'?"

jang DeghwI' tam. "ghobe'," jatlh. "nItlhDu'wIjDaq vIpol. mI'choH."

"chay'?!" jatlh yaS wa'DIch.

"jIqeq. jIqeqqa', jIqeqtaH. moQbara' rur." jatlh DeghwI' tamqu'choHpu' ghoghDaj.

"'a qatlh? qubqu'chu' ghu'. bImaw''a'?" jatlh yaS wa'DIch. qaDchoH.

Qub HoD. ja''egh <'ungya HIvchugh DeghwI' vImunbe'> bojchoHmo'.

'a HIvbe' DeghwI'. jang. jatlh "Du'majDaq qub 'a ghor DujvaD qubbe'bej. Hoch jaj cha'logh qaSbe'chugh jIDo', 'ach pIvghor ghajbe'ba'mo' wIjwI' ghor Duj, Qobqu'be'. wab Huj lIng neH. munuQtaH. vIj Heghbat wIpong. bo'Degh maw' rur. ghor DujvaD tI'meH jIyongHa'nIS ghIq vIj'e' vIpoSnISmoH QaptaHvIS vIj, 'ej vIj qoDDaq leQHom vIruQnIS. baSmo' taj vIlo'laHbe'." QIjtaHvIS ghopDaj yoymoHmeH yebDaj tlhe'qu'. "vImuS. pIj mumeQmoH vIj."

leSchoH yaS wa'DIch. jatlh "DujvamvaD nIbqu' vIj naw'meH mIw! QIp, qar'a'? Do' not QaptaHvIS DInaw'nIS."

"mumerbe'," jatlh DeghwI' "rurchuq je SeHlaw. ghopDu'wIj vImeQmoH 'e' vIjunmeH chuyDaH nger vIHaD 'ej Dup vISIm. DeghwI' vImojmeH jIHaDchoHDI', laHwIj vItobmeH, DuSaQ Duj ngebDaq Dup vIqeq. 'ejDo'vaD qubqu' ngugh 'e' vISovbe'. 'ej motlh Qap mIwlIj'e'. qubchu'qu'mo' ghu'. 'ach Qobchu'. pIvghor Qaw'laH." tlhoy jatlhpu'mo' tuHchoH DeghwI' 'ej tamchoH.

'ay' cha'maH Soch

"QapHa'mo' nuH HoS 'och, peQchem lIngwI' ngaDmoHwI' je ghaytan qaS," jatlh HoD. "tInmo' nuH HoS 'och, Duj naQvaD HoS ngaDmoH. mayepnIS. batlh bIvangta' Hota'ro' lagh. qaSqa'chugh, ghu' DaghovDI' yIvang. yImImQo'."

jang DeghwI'. "lu' HoD," jatlh 'ej yaS wa'DIchvaD Degh Qayqa'. wa'SanID 'uj'a' Saw'bogh ngeng'e' rur be'vetlh. ghorDaq motlh jot, 'a bIngDaq chaq ghargh'a'mey tu'lu'. *Dugh* muvDI' DeghwI', latlh Dujvo' Qaylu'pu'. ngugh jatlhpu' lajHa'pu'bogh HoD "jeQbe'. qaStaHvIS may' lImchugh DabachnIS. 'a SunvaD QaQ Hegh 'ej Degh DaruQ 'e' DatIv SoH vaj ghaH yItlhap." DeghvaD pov laHDaj 'ach rut gheD Dabej. reH DochHa', vuDmeyDajmo' tuHlaw'. QIb leghvIplaw'.

pIj Suvqu'laHbe'mo' vay' jeQbe', beq muvpu'DI' Hota'ro', ghuvvaD tonSaw' ghojmoHmeH HoD, HoD pa' qemta'. vangvIpbe'meH be', "maqeq" jatlhbe'pu' HoD. "yIHub'egh" jatlhpu' neH 'ej ghaHDaq Duvpu'. SIbI' vangta' DeghwI'. moQbara' pIn'a' ghaHlaw'. tlhoS vIHbe'law'pu' be' Qup 'ach ravDaq DubDajDaq QotchoHpu' HoD. jottaHvIS QamtaH DeghwI', pu'HIch QeqtaHvIS. pu'HIch bejtaH HoD. chay' pu'HIch ghaj'a'? taghpa' qeq pu'HIch ghajbe'pu'. vaHDajDaq SIchpu' vajar 'ach chImpu'. HoD pu'HIch QeqtaH DeghwI' jay'. HaghchoHpu' vajar.

Saghqu'pu' DeghwI'. QeHchoHlaw' ghaH. Hagh 'e' mev vajar. jatlhpu' "majQa'. yIpe''egh."

SaghtaH be'. jatlhpu' "jIQujbe'. qabachqang. Duj'e' vI'ormeH neH beqvam vImuv."

ngugh pay' poSchoHpu' lojmIt 'ej 'elpu' 'ungya. "pu'HIch?" jatlhpu' "ghaHvaD tonSaw' DaghojmoH bIjatlhpu'. Duj SunvaD tonSaw' lI' law' pu'HIch lI' puS. tonSaw'vaD latlh SuvwI' bopoQchugh Samuv."

"vIbachqang," jatlhpu' DeghwI'. vIHbe'qu'pu' pu'HIch.

'ay' cha'maH chorgh

yevpu' yaS wa'DIch. “qaStaH nuq?” jatlhpu'

ravvo' jatlhpu' HoD. “maqeq jIjatlhbe'pu'mo' vIHIvbej 'e' Har.”

“'ej Dujeyta'!” Haghpu' yaS wa'DIch. “majQa' Hota'ro'!” jatlhpu'.

“tlhaQbe'.” jatlhpu' HoD.

“ghobe'. pov. 'orlaH 'ej SuvlaH je DeghwI'ma' chu'.”

“jIqIDbe'. vIbachqangbej,” jatlhpu' Hota'ro'.

“Hoch jaj vIbachqang jIH, 'ach DaHjaj vIneHbe'. HoD QaQ ghaHtaHmo' vIbachbe'. DeghwI' tlhIbHa' SoHtaHmo' DaHjaj qabachbe' je.” jatlhpu' 'ungya. “Ha' jIghung. megh boSop boneH'a'?”

'ej pay' Hoch quv choqbogh mIw'e' 'oghta' 'ungya. pu'HIch Qeqbe'choH Hota'ro'. Sojpa' lughoSpu'. ba'choHtaHvIS Hota'ro', HoDvaD pu'HIch nobHa'pu'.

“yIpol. Dabajta',” jatlhpu' vajar.

“SoHvaD le''a'?” tlhobpu' DeghwI'.

“ghobe'. wagh, 'ach le'be'.”

“vaj yIpol” jatlhpu' DeghwI' 'ej nobHa'. megh SopchoHpu'.

QIb leghvIpwI' DataH ghaH 'ach Qobqu'ba' be'vetlh QIb 'e' Sov yaSpu'. “DunISchugh vay' vInISqang,” Hota'ro'vaD jatlhpu' HoD, nISwI' pu'HIch HottaHvIS.

“DunISchugh vay' qaHubchu', HoD,” jangpu' DeghwI'. Duj muvta'DI' matlh 'e' 'Ipba' DeghwI' 'ach DaH 'Ip tlho'laH HoD. wej wen qaSpu'. reH matlh ghaH 'ach beq muvchu'be'pu'. chaq 'eDjen ghaH. chaq bIt neH.

vajar ngaSwI'Daq ratlh wornagh 'e' tu'. Hota'ro'vaD nobpu'DI' Quchlaw'. DeghwI' yu'law'taH Hung yaS. ghaytan vangmeH 'eb jonta'mo' DeghwI' 'ej naDta'mo' HoD, ghal Hung yaS. “jIDo' neH” jatlh DeghwI'. “jIDo'be'chugh jor pIvghor. rut luj Dupvetlh. bID gho chenmoHchugh tajvaj, taH 'ej SeHlaH pagh. pIvghor Qaw'.” Qatlh Hung yaS Qu': reH vangrup 'ach pIj vangbe'nIS. jagh SuvlaHbogh neHba' ghutar.

ghumchoH yaS wa'DIch SeHlaw. HaStaDaq cha' 'ej jatlh “ghum mIch loS lo' law' lojmIt Surchem.” qaStaHvIS lupHom chach HoS lo'pu' wa' Surchem. ghaytan ram. ghaytan HoS choHwI' choHnISlu' neH.

jatlh HoD. “ghutar ne', Ha'. wI'olnIS. wornaghlIj yItlhutlhchu' 'ej HItlhej.”

'ay' cha'maH Hut

"lu' HoD." jatlh ghutar. HIvje' pep 'ej wejlogh ghupqu'pu'DI' HIvje' chIm roQ. QamchoH cha' loDpu' 'ej meHvo' mej. lojmIt leQ 'uytaHvIS HoD, mon yaS wa'DIch 'e' tu'. qeqmeH Qu' ghov.

yIttaHvIS jatlh HoD, "ghumbogh lo' law' lojmIt DaSov'a'?

jatlh ghutar "vISov. naw'meH puchpa' tlhoy'mey laghnISmo' ghIrel, lojmItHomvetlh vImuS jatlh."

verghDaq 'oHtaHvIS Duj'e', roD bIQ pat tebnISlu'. HIchDal veghnISlu'chugh, qay'laH. Sarmo' nov cham, tengchaH law' rarlaHbe' tlhIngan HIchDal. 'ej HIchDal veghDI' vay' QuQ pa'Daq tu'lu'. pIvghor juS bIQ 'och luHbogh nov luneHbe' jonwI' HoD je. vaj Duj nIHDaq lo' law' lojmIt tu'lu'. poStaHvIS lojmItHom, narghbe'meH muD, Surchem le' jomlu'pu'. QIt vIHchugh, Hurvo' Surchem lu'ellaH 'och, bIQ je. 'och chenmoHlu'meH baS le' lo'lu'pu'mo', 'och teqlaH vay'. SIbI' bIQ watlhmoHwI' ghoS bIQ. Surchemmo' narghbe' muD. Duj 'elnISbe' leHwI'. chob'a' botnISbe' 'och. lI'.[12]

wa'maH ben Dujvam SeghDaq Surchem jomlu'be'pu'. nIteb muD pollaH lo' law' lojmIt. ngugh verghDaq Surchem ru' chu' jonwI'. 'a Som naQbe'moHmo' lo' law' lojmIt, DaH HoSmoHmeH Surchem lulo'taH. le'mo' Surchem, pIj HoS choHwI' QopmoH 'ach ghutarvaD pup Qu'qoq.

QIj HoD. jatlh "ghu' wI'olmeH 'ej wItI'meH mIch loS wI'elnIS 'ach lujbeHmo' Surchem, napHa' Qu'. chaq Sabpu' lojmIt 'ej lujDI' Surchem muD polbe'. vaj maQIpbe'nIS. logh SutDaq[4] bIvumta''a'?"[7]

"logh Sut vItuQbejta', HoD!" jatlh ghutar. "jIpo'."

"DatuQta' 'e' vIghelbe'." DujDaq vumchoHpa' beq, logh Sut mIw qeqnIS. "DatuQtaHvIS bIvumbej'a'?"

"wej. 'a vIta'rupqu'."

'ay' wejmaH

jangbe' HoD. mIch cha'Daq 'aH polmeH pa' lu'el 'ej logh Sut, tlhegh, Hoqra', HoS choHwI' chu' je yIr ghutar 'e' raD HoD.

ghu' QIj HoD. jatlh “Qob mIch loS 'e' wIDa. vaj HIchDal'a' moj Duj'e'. mIch wej Da'elpu'DI' SoQchoHchu' lojmIt cha' 'e' yIloS, ghIq lojmIt wej yIpoSmoH 'ej mIch loS yI'el. lujlI'bogh HoS choHwI' Dangu'meH 'ut Hoqra'. logh Sut tuQtaHvIS vay', poghmo' Hoqra' ruQlaHbe' vaj DaH SoHvaD Hoqra' vIlISta'. Surchem HoS cha'beH.[8] yIlISQo'. puchpa' Dalaghpu'DI' Surchem yIHotlh neH. choHwI' Qop Dangu'pu'DI' qa'meH yItam[9]. HoS choHwI' yIchaghQo'. bIyaj'a'?”

“jIyaj, HoD.”

lojmIt cha' poSmoH HoD 'ej luvegh. SoQ'eghqa'moHDI' ra'choH HoD 'ej vanglI' ghutar. luch roQ Hung yaS. logh Sut qoghDaq tlhegh 'er'In bagh. baghchu'ta' 'e' 'ol HoD. “mIch Da'elpu'DI' choQDaq megh'an yIbagh. Duj HurDaq bIvumchugh reH yIbagh'egh. Duj qoDDaq QaQ je. mIv DatuQtaHvIS bIleghlaHchu'be'. lojmIt DaSammeH lI' tlhegh. DaH Sut yItuQmoH.”[5]

lob ghutar. vaHDaj teq 'ej logh Sut qoghDaq tuQmoH je. SoQchu'meH 'ej mIv tuQmoHmeH boQ HoD. yInSIp QumwI' je tob, ghIq ghutar poghDaq Hoqra' lan.

“DaleghlaH'a'?”

QumwI'vo', jatlh “HIja' HoD”

“maj. lojmIt tlhopDaq yIQam. mIchvam vImejpu'DI' yIvegh 'ej ghu' yInuD. yIHoj 'ej HIQumtaHqu'. Hoch yIDel. vulqangan yIDa.”

“lu' HoD!”

chobDaq DoH HoD. mIch wej mejtaHvIS ghutar van. “Qapla'” jatlh. SoQchoHDI' lojmIt cha' ghutar HoD je chev. mIch cha'Daq vajar tu'lu' 'ej mIch wejDaq ghutar tu'lu'. Qobchugh mIch loS, muD wegh mIwvam.

“lojmIt wej vIpoSmoH,” jatlh ghutar. “vIveghlI' ... SoQqa'lI' ...SoQchu' ... puchpa' vI­Qu'vatlh! HurghchoHchu' jay'!”

'ay' wejmaH wa'

QumwI'vo' jachtaHvIS Hung yaS, loStaH HoD. ghaytan Sut Soy'mo' bong mIv HurghmoHpu' ghutar. tamchoHDI'. “yIja'!” jatlh HoD.

jang ghutar. jatlh “HurghchoHpu' mIch naQ. qIjchu'. ghopwIj'e' vIleghlaHbe' jay'. Hoqra'vam QIv 'oghpu' 'Iv jay'? vIwovmoHlaHbe'.”

'oghba' logh Sut tuQbe'qu'pu'bogh tej 'e' Sovqu' vajar.[1] “Do'Ha' poghmeyvetlh DatuQtaHvIS DalISlaHbe' qa'ja'pu',” jatlh.

meHvaD Qum HoD. jatlh “ghutar Datoj'a'? HurghchoHpu' mIch.”

jang Hota'ro' ghogh. loQ Haghlaw'. “'ul wISeHlaHbe'. mIch loSDaq 'elpu' HoSDo' Sovlu'be'bogh. 'ul SIghlaw'!” meHvo' Hagh je 'ungya 'e' QoylaH HoD. lojmIt wa' poSmoH 'ej meH 'el. yaS wa'DIch yaH retlhDaq QamtaH Hota'ro'. yaS wa'DIchvaD jatlh, “DaH tlham yIchu'Ha'!”

“lujlI' tlham!” jatlh yaS wa'DIch, mIch loSvaD chIch tlham chu'Ha'taHvIS. vajar QumwI'vo' jachqa'DI' ghutar Haghqu' Hota'ro'.

DoghlaHmo' Hota'ro' 'ej jIjtaHmo' 'ungya Hota'ro' je bel HoD. vulqangan Da neHbe' 'ej Sol neHbe'. vajar QumwI'vo' jachtaH ghutar 'ej mu'qaD bach. 'a Haghbe' HoD. Sagh. tamchoHDI' ghutar latlhpu'vaD toch cha' HoD, ghIq QumwI' chu' 'ej jatlhchoH, “ghutar. choQoylaHtaH'a'?”

SIbI' jang ne', jatlh “HIja' HoD. 'a loj tlham 'ej pagh vIleghlaH.”

“ghu'vetlh wItI'lI'. rav DaSamlaHchugh 'oHDaq yIba'.” jatlh HoD.

“lu' HoD!” QumwI' SoQmoHpu'DI' HoD Haghqa' Hota'ro'. SeHlaw chu' HoD 'ej mIch loSvaD wovmoHwI'mey, tlham je chu'qa'. “wovqa' mIch ... Qapqa' tlham ... DaH lo' law' lojmIt vInaw'meH puchpa' tlhoy' vIlaghchoH.” jatlh ghutar.

ghutar 'IjtaHvIS HoD 'ungyavaD tlhuplaw' Hota'ro'. mu'mey QoylaHbe' 'ach jangDI' 'ungya' QoylaH. “ghobe'. Quchlaw'."

lo' law' lojmIt nablu'DI', Dach puchpa' 'ej ngeDqu' naw'meH Qu'. DaH puchpa' tlhoy'meymo' QIp Qu'. not leHwI'pu' SaH oghwI'pu'. laghtaHvIS tlhuHqu'mo' ghutar poStaH Se'. pay' voQchoHlaw'.

'ay' wejmaH cha'

SaHchoH HoD. jatlh “ghutar! qaS nuq?”

“vIlaghta', HoD,” jatlh ghutar 'ach jotbe'qu' ghoghDaj 'ej voQlaw'taH.

jatlh HoD. “Surchem yIHotlh.” ra'.

“wej vIlegh,” jatlh Hung yaS.

“qatlh? Dubot nuq? tlhoy' Dalaghta'mo' SoH tlhopDaq 'oHtaH.”

“puchpa' tlhoy' 'emDaq yaghmey vIleghDI' ... jI'empu'. [15] mIvwIjDaq bottaHmo' quy'Ip, Qatlh jIleghmeH Qu'.”[16]

Haghqu'mo' Hota'ro' SIHchoH qIvDu'Daj 'ej ravDaq ba'choH, Haghchu'taHvIS. “Hota'ro' lagh,” jatlh HoD. “yap.” SIbI' Hagh 'e' mev. ghutarvaD jatlh HoD “yIrechqu' 'ej nachlIj yIvIHmoH.”[17]

“'arghHa'choHlI',” jatlh ghutar. “DaH naw'meH Surchem vIlegh. vIHotlhchoH ... QaQ choHwI'vam ... QaQ je cha'DIch ... Qap wejDIch 'a pujlaw' .. QaQ loSDIch. wejDIch vIchoHrup.” yev ghutar, ghIq jatlhqa' “lojmItHom Surchem je jojDaq vI'law'pu' Hap SuD. botlaw'.” Haghbe'meH Hota'ro' voQ'eghlaw'.

“Dubot'a'?”

“ghobe'. lojmIt bot.”

“yIbuSHa', Hung yaS. ghaytan puchvo' nIj.” 11

“lu' HoD! DaH choHwI' vIteq DaneH'a'? ngaDbe'qa' tlham.”

“Duchaw'chugh ghu', yIruch,” jatlh HoD. targh Qup qawmoH ghutar. rut qu' 'ej buQtaH, rut HoD belmoHmeH ghop roSchoH. wej nIteb vangrup. valqu'be', 'a matlh 'ej tIn 'ej ghojqang. wa' jaj Hung yaS QaQ moj.

'a qatlh ngaDHa'qa' tlham? yaSpu'Daj bej HoD. ravDaq ba'taH DeghwI'. Qongruplaw'. jav rep ret ghaHvaD rInpu'mo' yaH poH, pIchbe' HoD. tlham chu'Ha'be'ba'pu'. yaS wa'DIchvaD jatlh HoD, “'ungya, Daghong 'e' yImev.”

“nuqjatlh?” jang yaS wa'DIch “jI'or 'e' vIbuS. qaSqa'laH 'e' DaHar'a'?”

“qaSqa'laH nuq?” jatlh HoD.

“vIj Heghbatqoq. tlhe'Ha'choH latlh 'e' vIHar. wej vISovbej. qaSlI'chugh DaH machqu' tajvaj.[18] chaq qaSbe'lI'. retlh chuyDaH vIDonmoHlI'. HoS naQ. 'arghchugh, Degh wIghma'vaD vIQay. ghu' vIjIHtaH.”

vemchoHchu' DeghwI' 'ej yaHDaj tlhap. “HIleghmoH, qaH,” jatlh.

wovchoH DeghwI' SeHlaw. “QaybeH Degh. DaSeHrupDI' yItlhap” jatlh yaS wa'DIch. tay'choH beq tay'Ha'choHtaHvIS Duj.

ghutarvaD jatlh HoD, “yI'uchqu', ghutar ne', chaq bIQom. ghu'lIj yIDeltaH.”

'ay' wejmaH wej

"loQ jIQompu'," jatlh ghutar. "vISIQrupqa'."

vIj ghu'mo', qeqmeH Qu'vetlh buSHa'choH HoD, 'ach chuyDaH lubuSmo' yaSpu''e' voqbogh HoD, Duj naQ qImnIS HoD. wa' jagh buSchugh Hoch, HoHlaH latlh.

"'ungya," jatlh HoD. "munbe'meH tlham, Duj naQvaD tlham wIchu'Ha' 'e' vIqel."

"wItoblaH" jatlh yaS wa'DIch. "nISbe'bej,"

qaStaHvIS lup puS loS. ghutar ghuHmoH. ghIq jatlh "Hoch mIchvaD tlham vIchu'Ha'ta'". DachtaHvIS tlham, roD tISchoHchu' Hoch. 'ach tlham chu'Ha'DI' HoD, 'ughqu'choH vajar 'ej nIHDaq tlhe'law'pu' meH naQ. DeSDaj rIQDaq pumbe'meH, DeS pepmoH. chuyDaHmo' chungmo' Duj, jaS 'ugh Hoch 'ej chen tlhamHey Huj.

Duj 'ItlhDaq qub tlham Hutlhbogh ghu'. qaStaHvIS vagh rep not SIQpu' vajar. 'a cha'maH ben motlh. tlham, muD je HutlhtaHvIS DujDaq Suvpu' vajar, logh Sut tuQtaHvIS. SuvwI' yoH Hegh qaw vajar. 'uS chevpu' jagh betleH. muD polmeH Sut 'uS baghchu'ta'. Qap, 'ach reghchu' SuvwI' 'uS. "QapHa'law' SutwIj. jIbIrqu'," jatlhpu', HeghtaHvIS. 'a QaptaH logh Sut. 'Iw Hutlhmo' SuvwI' bIr. Heghpa' tlhoS Sut tebpu' 'Iw.[6]

Qum ghutar. "SaSchoH tlham. DaH jIH bIngDaq lo' law' lojmIt tu'lu'."

"'e' wISov," jatlh HoD. "DaH yItamchoH. pIpoQDI' qarI'."

meHDaq ghumchoH SeHlawmey. "HaStaDaq!" ra' HoD. mIch loSvaD ghumchoH Hoch: 'uybe'choHpu' muD! yapbe' yInSIp! bIrqu'choH Hat! SuQ SIp tu'lu'! lujpu' lo' law' lojmIt Surchem! nIj HoS 'och wa'DIch! taHHa' HoS 'och cha'DIch! bIQ pat wem! baHbeHbe' 'et nISwI' wa'! ngaDHa'choHpu' tep! lujpu' nIH begh!

'ay wejmaH loS

"vIruch. vIj yIbuStaH," jatlh HoD, ghu' pojtaHvIS. ghummey maw' qIlchoH. ghum nuH pat 'e' SaHbe'. ghaytan bong Surchem chu'Ha'pu' ghutar 'ej nIjmo' lo' law' lojmIt, mIch loSDaq narghlI' muD. logh Sut tuQtaHmo' ghutar, 'ej mIchvetlhDaq mob ghaH, qay'qu'be'. ngaQchu' lojmIt wej, lojmIt loS je 'e' 'ol. chaq lujta' begh 'a pavbe'. DopvetlhDaq ghoSbe'mo' Duj loSlaH. ja'chuqtaH yaS wa'DIch, DeghwI' je. chaHvaD jatlh "chuyDaH boSeHlaH'a'?"

jang yaS wa'DIch. jatlh "SeH ghaH. wej QapchoH mIwDaj. Duj nIHDaq vIj Duy' tu'lu'mo', Dachbogh nochmo' tajvaj wIngu'laHchu'be'. tajvajDaj ja'Ha' vIj. wejmaH wej vatlhvI' gho 'oH tajvaj'e' 'e' wInoH. DaH ghurbe'law'. chaq maQagh 'ej qay'be'. maSuDbe' wIneH" SeHlawDaq mI'taH DeghwI' nItlhDu' 'ach monHa' DeghwI'. begh DotlhHey ja' HoD. HaStaDaq ghu' naQ lubejlaH.

QumwI' woHqa' HoD. "ghutar, DotlhlIj yIja'."

Qum ghutar. "baQa'! Dej! Dejpu' Som naQ jay'!"

"yIjot'egh, ne'. qaStaH nuq'e'?"

"naDev poSchoHpu' Som'e'. loj baS meyrI' tIn."

"nuqDaq SoHtaH?"

"puchpa'Daq jIHtaH. chob'a'Daq mubagh tlheghwIj."

"maj. chob'a' yIghoS 'ej yIba'choH. jotchoHpu'DI' ghu'vam pIlel."

"lu' HoD!" jatlh ghutar. "naDev SaSmo' tlhamHey, chob'a' vISIchmeH tlheghwIj vItoSnIS. Soy'mo' logh Sut, chaq vItoStaHvIS qajanglaHbe'."

"yaj, ne'. Qapla'. DatoSpu'DI' HIrI'." jatlhtaHvIS HoD HaSta bejtaH. choHbe'law' ghu' 'ach lojmo' HochHom nIH noch, SovbejmeH yapbe' De'.

Duj 'or neH 'ach motlh ghaH nIH ghop lo'. poS ghop lo'choHchugh 'orHa'bej. <niteb DujlIj yIchIj> net jatlh 'a Dujvam chIj 'e' mevpu'DI' Dubpu' ghu'. vItbe' Hoch vIttlhegh. chaq qaStaHvIS wa' ram vagh SaD Hugh SIjlaH qetbogh loD. 'a DaH 'IjlaHmo' neH 'ej vanglaHbejbe'mo', mogh vajar. SuvmeH ro'Du' QeymoH. SIbI' 'oy'qu'choH ghaH nIH DeS. 'oy' SIQ 'e' tIv.

'ay' wejmaH vagh

pIvghor pat qelchoH HoD. pIvghorDaq rugh, Hap je luDuDlu'DI Sangchuq. HoS law'qu' lIng 'ej HoSvetlh SeH cha'pujqut. DujDaq HoSvetlh lulo' patmey law'. pIvlob chavmeH Duj, lo'ba' pIvchem. nISwI' lubaHlu'taHvIS nom HoS law' poQlu', vaj bIH pIvghor je rar wej HoS QaymeH 'ochmey. pIvghorvo' jeq. Hoch HanDogh vegh wa' 'ej Som nIHDaq vegh botlh 'och. qaStaHvIS may' tujqu'choH nuH HoS 'ochmey vaj Hoch 'och Deghchu' 'och Qeb: bIrmoHmeH taS qeng 'ochvetlh. potlhqu'mo' nuH pat nIjchoHchugh taS, latlh taS cheltaH nuH pat. meqvamvaD vaghvatlh vatlhvI' taS'e' poQbogh pat lupoltaH cha' ngaSwI'mey. pIvghor HoS lo' je chuyDaH 'ach 'och mach lo' bIH. Dechbe'taH bIrmoHmeH taS. tujqu'choHchu'be'meH 'ochmey mach, bIHvaD HoS vuSlu'. HoS law' poQDI' vIj, mIm pat. 'a rut mImpu'DI' poQbe'choH vIj 'ej je'Ha''eghchoH. vaj ngaDHa'choHchugh vIj HoS, boQlaH nuH HoS 'och, QaptaHchugh. motlh qaStaHvIS tup puS chuyDaH lo'lu' vaj ngaDHa'choHDI' vIj potlhbe'. 'ach qaStaHvIS wa' Hogh lo'pu'mo' *Dugh*, qaSchoH Seng'e' lupIHbe'pu'bogh nabwI'.

loS HoD. jIH bejtaH 'ungya. vIHbe'. SeHlawDaq Hota'ro' SenwI' tu'lu' 'ach vIHbe'. monHa' neH. jatlh HoD "'ungya?"

"nuq?"

"DaH nuq bota'lI'?"

"maloSlI'."

"nuq wIloSlI'."

"pung ghap HoS." mon yaS wa'DIch. "pung wIHevchugh mI'be'choHpu' vIj. 'oHmo' DoHchugh HoS'e' chaq cha'pujqut QIH." ghaqbe' Hota'ro'.

loSqa' HoD, yaS wa'DIch je.

"ghutar ne'?" Qum HoD "choQoylaHtaH'a'?" jangbe'.

"qay'a'?" jatlh 'ungya.

"ghobe'. tlhegh toSlI'." chob'a' HeHDaq ghutar yInroH tu'lu'.

"motlh jangbe'DI' tlhegh toSwI' be' ghaH," jatlh 'ungya, Hota'ro' bejtaHvIS.

Hagh vajar 'a buSHa' Hota'ro'. loSqa'. tlhamHeymo' 'oy' HoD Dub ba'taHvIS, 'ach tlhamHeymo' QamlaHbe' je. Hob Hota'ro'.

"Qapta'DI' mIwraj ghorgh wISov?" jatlh HoD.

"DaH motlhlaw' Hoch latlh vIj. qay'chugh Duy'wI' wISIghlaHbe'," jatlh yaS wa'DIch. HaStaDaq ghop pepmoH, "qaSpu'DI' ..." pay' jatlh 'e' mev 'ej SIbI' meq legh HoD. ghutar yInroH cha' HaSta 'ach mIch loS Daq tu'lu'be'. Duj HurDaq tu'lu'law'.

'ay' wejmaH jav

nom Qum HoD. "ne'! Dotlh!" jatlh. jangbe' ghutar 'ej HaSta lubejtaHvIS lojchoH yInroHDaj.

yaS wa'DIchvaD tlhe' HoD. "lojmItHomvetlh veghlaH'a' nuv'e'?" jatlh.

"mach. chaq veghlaH loD, 'ach veghlaHbe' logh Sut tuQtaHbogh loD."

wab mogh lIng HoD ghogh. HoD bejchoHmeH chuyDaH buSbe'choH DeghwI'. 'ach ghaHvaD jatlhbe'law' 'e' tu'DI' HaSta bejchoH.

QumwI' lo'qa' HoD. jatlh "Hung yaS ghutar!" tamtaH Se'.

"HoD," jatlh DeghwI'. "chImlaw' mIch loS. mevpu' Hung yaS yInroH. Heghlaw'pu'." jotqu' DeghwI'. tlhoy jot. DeghwI' nach qIpqu'meH jop HoD, 'ach jaS vangmo' tlham Soy' HoD. way' DeghwI' 'ej SeHlaw neH qIp. jach 'ej SeHlaw qIpqa', HoD qab moghqu' bej DeghwI' 'ej nISbe'.

"logh yIHotlh," ra' HoD. "wISammeH Duj yIDIngmoH."

yev Hota'ro', SeHlaw DungDaq HuStaHvIS nItlhDu'Daj. poS nujDaj 'ach jatlhbe'.

"yIruch," jatlh HoD. "ghaytan QapHa'mo' nochvetlh wItu'be' neH."

ghopDu' po'Dajmo' tlhe'choH Duj. QIt DerchoHmo', yev DeghwI' pay' 'e' yaj HoD. tlham HutlhtaHvIS Duj, tlhe'choHDI' bIQamtaH DaneHbe'. ravHeyDaq ba'choH HoD.

"QaHbe'law' tlham Dotlh. wIchu'qa'laH," jatlh yaS wa'DIch."

"yIruch," jatlh HoD. motlhqa' tlham.

ronchoH je Duj. baS meyrI' lulegh. lojmItHom 'oHlaw'. chuch SuD lulegh. puch bIQHey 'oH. bIQHey leghpu'DI' HoD, SIbI' jatlh "bIQ pat yIchu'Ha'." DI lulegh. DIngtaH Duj 'ach loD luleghbe'taH. loD tu'be'taH noch.

"reH Hegh yoHwI'pu''e'," jatlh yaS wa'DIch. ghutarvaD Heghtay lop wej tlhIngan. mevpu'DI' beymey jatlh pagh.

'ay' wejmaH Soch

ngugh yaS wa'DIch qIp je neH vajar. Heghpu' beq 'ej pagh chav Hegh. logh Sut tuQmoH 'e' ra'pa' HoD, pIv ghutar 'ej mIch loS, mIch vagh je naw'laH vay'. DaH Heghpu' ghutar 'ej mIch loS, mIch vagh je naw'laHbe' vay'.

vay' ghuHmoH yaS wa'DIch SeHlaw. "DaH Dotlh ja'beH vIj Duy' ... Qapchu'. motlh Hoch. QaQ. maloSnISbe'taH ..." jatlhqu' 'e' tlhojmo' 'ungya, mev.

jatlh DeghwI' "HoD, chay' chora'? ghochmajDaq machungqa' DaneH'a'?"

jangmeH HoD jatlh "He wIghochchu'meH chuyDaH yIlo', 'ach lughDI' He chung 'e' yImev. Duj Dotlh yIjIH."

"lu', HoD."

tagha' jatlh HoD "'ungya, pa'wIjDaq."

QamchoH cha' loD 'ej HoD pa' lughoS. SIbI' jatlh yaS wa'DIch "DeghwI' yIpIchQo'."

"vIpIchbe'. munuQtaH neH. 'a DaH beq Sun wIqel vIneHbe'. potlh Duj." ba'choH HoD.

QamtaH yaS wa'DIch. "roD Duj wIqelmeH meHDaq bIjatlhqang. 'ach HubneS yaS 'e' DaqelchoHDI' naDev maja'chuq."

"DaHjaj bImuj, 'ungya. ghaH vIlo'Ha'qangbe'. DeghDaq po'qu'. yIba'choH."

ba'choH 'ungya 'ej ja'chuqchoH yaSpu'. ngaQtaHchugh mIch loS, jonta'mey, chuyDaH SeHwI' joq leHlaHbe' vay'. mIch vaghDaq pIvghor Hongghor HIchDal je lutu'lu'. ghaytan QIHmo' poSchoHpu' lo' law' lojmItHom, vaj ghaytan Dechbogh Som QIHlu' je. Do'Ha' meHvo' Som QIH lupojlaHbe'. Som pujmoHlaw' QIH. chaq tI'laH Surchem ru'. chaq mIch wejDaq HIchDal ru' lujomlaH. SImlaHmeH De', mIw je Hutlhmo' mogh. mIch loS Qugh lupojlaHbe' 'ej lutI'laHbe' 'ej luyajlaHbe'.

"ghuy'." jatlh 'ungya. "ghIrel Dutlho'bejjaj yo' qIj. pIHutlhmo' ghu' wIpay."[19]

to'waQ luyIvtaHbe'meH nab lu'ogh.

"vaj SIbI' vIta'choH," jatlh HoD. "latlh vIra'be'."

"chora'nISbe'. jISapta'." jatlh yaS wa'DIch.

"Qo'!"

"yIQam," jatlh yaS wa'DIch, 'ej SIbI' Qambe'DI' HoD chol 'ej vajar DeS nIH 'uchchoH. "baS DaruQmeH DeSvam Dalo' 'e' DaHech'a'? vItlhe'qu' DaneH'a'."

rav bejchoH HoD. "bIlugh 'ungya. pe'vIl mu'qaDmey tIbach."

'ay' wejmaH chorgh

HoD pa' lumej 'ej meH lu'elqa'. "Dotlh!" jatlh HoD

jang Hota'ro' "pagh."

"DeghwI'," jatlh yaS wa'DIch, "Dotlh neHDI' HoD, Dotlh yIja'bej: reH Do, He, yIjatlh. choHpu'chugh vay' yIja'. *Dugh* DachIjchugh bIDugh 'e' yIDa."

jangmeH Qam DeghwI' 'ach tamqu'mo' mu'meyDaj Qoybe' HoD. Qoylaw'pu' 'ungya. Hota'ro' qab qIpqu' 'ungya ro'. junbe'chu' DeghwI'. Qam neH 'ej bIj laj. nechqu' nachDaj. pumbe'mo' be', HoD merlu'. jatlhqa'be' DeghwI'. ba'qa'taHvIS regh qabDaj 'e' leghlaH HoD. DeghwI' buSHa'choH HoD 'ej meH mejtaHvIS yaS wa'DIch tlhej. SoQqa'DI' meH lojmIt jatlh HoD. "nuq jatlh DeghwI'?"

"jIcheghDI' qajatlh," jang yaS wa'DIch.

logh Sut, tlhegh, Hoqra', pu'HIchmey, latlh luch je yIr 'ej mIch wej lujaHpu'. logh Sut tuQmoH yaS wa'DIch ghIq mIv tuQmoHmeH boQ HoD. mIv SoQmoHpa' "Qapla'!" jatlh, ghIq meH ghoS.

qIQrup Hota'ro' 'e' pIH 'ach meHDaq ba'choHDI' HoD jatlh Hota'ro', "HoD!" 'ej Dotlh naQ ja'. vaqchugh 'ongqu'. 'Illaw'.

"maj," jatlh HoD. "lojmIt cha' yIngaQmoH. mIch wejvaD muD yIlel. yaS wa'DIch yInroH yIjIH. HaStaDaq."

"lu' HoD," jatlh DeghwI' 'ej Hoch 'ol ta'taHvIS.

mIch wejDaq yaHDI' muD SIbI' Dotlh chu' ja' DeghwI'. 'ungyavaD Qum HoD, jatlh "yIvIHrup." cha'logh lojmIt wej ngep, ghIq HaStaDaq poSchoH lojmIt wej, vegh yaS wa'DIch yInroH 'ej SoQchoH lojmIt wej 'e' lubej. vangtaHvIS 'ungya, meHvaD Hoch Del. Qap tlham. choQDaq tlhegh 'er'In baghlaw'pu' ghutar 'ej retlhDaq tlheghDaj'e' bagh yaS wa'DIch. puchpa' 'elpu'DI' yay'. poSqu' Som. wej 'uj 'ab 'ej loS 'uj juch Dachbogh Som. Dachlaw' ghutar. ravDaq ghutar tlhegh tlha' 'ungya. Som Qargh vegh megh'an.

'ay' wejmaH Hut

loQ tlhegh luH yaS wa'DIch. tISchu' 'ej cholDI' megh'an, chIm. pe'lu'law'pu'. Som QIH nuDchoH. HeHmeyDaq chen QarghHommey. qeSmeH yaS wa'DIch jatlh “naQHa'taHvIS Som, chungmeH chuyDaH wIlo'taHmo' Som QIHlaH.”

Qochbe' HoD. Hota'ro'vaD jatlh, “Hoch chuyDaH yIchu'Ha'. jaS mavang 'e' DaHarchugh SIbI' yIjatlh.” mu'tlhegh cha'DIch jatlhnISmo' qeH HoD.

“Hoch chuyDaH ­ chu'Ha'ta', HoD!” jatlh Hota'ro'.

wanI'mey DeltaH yaS wa'DIch. QIH tI'laH yaS wa'DIch 'e' noH. tI'choHpa' QIH pojmeH Hur ghoS 'e' Hech 'ach jejqu' Hoch baS HeHmey. tlheghDaj pe'be'meH Som HeH tlhegh QanwI' 'oghnIS 'ungya. chob'a'Daq chegh 'ej polmeH pa' Sam. DaSmey Sam. pu'HIch lo'taHvIS DaS 'uS 'ay' chev 'ej qam 'ay' woD. DaS 'uS 'ay'Daq tlhegh veghmoH. vIHlaH tlhegh 'ach Qan DaS 'ej vIHtaHvIS pe''eghbe'. puchpa'Daq chegh.[31]

yeptaHvIS, poSbogh Som vegh. HurDaq 'arghlaw' Som QIH. jorpu'DI' HoS QaymeH 'och, Som QIHlaw'pu' HanDogh DI. QIH law' tu'lu' 'ach Som DuQchu'be'. pujmoH neH.[28] ghaytan ghu'vetlhmo' chev Som 'ay'. QIH Daqmey qonmeH Hoqra' lo' 'a HotlhlaHchu'be'.

meHvaD Qum, “SomDaq 'uch chuch SuD”

“puchvo' 'oH 'e' vIHar,” jang HoD. “puchpa' tlham chu'Ha' vay' QaptaHvIS bIQ pat.” bIQ pat qelDI' HoD, qIDtaH 'ej Hagh 'ungya Hota'ro' je 'e' qaw. qejchoH ghoghDaj jatlhtaHvIS.

qun HoD 'e' buSHa' yaS wa'DIch. “puch bIQ 'oHbe'. law'qu'. ngoghmey tInqu' lutu'lu'. ngoghmey tIn law' loD tIn puS. ghaytan bIrmoHmeH taS 'oH. jorDI' HoS QaymeH 'och chach taS chel pat, 'ach woD. taDchoH 'ej SomDaq vI'.”

“qay''a'?”

“'qay'be' chuch'e' 'a QIH So'mo' qay'laH.” jatlh 'e' mev yaS wa'DIch, tlheghDaj vIHtaHvIS. vay' Huj tu'. “peloS. ghutar lomHey vItu'.”

'ay' loSmaH

meHDaq jatlhbe' HoD DeghwI' joq, yaS wa'DIch lu'IjtaHvIS. Som HurDaq nuv tu'lu'mo', cholbogh Dujmey tu'meH noch puj lISta' 'ej jIHqu' Hota'ro'. QobchoHchugh vay' vangrup. SomDaq ghu' DeltaH 'ungya.

Som 'uchqu' chuch ngoghmey tIn 'ej wa' ngogh retlhDaq loghSut DeSDu' mIv je qat chuch SuD. tlhab ro 'uSDu' je. lom tlhabmoHmeH, Dechbogh chuch tunmoHmeH pu' lo' yaS wa'DIch 'ej loQ tetmoH. tlhabDI' lom nuDchoH 'ach mIvDaq leghlaHbe' 'ungya. SIHbe' Sut. Dujvo' yuvqu'. mejtaHvIS DIng lom. logh Sut qoghDaq tlhegh baghlu'. chuchDaq taDmo' tlhegh, cheghchoH lom 'e' Del 'ungya.

"yIpol. lI' logh Sut," jatlh HoD.

tlhegh pe' 'ej lom qengchoH, tlhegh luH. Duj 'elqa'meH tlheghDaj'e' tlha'. chob'a'Daq ghutar lom lan, ghIq Som tI'meH chob baS pe'choH. tlhoy'mey 'utbe' pe'chu' ghIq DujDaq lan 'ej Som muvmoHmeH pu'HIch tuj lo'. qoDDaq chuch 'ay'mey mach tu'lu'. SIp SuQ tlhuD taS 'a cherghlaH Duj pat. tar puS teqlaH muD pat, bIQ pat je. Hoch QIH tI'meH vagh tlhoy'mey lo'pu'DI' yap 'e' luwuq HoD yaS wa'DIch je. QaQqu'be' 'ach Som HoSmoH 'e' lutul. Qarghmey mev. tlheghDaj baghHa' yaS wa'DIch. ghutar lom luHchoH 'ej meHvaD ja'. "jImejrup."

poSchoH lojmIt wej. meHDaq lojmIt wej veghlI' 'ungya yInroH 'e' lubej. ghIq pay' lojmIt wej vegh yInroH cha'DIch. "'ungya!" jatlh HoD ghogh pav. jatlh "yInlaw'taH ghutar!" SoQqa'pu'DI' lojmIt wej "mIch wejvaD muD yIchu'!" ra' HoD. "nom tebmeH, mIch vaghvo' muD yIQay."

qabDaj tlhopDaq DeSDu' taD tu'lu'mo' ghutar mIv qoD leghlaHbe' yaS wa'DIch. vIHbe'taH ghutar.

tlhaq laD HoD 'ej toghmeH nItlhDu'Daj lo'. yaplaH'a' yInSIp? SovlaHbe'. tInmo' ghutar 'ej roD logh SutDaq vumbe'mo' ghaytan yInSIp law' natlh. yaS wa'DIchvaD Qum HoD, "ghutar mIv yIteq." DeghwI' vaD jatlh "lojmIt cha' yIpoSmoH." ghIq Qel Hoqra' tlhap 'ej meHvo' mej.

'ay' loSmaH wa'

lojmIt wej chollI'DI' SoQtaH. leQ 'uy HoD 'ach poSchoHbe'. meHvaD jatlh "lojmIt cha' DapoSmoHmeH yIngep!" poSchoHDI' lojmIt, HoD Dub yuv muD. tlhoS pummoH. wej muD Qaylu'chu'pu'mo' tlhoy'meyDaq 'uyDI' muD, mIch cha' muD law' law' mIch wej muD law' puS. qay'qu'be'. Qapchu'taH muD ngeb SeHwI' pat 'ej naDev tlhuHmeH yap muD. HuD muD rur neH, 'ej nom ghur.

mIch wej choQDaq cha' logh Sut tuQtaHbogh loD lutu'lu'. QottaH ghutarHey 'ej ghaH retlhDaq tortaH 'ungyaHey 'e' legh HoD. ghutar mIv teqmeH poghmey Soy' ruQ 'e' nID yaS wa'DIch.

wa' ghop lo'taHvIS, ghutar mIv ngaQHa'moH HoD 'ej SIbI' teq yaS wa'DIch. ghutar qab lulegh. chIS. 'oHDaq ngoHlu'pu' quy'Ip. He'So'. SoQtaH mInDu' 'ej poStaH nuj. yIntaH. tlhuHtaH. "ghutar, bIjatlhlaH'a'?" ghel HoD. tlhuHtaH neH ghutar. HotlhmeH Qel Hoqra' lo'choH HoD. Hoqra' leghmeH joDDI' yaS wa'DIch, HoD nach qIp mIvDaj. yaS wa'DIch mIv ngaQHa'moHmeH 'ej teqmeH boQ HoD.

"He'So' nuq?" jatlh yaS wa'DIch, mIv roQtaHvIS.

"mIvDaq 'empu' ghutar ghIq HaHtaH." vIHbe'taH ghutar. bItchoH HoD. "ghutar!" jatlhqa' HoD "choQoylaH'a'? bIvIHlaH'a'?" jangbe' ghutar. nom Hoqra' nechqu'moH HoD. wej QapchoHpu'.[22]

tuQHa''eghtaHvIS yaS wa'DIch jatlh. "muD polbeHbe' Som vItI'pu'bogh 'ach Som HoSmoH 'e' vIHar. chaq chuyDaH wIlo'qa'laH." logh Sut DaS teqmeH 'ungya HoD volchaHDaq ghop lan.

QumwI'vo' Hota'ro' ghogh luQoy "Duj nIH chollI' ghopDapHey, HoD. vIjunmeH chuyDaH vIlo' 'e' Dachaw''a'?" Qapbe'taHmo' begh junnIS.

bejchuq HoD yaS wa'DIch je. jatlh HoD, "DatI'ta' SoH. yIwuq. bIvangchu'meH qavoq. meH yIghoS." lob yaS wa'DIch. chob'a'Daq logh Sut luchDaj je lon.

'ay' loSmaH cha'

ghutar DeSDu' taD vIHlaHbe' HoD. Huj. motlh SIHlaHchu' logh Sut bIr. QapchoHDI' Hoqra' ghutar Hotlh. yInroH QaQ cha'. QoghIj QIH cha'be'. roSHa'be'law'. taghDu'DajDaq QIH mach tu' Hoqra' 'ej vorchoH.

ghutar qab Say'moH HoD. taD qey'Ip HochHom 'ej bIrqu' DIr. ghutar qabDaq ghopDu' ghun lan HoD. mInDu'vo' chuch bI' 'ej mIn poSmoH HoD. pIvlaw' 'ej mIn'e' HotDI' HoD nIteb mIn SoQmoH ghutar. tujmoH 'e' nIDtaHvIS[23] HoD, logh Sut QIH tu'. tlhoS chevchoHpu' poghmey tlhay'mey je. logh Sut chenmoHlu'DI' wa' Doch naQ 'oH 'a yebmeyvam lupe'lu'law'. tlhay'mey qoDDaq chuch SuD tu'lu'.

pay' jachchoH ghutar "QI'yaH!! jIyIntaH! HImeQmoHQo'!" poSchoH mInDu' 'ej vIH. leghlaHlaw'.

ghutar qab Hot 'e' mev HoD. Hoqra' lo'qa'. beq meQmoHlaw' pagh. jotmoH 'e' nID, "DujDaq SoHtaH. qaboQ. yIleS. choleghlaH'a'? choQoylaH'a'?"

"HoD!" jatlh Hung yaS. mISlaw', 'a ghIq jachqa' 'ej noghchoH. "meQlaw'lI' ghopDu'wIj!"

pay' Seng tlhoj HoD. "bIbIrqu'mo', bItujchoHtaHvIS 'oy'qu'. SoHvaD qul rur tuj motlh." jatlh vajar. "yuQ bIrDaq jIvumpu'. bIrqu'mo' wItlhlaH nItlhDu'." Qel Hoqra' lIS HoD 'ej pu'HIch woH 'ej lIS je. "DaH bI'oy'qu'choH 'ach qaboQmeH 'ut mIw. 'oy' DaSIQrup'a'?"

"'Iw bIQtIqDaq jIjaH" jatlh ghutar. mu'tlheghvetlh jatlh puq, nenghep 'oy' SIQrupDI'. yaj HoD. logh Sut taDbe'choHmeH pu'HIch lo'. HoD DIr meQmoHbe' tIH 'e' tob 'ach ghutarvaD tujqu' 'e' Sov. SIHlaHDI' Sut ghutar lelchoH. mejmeH nogh ghutar. "pogh yI'uch!" jatlh ghutar. "DeSwIj vIlellaHbe'." Sut pogh 'uchtaHvIS vajar luH ghutar. jachqu' ghIq ghop 'ang. taD ghop DIr. SIbI' DeSvaD ghopvaD je Qel Hoqra' lo'choH vajar. bIrqu'mo' meQlaw'pu' 'a vorchoH Hoqra'. "qaqbej!" jatlh ghutar. "latlh."[28]

poghmeyvo' ghopDu' leltaHvIS HoD, chuch SuD leghqa'. tetchoHlI' 'ej taS jeDqu' lIng. bIrmoHmeH taS 'oHlaw'. law'qu'be'mo' SIbI' jochbe' 'ach nItlhDu' taDDaq Qel Hoqra' lo'taHvIS jatlh, "chay' logh SutlIj qoDDaq chuchvetlh SuD Daghaj?"

'ay' loSmaH wej

jatlh ghutar "taDchoHpu'pa' 'el, HoD."

"'a qatlh 'ellaH? chay' logh Sut chevlu'pu'?" jatlh HoD

"vIpe'." jatlh ghutar. qoghDaq taj HuSDI' ghutar, tlhoS beppu' vajar, 'ach Hung yaS nuH nge'chugh, Ha'qujDaj nge'. logh Sut QIHlaH 'etlh yanbogh SuvwI' po' vaj pe'pu'mo' ghutar yay'be' HoD.

"bong Dape''a'?" jatlh HoD.

"ghobe' HoD. chIch vIpe'ta'. DujwIj vIHubmeH." jatlh ghutar

nuqjatlh? boHchoH HoD. taghqa', jatlh "ghutar ne', wo'vam Datoy'laHtaHmo' jIbel. DaH lut naQ HIjatlh. potlh Danopchugh vaj HughlIj vISIj. tlhegh DatoSlI' 'e' Daqaw'a'?"

"lu' HoD." jatlh ghutar. ravDaq QottaH ghutar 'ej lut ja'chu'.

"tlhegh vItoStaHvIS, ngaDHa'mo' tlham tlhoS HoS choHwI' vIchagh. logh Sut poghmey vItuQtaHmo' HoS choHwI' vI'uchqa'DI' tlhegh vI'uchHa' vaj jIpum. Som Qargh vIvegh. ghIq Duj bIngDaq jIHuStaH. 'IH Hovmey. vIHo' 'ej Som vIlegh. QIH vIleghmo' qaQum 'e' vInID 'ach bIjangbe'."

mIv nuD HoD. loj QummeH DuQwI'. "bIDo'." jatlh HoD. "QummeH DuQwI' wItlhlaw'pu' Som HeH jej. yInSIplIj chevlaHpu'."

"tlhegh vItoSqa' 'e' vInID 'ach SomDaq vIHbogh vay' vIleghpu'mo' jIyev. SomDaq vIH bIQtIqHey SuD. SomDaq chuch SuD law tu'lu' 'ej vIHmoH vIj tuj. vIj vIbejtaHvIS pay' wanI' vIbejbogh vItlhoj. bo'Degh maw' Da vIj. tlhe' 'ej tlhe'qa'," DelmeH ghop joqmoH 'e' nIDDI' ghutar 'oy'qu'choH nItlhDu'Daj taD. "vIj Heghbat Delta'bogh Hota'ro' vIbejlI'. tlhe'qu'. tajvajDaj tIn law' wa' bID gho tIn puS. chaq javmaH vatlhvI ghoDaq tlhe'. jatlhpu' Hota'ro' lagh mevlaHbe' DeghwI', 'ach vIjDaq chaq mevmoH vay'. Daqaw'a'?"[41]

qawchu' HoD.

"vIj vIghoSmeH tlheghwIj vItoS, ghIq vIvo'eghmeH Som vIpup. 'a vIj vISIchmeH, tlhoy tIqHa' tlheghwIj 'e' vItlhoj. vaj vIvo'eghpu'DI' tlhegh vIpe'. vIj vIQeqchu'. Duj tlhammo' vIj retlhDaq SomDaq vIQotlaH. DIngchoH Duj, 'ach vIj vI'uchmo' jIpumbe'."

ghutar nejmeH DIng Duj 'e' qaw HoD. 'ach taHmeH ghutar qaghbe'.

'ay' loSmaH loS

"vIj vI'uchtaHvIS, naw'meH lojmItHom vIpoSmoHmeH tajwIj vIlo'. 'ach vIlISmeH taj vIlo'be'nIS jatlh Hota'ro'. nItlh vIlo' 'e' vInID 'a Soy'qu'mo' poghmeywIj naw'meH lojmItHom veghbe'. chuch 'ay' jej vIlo' 'e' vInID 'a Qapbe'. ghurtaH tajvaj. nItlh lo'nISlu' jatlh Hota'ro' vaj nItlh'e' vIlo'meH SutwIj tlhay vIpe'." jatlh ghutar.

yay' HoD. jatlh "logh SutlIj'e' Dape''a' jay'. loghDaq Dape'DI' nuq DapIH?"

"HoD," jatlh ghutar. ja'qa'pa' ba'choHmeH chob'a' tlhoy' lo'. "HoD, jIQupqu'. wa' Duj neH vIchIjpu'. wIgh jIHbe'. 'ach jIQIpbe'. loghDaq logh Sut pe'lu'chugh nIj yInSIp 'ej Hegh SuvwI'. vIj Heghbat vIbotmeH jIvangnISpu'. tlhay vIpe' ghIq ghopwIj vIlel. SIbI' nIjbe'meH Hoch muD, jIvumtaHvIS yeb vI'uch."

"'a qatlh latlh tlhay Dape' je?" jatlh HoD.

"Qatlh vIj tI'meH Qu'. vIta'laHpa' bIrchoHpu'mo' ghopwIj vIlo'laHbe'taH. Qap ghop cha'DIch. SIbI' mI' 'e' mev vIj. SutwIjDaq ghopDu'wIj vIlanqa' 'ach nIjtaH muDwIj. tujqu'mo' vIj, tet chuch. chen bIQtIqmey. tlhaymeywIj vIngaQqa'moHmeH bIQtIqvetlhDaq DeSDu'wIj vIlan. Qap 'e' vISovbejbe' 'ach latlh nuH vIghajbe'. Qapbe'lI' 'e' vIHar. jIpujchoHmo' 'ej jIQubbe'choHmo'. tuSammeH Som vIpup, 'ach ghaytan boQoybe'. jIpujchoHpu'. jIvulchoHlaw' 'a naDev jIH."

ngugh choHbe' chob'a' ba'taHbogh ghutar'e' 'ach 'IjtaHvIS HoD, choHlaw'. qeqmeH Qu' ta'Ha'laHbogh ne''e' leghbe'choH vajar. DaH chob'a'Daq ba'taH Duj toy'bogh SuvwI''e'. HoD DuQqu' ghutar chav. Qumbe'choHpu'DI' HoD lImbe'pu'. loSbe'pu'. ghu' tu'pu' 'ej Qu' nabpu' 'ej ta'pu'. SomDaq, laQtaHvIS vIj lISta'. Qu' DuHHa' lajpu' 'ej Qapta'. vangbe'pu' ghutar Hegh Hoch.

"tujqu' vIj, laQtaHvIS. chay' DameQ'eghmoHbe'?" jatlh HoD.

ghutar ghopDu' bejchoH ghutar. "jImeQ'eghqu'pu'. qaStaHvIS wanI', ghopDu' vImeQmoHchu' 'e' vIHar. 'a ratlhlaw' Hoch nItlhDu'." bellaw' ghutar. "choqlaw'pu' chuch. 'a Do'Ha' HoS choHwI' vIchIllaw'pu'." jatlh

ghutar bejqa' HoD. DujDajvaD Heghqang SuvwI' net pIH. 'ach DujDajvaD Qotlh'eghqangDI' vay', toy'chu'.

"jIHeghvIpbe'pu'." jatlh ghutar. "Qu' vIlajta'. Qu'Daj ta'taHvIS Hegh 'e' tul Hoch tlhIngan."

"bIHeghvIpbe' 'e' vISov. HonlaH pagh."

"jIHeghvIpbe' 'ach jIHegh 'e' vIpIHbe'," jatlh ghutar. "Duj law' DachIjpu'. Qap HoDwI' 'e' vIvoqtaH." HoD ghIch bochmoHbe'law' ghutar. tlhIngan qa' pIlmoHta' Qob.

'ay' loSmaH vagh

Qub HoD: DujwIj vIHubtaHvIS jIHeghbe'chugh, 'ej muHoHnIS ghutar. batlh jIHegh. ghutarvaD jatlh “Ha'! bIQamrup'a'?”

ghutar 'uSDu'vo' logh Sut teq HoD, ghIq QamchoH ghutar 'e' boQ HoD. loD naQvaD Hotlh Hoqra' 'ej vorchoH. nItlhDu' tochDu' je qab law' Hoch qab puS. ghopDu' poSmoHlaHchu'be'taH ghutar 'ej nItlhDu' lo'laHbe'. “'etlh vI'uchlaHbe',” jatlh. tuHlaw'.

“jajvam loD nen SoHtaH,” jatlh HoD. nItlhDu'vaD Qel Hoqra' lo'qa', 'a SIbI' vorlaHbe'. “chaq wa'leS 'etlh Da'uchqa'laH. mIch loSDaq bIvum SoH 'e' vIra'. meqwIj DaSov DaneH'a'?”

Hemqu'choH ghutar. “batlh Qu' vIta'laH 'e' Davoqmo' choquvmoH, HoD.”

yev vajar. jatlh “SaH je latlh meq.”

'IjtaH ghutar.

ghaH nIH ghop pep HoD “SochHu' DeSwIjvam Hom vIghorpu'. 'oy'qu'taH 'ej tlhoS vIlo'laHbe'. logh Sut pogh vItuQmoHlaHbe'bej.”

yaj ghutar. chaq logh Sut tuQmoHpa' voqbe' HoD, 'ach DaH voqba'. motlh yaS QIvvaD puj 'e' chIDbe' yaS moch. “jIjatlhpa' jatlh Hovmey.” jatlh. ghIq tam cha' loDpu', meHDaq cheghtaHvIS.

baH vIj 'e' QoylaH HoD. tlham ngebmo' chung lutu'laHbe' 'a qaS. naQlaw'taH Duj. Qapla'.

meH 'el HoD ghutar je. jatlh yaS wa'DIch “Hoch chuyDaH yIchu'Ha'!” vang Hota'ro'. ghIq ghutar legh. jach. Quchba'. QamchoH 'ej ghutar paw'meH qabDaj 'uch.

“DuloS yo' qIj,” jatlh yaS wa'DIch. “DaghoS 'e' wIghuHmoH.”

“qaStaHvIS poH nI' loStaHjaj. *Dugh* vItoy'.” jatlh ghutar, montaHvIS. tlhaq laD. jatlh “qaH! qaSon.”

'ay' loSmaH jav

"lugh ghutar," jatlh HoD. "yaH poHraj tIbuSHa'Qo'. 'a Sumejpa' nom Qu'vam vIpoj.

"QapHa'choH chuyDaH patmaj. nutoDmeH vang DeghwI'ma', Hota'ro' lagh. SovDajmo' laHDajmo' je jorbe' pIvghor. qaSqa'DI' Seng, nutoD Hung yaSma' ghutar ne'. vIj lISmeH ghopDu''e' lo'. Heghqang 'ach wo' toy'taHmeH toD yaS wa'DIchma' 'ungya Sogh 'ej Sommaj tI'ta'. batlh vangta' Hoch. SanaD. 'a SuDublaH." ghutarvaD jatlhchoH HoD. "bIlobchu'taH. bIyoH, bIvangrup 'ej pavDI' ghu' bI'ong. tlhIngan ghob Dapabchu'." Hemba' ghutar, 'a taH HoD. "'a tlhoy bISey. De' DalablaHtaHvIS mu'qaD DabachtaHmo' ghu'na' Da'ngu'be'pu'? QumwI' Dalo'taHvIS, yIlachQo'. wa' jaj HoD SoH DaneH, qar'a'?"

"HIja' HoD!"

"bo'Dagh'a' Dalo'taHchugh lImlaH beqlIj. yIjottaH." largh HoD. "quy'Ipmo' bIHe'So'taH. yagh 'up DacherghnISchoH. jagh 'up DaHoHtaHvIS bI'emchugh bIHegh 'ej HeghlaH je maqochlI'. DaH puchpa' wIHutlhmo' puchpa' ru' wIchernIS. qaStaHvIS Hogh veb yISay'moH SoH."[24]

"lu' HoD!" jang ghutar. HemtaH.

"SoH," DeghwI'vaD jatlh HoD. "yIQam." QamchoH be'.

"bIjot. bIjotchu'. bIval. bIqar. ghu' qubqu'vaD bIqeqchu'pu'mo' mayIntaH. 'ej Deghvetlh DaHotDI' toQ moj Duj. 'ach bIjeQHa'. De' DaSovchugh, SIbI' HoDvaD yIjatlh. ghu' Dangu'chugh, De' SovmeH HoD yIja' ghIq yIjIH. potlh'a' De'? wuqnISchugh vay' wuqnIS HoD'e'. bo'DaghHom yIlo'Qo'. vay' vIbuSHa' vIneHchugh vIwuq jIH. vay' DaSovchugh DajatlhnIS. chu'HataHvIS tlham Duj DIngmoH vay' 'e' Dachup'a'?"

rav bejchoH DeghwI'. "ghobe' HoD."

"DeghwI'!" ra' HoD. "yIjaq'eghmoH!"

"ghobe' HoD!" jatlh Hota'ro', qu'taHvIS.

"qaq." jatlh HoD. "'bIjaqlaH 'e' vISov 'ach roD bemorngan[25] DaDa. jIQongtaHvIS chovemqangmoHchu' 'e' vISovnIS." HoDpa' cha'meH SIq HoD. "qawuvlaHbe'chugh bIlI'Ha'. choyaj'a'?"

"yaj HoD!" jatlh. qu'taH.

"maj. vangtaHvIS SuvwI' bIvaqmo' 'ej bIHaghmo' qaStaHvIS wa' Hogh, Hoch ghutar Qu'Hom Data'nIS."

"SuvwI' Qu'Hommey vIta'mo' jIHem," jatlh, 'ej ghutarvaD monqu'.

'ay' loSmaH Soch

"toH, Hota'ro' lagh," jatlhqa' HoD. "chorgh rep ret DaSonlu'ta'. taghDI' yaH poHlIj bIvumrupmeH DaH pa'lIj yIjaH 'ej yIQongchoH."

HoD mIn bej Hota'ro' jatlhtaHvIS. "mIch loSDaq pa'wIj tu'lu'."

tlhuHHa' Hoch net QoylaH. ghaytan meHDaq mImbe'pu'chugh Hota'ro' QongtaHvIS Hegh.

"ghIrel pa' yItlhap," jatlh HoD. "ngaQbe'." Duj De' nejmeH HoD, ghIrel pa' ngaQHa'moHta'. mej Hota'ro'. qabDajDaq reghtaH QIHHom.

ba'choH ghutar. ghopDu'Daj Qorgh. laH tobmeH jatlh HoD, "begh pat yIcha'."

SeHlaw Sen ghutar 'ej HaStaDaq begh pat leghlu'. Qapbe'taH nIH begh. "ghaytan naDevvo' vItI'laH." jatlh HoD. ghIq "'ungya, DuSonta' Hung yaS. HItlhej." HoD pa' lujaH.

"yIba'," jatlh HoD. "DaHjaj batlh bIvang je. Ha'qujlIj nge'pu'DI' Hota'ro' bIqeH 'e' vIpIH 'ach SujIjchu'. SoHmo' moch tlhochmeH mIw ghojlaHbej. Qu' vIta'laHbe'bogh Data'ta'. qanaD neH vIneH 'ach qatlh puqpu' DatungHa'moH? tlham Dachu'Ha' jay'? QIp! HeghlaH vay'!"

"reH Saghqu' Hota'ro'. vIHurghmoHDI' Haghqu' 'ej leSlaw'. vIqun vIneHbe'."

"bIqunqangbe'pu'mo' vIqunnIS. wa'logh DabIjqangba'pu'. nuq jatlh DaqIppa'?"

"jatlh muqIp HoD 'e' vIqotlh. vIlob vIneHqu'. HIqIp."

yay' HoD. "bInep! vIHoHbe'meH bInep. vIHoHbe' 'e' vIlay'. lo'laHbej. nuq jatlh?"

"jInepbe'. Dutoy' neHqu'law'."

"Huj be'vetlh ghob. chaq nuv SeHmeH tuHmoH ghIq pegh. Quj'a' Qujlaw'. 'a mutoy'qangmo' jIbel. bIQongpa' ghe'naQ bom yIQoy." jatlh vajar.

nov bom bomlI' Mahoun ghogh 'e' lu'Ij. ghelmoH 'a jotmoH je. HoSghaj QoQ. 'IjtaHvIS tlhoS boQbogh vIghro''a' luleghlaH.


rInpu'DI' bom jatlh yaS wa'DIch, "'a nuq bop bom?"


"vISovbe'," jang HoD. "'ach vISovchoH 'e' vIHech."

Beginners' Summary - Volume 3

DujDajDaq vem tlhIngan HoD.
Duj Qotlhlu'pu' 'e' Sov.
meHDaq DeghwI', yaS wa'DIch, Hung yaS je lutu'lu'.
yIntaHmo' tlhInganpu', lopchoH.
HIq lutlhutlh.

QomchoH Duj.
QapHa'choHpu' wa' vIj.
pIvghor Qaw'laHmo' Qobqu' ghu'.
SeH yaS wa'DIch 'e' nID.
Sengvam ghov DeghwI'.
vIj SeHlaH DeghwI'. Qap.

ghuHmoH latlh ghun.
nuDchoH Hung yaS, logh Sut tuQtaHvIS.
nuDtaHvIS Dej Som.
lojmo' yInroHDaj, Heghpu' 'e' luHar latlhpu'.

QapHa'choH latlh vIj.
SeHlaHbe' DeghwI'.

Qapbe' noch.
Heghbe'pu' Hung yaS.
Duj Som HurDaq vIj tI'.
ghopDu'Daj meQmoH 'ej taDmoH.

batlh vangta' Hoch jatlh HoD.


Comprehension Questions

chay' lop tlhInganpu'?
Heghpu' Hung yaS qatlh 'e' luHar tlhInganpu'?
nuqDaq ghaH DeghwI''e' vIj tI'taHvIS?
nuqDaq ghaH Hung yaS'e' vIj tI'taHvIS?
rIQ'a' Hung yaS?


Speculation Questions

qatlh Dej Som?
DaH chay' SuvlaH Hung yaS?
nuq jatlh HoD cheghDI' Hung yaS?