nuq bop bom: 'ay''a' wa'

'ay' wa'

meHDaq yaHDajDaq ba'taH vajar HoD. ghaH tlhopDaq nIn tamey cha' HaStaHom, 'ach nIn natlhbogh ngIvmeH DujDaj qelbe'taH HoD. DujDaj HubtaHvIS Hegh 'e' tul Hoch tlhIngan net Sov. 'a loQ tlhoch'egh qechvetlh. HeghvaD neH Suvbe' tlhIngan. pIvchugh Hegh nejbe' ghaH. QapmeH Suv. yInvaD Qap chavchoHDI' SuvwI' 'ej Hoch jaj SuvnISbe'DI', may' bopchu'be'bogh yIn'e' qelchoH. wo'vaD qa'vaD quvvaD je Suvba', 'ach wo' qa' je je'meH 'ut je chavmey'e' juvbe'bogh jagh 'Iw. may' neH buSchugh SuvwI', qanchoHDI' ghaH Hegh nejchoHmo' yepHa'choH. HoD qan le'yo'mo' Hegh tlhIngan Qup 'ej tlhIngan wo' Duj Qawlu'. qaSbe'meH SeQpIr ghItlhmey, HIq qub, QoQ Qatlh, rurbogh latlh joq SaHnIS HoD. ngervetlh Har vajar. loD qan mojpa' Qu'Hom neH, 'a laD 'e' tIvbe'. HIq tlhutlh 'e' tIv 'ach lubelmoH Hoch HIq. qubchugh SaHbe'. HIq tlhutlhtaHvIS bom 'e' tIv. bommey qatchugh QoQ jan, chu'wI'pu' naD 'ach chuS'ugh Seghmey ngu'laHbe'. wa'logh vajar DuQchu' QoQ. jum wanI'. ngIvmeH DujvamDaq vumchoHpa' vajar, ngaq Duj Hung yaS ghaH. may'Duj Dor ngaq Duj. nov Duj jonta' chang'eng. may'DujDaq HochHom qama'pu' luweghlu' 'ach ngaq Duj bIghHa' machDaq wa' nov tu'lu'. potlhbe' ghaH. loQ lujoy'ta' 'ach rIQqu'be'. bIghHa'Daq ba' neH. 'IQlaw'. chaq mobmo' 'IQ. rut bom nov. jatlhtaHvIS ghaH puj ghoghDaj 'ej vaQbe', 'ach bomchoHDI' rach'eghchoHlaw'. nov Hol yajbe'chu' vajar 'ach ghaH DuQchu' wabmey watlh lIngbogh nov ghogh. 'avwI'vaD jatlh qama' net tuch. bomchoHDI' nov luqIp 'ej lutammoH latlh 'avwI' 'e' Sov vajar 'ach vajarvaD pIm bom QIch je, vaj bom nov 'e' chaw' vajar. rut bompa' pagh bompu'DI' nov loQ jatlh. jatlhchoHDI' nov reH qu'choH vajar 'ej jach. jatlh: jatlh 'e' mev. Dugh ghaH 'ach may 'ej naSbe'.

'ay' cha'

narghbe'meH qama' vangnIS 'avwI'. bIghHa' lojmIt vegh qama' 'e' botnISba' 'a rut veqlargh lojmIt je 'avnIS. Hegh qama' neHchugh yu'wI' nawlogh ra'wI', vaj luHoH 'e' ra'. ra'be'mo' vaj yIntaH qama' neH. HoH'eghmeH qama', jan 'oghchugh qama', jan nge'nIS 'avwI'. nuH 'oghbe' bombogh qama' 'a SabtaH DotlhDaj. chaq pujmo' nov, ravDaq Qong 'e' cherghlaHbe'. rIQ 'ej ngejlu'law'. ngejlu'mo' HeghlaH SuvwI''e' 'e' Sov vajar, 'ej moH Heghvetlh. vaj Qel rI'. pawDI' Qel, QotchoH qama' 'e' ra' vajar, ghIq qama' Surchem chu'Ha'. qama' vulchoHmoHmeH pu'HIch tIH puj lo' vajar. vulchoHpu'DI', 'el Qel 'ej qama' nuD. qama' DIr Say'moH Qel, ghIq DeSDaq HerghwI' lo' 'ej DIr ngeb lan. pIm nov DIr, tlhIngan DIr je 'ach ngejlu'be'meH nov, Qap tlhIngan DIr ngeb, jatlh Qel. tagha' Ser bagh. vumtaHvIS Qel qama'Daq pu'HIch QeqtaH vajar. Sev baghtaHvIS Qel poSchoH qama' mInDu'. qama' bachrupqa' vajar 'a ghu' yajchoHlaw' 'ej morghbe'. leS. qama' pa'vo' mej Qel 'ej Surchem chu'qa'ta'DI' vajar jatlh Qel. ropbej qama 'a QaHmo' ghaytan pIvchoH.

jajvetlh bombe' nov. ravDaq QottaH neH, DeS rIQ 'uchtaHvIS. qaStaHvIS rep neH bejchuq qama' vajar je. qaSpu'DI' repvetlh jatlhchoH qama'. jatlhchoHDI' qama' yItamchoH jatlh vajar. not nov bom Qoyqa' vajar.

'ay' wej

nuq bop bom 'e' SIvtaH vajar 'ach not Sov. novvetlhvaD pagh De' Sov. 'a chaq weHvetlh ta SamlaH. ghaytan Hol jatlhbogh nov lungu' joy'wI' ta. HaStaHomDaq nIn tamey qIl vajar 'ej Qu'vetlh ta nejchoH. may'Duj tamey SamlaHbe'. vajar merbe'. ghaytan luchoqlu'be', pay' rInchoHmo' Qu'vetlh. ngaq Duj tamey Sam. DujDaq SaHtaH wa' qama' net qon, 'a pagh nov ngu'bogh De' qonlu'. QI' pegh 'oHlaw'. merbe' je.

tamey Hotlhqa' vajar. ngaq Duj ta laDtaHvIS, pongDaj'e' tu'. HoDvaD vajarmo' beplaw'ta' latlh 'avwI'. tavetlh laDDI' vajar, mu' QeH jatlh. lubejchoH meH yaSpu'. “HoD?” jatlh yaS wa'DIch.

yepHa'choHDI' HoD Hegh, 'a roD ghaHmo' Heghbe' beqDaj Qup. roD yepHa'choHDI' HoD HoH beqDaj Qup. beqDaj Qorghqu' vajar 'a yInlu'taH 'e' bajnISlu'. yaS wa'DIchvaD “pe'vIl mu'qaDmey tIbach,” jatlh vajar. Hagh yaS wa'DIch 'ej leS Hoch. yaS wa'DIch voqchu' vajar, vaj HeghnISDI' vajar HoH yaS wa'DIch 'e' voq.

ta laDqa' vajar. ghaHmo' bepmo' latlh 'avwI'. Dughbe' ghaH ja'. bIghHa' Hung HotlhwI' ta nuDta' HoDvetlh. novvaD Qel rI' vajar 'e' tu' ghIq nov bejqu' vajar 'e' legh. Dughchu' vajar 'e' lu'ang tamey, 'ej buD latlh 'avwI' lu'ang je. yo' la''a'vaD vajar naDta' HoD. naDvetlhmo' DujvamDaq meH yaS mojpu'. 'ej laHDajmo' DaH HoD ghaH. mach Duj 'ach batlh wo' lutoy' 'ej qu' beq. vagh chaH: vajar HoD, 'ungya (yaS wa'DIch), Hota'ro' (DeghwI'), ghutar (Hung yaS), ghIrel (jonwI') je. DaH meHDaq chaHtaH vajar, 'ungya' Hota'ro' je. nuH pat nuDlI' ghIrel 'ej Qonglaw'taH ghutar. tugh QongchoH vajar. vemmoH vay' qaSchugh wanI' Daj.

HaStaHom chu'Ha' vajar 'ej QamchoH. pay' ghum SeHlaw. wIyDaq bejchoH 'ach pagh cha'. jIm Duj ghIq ronqu' 'ej vajar pummoH. pumtaHvIS Qan'eghmeH ghop SIch 'ach ghopDaq SaqDI' ghaH, wab ngaj Qoy 'ej bep SIQ DeSDaj. yeb SIghDI' ghurqu' 'oy' 'ej chuS Hom. ghuy'cha'. DeS Hom ghorlaw'pu'. Duj SeHmeH 'ej ghu' chovmeH vumlI'mo' beq, chaq HoD qabDaq 'oy' luleghbe'pu'. yaS wa'DIchvaD jatlh vajar, “Dotlh!”

'ay' loS

Sagh yaS wa'DIch 'ej ngoDmey neH jatlh. “jorpu' nuH HoS 'och. chevpu' nIH HanDogh. nIjtaH nIn. loj jonwI' yInroH. nIH nuH DIlo'laHbe'. chaq poS DIlo'laH. wej vISov.”

jatlhtaHvIS yaS, Hu'meH vajar poS ghop lo' 'ej quSDajDaq ba'choH. 'oy' 'angchugh qabDaj vaj Duj Dotlh qelba' 'e' luHar yaSpu'.

HanDogh HutlhtaHvIS DuHbe'ba' pIvghor. DeghwI'vaD jatlh vajar, “Hongghor?”

“'aqroS bID Do. ... lolSeHcha ghajchugh, HoD” jang DeghwI'. Qupqu' ghaH. motlh ghu'vam pavvaD Degh SeH HoD. 'ach Duj vuv DeghwI' Qup--'ej cha' ghop lo'laH.

“yIDaj.” jatlh vajar. “yItor neH. yIruQchu'.” chIch may' Hol jun 'ej moHaq lo'. pav ghu' 'a may' 'oHbe'. moDnISbe' 'ej yepnIS. SeHlaw Hot DeghwI' 'ej QIt ghIr Duj 'et. mev 'ej Salqa'.

“maj,” jatlh vajar. “yIDer.”

“lu' HoD.” loQ tlhe'choH Duj. poSDaq tlhe'taHvIS loQ Qom 'ach Qom DeghwI' ghop 'e' leghlaH vajar. motlh Duj SeHmo' De'wI' DaH Qatlh DeghwI' Qu'. nIHDaq tlhe'choH. HaStaDaq logh wewmoH nIjtaHbogh nIn.

“yIron” ra' vajar. ronchoH Duj. Hab, 'a ngaDtaHmeH vIHqu' DeghwI' ghopDu'. rontaH 'ej yoychoH Hovmey. DIngba' Duj'e' 'a Do' Qapchu'mo' tlham ngeb, yoylaw' Hovmey. rontaH Duj ghIq DerchoH 'ej torchoH. Habbe' 'a ron 'e' mev.

"'eDSeHcha vIlo'nISta'," jatlh DeghwI'.

lolSeHcha pat luyajmo' Hoch yaS, jatlhbe'. pIch ghajbe' DeghwI'. chaq Duy'mo' Qapbe' je Hongghor.

"vagh vatlhvI' Hong yIchu'," ra' HoD. quSDaj 'uchqu' ghaH poS ghop 'ej chorDajDaq 'oy'taH ghaH nIH ghop. Hongghor chu' DeghwI'. Qombej Duj 'ej ronqa'. ngaDtaHmoHmeH vumtaH DeghwI'.

pat Dotlh jIH HoD 'ej "mev!" jatlh. Hongghor chu'Ha' DeghwI'. DIngtaH Duj.

jatlh yaS wa'DIch, SeHlawDaj bejtaHvIS, "lujlaw'pu' Hongghor QuQ peQchem lIngwI' ngaDmoHwI'."

"Som pujmoHpu'mo' HanDogh Hongghor cherghlaHbe'." jatlh vajar. "yIntagh."

"Qaplaw'taH" SIbI' jang yaS wa'DIch, montaHvIS. Hagh 'e' ngIlpa' DeghwI', HoD bej. HaghchoHDI' HoD Hagh je DeghwI'. chIch HoD yajHa'ta' yaS wa'DIch, 'a chIch 'ebvetlh nobta' vajar HoD. Sov neH 'ach tlhob neHbe'pu'. HaStaDaq DIngtaH Hovmey.

'ay' vagh

QumwI'vo' "qaS nuq jay'?" jatlh ghogh. vempu' Hung yaS 'ej rI'. "'orqa''a' ghIrel?"[1]

"Heghlaw'pu' ghIrel," jatlh HoD. "chev'eghpu' HanDogh. jonwI' pa' DaSIchlaHchugh yIruch. DuHbe'chugh, meH yIghoS."

DeghwI'vaD, "maDIng 'e' yImev," jatlh HoD. "lolSeHcha 'eDseHcha joq neH Dalo'taHvIS manech 'e' yInID."

Hemba' DeghwI'. nIteb Qu'vam potlh ta' 'e' voqba' HoD. "lu' qaH!" jatlh. qaStaHvIS lup puS SIm DeghwI', ghIq SeHlaw Hot. DIng 'e' mev Hovmey. nIHDaq nIjbogh nIn juSchoH Duj.

"poSDaq yIghoS!" ra'qa' HoD.

"poSDaq machung," qagh yaS wa'DIch. "nujuStaH nIn. loQ machunglaH neH. wa' waQ wa'maH vagh vatlhvI' Hong Do wIchavta'."

"wa' waQ!?”

"maghoSmeH 'oghbe'lu' patvam. bong ngaDchu'be'mo' loQ wIlo'laH. QIt, pIpyuS wIrurtaHvIS maghoS."

HaStaDaq gho chenmoH nIjtaHbogh nIn. jatlh yaS wa'DIchvaD, "nIn Dotlh vI'ollI'."

jang HoD, "wejmaH cha' vatlhvI' natlhta' Qu'. DaH nIjpu' cha'maH Hut vatlhvI' 'ej qaSpu'DI' wej rep wejmaH loS vatlhvI' wIchIlpu'. ngugh chIm nIn ngaSwI'vetlh 'ej mev. yIntagh lolSeHcha je HoSlaw'moH ratlhbogh nIn qaStaHvIS Soch jar. yI'ol, 'ej yuQ DISIchlaHbogh DaSImta'DI' yIja'."

chaq 'evnagh Sotlaw' Hev tlhIngan yo'. chaq. Summo' Qab Hov[2], naDevvo' Qatlh. yInchugh jonwI' chaq vay' 'oghlaH. QuQ leHlaH latlhpu' 'ach loghDaq Duj lutI'laHbe'.

Duj ngaDmoHtaHmeH vumtaHvIS DeghwI', HanDogh pIgh 'angchoH HaSta. loghDaq HuStaH DI Sar neH. DI Hotlh HoD 'ej HaStaDaq wa' 'ay' tInmoH. jonwI' lom ngu'laH Hoch.

qaStaHvIS wej lup tam chaH, ghIq meH teb Hegh bey. tamqa'DI' jatlh HoD, "Som QIHlaH DIvetlh. wIbachlaHbe' 'uchmeH tIH?"

"jISImlI'," jatlh yaS wa'DIch, ghIq "DIjunpu'."

"maj." jatlh HoD. SeHlaw HotchoH 'ach bong ghop nIH lo'choH. 'oy'.

DeghwI'vaD jatlh yaS wa'DIch. "Hota'ro', pa'lIj yIghoS. yIQong. wa'maH Hut vatlh rep yIchegh. qaStaHvIS ram chaq meHDaq bImob. Degh DaruQnIS. bIDughnIS."

qaStaHvIS wa' lup loS DeghwI'. yaS wa'DIch tlhoch HoD 'e' loS. qaSbe'DI' "lu' qaH!" jatlh 'ej yaS wa'DIchvaD Degh Qay.

'ay' jav

HoD bej DeghwI', mejtaHvIS, 'ej pay' tlhoj vajar. “muHoH 'ungya 'e' Har Hota'ro'.” DuH'a'?

DeghwI' 'emDaq SoQpu'DI' lojmIt. lolSeHcha chu'Ha' yaS wa'DIch. HoD chol 'ej nuDchoH. HeghvIpbe' vajar, 'a Hegh neHbe'. nuH SIchlaHpa' jatlh 'ungya.

“DaH HIja': nuq Daghor?” ghel.

“bISov'a'?”

“ghorDI' Hom, yaHwIjvo' vIQoylaH. wabvetlh vIghovbe' 'e' DaQub?”

“DeSwIj.” jang HoD. “chaq yebwIj neH. 'oy'qu'be'.”

nep maqochDaj 'e' Sov yaS wa'DIch. not 'oy' chID tlhIngan. DujDaq Qel tu'be'lu' 'a Qel Hoqra', Hergh je tu'lu'. rIQDI' maqoch, QaH 'e' Sov SuvwI'. DeS Qorghta'DI' yaS wa'DIch, DeSDaq yeb yoD qatqu', ghIq HoD pu'HIch SIq. “pa' DaSIchlaHbe', qar'a'?” jatlh.

ghop pIv lo'taHvIS pu'HIch 'uchchoH 'e' nID HoD. “bIlugh.” vaH lIS yaS wa'DIch 'ej latlh nuHmey Dop mech je. rInDI' paw'chuq HoD yaS je ghIq yaHmeychaj buS. lolSeHcha lISqa' 'ungya.

Sotlaw' labmeH, ngoq wIvnIS HoD. Qatlh wuqmeH Qu'. tlhIngan mIchDaq chaHbe'taHmo' loghvam SeH pagh wo'. ngoq yajnIS QaHqangbogh Dol 'ach ngoq yajbe'nISbej HIvqangbogh Dol. ngoqmey Sovbogh ngIq yo' Sovqu'be' vajar 'ej HIvqangbogh yo' Sovqu'be' je. ngoq peghqu'chu' lo'chugh ghaytan yaj tlhIngan yejquv neH, 'a ghaytan jabbI'ID peghqu' Hal lunej jaghpu', 'ej tlhoS vIHlaHbe'mo' ngeD SammeH Qu'. va.

rI' Hung yaS. QumwI'vo' ghumqu' QuQ De'wI'mey, “jonwI' pa'Daq jIH. ghuSbe' Hoch nuH. SoQchu' nawmeH lojmItHommey.”

“nIH nuH tImobchu'moH, ghIq poS nuH neH tIrIHbeHmoH,” QumwI'vaD ra' HoD.

“ghaytan Qapbe',” jatlh yaS wa'DIch.

“vISov,” jatlh HoD. “pach Hutlhbogh pIpyuS maH. 'ach Hung yaS ghaH. nIDbe'chugh yonbe'.”

QumwI'vaD jatlh HoD, “nIH nuH yIrIHQo'.”

“ghoch vIchuprup,” jatlh yaS wa'DIch. “Hemey puS vISImta'.” Qam 'ej DeghwI' yaH ghoS. HoDvaD ghochmey cha', ja'chuq chaH 'ej qaqwI'Hey luwIv. SeymoHbe' 'ach jagh He jun, Sotlaw' HevlaHbogh SIbDoH chol 'ej vagh waQ yuQ tayDaq paw.

“yIruch.” jatlh HoD. “jIQongchoH. wa'leS ghu'maj wIpojta' 'ej Sotlaw' vIqon.” meH mej HoD, DeSDaj rIQ QorghtaHvIS.

'ay' Soch

Duj pImDaq, HoD quSDaq ba'taH HoD pIm. 'oy'be' DeSDaj'e' 'ach DeSDu'Daj So'meH tlhaymey lo'taH.

"HoD," jatlh QeDpIn ('ach nov Hol lo'), "DujHey tu'pu' chuq'a' noch. wej Segh ngu'ta' De'wI'."

"ghoch yISIm," jatlh HoD.

"vIHbe'law'," jatlh QeDpIn. "vIHchugh, chuqvamvo' wItu'laHbe'."

"'oHDaq He yIghoS," ra' HoD. "Dangu'DI' HISovmoH."

tlhoS vIHbe'chugh Duj, Qotlhlu'pu', lonlu'pu', pagh vay' Daj tu'ta'. ghaHvaD Huch bajlaH Hoch ghu'. Qotlhlu'pu'chugh ghaytan lutI'meH pagh beq toDmeH DIlqang. lonlu'pu'chugh jonlaH. 'ej vay' Daj tu'chugh vaj ghaytan ghaHvaD je Daj.

"HaStaDaq," jatlh HoD.

Hopqu'mo' Huvbe' 'a jumlaw'. cha' pIvghor HanDoghmey ghajbe'law'. pIvghor Hutlhchugh, chaq puq poH Duj 'oH. pIj Daj nov cham. pay' Duj ghovchoH HoD. "yImev." jatlh HoD. "tlhInganpu' chaH. yIHotlh."

jang QeDpIn. "nuH lurIHbe'lu'. Hongghor rIHbe'lu'. bachHa'law'mo' lolSeHcha neH ghoS. naQ Som 'ej QaptaH yIntagh. SaH loS yInroH."

"yIDoH," ra' HoD.

"Qotlhlu'pu'." jatlh chIjwI'. "tlhIngan chaH 'ach QaQ tlhIngan wo' DeQmey."

chIjwI'vaD "tlhIngan DaqIHpu''a'?" jatlh HoD?

"ghobe', qaH," jang.

"Ha'DIbaH rur tlhIngan," jatlh HoD. "Ha'DIbaH rIQ DaQaH 'e' DanIDchugh, ghaytan DuHoH. chaq DIlupmeH tlhInganpu'vetlh DIlqang, 'a chaq DIlup luneHqu' 'a tuHmo' nuHoH 'ej Duj lunIH. chaq DIlup luneHbe', 'a vay' lujoy'laH 'e' lunej neH." yev HoD. "yIDoH."

'ay' chorgh

tlhIngan meHDaq ghum SeHlaw. "wIHotlhlu'!" jatlh Hung yaS. meHDaq mob
ghaH DeghwI' je.

"DaSovbej'a'?" jatlh DeghwI'. "chuqDaq pagh Duj tu'lu'. So'wI' ghaj'a'?"

"HanDoghmajDaq HochHom noch DaH tu'lu'. Dachmo' bID, ghurHa' chuq."
jatlh Hung yaS. "'ej lI'be'mo' nuHmeymaj wIbachlaHbe' je."

puchpa'vo'[1] chegh yaS wa'DIch. "ghum nuq? nuHIv 'Iv?" jatlh, HoD
quSDaq ba'qa'taHvIS.

"nuHotlhta' vay'," jatlh Hung yaS.

"HaStaDaq," ra' yaS wa'DIch.

HaStaDaq logh neH leghlu'.

rI'Se' leQ DungDaq vIH yaS wa'DIch SIqwI'. yev, ghIq HoD pa' QumwI'
leQDaq vIH. Qong vajar 'e' Hon. HoD rI'.

SIbI' QumwI'vo' HoD ghogh Qoylu', "nuHIv 'Iv?"[2]

"nuHotlh vay' wIleghlaHbe'bogh."

"yIrI'. meHDaq vIghoSlI'."

rI'Se' leQ 'uy' yaS wa'DIch 'ej jatlh, "tlhIngan tlharghDuj "Dugh"
boHotlhta'. pengu'egh."

jangbe' latlh Duj.

meHDaq 'el HoD. ghaHvaD quSDaj nobHa' yaS wa'DIch 'ej ghu' QIj.

nov Duj rI' 'e' nID HoD. Qap.

HaStaDaq nargh nov. Hab QuchDaj 'ej nuHmey 'angbe'. SuD DIrDaj. QIt
nov Hol jatlhchoH 'ej mughchoH De'wI'  "Mahoun HoD jIH."

nov toj 'e' qel vajar 'ach wa' HanDogh toghlaH nov QIpqu'. ghu'chaj
luleghlaHba' Hoch. "vajar HoD jIH. tlhIngan tlharghDuj "Dugh"
DaHotlh. nuq DaneH?" cha' HanDogh ghajbogh Duj ra'bogh loD'e' Da.

QuchDaj Hab Hot nov. "malja' wIHuq wIneH," jatlh. nov Segh ghovlaw'
HoD, 'a rurchuq mut law', 'ej potlhbe'. yuDlaH Hoch mutmey.

"nuq chengev?" jatlh HoD.

"pong noy tlhaqmey, tach chuch, tu'lummey 'IH, Hergh SuD. nuq
bopoQ?[3]" jatlh nov HoD. "Hoch wo' potlh DeQ DIlaj." loS nov. valqu'
ghaH. cha' HanDogh ghajbogh Duj HoDvaD Sutlh 'e' Da. tlhIngan batlh
yajlaw' nov. loQ toj nov 'e' yaj vajar. 'ach jochbe' 'e' Har. DujlIj yIvoq.

"'IHqu''a' tu'lummeyvetlh?" tlhob, lummeH, QubtaHvIS.[4]

"'IHqu'," jatlh latlh nov. "QuchlIj rur."

latlh nov tammoH nov HoD. "tlhIngan HoD yIbochmoHQo'."

DeSDu' 'angmeH nov HoD, yebDu'vo' tlhaymey yuv. Huj DeS DIr. SuD bID
'ej Hurgh bID. DuD cha' DIr Segh. ghaH retlhDaq, HoD DeSDu' leghmo'
yay'law' latlh nov.

'ay' Hut

nov DeSDu' legh vajar ghIq chIch nov qab'e' neH bej. "maHun HoD" jatlh vajar. "bIbomlaH'a'?" bejchuq tlhIngan beq mIS 'e' leghlaH vajar. 'ej mIS je nov beq. jottaH nov HoD.

"HIja'. jIbom 'e' vItIv."

"maj" jatlh vajar. "bommey vIboS. SoHvo' bom vIje'. jIHvaD yIbom 'ej vIqon. ghIq jIHvaD tlhIngan Duy yIrI', QuvwIj yInob, vaj bom QoymeH muSuchlaH jupwI'."

HoDDaj maw' HIvruplaw' ghutar. ghaHDaq nISwI' QeqtaH 'ungya ja'chuqtaHvIS HoDpu'. jatlh nov HoD, "Qu' DaDelbogh wIta'qang." Domey, yuQmey Quvmey je qelchoH chaH. tlhongtaHvIS cha' HoDpu' bej beqmeychaj, yay'taHvIS.

tagha' jatlh nov HoD, "jIbomrupDI' qarI'qa'," 'ej rI'Se' luSoQmoH.

nov cha'be'choHDI' HaSta, QamchoH 'ej jachchoH Hung yaS. "baQa'! Dujvam vIHubmeH jIHeghqang 'ej nuq ta'lI' HoDqoqma' jay'? Dotlhmaj ..."

Hung yaS SIq HoD. "bIjatlh 'e' Damevbe'chugh Dubach 'ungya, 'ej jImorghbe'." ghutar Qeq 'e' mevbe'pu' 'ungya. nuj SoQmoH ghutar 'ej ba'qa'.

rI'qa' nov HoD. "HaStaDaq," jatlh HoD.

"bom DaparHa'bogh vIwIvpu'," jatlh nov HoD. "juHqo'wIj ghe'naQ bom 'oH. SoHvaD lut vIDel. ngemDaq Sub ghImlu'. ghaH HIvmo' ngem Ha'DIbaH qu' pujqu'choH. HeghtaHvIS, bomvam bom." ghIq bomchoH nov.

bomvetlh qaw vajar HoD. bomvetlh bom nov, bIghHa'Daq weghlu'taHvIS. ngugh vajar DuQqu' 'ej loD pIv ghogh QaQ law' qama' rIQ ghogh QaQ puS. DaH vajar meH teb bom. ba'mo' vajar Quch. QamtaHchugh, ghaytan tormoH bom HoS. bom mu' mughbe' De'wI'. wab Dun choHbe'. nov ghogh QoQ neH luQoylaH. morgh 'e' mev ghutar. HoDchaj ghoghmo' Hemlaw nov beq.

rIn bom. tamtaH 'IjwI'pu'.

QIjqa' nov HoD, "bomtaHvIS Sub chol ngem vIghro''a'. ghaH Sop 'e' pIH 'ach ghaHvaD Soj nob vIghro''a' 'ej porgh rIQ roS. pIvchoH 'ej juHDajDaq chegh. qaStaHvIS bertlham, SawtaHvIS Sub, vaSDaq pum vIghro''a'. Haw' Hoch 'a vIghro''a' tlhabmoH Sub."

"ghIq qaS nuq?" tlhob vajar.

"bertlham 'oH" jatlh nov. "rIn ghe'naQ."

'ay' wa'maH

vajar HoD pa'Daq ba'taH vajar 'ungya je. jatlh HoD, “SoHvaD vay' vIQIjnIS'a'?”

jang 'yaS wa'DIch “'utbe'. pagh Sovbe'bogh Daja'. ghu'maj Sov. Quvmaj Sov. ghu'maj 'arghmoHbe' Qu' Danobbogh. ghaytan tlhIngan tumvaD ghu'maj Del 'ej cha' Hogh pIq wItoDlu'. maquvtaH. 'a wa' Doch vIyajbe'.”

“nuq?”

“bommey'e' DaboStaH'a'?”

“jInep. DaHjaj vIboSchoH.”

Hagh 'ungya. “DaH vIyajchu'. QIp nov ghe'naQ. nov DeSDu' Dalegh'a'? pIvlaw' 'a Huj. nISwI'mo' meQlu' 'e' DaQub?”

“ghaytan ngemDaq HeghtaHvIS roS vIghro''a',” jang HoD.

Hagh cha' loD.

'a nuq bop bom 'e' SIv vajar.

Beginners' Summary - Volume 1

Here's an easy version of the story so far.

Duj ra' tlhIngan HoD.
ben nov 'av HoD.
bom nov.
QoQ tIv HoD

jor Duj HanDogh
Duj Qotlh chach.
chunglaHbe'.

tlhIngan Duj Hotlh nov Duj
tlhIngan Duj rI' nov HoD
nov ghov tlhIngan HoD
ben bomwI' ghaH.

bomqa' nov.
bom qon tlhIngan HoD.
tlhIngan Sotlaw' moj bom.
Sotlaw' qeng nov Duj.
loStaH tlhInganpu'.

Easy Study Questions
(answers are all in the story)

Qap'a' tlhIngan Duj?
nuq ta' nov HoD?
'Iv ghov tlhIngan HoD?
bom 'Iv?

Harder Questions
(you'll have to make up your own answers, but there are no wrong ones)

tugh qaS nuq?
qatlh jor HanDogh?

'ay''a' cha'