nuq bop bom: 'ay''a' chorgh

wa'vatlh loSmaH: vItbogh ghoqwI'

tej ghItlh qontaHvIS 'eSSIm, jabbI'ID chu' maq De'wI'. jangta' vajar HoD. QIn laD.

***
'eSSIm,

ben law' ngaq Duj *naQjej yoH* bIghHa'Daq novvetlh SuD vI'avtaH. latlh vI'angbe'. ngugh tlhIngan Hol jatlhlaHbe'. ra'lu'DI' puSqu'bogh mu'mey napqu' loblaH 'ej qoy'meH jatlhlaH. puj, yoHHa'qu' 'ej jIj. ghoqwI' ghaHchugh vItemlaHbe' 'ach Qobbe'law'. ghe'naQ bom 'oH 'ach mu'mey vImughlaHbe'. chaq vIghro''a', HeghlI'bogh loD je bop. De''e' cha'be'bogh Sotlaw'wIj vISovbe'.

Sotlaw'maj Dalabqa'mo' DuquvmoHjaj ta'.

vajar HoD
tlhIngan wo' tlharghDuj *Dugh*
***

DochHa' vajar HoD. motlh 'eSSIm lubuSHa' QI' ghotpu'. Hu' 'eSSIm 'ej vIychorgh Suq. ghupDI' ghur nach 'oy'. 'oy'choHpu' je teS. qaStaHvIS wa' Hogh wuQtaHmo' qejqu'. QuchDajDaq 'uymeH nItlhDu' lo'. loQ 'oy'mo' bepbe' tlhIngan SuvwI', 'ach buSmoHlaHbe' 'oy'vam.

Mahoun bopbogh qech chu' ghaj.[120] DIvI' ghoqwI' ghaHbe' 'e' maq vaj tobmeH chaq tlhIngan ghoqwI' mojqang. DIvI' QI' peghmey SuqlaHchugh 'eSSIm naDnISbej tlhIngan wo'. vajar jabbI'ID laDqa'. Mahoun lut 'olpu' vajar. puj 'ej yoHHa', 'ej ngabbe'ba' Sotlaw'. Sotlaw' bejqa' 'eSSIm. DaH bomwI' Sovmo' monmoH ta. bomtaHvIS Mahoun jeQ 'ej vIHchu'. SuvwI' ghaHbe' Mahoun'e' 'ach SomrawDuDaj SeHchu' 'ej Sov'eghmo' loQ tonSaw' po'wI' rur. 'IH.

SochHu' rInpu'DI' DIvI' lopno', ghoHtaHvIS 'eSSIm ghaH je 'IHbe'. lut rap ja'taHmo' Mahoun, 'eSSIm moghmoHchu'. 'eSSIm belmoHmeH Hoch De' Sovbogh jatlhtaH, 'ach De' ngeb 'oghpu'be' DaH 'e' Sov 'eSSIm. not choHpu' Mahoun lut. Daj. HeghvIpba'taHvIS nepchoHbe'pu'. toDuj Segh 'ang. tlhIngan yu'wI' SIQpu' Mahoun. 'eSSIm qIHDI' Hajmo' vulchoH. De' neHbogh 'eSSIm loylaHba'. 'ach neppa' Heghrup. pay' pur 'eSSIm. jaS yoH Mahoun, 'ach yoH. tlhIngan retlhDaq QammeH yoHnIS. 'eSSIm voqchoHpu'. vItpu'. 'ej HoH 'e' nID 'eSSIm.
batlhHa' vangpu' 'eSSIm 'e' tlhoj.

wa'vatlh loSmaH wa': reH Suvrup

nuH 'uchbe'taHvIS jup'e' 'ej qoy'taHvIS HoH 'eSSIm 'e' nID. lI'laH QeH 'ach SeHnIS SuvwI'. SeH QeH 'e' chaw'pu'mo' 'eSSIm, tuH. SochHu' MahounDaq ghonDoqDaj yanpu'. SIbI' mejpu' varSajIy. boQDaj Sam 'eSSIm. jatlh, "ghorgh chegh yelwIyyItngan Suypu' 'e' luHech?"

jatlh boQ, "naDev cheghbe'."

ghIjchu'pu'mo' not chegh. tlhIngan mu'qaD jatlh 'eSSIm. yajbe' boQ 'ach QeH tlhIngan 'e' yaj. DoH 'ej jatlh "Sepvam tIr luje'laHbe'mo' Sep pIm luSuchlI'. tIr law' luje'qa' net jatlh."

latlh Sep'e'? vaj yuQvamDaq cheghpu''a'? jatlh "Sep yIngu'!"

jatlh boQ, "vISovbe'. naDev chaHbe'mo' vaj latlh SepDaq chaHnIStaH."

va. SaH pagh SaHbe'? chaq law' yuQmey 'e' yajchu'be'mo' boQ, pagh Sung Hol yajchu'be'mo' 'eSSIm yajHa'chuq. qachDajDaq chegh 'eSSIm. QumwI' HaSta chu' 'ej maHun Duj rI' 'e' nID. jang yaS HIp tuQbogh be''e'. SaH! jatlh 'eSSIm, "maHun vIjatlh vIneH."

yay'law' be'. yev. bIng bej ghIq jatlh, "jItlhIj. tlhIngan Hol vIjatlhbe'. DaH mughwI' vIchu'ta'mo' qayajlaH. yIja'qa'."

jatlhqa' 'eSSIm, "maHun vIjatlh vIneH."

taD HaSta. taDHa'choHDI' bItlaw' be'. law' mu'meyDaj 'ach mughDI' 'eSSIm QumwI' wa' mu' neH jatlh, "DujatlhQo'."[122]

yaj 'eSSIm. batlhHa' vangpu'mo' 'eSSIm buSHa' Mahoun. jatlh "ghaHvaD QIn yIqon. yIqonchu'. potlh. Daqonrup'a'?"

"HIja'," jatlh be'.

ba'qu' 'eSSIm. HaSta bejqu'. jaq qab 'ej HoS ghogh jatlhtaHvIS. jatlh "reH Suvrup SuvwI''a'." qa'meH vIttlheghmo' QaghDaj tlhojpu' 'eSSIm 'e' yajDI' Mahoun jatlhqangchoH 'e' tul. jabbI'ID van.

wuQbe'choHmoHmeH mI'choH 'eSSIm.

wa'vatlh loSmaH cha': quv qa'meH

ghonDoq lel 'eSSIm. yanchu'meH lojmIt poSmoH 'ej Hur ghoS. QumwI' qem. Qamchu' 'ej muD DuQchoH. reDDaq DoS wIv 'ej DuQ. DIng'egh ghIq DoS DuQqa'. latlh ghopDaq ghonDoq 'uchchoH 'ej DuQqa'. yavDaq QotchoH ghIq SIbI' Hu' 'ej DuQqa'. qelI'qam bID 'abbogh He ghoS qetqu'taHvIS, ghIq tlhe'egh 'ej qach ghoSmeH qetqu'taH. pawDI' DoS qIpqa'. 'oy'taHmo' vIlchoH ghIch 'ej wuS pepmo' Ho'Du' 'ang. DoS 'eS wIv 'ej qeqqa'. lubejtaH 'op Sungpu' 'e' Sov 'ach SaHbe'. qeqtaHvIS 'eSSIm pIj lubej 'ach not chol. maghwI' ghaHmo' 'eSSIm vav, QI' muv 'eSSIm net tuch, 'ach SuvwI' laHmey qeqtaH. chaq wa' jaj Qang toDmo' 'eSSIm naD yejquv. chaq Heghbe'pu' vavDaj 'ej wa' jaj chegh 'ej tay'taHvIS tlhIngan jaghpu' HoH. puq qechmeyvetlh Dogh qIlmeH Suvqu' 'eSSIm. qet 'ej ghonDoq yan 'ej ray' qIptaH.

tlhuch'eghpu'DI' qachDaj 'elqa'. nachDajDaq vavDaj qab Hem legh neH, 'ach qabDaj qawlaHbe'. 'IQmoH. vav mIllogh polbe'pu'. pIj tlhIngan DujDaq raQpo' 'aH nuD Hung. maghwI' mIllogh qengchugh rewbe' pIHqu'. vav HIp, rolDaj je qawlaH 'ach qab qaw 'e' nIDDI' ... pagh legh. cheghchugh ghovbe'. "Heghpu'! not chegh!" ja''egh 'eSSIm nen 'ach tultaH be'Hom. ravDaq QotchoH 'ej nach 'uch. vav qab ngaSbe' 'ach 'oHDaq ghoSlaw'taH tep lupwI' mIr.[121] Dargh wIb tlhutlhpu'DI' Dub.

jaj veb wej jangpu' maHun. jangpu' 'e' pIH 'eSSIm. qa'meH vIttlhegh lajchugh wanI' buSHa' 'ej lengDaj DellaH. lajHa'chugh vaj QeH pagh tIch 'ach jangnIS. lumbe'nIS. boHchoH 'eSSIm. QubchoH. qa'meH vIttlhegh lo'pu''a' Mahoun? qawlaHbe'. puj HIch lo'pu'mo' tlhIjqu'pu' 'ej qoy'pu'. chaq qa'meH vIttlhegh qech Sovbe'. chaq yajbe' neH.

varSajIy rI'qa'. jang be' rap. mughwI' chu'meH be' loS 'eSSIm 'ach 'eSSIm bejtaH neH be'. 'eSSIm leghvIplaw'. boHchoH 'eSSIm. jatlh "yIchu'!" 'ej leQ chu'wI' Da. jach be' 'ej jabbI'ID van. QIpwI'! moghchu' 'eSSIm 'ach pay' wuQbe'choH.

wa'vatlh loSmaH wej: qab 'ang

'oy' DachchoHghach tIvtaHvIS 'eSSIm rI' Mahoun. ghogh QumwI' neH lo'mo', Mahoun qab leghlaHbe' 'ach QeHba'. jatlh, "nuq DaneH? qamawpu'chugh jIngoy' jIH 'ej jIHvaD yIjatlh. bong vIta' 'ach jIHvaD nImuSnISmoH tIghmeylIj vaj yIruch! nItIchbe'pu' beqpu'wI'. tIghIjQo' 'ej tIbuQQo'. junuQqa'be'chugh pInuQqa'be' maH. choyajlaH'a'?"

jatlh 'eSSIm, "nach qablIj Da'angvIptaHvIS chobuQ 'e' DangIl'a'?"

jatlh Mahoun, "HIpumQo'. tep choQDaq jIHtaHmo' naDev HaSta tu'lu'be'. qabuQbe'lI'. qaqunqu'lI'. qabwIj DaleghnISchugh beqpu'wI' Davuvpa' vaj vI'ang. pa'wIj vIghoSlI'." moDtaHvIS Mahoun tlhuH 'e' QoylaH 'eSSIm. HaStaDaq nargh Mahoun qab QeH. beq HubmeH qu'laHmo' pujwI' vuvchoH 'eSSIm. pay' choH Mahoun qab. jatlh, "QunwI'! 'eSSIm! mInlIjvaD qaS nuq?"

mIS 'eSSIm. "nuq?" jatlh. legh'eghlaHmeH HaSta lISDI' Seng legh. Doqqu' ghaH poS mIn. qevpobDaq Huy bIngDaq je 'Iw 'IqnaH je' lutu'lu'. jorpu'law' mInDaj 'ach leghlaHchu'taH. wuQqu'pu'mo' qaSDI' tu'be'pu'. motlhbe'bej ghu'. 'eSSIm bItqu'moH 'ach novvaD chIDqangbe'mo' jatlh "vIlegh. qay'be'. ramqu'." Harlaw' Mahoun.

jatlh Mahoun, "<'Iw vo' mInDaj> jatlhDI' chIjwI'wI' lachbe'. DaghIjchu'pu'. nuHIv tlhIngan yo' qatlh 'e' DabuQ?" SaghtaH Mahoun 'ach DaH jottaH.

jatlh 'eSSIm, "SabuQbe'pu'. qajatlhmeH vIrI'. tlhIngan Hajlaw' neH. "

navHom woH Mahoun. jatlh "QInlIj'e' vIlaDlI': <tugh nIghobtaH negh qu'>. jIH mughIj. jubuQbe'chugh vaj ... jughuHmoH'a'?" Saghqu'choH Mahoun.

Qub 'eSSIm. pay' ghu' tlhoj. jatlh "mughHa'! <reH Suvrup SuvwI''a'> jIjatlh. qa'meH vIttlhegh 'oH. qechvetlh Dayaj'a', bangwI'?" yajlaH Mahoun 'e' tulqu'.

qu'be'choH Mahoun. jatlh "HIja'. qa'meH vIttlheghmey vIyaj." Doy'law 'ej 'IQlaw'. qa'meH vIttlhegh lajpu' 'e' noHlaHbe' 'eSSIm. jatlhqa' Mahoun, "'eSSIm, tlhIngan quvlIj vIHonbe', 'ach ... choghIjchu'pu'. DaH jInajtaHvIS muDechqa'taH tlhIngan mIgh." DaH pujtaH 'e' mIylaw'mo' mIS 'eSSIm. moghmoH tIgh nov! jatlh Mahoun, "bI'IH. choSeymoH 'ej chopIlmoH 'ach choHoHta' 'e' DanID jay'. chaq HoHchuq tlhInganpu' 'e' lulIjlaH 'ach nughwIjvaD yapbe' wa' vIttlhegh nap. mapImchu'. reH tIghmeylIj'e' vIpabnISchugh 'ej vIyajnISchugh ghu' vItIvlaHbe'. lugh yaSpu'wI'. tlhoy bIQob. matay'be'nIS. maHvaD qItbe' parma--" qagh'egh Mahoun 'ej choHchu' ghoghDaj. "chach wISIQtaH," jatlh 'ej jabbI'ID ghang.

wa'vatlh loSmaH loS: mIwmey motlh

quvDaj choqmeH, Mahoun rI'pu' 'eSSIm, 'ach chach SIQtaHmo' Mahoun 'ej 'eSSIm lajHa'ta'mo', Mahoun SaHqu' DaH 'e' tlhoj. tlhIngan tuqmey SaHbe'mo' nov, tay'laHtaH 'e' tul 'ach Do'Ha' qaSbe'taH. Mahoun wIv vuv.

HaStaDaq jabbI'ID labpu'bogh bejqa'lI' 'eSSIm. Hujqu' qabDaj. chIjwI'vaD jatlhtaHvIS rorqu'choH mInDaj Dung. 'eSSIm qab qu'qu'moH. jatlhtaHvIS pay' jorlaw' mIn. 'Iw 'IqnaH je ghaypu' mIn. bejtaHvIS chIjwI' bey yajlaH. SIbI' choH tu'be'pu' 'ach jorpu'DI' wuQbe'choHpu'. Qapchu' mInDu'Daj, 'ach Hujbej wanI'. qab Say'moHmeH ghop lo' 'eSSIm. nIjtaHbe'.

bej'eghtaHvIS 'eSSIm, rI' may'Duj *veS*. ghIH 'eSSIm qab 'e' SaHbe' Sogh. jatlh "yuQlIj wIbavchoHta'. nuqDaq luchlIj wIQol DaneH?" Quv ja' 'eSSIm. ja' Sogh, "DaHjaj Du' qachlIj chu' mutlhmeH, Qol cha' negh 'ej DunuDmeH Qol je Qel." motlh mIw. jInmolDaj DIlmo' QI', luchDaj luqem 'ej 'eSSIm Qorgh QI' Qel.

pawpa' luch paw Qel. raSDaq ba'choH 'eSSIm HotlhtaHvIS Qel. ja'pu'pa' 'eSSIm mIn Seng tu' Qel. jatlh, "bIwuQtaH'a'?" 'oy', wanI' Huj je chID 'eSSIm. "pIj lam DatlhuH'a'?" jatlh Qel. tIr chach Del 'eSSIm, 'ach qaSmoHwI' toDwI' je perbe'.

yaj Qel 'ej ghu' Del. tlhIngan nach HomDaq ghIch teSDu' je rarmoH muD 'ochHomDu'. 'eSSIm 'ochHomDu' lungejqu'lu'. jatlh Qel, "nachlIjDaq ratlhlaw'mo' tIr lam 'ochHomDu'lIjDaq cheplaH yaghmey. yaghmey 'ommeH porghlIj, 'IqnaH lIng 'ej 'IqchoHDI' jor. mInlIj Hom gho veghpu'.[128] ngejlu'taHchugh qaSqa'. DuwuQqu'moH 'ej teSDu'lIj QIHlaH." HerghwI' lo' Qel. jatlh, "wa'les qaSuchqa'. chaq qaHaqnIS." 'eSSIm pIvHa'moH Sengvetlh neH.

mejpu'DI' Qel, luch, Soj, cha' loDpu' je jol may'Duj. qach chu' Daq cha'pu'DI' 'eSSIm, 'ay'mey laghHa'choH negh. Qup chaH. tujmo' muD Dotlh, yIvbeHmeychaj teq 'ej jul bIngDaq vumtaHvIS yIQchoHDI' DIrDaj, wew SomrawDaj. qaStaHvIS wa'maH jav jarmey tlhIngan loD leghbe'taH 'eSSIm. QaS bejtaH 'e' tIv. chaHvaD wornagh bIr qem 'ej qach chu' nuDchoH. 'eSSIm luqIHbe'pu' loDpu' 'ej qorDu'Daj quvHa'ghach Sovbe'chu'. Ho'taHbogh be' neH lulegh, 'ej tuj 'eSSIm 'Iw. rI'qa'DI' Mahoun Qoybe' 'eSSIm.

wa'vatlh loSmaH vagh: nov tIgh

yon 'eSSIm porgh 'a bIt yabDaj. Farsajii rI'qa'. jang be' rap. mughwI' jan chu'be'. 'eSSIm jatlhvIplaw'. SIbI' jabbI'ID yev. rarHa'pu' 'e' Har 'eSSIm ghIq jang Mahoun. QuchHa'law'taH.

“Sagh'a' chachraj?” jatlh 'eSSIm. SaHtaHmo' 'ej pIvlaw'taHmo' Mahoun, bel.

jatlh Mahoun, “beqpu'wI' DaghIjpu'mo' 'ej DabuQlaw'pu'mo', cholDI' tlhIngan may'Duj nuHIv 'e' luHar. chach lumaqta'. vIpIchbe'. DaH qa'meH vIttlheghqoqlIj vIQIjta' 'ach jotchoHDI' DaH bIrI', bIreghtaHvIS. chIjwI'wI' DaghIjqu'mo' DaSaQmoH . chay' bIrIQchoH?”

jatlh 'eSSIm, “ram. jIrIQqu'be'. jIHmo' SaH may'Dujvetlh. lIHIvbe'. jInmolwIjvaD luch luHIj beqpu'.”

“nISuv'a'?” jatlh Mahoun.

“maHun! ram qaja'pu',” jatlh 'eSSIm.

jatlh Mahoun, “DaQIDlu'DI' ­ ram. choHoH 'e' DanIDDI' ­ ram. yaSwI' HoHDI' joy'wI' ­ ram. jIHvaD potlh Dochmeyvam. matay'laHtaHbe' DaH 'e' Dayaj'a'? bIQob! 'ej jIHvaD ghaytan Qob je jaghpu' DaSuvlI'bogh.”

jatlh 'eSSIm, “maHun, jaghpu'qoq tIHajQo'. mangaghta' neH. ramqu'.”

nom mu'meyDaj jatlh Mahoun, “ghuy'cha', 'eSSIm! bImIymeH chorI''a'? qatlh chobojtaH?”

jatlh 'eSSIm, “chach boSIQlaw'mo' DotlhlIj vI'ol vIneH neH.” lugh Mahoun. qatlh jatlhtaH? jaS quv'eghnISqa'moH.

jatlh Mahoun, “DaH Da'olpu'. jIpIvtaH 'ej jIpuQ. DotlhwIj SaHchugh vay' muHoH 'e' nIDbe'. tIghmaj Dayaj 'e' DanIDlaHbe'chu''a'? tlhIngan quv bop'a'? DaH chIjwI'wI' vIjotnISqa'moH.” quvDaj qaDpu'mo' Mahoun, quv'e' DaH bopchoHbej. jabbI'ID vanmeH vIHchoH Mahoun ghop.

“yIloS!” jatlh 'eSSIm. “nuq 'oH chIjwI'lI' pong'e'?”

“Tiadynsan,” jatlh Mahoun. “chIjwI' jIHbe'. vIwuv.”

jatlh 'eSSIm, “vIghIjpu' 'e' vIpay. tIghmeyrajvaD chay' ghaHvaD jItlhIj? yel Hol mu'mey HIghojmoH.”

pIHlaw' Mahoun 'ach mu'mey jatlh. mugh. <jItlhIj 'e' yIlajneS> 'oS neH. Hoch HeSmeyvaD qar, 'ach HeSqu'chugh vay' ghaytan lajQo' latlh. Qatlhqu'be' mu'mey. qeqmeH mu'mey jatlhDI' 'eSSIm, Hagh Mahoun.

“qatlh tlhaQ?” jatlh 'eSSIm.

jatlh Mahoun, “bI'Ilbe'. DajatlhtaHvIS bIqu'.”

'Ilchugh vay qu'nIS, qar'a'? jatlh 'eSSIm, “jIqu'be'nIS'a'?”

wa'vatlh loSmaH jav: nIteb vang

jatlh Mahoun, "bItlhIjtaHvIS bIqu'be'nIS. bItuHnIS. bIpujnIS. tlhIjtaHvIS vay' maqbe'. HeSpu' 'e' lIjqang latlh 'e' tlhob. SeQchu'chugh tlhIjwI' tor. mInDu' tIbejqu'Qo'. bIjatlhpu'DI' bIng yIbejchoH."

yay' 'eSSIm. "chovaq'a'? jItorQo'!" Qaghpu'chugh toy'wI''a' tor. Qaghpu'chugh SuvwI' QamnIS 'ej HoS 'angnIS!

jatlh Mahoun, "bItornIS jIjatlhbe'. vIQIj neH. torwI' Da tlhIjwI'. muj 'e' chID."

jatlh 'eSSIm, "tIy-'a-DIy-'In-SanvaD jIruch. yISuq."

Qochbe' Mahoun 'ej jabbI'ID yevmoH. yevHa'moHDI', maHun retlhDaq QamtaH Tiadynsan. be' mInDu' bej 'eSSIm. yel Hol mu'mey jatlh ghIq bIng bejchoH. mughwI' chu'ta'DI' Mahoun jatlhqa', "qaghIjpu' 'e' vIHechbe'." bIng bejqa'. QIp mIw 'ach tay 'oHchugh tay pabqang. yay'law' chIjwI'. tay ta'Ha'pu' 'e' SIv 'eSSIm ghIq jatlh Tiadynsan, "bItlhIj 'e' vIlaj, 'eSSIm Duy."

jatlh 'eSSIm, "DulajmoH'a' pInlI'?"

yev Tiadynsan, ghIq mon, "ghobe'. nIteb vIlaj. DutlhIjmoHta''a'?"

jatlh 'eSSIm, "ghobe'. nIteb jItlhIj. mu'mey mughojmoHta' neH."

jatlh Tiadynsan, "jurI'qa'DI' qararHa'be'."

mejpu'DI' chIjwI' jatlh Mahoun, "majQa'. SoHvaD Huj tIgh nov 'e' vISov. Data'chu'."

jatlh 'eSSIm, "jIvumtaHvIS novpu'vaD jIQumnIS. jIQIpbe'. majatlhnIS. yIQol."

jatlh Mahoun, "'eSSIm, yImaw'Qo'. wa' Hogh ret choHoH 'e' DanID. jIyIn 'e' vImaS. qacholqa' 'e' tuchqu' HungpInwI' 'ej vIneHbe'. mubItmoH qech'e'."

jatlh 'eSSIm, "HungpInlI' yIqem. Hung nawlogh yIqem. HIghoS neH." jabbI'ID van 'eSSIm. Se' DaqtaH may'Duj 'e' yajbe''a' Mahoun?

qaSpu'DI' wa' rep jol Qoy 'eSSIm. lojmIt poSmoH. pawpu' wej yelwIyyItnganpu'. cha' loDpu' wa' be' je lutu'lu'. Dach Mahoun. Hung nawlogh ngeHta'.

"e'Sem?" jatlh be'.

DunHa' QIchDaj 'ach pongDaj ghovlaH 'eSSIm. jatlh "jIH. nuqneH?"

"Farsajii HungpIn jIH," jatlh be'. "nuHmeylIj Dateyqangya'?" ra'be' 'ach jeQchu'. HujtaH QIch.

jatlh 'eSSIm, "SaHoHlaHchu' nuH vIHutlhtaHvIS 'e' boSovbe''a'?"

wa'vatlh loSmaH Soch: Mossam Hung mIw

Supbe' HungpIn. jatlh, "nuHmeylIj Dateyqangya'?"

choHbe'pu' ghoghDaj. buQ 'eSSIm 'e' buSHa'chu'. 'eSSIm tIn law' HungpIn tIn puS 'ej SuvwI''a' ghaH 'e' Honqu' 'eSSIm. yoH. bejtaH neH latlhpu'. Mahoun luQanmeH nuHmey nge' luneH. HeQqangbe'chugh 'eSSIm, mejba' Mahoun. nepbe'pu' 'eSSIm. yelwIyyItnganpu' HoHmeH 'utbe' nuHmey. jatlh 'eSSIm, "lu'," 'ej qachDajDaq ghoS. raSDaq ghonDoq lan 'ej latlh nuHmey teq je. wa' taj pol 'e' qel 'ach yuDHa'meH tajvetlh roQ je. chegh 'ej HungpInvaD jatlh, "Hoch nuHmeywIj vIteqta'."

SIbI' jatlhbe' HungpIn, ghIq jatlh, "vIyol 'ey Dach 'awa'?" yajmeH buSnIS 'eSSIm 'ach mu'mey yajbejpu'. 'eSSImDaq nuHmey nej neH HungpIn.

'eSSIm maw HungpIn. jangDI', HungpIn no' tIchchu' 'ej ghaHvaD Qu' DuHHa' chup. DoHbe'chu' HungpIn. choHbe' tlhuHDaj. jatlhqa' 'eSSIm 'e' loS, ghIq mu'mey nIb jatlh "vIyol 'ey Dach 'awa'?" <vI'ol 'e' Dachaw''a'> moHqu'moH 'ach yaj 'eSSIm.

"jInep 'e' DaHar'a', petaQ?" jatlh 'eSSIm. ghaHvaD Hegh Qatlh Del 'ach HungpInvaD Dallaw' qech.

tIchpu' 'e' buSHa'chu'taH HungpIn. jatlh "vIyol 'ey Dach 'awa'?" boHchoHbe'. jeQtaH. Hub'eghrup 'ej luHubrup je loDpu'. HungpIn mach butlh Ho'choH 'eSSIm.

jatlh 'eSSIm, "jIHeQchugh Qol'a' maHun?"

jatlh HungpIn, "HIja'," 'ach yevqu'mo' toj 'e' pIH 'eSSIm. be'pu' rotlh parHa'chugh Mahoun, chaq Mahoun porgh Qorghqu' be'vam. pay' ghalchoH 'eSSIm. HeQQo'meH 'eSSIm chIch Doch HungpIn 'e' pIHchoH. "yInej," jatlh.

yev HungpIn. ghaytan vay' pIH je. 'eSSIm porghDaq nejchoH. tlhIbHa'. ralbe' 'ach nejchu'. 'eSSIm HotvIpbe'[130]. Dat nejbe' 'ach pa' nuH So'ta'chugh 'eSSIm, nom naw'laHbe'. pagh jatlh HungpIn, Sutmey DIr je nuDtaHvIS. pIj rurbogh mIwmey SIQpu'mo' 'eSSIm, 'utbe' mu'mey. DaS mupDI' HungpIn teq 'eSSIm. rInDI' HungpIn, DoH. loDvaD jatlh 'ej QumwI'vaD jatlh loD. SIbI' nargh jol 'ej Mahoun moj. MahounvaD jatlh HungpIn 'ej yavDaq SIq 'ej qay. ghaHvaD Daq wIvta' HungpIn. ghoHchoHlaw'DI' Mahoun ghuH ghoghDaj 'ej lob Mahoun.

wa'vatlh loSmaH chorgh: toDuj Segh pIm

"vIlobHa'chugh pagh chobuQchugh SIbI' vIQollu'," jatlh Mahoun.

jatlh 'eSSIm. "jabbI'IDmeymaj jIHtaHmo' tlhIngan may'Duj, DaHjaj QumwI' vIlo' vIneHbe'." novpu'vamvaD quv tobnISbe' tlhIngan, 'ach tob neHqu' 'eSSIm. jatlh "nepwI' SoH 'e' vIqapDI' jIQaghpu'. De'lIj vI'olpu'. DujDaq qama' SoHbej. chovoqtaHvIS qaHoH 'e' vInIDDI' jIquvHa''egh. tIghwIj Dama'nIStaH 'e' vIyaj. qa'meH vIttlheghwIj Dalajta' 'ach wej may ghu'."

"manoDbe' 'e' vIlay'," jatlh Mahoun. tlhoS Hagh 'eSSIm. noD yelwIyyItngan 'e' Hajbe'bej. 'ach DaqtaH HungpInvetlh 'e' tIvbe'.

"joS'a' Hung yaSpu'lI'?" jatlh 'eSSIm.

"ghobe'," jatlh Mahoun. "'bejtaH 'ach jatlhbe'." yelwIyyItnganpu' jatlh Mahoun ghIq jatlh, "qepvam lupegh 'e' vIra'."

Mahoun mInDu' bej 'eSSIm. jatlh, "bIvIttaHvIS qabuQqu' 'ach bItoD'eghmeH bInepQo'. toDuj Seghvetlh vIvuv 'e' Daqotlh." yel Hol tlhIjmeH mu'mey ghojpu'bogh jatlhchoH. bIng bej 'ej jatlhtaHvIS yavDaq torchoH. Mahoun bejqa'. 'eSSIm lughIj nov tIghmeyvam. puj'eghmoHDI' chay' vuvqa'laH vay'?

vIHbe' Mahoun. taD je qabDaj. ghIq mInDu'Dajvo' nIj bIQ, 'ej loQ monHa'. SaQchoHpu'.

<bItlhIj 'e' vIlaj> jatlhpu' chIjwI'. jaS vangtaHmo' Mahoun lajbe'law'. tayvam nIDqa'laH'a' vay'? tagha' jatlh 'eSSIm, "qatlh bI'IQ?"

"jI'IQbe'. bItorta' 'e' vIHarlaHbe'," jatlh Mahoun.

mIStaH 'eSSIm. Qamqa' 'ej loStaH. Qaghqa'pu''a'? munbe'pu' Hung. HungpIn leghtaH 'eSSIm. vangruptaH. QeHbe'taH. 'eSSIm bejtaH 'ej qaStaHvIS lup puS bejchuqtaH be'pu'. ghIq nom jatlh HungpIn. pavlaw' ghoghDaj.

jatlh Mahoun, "choDuQpu'mo' jISaQtaH. jIHvaD qay' pagh. tIghmeymaj Dapab 'e' DanIDmo' choquvmoH."

jatlh 'eSSIm, "vaj jItlhIj 'e' Dalaj'a'?"

"HIja'! yIHonQo'!" jatlh Mahoun. leS 'eSSIm 'ej loQ leS HungpIn 'e' legh.

"nuq jatlhpu' HungpIn?" jatlh 'eSSIm.

"jIHvaD jatlh, <bISaQ 'e' yIQIj. mISlaw'>." jatlh Mahoun.

HungpIn bejqa' 'eSSIm. butlh ghaj 'ej val. batlh tuj cherghlaw' je. tujmo' Doy'choHba' yelwIyyItnganpu'. Mahoun QIH neHchugh 'eSSIm, DaH Hung jeylaHbej.

wa'vatlh loSmaH Hut: maghbe'nIS parmaqqay

HungpInvaD jatlh Mahoun, "Mossam," <ghoghoS> 'oSmeH nItlhDu' lo'. jangDI' HungpIn Hagh Mahoun. QIjmeH jatlh, "Durur. jatlh <bISumqu'chugh nuHwIj Dabot, qaH>." HungpInvaD yel Hol jatlh Mahoun. loQ mon HungpIn. SaHchuqlaw' HoD HungpIn je.

"banglI' ghaH'a'?" jatlh 'eSSIm. Mossam HoHrup 'eSSIm ghop.

"ghobe'," jatlh Mahoun. "pImlaw' tIghmeymaj. parmaqqay ghajchugh yelwIyyItngan, latlh ngaghbe'. latlh ngaghchugh bang, qay'." loQ jej Mahoun ghogh.

jatlh 'eSSIm, "maHun, qechvetlh vIyajchu'. tlhIngan maghpu'chugh bang, pIj maghwI' HoH latlh. qamaghbe'pu'. bIjatlhta' . qayajHa'pu''a'?"

"loQ," jatlh Mahoun.

Ho'Du' 'ang 'eSSIm, "qamaghta' jIH 'e' Dapum'a'?" Dujmo' vaH chIm SIchmeH vIHchoH 'eSSIm ghop. lubejtaHmo' Hung yaSpu'. yIvbeHDaj lIS 'ej vaH Hotbe'.

jatlh Mahoun, "qapumbe'. jImIS neH. choSaHbej'a'?"

"HIja'," jatlh 'eSSIm. "cholajHa'ta'DI' chotungmoHmo' latlh vIngaghta'. qamaS. matay'qa' vIneH. DuH'a'?"

jatlh Mahoun, "napHa'qu' ghu'. DIvI' ghoqwI' jIHtaH 'e' DaHar'a'?"

ngoDmeyqoqDaj, vajar QIn je qawtaH 'eSSIm. teHpu' Sotlaw'. teHpu' tlhIngan bIghHa'. chaq teH lut naQ. jatlh, "not yuQjIjDIvI' Datoy'pu''a'?"

jatlh Mahoun, "jInenDI', DIvI' malja' vItoy'choHpu' 'ach not ghoqwI' jIH! vergh ravmey vISay'moHtaH."

"yIQIj," jatlh 'eSSIm. DIvI' qangwI' ghaHlaw'taH.

jatlh Mahoun, "ngugh wa'maH wej ben jIboghpu'. yuQwIjDaq Dujmey DIchenmoHmeH nuboQpu' DIvI'. SepwIjDaq SaqmeH yotlh luchenmoHmeH jIjlI' yelwIyyItngan malja', DIvI' malja' je. DIvI'vaD HattaHmo' toy'wI''a'pu', vergh Say'moHwI' luDIllI'. vergh ravmey vISay'moHtaH ghIq 'op Dujmey rav vISay'choHmoHmo' HoDpu' vIqIHpu' 'ej logh tongDujDaq jIvumchoH. loghDaq machIjmeH, tongDujmajDaq toy'taH Human HoD. ghaytan ghaHmo' nupIHpu' tlhInganpu' 'ej nujonta'. DIvI' QI' toy'be' HoD. chIjmeH mIwmey ghojmoHtaH neH. jIH mughojqangmoH je. boQqangqu'. chep yelwIyyItnganpu' neHlaw'. wIjonlu'pu'DI' not vIleghqa'pu'. Dujvetlh yaSpu' tlhabmoHbe'law'pu' tlhInganpu'." yev Mahoun 'ej 'eSSIm pumqu' mInDu'Daj.

wa'vatlh vaghmaH: jaS mej

SIbI' jatlhbe' 'eSSIm. Duj chIjbogh Human lujonpu'chugh tlhInganpu', tongDuj HoD chun ghaH 'e' luHarbe'. Heghba'pu' 'ej 'oy''a' SIQpu'. 'a Mahoun 'IQmoHbe'meH QIjbe'. jatlh "Do'Ha'."

jatlh Mahoun, "wejmaH ben yuQwIjDaq Dochmey nov ngevmeH malja' mach vIcherta'. verghDaq Dujmey vISay'moHpu'mo' Suy'pu' law' vISovpu' 'ej chaHvaD Dochmeychaj vIngev. jIDo'pu'. qarpu' poH 'ej juppu' qar vIqIHpu'. chepqu'taH malja'wIj. DaH DujwIj'e' vIghaj 'ej muboQbe'taH DIvI'. yelwIyyItnganpu' chaH Hoch beqpu'wI''e'--HochHom, SaH wa' 'anDorngan toy'wI''a'."

DIvI' rewbe' ghaH 'anDorngnan'e'. DIvI' toy'wI''a' ghajchugh vay' voqbe'bej DIvI'. jatlh, "ghoqwI' SoHbe' DaH 'e' vIHarchu'. 'ach maqIHDI' qaghIjba'pu'. qatlh manga'chuq DaneHpu'?"

jatlh Mahoun, "SoH qaSeymoHlaw'mo', jIH choSeymoH ... 'ej tlhIngan vIghatlh vIneHpu'. bortaSHey vISuq. ghIq qaSaHqu'choHpu'. qaSaHtaH 'ach tlhoy bIQob." Hung yaSpu' muchmeH ghopDaj joqmoH.

bortaS yaj 'eSSIm. meq QaQ 'oH. bortaS taQ Suqta' Mahoun 'ach taQtaH novpu'. jatlhtaH Mahoun 'ach pagh De' chu' chel. poj'eghtaHlaw' 'ej 'eSSIm poj je. yevpu'DI' 'ach pagh ghelpu'DI' tlhe''egh 'eSSIm 'ej yelwIyyItnganpu'vo' yItchoH.

HaghchoH Mahoun 'ej jatlh, "reH bImejDI' tlhIngan tIgh Dapabmo' bItlhaQ."

mIS 'eSSIm. mejtaHvIS Mahoun tIgh le' pablI' 'e' tu'be'. jatlh, "jaS bImej'a'?"

jatlh Mahoun, "<matay'laHbe'> jatlhDI' bang, ja'chuqnISchoH bangpu'."

jatlh 'eSSIm, "tIghmeywIjvaD ja'chuqbe' bangpu'. ngagh pagh Suv pagh mej. tay'taH pagh tay'be'. qaStaHvIS wa'maH vagh tup DebDaq maQamtaHvIS majatlhtaHmo' tIghraj'e' vIpabtaH."

HungpInDajvaD jatlh Mahoun. jang HungpIn ghIq QumwI' lo' latlh yaS. 'eSSIm chol Mahoun. 'eSSIm nach DopDaq ghop lan Mahoun 'ej jIbDaj yach. tlhup Mahoun. jatlh, "wa'leS qaleghqa', tujoy." tlhe''egh 'ej Qol Hoch yelwIyyItnganpu'.

wa'vatlh vaghmaH wa': nuch 'ollu'pu'

'eSSIm Suchqa'lI' Qel. 'utbe' Haq 'e' wuq 'ach 'eSSIm tlhonDaq nejwI' DuQta' 'ej latlh Hergh nob. 'oy' 'ach bepbe'ba' 'eSSIm. 'eSSIm ta lIStaHvIS Qel, vavDaj pong, tuqDaj je ghov. ghelDI' Qel, jatlh 'eSSIm, "yurwI' ghaH maghwI'vetlh'e'." pIj lutvetlh ngeb jatlhpu'mo', 'eSSIm jatDajvaD ngeD. ghIq jatlh Qel, "ngugh *lotlhwI'*Daq jItoy'. tarven[231] vISovpu'."

tarven. vavoy. pongvetlh ja' 'e' ngIlbe' 'eSSIm. jatlh, "HoH'eghta' maghwI' net ja'." maghwI' muSbogh rewbe''e' Dachu', 'ach vav jup ghaHpu' Qel'e' 'e' tul 'eSSIm. chaq Qu' le' ta'meH tarven boQpu' Qel.

jatlh Qel, "HIja'. mobtaHvIS, rav'eq yIbDaq tlhegh megh'an baghta' 'ej mongDajDaq 'er'In baghta'. voQ'egh. HuStaHvIS tlhegh vIpe'ta' jIH 'ej lom vInuDta'. HoH'eghbejta'. jajvetlh po HoH'eghmeH Hergh neHpu' je." SeH'egh 'e' nID 'eSSIm. ngoDmeyHeyvetlh 'ol neHqu' 'ach pay' Hoch 'olpu'mo' Qel, DaH tullaHbe'taH 'eSSIm. jatlhqa' Qel, "SorghwI' ghaHchoHDI' mumerqu'. maghwI' ghaHpa' batlh toy'law'. ngerwIj vIjatlh: qorDu'Daj buQ vay'. puqbe'Daj mach QanmeH Heghqangbej." letHa' Qel ghogh. yur ghaHbe' tarven'e' 'e' Sovlaw' Qel. 'ach 'eSSIm pumbe'.

mejmeH lojmIt poSmoHDI' Qel, SaH Mahoun. vay' chagh Mahoun 'ej DoHqu'. "yIHaw'Qo'! QelwI' ghaH!" jatlh 'eSSIm.

QumwI' 'uchtaH Mahoun ghop 'ach ratlhtaH. lojmItDaq bejchuq Mahoun Qel je. jatlhtaH Mahoun, "qaSuvbe'. Suy jIH. tlhIngan DuyvaD Sutmey vIngev. SaSujba'lI'. jIcheghlaH." DoHtaH Mahoun.

jatlh Qel, "vIt Duy. Qel jIH. Qugh 'oH pongwIj'e'. yelwIyyItngan SoH, qar'a'?" nov buQbe'meH Qel, quSDaq ba'choH.

jotchoHpu'DI' Mahoun Doch chaghpu'bogh woH 'ej 'el. lIH'egh 'ej mutDaj 'ol. DeSDu'Daj 'angmo' yIvbeHDaj DIr ghegh leghlaHba' Qugh. nuD Qel 'e' ghIbDI' Mahoun, nom 'eSSImvaD mon Mahoun. DeSDu' nuDta'DI' Qugh 'ej Hotlhta'DI' jatlh "SIDwI' SoHpu', maHun. tlhIngan bIghHa'Daq DeSDu'lIj vIQorghta'."

wa'vatlh vaghmaH cha': maghwI' puqbe'

jatlh Mahoun, "jIchun! Dujmaj lujon neH. pagh vISov! Duj ravmey vISay'moH neH!" munrup 'eSSIm 'ach lImbe'choH maHun. chIch tlhuH 'ej ba'choH. Hem 'eSSIm.

jatlh Qugh, "Do'Ha' bIghHa' rav DaSay'moHbe'ta'. lammo', DIrlIj ngejlu'. DaH bIpIvtaH'a'? nInuQ'a' DeSDu'? 'oy''a'? ngejlu'qa''a'? tlhIngan DIr ngeb 'oH. lajHa' porghlIj 'e' vIpIH. Qo'noS DapawDI' DuQorgh'a' latlh Qel?"

jatlh Mahoun, "ghobe'. Qo'noSDaq SaqDI' muHIjbogh Duj, SIbI' vItlhabmoHlu'. yaSpu'wI' DaQorgh'a' je? not vIleghqa'."

may'Duj Qaw'bogh Qugh'e' Del Qel[133]. QuS naQ yajbe'law' QI' 'ach cha' 'avwI'pu' chotta' qama' 'ej boQba'ta' vay'. maghwI'pu' nejtaHvIS beq, Hegh nuv puS. Sub moj wa' yu'wI' Qup. wa' maghwI' Sam 'ej DISmeH joy'lI'. jorbeHbogh peng jornebmey So'ta' SorghwI'. latlh QuSwI' pong luHta' joy'wI' 'ach QuSwI'vetlh joy'lu'pa' HoH'egh. ngoqmey 'angbe'meH vangta'. 'op jorbeHbe'moH beq 'ach Hoch Qobbe'moHlaHpa' Duj Qaw'. Heghpu' wa' SanID nuv. Duj Qaw'lu'pa' yaS puS neH toD yu'wI'vetlh Qup. jatlh Qugh, "po'qu' yu'wI' 'ej val. luwelmo' yaSpu' toDta'bogh, chep 'ej luQanqang nuv law'. wIH 'ej juppu'Daj Qanqang. DaH Sa' ghaH. mutoDta' 'ej vItoy'taH. tugh tlhIngan yejquv muv net pIH." lut Sovchu' 'eSSIm. 'ay'mey noppu' Qel 'ach mujbe'.

mIS Mahoun. jatlh, "mutoDta''a' yu'wI'?"

jatlh Qel, "Dujon may'Duj *lotlhwI'* 'ach jorpa' may'Duj, ngaq Duj *naQjej yoH*Daq DaQaylu'. *lotlhwI'*Daq Hegh Hoch qama'."

'IQlaw' Mahoun. jatlh, "bIQ vItlhutlhnIS."[134] Hu' 'ej pa' mej. chaq Heghpu'mo' Hoch yaSpu'Daj SaQnIS.

Qubqu'law' Qel. vay' Sov. ghaH retlhDaq ba'choH 'eSSIm 'ej peghmey vIttlhegh jatlh. jatlh Qel, "vavlI' ghaHpu', qar'a'?"

"HIja'," jatlh 'eSSIm. tlhup. tuH.[135]

jatlh Qel, "Heghpa', potlh munobta'."

'eSSIm nachDaq DIng qechmey. nuq nobta'? ghajtaH'a' Qugh? loSlI' 'eSSIm.

wa'vatlh vaghmaH wej: maghwI' QIn

jatlh Qugh. "maghwI' ghaH net Sovpa', tlhIngan yejquv DevwI'vaD[136] QIn pegh vIngeH 'e' qoy'. HevnIS Qa'bar DevwI'.[140] QumwI' beq voqlaHbe' 'e' qap. pagh voq. QIjQo'. jatlh . reH Dughlaw' loDvetlh. qar. 'urmangDaj vIpIHbe'chu'mo' vIvoq. QIn vIlaj. De' 'aplo' machqu' 'oH. 'aplo' mach law' qanwI'lIj nItlhpach mach rap. mep 'oH. ngugh SID De' qonmeH Hoqra'Daq De' 'aplo' Seghvetlh lo'lu'."[237]

qanwI'Daj nuDchoH 'eSSIm. De' 'aplo' Seghvetlh qaw. puq ghaHtaHvIS QIn labDI' vavoy rurbogh De' 'aplo'Daq pol SoSoy. maghwI' ghaH 'e' luSovchoHDI' Hoch Qaw'ta' 'eSSIm SoS.

jatlh Qel, "De' vISo'meH 'aplo'Daq SID per vIlan 'ej Qel Hoqra'wIjDaq vIjom. ngugh cha'Hu' cha' 'avwI'pu'vetlh chotta'mo' qama', maw'choHlaw'pu' Hung. SIDwI' veb vIghoStaHvIS muyu' 'ej luchwIj lunuD. tarven De' vIpoltaHmo' jIbItchoH. De' 'aplo' luleghDI'--"

chegh Mahoun, bIQ ngaSbogh HIvje' tIn qengtaHvIS. SaQbe'law'pu'. bejqu' 'eSSIm 'e' tu'DI' jatlh, "Dumaw'a' bIQwIj?"

jatlh 'eSSIm, "maja'chuqnIS Qugh jIH je. yImej."[138]

jatlh Qugh, "Qo'. yIratlh, Mahoun. Dubop." morghbe'DI' 'eSSIm ba'choH Mahoun. jatlhtaH Qugh, "vaj may'DujDaq jIHtaH, Hoqra'wIj vIqengtaHvIS, 'ej SID vIghoSlI' ..."

qagh 'eSSIm. jatlh "'ach Hoqra'Daq De' 'aplo' luleghDI' 'avwI'pu' ..."

jatlh Qel, "Hoqra' luleghpu'. lut yIqaghQo'. 'avwI'pa'Daq SIDwI' vISuchlI'. mInDaj rIQbogh wanI''e' Delqangbe'chu'. mIn moQ tapta' vay'.[139] 'oy'qu'ba' 'ej bong qaSbe' 'ach wanI' peghchu'. mIn vItoDlaHbe'. mIn vIHotlhDI' bong De' 'aplo' mujDaq vIqon. De' 'aplo' vItam ghIq qarwI' vIlo'.

"ghIq murI'ta' meH. ngaq DujDaq roplaw' qama'. *naQjej yoH*Daq qama'pu' lutu'lu'be' 'e' vIHar. qama' ta vInejDI' vISam. DujvetlhDaq wa' qama' weghlu'. nonchoH qama' DeSDu' jatlhpu' 'avwI'."

"jIHHey," jatlh Mahoun.

"SoHna'," jatlh Qugh. "Hoch qama' De' Hutlh ta. mut, mI' qoj qonbe'lu'. Qo'noSDaq yejquv DevwI' Qa'barvaD qama' ngeHlu'lI'."

wa'vatlh vaghmaH loS: nuqDaq DapIH?

jatlh Qugh, "jIQol 'e' lutuch jolpa' 'avwI'pu'. Qu'wIj Sovchu'meH muyu'. vay' lurI'. Hoch 'ol. munuDqu' 'avwI'pu' 'ej 'aHwIj lunuDqu' je. Hoqra' De'wIj nuDchoH 'ach mIn moQ taplu'pu' luleghDI' nobHa'. DochmeywIj Say'qu' HotchoHDI' jIjachchoH. jIjatlh <SIDpu'wI' boHoH boneH'a'? ngaSwI'vetlh bongaQHa'moHta'mo' DaH vIwoDnIS>. yuDHa'mo' QeHwIj jIbIt 'e' So'. mujol 'ej SIDwI' vISuch. bIghHa'Daq muloSmoH 'avwI', qama' vulmoHtaHvIS ghIq mo' vI'el."

Mahoun Dotlh Del Qugh. qIjchoHpu' DIr 'ej He'So'taH. 'uch'egh Mahoun, 'IjtaHvIS. ghaHvaD jatlh Qugh, "DeSDu'lIj vISay'nISmoHta'. Ha'DIbaH non vIteqta'DI' Hom vIleghlaH. lojmo' Ha'DIbaH DIr je Somraw'DulIj vIchoqmeH ngoSbogh mep vIlo'[146]. tay'taHmeH DIr ngeb, 'oHDaq mep qoSta' tu'lu' je. qaStaHvIS DIS ragh mep 'ej lojmoH porghlIj. DeSDu'lIj vISoQmoHta'DI' vIHotlhqu'. Dat SaH mep 'ach nonbe' Ha'DIbaH. SIbI' DIr lajHa'be'meH porghlIj, Hergh qanobta'. tlhIngan DururmoH. qaStaHvIS wej Hoghmey QaptaH Hergh 'e' vIpIH. QopDI' Hergh mutlIjDaq Hegh DIr."

poSqu' Mahoun mInDu'. "tlhIngan Hol mujatlhmoHta''a' Hergh?" jatlh.

jatlh Qel, "yIDoghQo'. Qel tlhach mu'mey vIjunmeH neH jIjatlh <DururmoH>. tlhIngan DIr lajmeH porghlIj vang neH. 'ach bIpIvtaHmo' 'utbe'law'pu'. DIr 'Iq vIlo'ta'mo' ghegh DeSDu'lIj. jIvumtaHvIS bIvemchoHlaw' 'ach DuQIHqa' 'avwI' vIneHbe'mo', vIpegh."

jatlh Mahoun, "vIqaw. choQaHlI' 'e' vISov. qatlho'."

jatlh Qugh "jIDachtaHvIS ropyaHwIj lulaghchu'ta' 'avwI'pu', nejtaHvIS. jIcheghDI' De' 'aplo' vIqengbogh nge'. Hoqra'vo' latlh De' 'aplo' lunge' je. muyu'choH. povam ropyaHDaq SaHpu' tarven 'e' vIchID 'ej jIvIt: QongmoHmeH Hergh neHpu'. vInobbe'pu'. Doy''eghmoHmeH mI'qu' 'e' vIchup. yonlaw'pu' 'avwI'pu'. 'ej mej."

jatlh 'eSSIm, "vaj De' lutlhapta'."

jatlh Qugh, "lupolbe'ta'. qaSpu'DI' cha' rep lunobHa'."

jot Qel ghogh 'ach 'eSSIm joQDu' HIvlaw'taH 'eSSIm tIq. jatlh 'eSSIm, "'oHDaq nuq qonlu'pu' jay'!"

jatlh Qel, "'avwI' mIn rIQ, maHun DeS, latlh SID Sar De' je. 'aplo'mey vItamta' 'e' yIlIjQo'."

jatlh 'eSSIm, "vaj nuqDaq 'oHtaH latlh'e'?"

"Daloybe'ta''a', 'eSSIm?" jatlh Qugh.

wa'vatlh vaghmaH vagh: peghlaHchu' Qel

pay' Daq pegh tlhoj 'eSSIm. Mahoun bejqu'. bIQDaj tlhutlhchu'ta'. jatlh, "Qel De' vInIHta'be'."

Mahoun mu'mey buSHa' 'eSSIm. vavDaj QIn legh neH 'ach leghbe' neH je. yejquv DevwI'vaD QIn ngeHchugh maghwI' nuq jatlh? DIS'a'? pum'a'? qoy''a'? ghaytanHa' QuSwI' ghaH je Qa'bar DevwI''e' 'ach DuH. tuq QaHlaHchugh De' vaj SovnIS 'eSSIm 'ej SovnIS wo'. qIchchugh vaj SovnISlu' je. QumwI' chu'laHpa' Mahoun jonlaH 'eSSIm, 'ach ghaytan HoD yInroH jIHtaH DujDaj 'ej lImDI' jol.

jatlh 'eSSIm, "DanIHta'be' 'e' vISov. Ha', jIHvaD DeSDu'lIj tIcha'." 'eSSIm qIvDu'Daq DeSDu'Daj lan Mahoun 'ej cha'neHDu'Daj 'uchchoH 'eSSIm. ralbe' ghopDu'Daj 'ach DaH QumwI' SIchlaHbe' Mahoun. leStaH Mahoun. 'uchtaH 'eSSIm 'e' Hajbe'.

jatlh Mahoun, "ghoqwI' jIHbe' 'e' Da'olmeH Daghelta' 'ach qunwIj Del Qel 'e' Datlhobmo' choDuQpu'. nuq 'oH De' 'aplo'vetlh'e' boqeltaHbogh?" 'eSSIm vav qun rar Mahoun qun 'e' Sovbe' Mahoun.

Mahoun yebDu' 'uchqu'choH 'eSSIm ghopDu' 'ach nargh Mahoun 'e' nIDbe'. jatlh 'eSSIm, "jIHvaD potlhqu' De'vetlh. 'ej SoHDaq So'lu'ta'."

"jIHDaq?" jatlh Mahoun. jIv mu'meyDaj 'ach jatlhtaHvIS qabDaj yotlI' jaqHa'moHbogh Sov.

jatlh Qugh, "maHun, qama' SoHtaHvIS DeSlIjDaq De' 'aplo' vISo'ta'. chaq ratlhtaH. vIteq vIneH." DeSDu'Daj tlhe'choH Mahoun ach narghmeH noghbe'. Mahoun DeSDu' 'uchtaHvIS 'eSSIm, 'eSSIm DeSDu' 'uchchoH Mahoun.

QelvaD jatlh Mahoun, "nuqDaq 'oH? pagh vItu'pu'."

Daq cha'meH DeSDajDaq SIq'egh Qel. jatlh, "poSwI'Daq. So'mo' SomrawlIj Datu'laHbe'. Hotlhlu'DI' mep rurmo' DIr ngeb, tu'be' Hoqra'. SaHtaHchugh, DaH vIteqrup."

jatlh Mahoun, "Qo'. HIpe'Qo'."

Qan 'eSSIm 'e' voqchu' Mahoun. ghaHvo' DeSDu' tlhapbe' Mahoun. Mahoun Qanqang 'eSSIm. QelvaD jatlh 'eSSIm, "chaw'choHchugh qarI'."

mejchoH Qel. lojmItDaq yev 'ej jatlh, "peyep. wa'logh yelwIyyItngan qama' yatlh vIQorghpu'."

jatlh 'eSSIm, "qatlh nuyepnISmoH ngoDvetlh?"

jatlh Qel. "tlhIngan 'avwI' ghaH vav'e'." pay' Mahoun 'uchbe'choH 'eSSIm 'ej ghaHvo' vIH'egh. Hagh Qugh. jatlh "vISaHbe' 'eSSIm. peghlaHchu' Qel." mej.

wa'vatlh vaghmaH jav: jatlh 'e' tuch

QubtaH 'eSSIm. puq ghaHtaHvIS <not chegh> jatlh Hoch, 'ej <vavoy> <tarven> joq jatlh 'eSSIm 'e' tuch SoSDaj. ngugh <Heghpu'> ja'pu'mo' pagh, nenchoHDI' Heghbejpu' 'e' Harchu'be'. Heghpu' maghwI'vetlh net Sov, 'ej Heghpu' 'e' Sov 'eSSIm nach, 'ach chaq yIntaH vavoy 'e' Har tIqDaj. DuHmey'e' 'oghpu'bogh lIjlaHbe'. DaH lomDaj Hotpu'bogh loD'e' qIHpu'mo', ngoD mojpu' HeghDaj. HeghDajmo' DaH jach neHqu'.

ba'taH Mahoun, 'uchchuqtaHvIS DeSDu'Daj. chIch tlhuHtaH. bejtaH 'eSSIm 'e' tu'DI' tlhe''egh 'ej jatlh, "tIghmeylIjvaD Dochqu' 'e' vISov 'ach tIghmeywIjvaD DaH bIjatlhnIS ...," yev 'ej monHa'. jatlh, "mu'mey qar Hutlh tlhIngan Hol 'ach ... <bIpIv'a'?> bIjatlhchugh, Qap."

yajchu'pa' QubnIS 'eSSIm ghIq jatlh, "bIpIv'a', chaloy?"

leSchu' Mahoun. QuchmoHlaw'pu' mu'mey. jatlh Mahoun, "choQanmo' qatlho'. mughIjbejpu' Qelvetlh. 'eSSIm, DughIjchugh vay' 'ej qaSaH 'e' vIcha' vIneH, nuq jIjatlhnIS?"

"mughIj pagh," jatlh 'eSSIm.

"mu' muj vIwIvta'," jatlh Mahoun, "<DubuQchugh> 'e' vIHech. DubuQ 'e' nIDchugh."

"mubuQchugh vay', pagh jatlhnIS jup. muHub neH. tlhoy bIjatlh. tlhoy jIjatlh matay'taHvIS. reH tlhIngan Hol wIjatlhmo' choma' 'e' vIchID 'ach reH majatlhtaHmo', SoH qama'. jatlhmeH mIwmey bIH Hoch tIgh'e' chocha'ta'bogh. majatlhtaH 'e' vIpuQ," jatlh 'eSSIm.

"QIch bopbe'bogh tIgh'e' qamuchlaH," jatlh Mahoun, 'eSSIm volchaH 'et yachchoHtaHvIS. volchaHDajvo' Mahoun ghop teq 'eSSIm. ngagh neHbe'.

"jImej vIneHbe'. matay' vIneH," jatlh Mahoun. jatlhtaH jay'. jangbe' 'eSSIm. jatlh 'e' mev Mahoun. QIpbe'. qaStaHvIS cha'maH tup jatlhbe'taH. pIj pur Mahoun 'ej jatlhrupchoH 'ach reH jatlhpa' qaw. Hu' 'ej 'eSSIm nuHbey' nuDchoH. nuHmey Hotbe'taH. Hu' 'eSSIm. nuHbey'vo' qutluch tlhap 'ej Mahoun tochDaq ret'aq lan. 'uchQo' Mahoun. taj tonSaw' laH Hutlhba' 'e' qaw 'eSSIm. qIHchuqDI' 'eSSIm HIvmeH taj lo'Ha'pu'. SuvtaHvIS motlh Mahoun voQ 'e' nID neH.

bey'Daq taj tatlhta'DI' jatlh 'eSSIm, "Ha'." qach mej. tlha' Mahoun.

wa'vatlh vaghmaH Soch: DeS Suv

yotlh lughoSta'. Qamqu' 'eSSIm 'ej loS. QamDI' Mahoun, loD qam Daq qarmoH 'eSSIm. loQ qIvDaj SIHmoH. yavDaq rarnISchu' SuvwI'. yajchoH Mahoun 'ej tonSaw' nap ghojchoHmoH 'eSSIm. laH chov. pumchoHmoHDI', jatlh Mahoun."yIloS." QumwI'Daj lel 'ej vay'vaD jatlh. QumwI' lelHa'DI', jatlh, "HungpInwI'vaD jIjatlhpu', maqeqmeH maQor."[147] HIvqa' 'eSSIm. pumlaH Mahoun. qIpDI' nuH qengbe'bogh nuv'e' loQ Hub'eghlaH 'ach jonlu'pu'DI' narghqu'laHbe'. narghmeH mIw nap cha' 'eSSIm 'ej qeqmeH Mahoun jonqa'.

Mahoun 'emDaq QamtaH 'eSSIm, 'uchtaHvIS wa' DeS. Mahoun poS DeS bejqu'. 'uchmeH mIwvam lo'chugh SuvwI', ghaytan ghol Hugh SIj, pagh mIn DuQ. DaSDajDaq taj jej ghajtaHbogh SIchlaHbej 'eSSIm latlh ghop. Mahoun Hugh SIj neHbe'. 'a DeSDaj pe'laH 'ej De' 'aplo' teqlaH, HoDchaj lujolpa' yaSpu'. noghtaH Mahoun. narghmeH, 'eSSIm yeb tlhe'moH 'e' nID 'ach qarchu'be'mo' DoS 'ej SenHa'taHmo', Qapbe'lI mIw. wej DaS ghoSta' 'eSSIm ghop. 'eSSIm poS DeS QortaHvIS Mahoun, 'eSSIm nIH DeSvaD vay'egh 'eSSIm yab.[148] QIn neHqu'. Mahoun QIH neHbe'. Qorgh neH. vaj Mahoun potlh law' vav QIn potlh puS 'e' Har'a'? ghobe', 'ach QIn SuqmeH 'eSSIm, Mahoun voqHa'qa'moHchugh, lI'be'chugh QIn, ratlh pagh. SaHbogh vay' 'ej vupbe'bogh neH 'eSSIm. maghwI' puqbe' ghaHtaHmo' vup qorDu'Daj. yIn qeltaHvIS 'eSSIm QeychoH SomrawDu'Daj. pupchoH Mahoun. tlhup. jatlh, "chovoQlI'! 'eSSIm!" chuSchoH Mahoun QumwI'.

Mahoun tlhabmoH. pagh jatlh. bej 'eSSIm, QumwI'vaD yel Hol jatlhtaHvIS. chay' ponlaH? tIghmeyDaj buSta'chugh, chaq ponmeH mu'mey qar Sov. QumwI' SoQmoHpu'DI' mon Mahoun 'ej jatlh, "choHIvbe'bej 'e' lu'ol yaSpu'wI'. <ghoSujtaHQo'> jIjatlhpu'. yIruchqa'." Suv'eghrupchoHmoH Mahoun. 'eSSIm voqmo' Mahoun, voq'eghlaHbe'taHvIS 'eSSIm, DuQ.

jatlh 'eSSIm, "chaloy, lugh chaH. tlhoy jIQob. tlhoS qaQID. vavwI' Hegh bopmo' De' DaSo'bogh jIqImlaHbe'."

wa'vatlh vaghmaH chorgh: HIvwI' ghaH HubwI' nIv'e'

jatlhbe'choHDI' 'eSSIm mu'meyvetlh ja'pu' 'e' pay. vav lut SovmeH, yu'choH Mahoun neHbe'qu'. 'ach yu'be' Mahoun. DaqDaq cha'ta'bogh Qel ghop lan 'ej jatlh, "De'vammo' cholajta''a' maqIHDI'?"

jatlh 'eSSIm, "ghobe'. DaHjaj nuja'pa' Qel, Surarchuq SoH vavwI' je 'e' vISovbe'chu' 'e' vIlay'." laj Mahoun.

tlhuch'eghmeH nIteb mI'choH 'eSSIm. bejtaH Mahoun 'ach vIHqu'mo' 'eSSIm, cholbe'. SaHbe'bogh gholDaj buSmo' 'eSSIm, Mahoun bejbe'. qeqtaHvIS vavoy rut qamDajDaq lIghta' 'eSSIm, 'uS 'uchtaHvIS. gho'. jop. QamchoH. tlhe''egh. gho'qa'. vav jeylaH pagh, ngugh 'e' Har. jeyta' vay' vaj DuHlaH Hoch. tlhe''egh 'eSSIm. Dach Mahoun pay' 'e' tlhoj. mejpu'. jol Qoybe'pu' 'eSSIm. qechmeyDaj loyta' 'ej pe'pa' 'eSSIm Haw'law'ta'. DIngtaH 'eSSIm, nejtaHvIS, ghIq Mahoun legh. 'eSSIm qach mejlI' 'ej cheghlI'.

cholpu'DI' jatlh 'eSSIm, "qatlh bImej?" bong qu' 'eSSIm ghogh.

loQ DoH Mahoun. jatlh, "puch." leSqu' 'eSSIm 'ach qechmeyDajmo' loQ DIvtaH.

HubmeH mIw ghojtaH neH Mahoun. HIvwI' ghaHmo' HubwI' nIv'e'. tlhIngan bep Daqmey cha' 'eSSIm. jatlh 'eSSIm 'aghtaHvIS, "Daqvam DaqIpmeH ro' yIlo'. naDev qaq toch let. naDevpe'vIl pach ghop yIlo'. DaqIpchu'chugh 'oy'mo' tlhoS vanglaHbe' ghol." paQDI'norgh vuvqu' Mahoun. voq 'eSSIm 'e' 'oS 'e' yaj. "DaH HIHIv," jatlh 'eSSIm. "Daqmeyvetlh tIqIpchu'. qabot 'ach vInoDbe'."

tlhIngan 'oy' DaqmeyDaq QeqlaHDI' Mahoun, mI'choH 'eSSIm 'ej mIwmeyDaj qeqtaHvIS qIptaH Mahoun 'e' ra'. roD jun 'eSSIm pagh bot 'ej pe'vIl qIpbe'mo' Mahoun 'oy'qu'be' 'ach 'oy'DI' 'oy' tIv. 'oy' qotlh. 'oy' pIHbe'bogh SIQmeH, mInDu' SoQmoH. qaStaHvIS Hogh wuQtaH 'eSSIm 'e' tIvbe' 'ach pay' DuQDI' 'oy' 'ej 'oy' SIQlaHchu'DI' rachmoH. bong wa'logh Mahoun qIpDI' jach Mahoun. SIbI' mev 'eSSIm 'ej mInDu' poSmoH. DoHpu' Mahoun 'ach SIbI' jatlh "jIrIQbe'. let nachwIj." HIvqa'DI' Mahoun, 'eSSIm QamHa'moH 'oy'. SuvwI' ghaHchugh Mahoun, ngugh pummoHlaHpu' 'ach ngaD'eghmoH 'e' loS Mahoun. yelwIyyItngan yIn poH Sovbe' 'eSSIm 'ach wej qan maHun 'e' noH. pujchu'be' 'ej Qorgh'eghta'. vangmeH mIw Sovchugh tlhIbHa'choHlaH.

wa'vatlh vaghmaH Hut: SuDrup

mI'qu'ta'mo' yonDI' 'eSSIm, Mahoun retlhDaq ba'choH. ghaH poS DeS nuDqa' Mahoun. pagh tu'laH 'ej qaStaHvIS wejmaH wej DISmey pagh tu'ta'. DeS Hot 'eSSIm 'ach De' 'aplo' tu'laHbe' je. Mahoun DeS lon 'ej qab nuDchoH. rol ghajbe'mo' puq woS ghaj 'ach yachtaHvIS lubejtaH loD mInDu'. loD nov SaHqu'choHpu'mo' QIp 'eSSIm, 'ach chaq ghaHvaD qaq nov. jatlh 'eSSIm, "ben 'ar bIboghpu', Mahoun?[160]" nenchoHDI' 'ej qanchoHDI' yelwIyyItngan, tlhIngan rur 'e' SIv.

jatlh Mahoun, "loSmaH Hut ben jIboghpu' 'ach pegh vIghaj. loSmaH jav DISmey neH vISIQpu'. wa'logh jIHvaD poH ngajmoH gho'Do. qaStaHvIS wej DISmey wa' jar neH vISIQpu'. jIqanbe'."

rurbogh lutmey Qoypu' 'eSSIm. jatlh "bIqID'a'?"

jatlh Mahoun, "ghobe'. jIvIt. motlh lutvetlh vIja'be' 'ach peghmey DamuSmo' qaDIS."[186] yotlhDaq QotchoH Mahoun. 'engmey bejlaw'taH. QotchoH je 'eSSIm. lugh Mahoun. Hoch peghmey Sov neH 'eSSIm. pay' jatlh Mahoun, "tujoy, yuQwIjDaq jIHqa'taH De' teq Qel 'e' vIDIl. qangeH."

'eSSIm bItmoH qech. teqlu'DI' SaHtaH neHlaw'. qatlh? De' nIHlaHbe'meH vay', pagh MahounvaD Qobbe'meH ghu'? De' Sov neHbe'mo'? Sovchu'be'. nuq qonta' vavDaj, QelvaD De' 'aplo'vetlh nobpa'?

jangbe'taHDI' 'eSSIm jatlhqa' Mahoun, "vIt Qel 'e' DaHar'a'?"

vIt 'e' Har 'eSSIm. Heghbejpu' tarven. SaHbe'chugh De', qatlh Haq 'e' Sap Qel? jatlh, "HIja'. vItlaw'."

Saghqu' Mahoun. jatlh, "yIntaH 'e' vISIv."

jatlh 'eSSIm, "chay'?"

jatlh Mahoun, "<vIQorghpu'> jatlh Qel. Qorghpu'chugh chaq yIntaH ghaH puq je." toH 'eSSIm vav bopbogh mu'mey Qoybe'pu' Mahoun. qama' yatlh qeltaH. chaq vIt, chaq bangpu'Hey nuQmeH ja'pu' neH. SuDrup 'eSSIm. bangDaj 'uchchoH 'ej yotlhDaq QottaHvIS nga'chuq. ghaytan jIHtaH Farsajii 'ach SaHbe' 'eSSIm. bejtaH neHchugh HungpInvetlh vaj ghalchoH 'e' tul 'eSSIm. SuvtaHvIS po'qu'be' Mahoun 'ach latlh laHmey 'agh.